Nte Bible Etie nte N̄wed Eken?

“Abasi ọkọnọ odudu spirit ẹda ẹwet ofụri N̄wed Abasi, ndien enye ọfọn, ndida nnọ ukpep . . . , man owo Abasi etịm odot, eben̄e idem ọyọhọ ọyọhọ ndinam eti utom ekededi.”​—2 TIMOTHY 3:16, 17.

NDUSỤK owo ikereke ntre. Afo ada Bible didie? Ndi ada enye nte:

• Eti n̄wed emi onyụn̄ enemde ndikot?

• Kiet ke otu ndisana n̄wed oro mme owo ẹmade?

• N̄wed n̄ke emi onyụn̄ ekpepde owo nti n̄kpọ?

• Ikọ Abasi?

Mbụme en̄wen edi, Ndi se afo enịmde aban̄a Bible enen̄ede edi akpan n̄kpọ? Kop se Bible etịn̄de aban̄a idemesie mi: “Kpukpru n̄kpọ oro ẹkewetde ke ini edem, ẹkewet mmọ ndida nteme nnyịn, man ikpenyene idotenyịn oto ke nnyịn ndiyọ nnyụn̄ mbọ ndọn̄esịt oro N̄wed Abasi ọnọde.” (Rome 15:4) Imokụt mi ke ẹkewet Bible man ẹda ẹnọ nnyịn item, ẹdọn̄ nnyịn esịt, ẹnyụn̄ ẹnam nnyịn inyene idotenyịn.

Edi edieke Bible ekpedide sụk eti n̄wed emi onyụn̄ enemde ndikot, m̀mê kiet ke otu ndisana n̄wed, ndi afo ekpeberi edem ke ndausụn̄ oro enye ọnọde, akpan akpan edieke se enye etịn̄de okpụhọrede ye se afo ekerede ke enen? Edieke Bible okponyụn̄ edide n̄wed n̄ke, ndi mme un̄wọn̄ọ esie ẹkpedọn̄ fi esịt ẹnyụn̄ ẹnam fi enyene idotenyịn?

Ediwak miliọn owo emi ẹkpepde Bible ẹnen̄ede ẹnịm ke enye edi Ikọ Abasi. Ntak-a? Nso inam Bible enen̄ede okpụhọde ye kpukpru n̄wed eken? Nnyịn ikpama fi okot akpan n̄kpọ ition emi ẹbatde ke mme ibuotikọ oro ẹtienede, emi ẹwụtde ke Bible inyeneke mbiet.