Anie Esikop Akam?
Anie Esikop Akam?
EDIEKE edide odu Owo emi esikopde akam, anaedi enye okobot kpukpru n̄kpọ. Anie efen ke mîbọhọke Enye emi okobotde ukeme ukere n̄kpọ ekeme ndidiọn̄ọ se nnyịn ikerede? Anie n̄ko ekeme ndikop akam nnyụn̄ nnọ ubonowo se mmọ ẹyomde? Edi afo emekeme ndikere m̀mê owụt ifiọk ndinịm ke Andibot odu.
Ediwak owo ẹkere ke owo ekededi oro enịmde se ntaifiọk ẹkpepde mfịn ikemeke ndinịm ke Andibot odu. Edi emi idịghe akpanikọ. Ntak idọhọde ntre? Kere ban̄a emi ise.
◼ Ke ini ẹkenamde ndụn̄ọde ye ntaifiọk 1,646 ke n̄wọrọnda ufọkn̄wed ntaifiọk 21 ke United States, n̄kpọ nte ntaifiọk 550 kpọt ẹkedọhọ ke mmimọ inịmke ke Abasi odu.
Ke akpanikọ, ata ediwak ntaifiọk ẹnịm ke Abasi odu.
Uyarade Emi Ẹwụtde ke Abasi Odu
Ndi ana inịm ke Andikop akam odu ke ini n̄kpọ ndomokiet mîdụhe ndiwụt ke enye do? Baba. Ndusụk owo ẹkere ke mbuọtidem ọwọrọ ndinịm n̄kpọ oro uyarade ndomokiet mîdụhe ndiwụt ke n̄kpọ oro odu. Edi Bible ọdọhọ ke mbuọtidem edi “uyarade oro owụtde ke ata idem n̄kpọ odu okposụkedi enyịn mîkwe.” (Mme Hebrew 11:1) Ke uwụtn̄kpọ, idụhe eke akanam okụtde ofụm, edi ke ini enye enyen̄ede eto m̀mê n̄kpọ en̄wen, oro owụt ke ofụm do kpa ye oro nnyịn mîkwe. Kpasụk ntre, kpa ye oro nnyịn mîkwe Andikop akam, nnyịn imokụt ekese uyarade emi ẹwụtde ke enye odu.
M̀mọ̀n̄ ke ikeme ndikụt uyarade emi ẹwụtde ke Abasi odu? Se mme n̄kpọ emi enye obotde. Bible ọdọhọ ete: “Kpukpru ufọk ẹnyene andibọp, edi enye emi ọkọbọpde kpukpru n̄kpọ edi Abasi.” (Mme Hebrew 3:4) Ndi emenyịme se itie Bible emi etịn̄de? Edieke etiede ekere nte kpukpru n̄kpọ ke ekondo ẹdude ke nde ke nde, nte uwem ọkọtọn̄ọde, m̀mê nte mfre nnyịn emi awakde n̄kukọhọ akan ke ofụri ekondo etiede, afo eyenịm ke Abasi odu.
Edi ndise mme n̄kpọ-obot emi idikpepke nnyịn kpukpru n̄kpọ iban̄a Abasi. Ndise mme uyarade emi ẹwụtde ke Abasi odu onyụn̄ etie nte nditie ke esịtufọk n̄kop ke owo ke asan̄a edi. Ọmọdiọn̄ọ ke owo ke edi, edi udiọn̄ọke m̀mê anie owo. Ana eberede usụn̄ man ọdiọn̄ọ m̀mê anie ke edi. Oyom inam mbiet n̄kpọ emi man idiọn̄ọ Enye emi okobotde kpukpru n̄kpọ.
Bible etie nte usụn̄ emi ẹsan̄ade ẹfiọk Abasi. Ke ini ebererede usụn̄ emi onyụn̄ odụn̄ọrede ndusụk ntịn̄nnịm ikọ esie emi ẹma ẹkesu, afo oyokụt uyarade emi ẹwụtde ke Abasi odu. * Edi se ẹwetde ke Bible ẹban̄a nte Abasi ekesinamde n̄kpọ ye mme owo owụt orụk Owo emi enye edide.
Nso Orụk Owo ke Andikop Akam Edi?
Bible anam nnyịn idiọn̄ọ ke Owo kiet kpọt esikop akam, ndien ke afo emekeme ndidiọn̄ọ enye. Owo kpọt ekeme ndikop nnyụn̄ ntịm ndiọn̄ọ se owo etịn̄de. Enem ndifiọk se Bible etịn̄de aban̄a Abasi mi ete: “O Andikop akam, kpukpru obụkidem ẹyedi ẹbịne fi.” (Psalm 65:2) Abasi esikop akam mbon oro ẹbọn̄de akam ẹnọ enye ke mbuọtidem. Enye onyụn̄ enyene enyịn̄. Bible ọdọhọ ete: “Jehovah ada nsannsan ye mme idiọkowo, edi enye okop akam ndinen owo.”—Mme N̄ke 15:29.
N̄kpọ esitụk Jehovah. Enye edi “Abasi ima” ye “Abasi inemesịt.” (2 Corinth 13:11; 1 Timothy 1:11) Bible ọdọhọ ke “esịt [ama] ayat enye” ke ini idiọkido ọkọyọhọde isọn̄. (Genesis 6:5, 6) Ndusụk owo ẹdọhọ ke Abasi esimia owo ufen man odomo owo ese. Edi Bible owụt ke utọ ikọ oro idịghe akpanikọ. Job 34:10 ọdọhọ ete: “Nsa-o ata Abasi ndinam se idiọkde.” Edi afo emekeme ndikere ete, ‘Edieke Andibot edide ata ọkpọsọn̄ Abasi, ntak ndien emi enye ayakde mme owo ẹka iso ẹbọ ufen?’
Jehovah ọnọ nnyịn ifụre ndimek se iyomde ndinam, ndien emi owụt orụk owo emi Enye edide. Ndi nnyịn imaha ifụre oro Abasi ọnọde nnyịn mi? Edi ndusụk owo ẹda ifụre oro ẹnam se mmọ ẹmama, ndien emi esisịn mmọ ye mbon en̄wen ke mfịna. Idahaemi, enyene mbụme oro anade inen̄ede ikere iban̄a: Didie ke Abasi editre ufen oro isụk ibọde mi edi ibọhọ nnyịn ifụre oro enye ọkọnọde nnyịn? Iyọbọrọ mbụme emi ke ibuotikọ oro etienede.
[Ikọ Idakisọn̄]
^ ikp. 10 Ediye uduot ekpri n̄wed oro, N̄wed Ofụri Owo emi Mme Ntiense Jehovah ẹsiode, ayan̄wam fi okụt ke Abasi ọkọnọ odudu spirit ẹda ẹwet Bible.
[Ekebe ke page 5]
Ndi Ido Ukpono Anam Eyịk M̀mê Abasi Odu?
Edi n̄kpọ mmọn̄eyet ndidọhọ ke ido ukpono akam anam mme owo ẹyịk m̀mê Abasi mbọm emi esikopde akam odu. Nte mmọ ẹsịnde idem ke ekọn̄ ye edinam oyomonsia ẹnyụn̄ ẹsabarede nditọwọn̄ anam mbon oro ẹkesibọn̄de akam ẹdọhọ ke mmimọ inịmke ke Abasi odu.
Ntak emi ido ukpono ẹsinamde mme owo ẹnam idiọkn̄kpọ? Ke nditịn̄ ibio ibio, ndiọi owo ẹda enyịn̄ ido ukpono ẹnam ndiọi n̄kpọ. Bible ama etetịn̄ ke ndiọi owo ẹyeyọhọ Ido Ukpono Christ ẹsịne ẹbak ibak mmọ. Apostle Paul ọkọdọhọ mbiowo Christian ete: “Mme owo ẹyedaha ẹda ke otu mbufo ẹtịn̄ ukwan̄ ikọ man ẹdụri mme mbet ẹnọ idemmọ.”—Utom 20:29, 30.
Nsunsu ido ukpono ẹtetek Abasi esịt. Ke nditịm ntịn̄, Bible ọdọhọ ke mmọ ẹkama “iyịp . . . kpukpru mbon oro ẹkewotde ke isọn̄.” (Ediyarade 18:24) Abasi abat ke mme ido ukpono emi ẹkama iyịp owo sia mmọ mîkpepke mme owo iban̄a ata Abasi ima.—1 John 4:8.
Enye emi okopde akam enen̄ede ekere aban̄a mbon emi ẹdude ke mme utọ ido ukpono oro. Ibịghike, ima emi Abasi amade ubonowo ọmọn̄ anam enye ọdọn̄ Jesus edibiere ikpe ọnọ kpukpru mbubịk mbubịk ido ukpono emi. Jesus ọkọdọhọ ete: “Ediwak owo ẹyedọhọ mi ke usen oro ẹte, ‘Ọbọn̄, Ọbọn̄, nte nnyịn iketịn̄ke nte prọfet ke enyịn̄ fo?’ . . . Ndien adan̄aoro nyọdọhọ mmọ nte: Akananam ndiọn̄ọke mbufo! Ẹdian̄ade mi ke idem, mbufo mme abiatibet.”—Matthew 7:22, 23.
