Bible Okpụhọde Mme Owo

NSO ikanam mma kiet ke Philippines emi ekesin̄wọn̄de mmịn ebe ubọk etre emi onyụn̄ ama ebe ye nditọ esie? Nso ikanam an̄wana-en̄wan karet ke Australia akabade edi ọkwọrọikọ? Kot se mmọ ẹtịn̄de mi.

‘Mme ukpụhọde emi n̄kanamde ikedịghe n̄kpọ usen kiet.’​—CARMEN ALEGRE

N̄KAMANA KE 1949

NTO PHILIPPINES

N̄KEDI ỌN̄WỌN̄-N̄KPỌ OWO

NTE UWEM MI EKETIEDE: N̄kamana ke San Fernando, ke Camarines Sur. N̄kokpon ke Antipolo, ke Rizal. Antipolo odu ke obot obot ikpehe emi ediwak mbiet ye eto ẹdude ndien mme owo ikawakke do ke ini n̄kọwọrọde n̄kodụn̄ do. N̄kesiwakke ndikụt mme owo ẹwọrọde ẹsan̄a ke eyo ama okokụt. Edi idahaemi Antipolo edidi akwa obio emi mme owo ẹwakde etieti.

Ke mma n̄kọwọrọ n̄kodụn̄ ke Antipolo, mma n̄kụt akparawa kiet emi ekerede Benjamin, ndien ima idọ ndọ nte ini akakade. Mma ndikụt ke ndọ itiehe nte n̄kekerede. Mma ntọn̄ọ ndin̄wọn̄ n̄kpọ man mfre uwa. Mma nnyụn̄ nsọn̄ uwem etieti ye ebe mi ye nditọ mi. Ekesidi mmọ ẹte inanam ekpri n̄kpọ, ami nyat esịt. N̄kenyeneke ime ndomokiet, n̄konyụn̄ n̄kponoke ebe mi. Ndien ufọn idụhe nditetịn̄, ubon nnyịn ikesikopke inemesịt.

NTE BIBLE OKOKPỤHỌREDE UWEM MI: Editha adiahaeka ebe mi edi kiet ke otu Mme Ntiense Jehovah, ndien enye ama ọdọhọ ete yak ami ye Benjamin ebe mi idọhọ Mme Ntiense ẹdikpep Bible ye nnyịn. Ima inyịme inyụn̄ ikere ke emi ayanam ubon nnyịn enem.

Nte ikosụk ikpepde Bible, ima ikpep ediwak nti n̄kpọ. Se idude ke Ediyarade 21:4 ama enen̄ede otụk mi. Itie n̄wed oro etịn̄ ntem aban̄a mbon oro ẹdidude ke Paradise ke isọn̄ ke Obio Ubọn̄ Abasi: “[Abasi] ọyọkwọhọde kpukpru mmọn̄eyet ke enyịn mmọ efep, n̄kpa idinyụn̄ idụhe aba, mfụhọ m̀mê ntuan̄a m̀mê ubiak idinyụn̄ idụhe aba.” Mma nyom nditiene mbọ mme edidiọn̄ oro.

Mma ndikụt ke n̄kenyene ndikpụhọde uwem ye edu mi. Emi ikedịghe n̄kpọ usen kiet, edi nte ini akade, mma n̄keme nditre ndin̄wọn̄ mmịn mbe ubọk. Mma nnyụn̄ n̄kpep ndifọn ido nnyụn̄ nnyene ime ke ini nnamde n̄kpọ ye ebe ye nditọ mi. Ke adianade do, mma n̄kpep ndikpono ebe mi, nnyụn̄ mbere ye enye nte enye adade ubon nnyịn usụn̄.

 Ke ini ami ye ebe mi ikodụkde mbono esop Mme Ntiense Jehovah, se ikokụtde do ama enen̄ede otụk nnyịn. Ima idikụt ke Mme Ntiense Jehovah isibreke mbre mfọniso, isin̄wọn̄ke mmịn ibe ubọk, isinyụn̄ inamke asari. Mmọ ẹkpokpono kpukpru owo. Emi ama anam inịm ke imokụt ido ukpono akpanikọ.—John 13:34, 35.

UFỌN ORO MBỌDE: Ubon nnyịn enem etieti idahaemi. Ami ye ebe mi imokop inem ndọ nnyịn etieti. Ndien esinem nnyịn ndikpep mbon en̄wen Bible. Akpan ye udọ nnyịn ye iban mmọ ẹma ẹnyụn̄ ẹtọn̄ọ ndikpep Bible. Imekere ke nte ini akade mmọ ẹyetiene nnyịn ẹnam n̄kpọ Jehovah. Idụhe se ifọnde ke uwem emi nte ndinam n̄kpọ Jehovah.

“Eketie nte owo ikemeke ndikan mi.”​—MICHAEL BLUNSDEN

N̄KAMANA KE 1967

NTO AUSTRALIA

N̄KEDI ATA AN̄WANA-EN̄WAN KARET

NTE UWEM MI EKETIEDE: N̄kokpon ke Albury, ediye obio kiet ke New South Wales emi ẹforode etieti. Ubiatibet odu mi n̄ko kpa nte onyụn̄ odude ke ediwak ikpọ obio eken. Edi Albury osụk ọfọn se mme owo ẹdụn̄de.

Ima inyene se idade idu uwem. Kpa ye oro ete ye eka mi ẹma ẹkedian̄ade ndọ ke ini n̄kedide isua itiaba kpọt, mmọ ẹma ẹkụt ẹte ke ami ye nditọeka mi inanake n̄kpọ ndomokiet. N̄kaka mfọnn̄kan ufọkn̄wed ke New South Wales. Ete mi okoyom mi ndi anam-mbubehe idemmi ke mma n̄kụre n̄wed. N̄kama ndibre mbre mbuba nnyụn̄ nnen̄ede mfọn ke uwat enan̄ukwak ye en̄wan karet. Edi ke mma n̄kokụre n̄wed, n̄kanam utom udiọn̄ ubomisọn̄, ndien emi ama ọnọ mi ini ndisịn idem ke mbuba mi.

Mma mma ndisịn̄ede idem man n̄kop idem. Ndusụk ini, eketie nte owo ikemeke ndikan mi. Ntre mma nsida odudu mi mfiomo mme owo. Edi ete oro ekesikpepde mi karet ama ekpep mi ime ye mfara ke idem sia enye ama ọdiọn̄ọ ke mma nsida odudu mi mfiomo mme owo. Enye ama esiwak nditịn̄ mban̄a ufọn edikop item onyụn̄ ọdọhọ n̄ka iso ke en̄wan emi.

NTE BIBLE OKOKPỤHỌREDE UWEM MI: Ke ini n̄kọtọn̄ọde ndikpep Bible, mma ndifiọk nte ke Jehovah asasua afai. (Psalm 11:5) Akpa kan̄a, n̄kekere ke karet idịghe afai ke onyụn̄ edi mbre emi ẹkemede ndibre ke ufat. Mma n̄kere ke nti edu oro ẹkekpepde mbon oro ẹn̄wanade karet onyụn̄ edi se Bible ọdọhọde ẹnyene. Ebe ye n̄wan oro ẹkekpepde Bible ye ami ẹma ẹnyene ime tutu. Mmọ ikọdọhọke mi ntre en̄wan karet; edi ẹma ẹka iso ndikpep mi akpanikọ Bible.

Nte n̄kọdiọn̄ọde Bible nnyụn̄ nnen̄erede  nsan̄a n̄kpere Jehovah, mma ntọn̄ọ ndikpụhọde nte nsikerede n̄kpọ. Ama enem mi ndikpep mban̄a uwụtn̄kpọ oro Jesus Eyen Jehovah ekenịmde. Kpa ye oro enye ekenen̄erede enyene odudu, enye ikan̄wanake en̄wan. Ikọ esie emi ke Matthew 26:52 ama enen̄ede otụk mi: “Kpukpru owo eke ẹmende akan̄kan̄ ẹdikpa ke akan̄kan̄.”

Adan̄a nte n̄kekpepde mban̄a Jehovah, ntre ke n̄kenen̄ede mma nnyụn̄ n̄kpono enye. Ama enem mi tutu ndikere nte ke Andibot nnyịn emi enyenede ọniọn̄ ye odudu enen̄ede ekere aban̄a mi. Ama onyụn̄ enem mi ndifiọk nte ke idem edieke nnamde se mînemke Jehovah, mîdịghe edieke n̄kerede ke n̄kemeke ndinam eti n̄kpọ aba, ke Abasi idikpọn̄ke mi adan̄a nte nsụk nsịnde ukeme ndinam se inende. Un̄wọn̄ọ esie emi ama ọdọn̄ mi esịt: “Ami Jehovah Abasi fo mmụm fi ubọk nnasia, Enye emi ọdọhọde fi ete, ‘Kûfehe ndịk. Ami nyan̄wam fi.’” (Isaiah 41:13) Ke ini n̄kedide ndidiọn̄ọ ke Abasi ama mi ntre, ama ọdọn̄ mi nditiene mma mbon en̄wen.

Mma mfiọk ke idụhe se idisọn̄de mi ndinam nte nditre en̄wan karet. Mma nnyụn̄ ndiọn̄ọ ke emi eyenem Jehovah esịt, ndien ke se ededi emi ntrede ndinam ke ntak esie idiọkke. Ikọ Jesus ke Matthew 6:24 ekenen̄ede an̄wam mi ntre en̄wan karet. Itien̄wed oro ọdọhọ ete: “Baba owo kiet ikemeke ndidụk ufụn nnọ eteufọk iba.” Mma ndifiọk ke n̄kemeke ndinam n̄kpọ Jehovah nnyụn̄ n̄n̄wana karet sia karet idiyakke nnen̄ede n̄kpono Jehovah. Akana mbiere m̀mê ndinam n̄kpọ Jehovah m̀mê ndin̄wana en̄wan karet.

Ikememke inọ mi nditre en̄wan karet. Esịt kiet eketie nte n̄kpetetre, eken etie mi nte n̄kpetreke. Esịt ama enem mi nditre sia mma mfiọk ke se nnamde enem Jehovah esịt. Edi ama onyụn̄ etie mi nte ke mmanam owo emi ekekpepde mi karet akpakpa ufreke. Mbon oro ẹsin̄wanade karet ẹsida emi nte ata akpatre idiọkn̄kpọ. Ndusụk mmọ ẹsikam ẹnyịme ndiwot idem utu ke ndinam utọ n̄kpọ oro.

N̄kekemeke nditịn̄ nnọ owo emi ekekpepde mi karet ke mmọn̄ ntre karet. N̄kukụre se n̄kanamde ekedi nditre ndụk ye mmọ ofụri ofụri. Mma ndiọn̄ọ ke ami nditre en̄wan karet ọfọn, edi esịt ama afịna mi sia mmen̄kekemeke nditịn̄ nnọ mmọ se inamde ntre. Eketie nte mmokpu Jehovah idem mbemiso ntọn̄ọde ndinam n̄kpọ esie. Esịt ama amia mi ufen etieti. Ediwak ini mma nsidomo ndibọn̄ akam nnọ Jehovah edi mmọn̄eyet iyakke.

Anaedi enyene se Jehovah okokụtde ke idem mi ama, emi akanamde enye ada nditọete ke esop an̄wam mi. Inua ikemeke nditịn̄ nte mmọ ẹkemade mi, ẹdọn̄de mi esịt, ẹnyụn̄ ẹsan̄ade ẹkpere mi. N̄kpọ efen emi n̄kadade nsọn̄ idem esịt edi mbụk Bible emi aban̄ade David ye Bath-sheba. Okposụkedi emi David akanamde ikpọ idiọkn̄kpọ, Jehovah ama efen ọnọ enye ke enye ama ekenen̄ede akabade esịt. Nditie n̄kere mbụk emi ama anam mfre mban̄a se n̄kanamde ke edem.

UFỌN ORO MBỌDE: Mbemiso n̄kekpepde Bible, n̄kesikere mban̄a idem mi ikpọn̄. Edi Jehovah, ye ediye an̄wan mi emi ndọde isua itiaba idahaemi, ẹkpep mi ndinen̄ede n̄kere mban̄a mbon en̄wen. Nnyịn imekpep ediwak owo Bible, idem ye mbon nnanenyịn. Ndikụt nte ima Jehovah anamde mmọ ẹkpụhọde anam n̄kop inemesịt emi mmen̄kpokopke, idem ekpedi n̄kedi ọbọn̄ karet.

[Se ẹwetde ke ikpọ abisi ke page 14]

“Ama enem mi tutu ndikere nte ke Andibot nnyịn emi enyenede ọniọn̄ ye odudu enen̄ede ekere aban̄a mi”

 [Ekebe/​Ndise ke page 15]

“Ẹsọsọn̄ọ ke Ndisiwet Utọ Ibuotikọ Emi!”

Ndi mbụk owo iba oro osụk okotde ama do enem fi? Ẹwet mme mbụk ntem ke Enyọn̄-Ukpeme ẹbe 50 idahaemi tọn̄ọ ẹketọn̄ọ ndiwet ibuotikọ emi ke August 2008. Ibuotikọ emi, “Bible Okpụhọde Mme Owo,” ke ediwak mbon oro ẹsikotde Enyọn̄-Ukpeme ẹma ẹkan. Ntak emi mme owo ẹmade enye ntem?

Mbon oro ẹbụkde mbụk mmọ ke ibuotikọ emi kiet kiet ẹto nsio nsio obio ẹkenyụn̄ ẹnyene nsio nsio mfịna. Mbemiso ndusụk mmọ ẹkpepde ẹban̄a Jehovah Abasi, mmọ ẹma ẹnyene n̄kpọ edi uwem mmọ ikọwọrọke n̄kpọ. Mbon eken ẹma ẹnyene ikpọ mfịna nte edisọp iyatesịt, edida n̄kpọsọn̄ ibọk ke idiọk usụn̄, m̀mê edin̄wọn̄ mmịn mbe ubọk. Ndusụk mmọ ẹma ẹdiọn̄ọ Jehovah ke uyen, edi ekem mmọ ẹwọrọ ẹkpọn̄ esop Abasi. Mbụk mmọ owụt ke owo ekededi ekeme ndinam ukpụhọde man enem Abasi esịt. Ndinam mme utọ ukpụhọde oro esinyene ufọn n̄ko. Ibuotikọ emi esitie didie mme andikot n̄wed nnyịn ke idem?

Kiet ke otu mmọ etịn̄ nte mbụk oro okodude ke nsiondi eke February 1, 2009, akan̄wamde ndusụk iban emi ẹkekade n̄kpọkọbi.

◼ Enye ọdọhọ ete: “Ediwak mbon n̄kpọkọbi ẹnyụn̄ ẹbiet mbon oro ẹbụkde mbụk mmọ ke ibuotikọ emi. Mme ndise oro ẹwụtde nte mmọ ẹketiede mbemiso mmọ ẹkpụhọrede ye nte mmọ ẹtiede idahaemi, ọkọrọ ye mbụk mmọ ama enen̄ede otụk mbon n̄kpọkọbi emi. Ke ẹma ẹkekot mbụk emi, mbon n̄kpọkọbi iba ẹma ẹtọn̄ọ ndikpep Bible.”—C. W.

Mbụk oro ẹsiwetde ke ibuotikọ emi ẹnen̄ede ẹtụk ndusụk owo. Ke uwụtn̄kpọ, Enyọn̄-Ukpeme eke April 1, 2011, ama obụk mbụk Guadalupe Villarreal emi eketrede ndidan̄ ekemmọ erenowo man ekeme ndinam n̄kpọ Jehovah. Ediwak owo ẹwet leta ẹnọ nnyịn ẹban̄a mbụk emi; edi kop se owo iba ẹwetde mi.

◼ “Mbụk Guadalupe ama otụk mi esịm ọkpọ. Enen̄ede eye ndikụt nte ima emi owo amade Jehovah ye Ikọ esie ekemede ndinam owo okpụhọde ofụri ofụri!”—L. F.

◼ “Mma nsidomo ndikwọrọ ikọ nnọ kpukpru owo, esịnede irenowo oro ẹsidan̄de irenowo ye iban emi ẹsidan̄de iban. Edi idahaemi etie nte mmesisọn mmọ. Mma nnen̄ede mma ibuotikọ emi. Enye ama an̄wam mi nse utọ mme owo emi nte Jehovah esede—oro edi, nte mbon oro ẹkemede ndidi ndikpono imọ.”—M. K.

Mbụk en̄wen emi ekenen̄erede otụk ediwak owo ekedi eke Victoria Tong emi ẹkewetde ke Enyọn̄-Ukpeme eke August 1, 2011. Victoria ọkọdọhọ ke ẹkekama imọ ke idiọk usụn̄. Idem ke ama akanam n̄kpọ Abasi ke ediwak isua, enye ọdọhọ ke osụk ọsọsọn̄ imọ ndinịm ke Jehovah ama imọ. Enye etịn̄ se itọn̄ọde ndinam imọ inyịme ke Jehovah ama imọ. Kop se ndusụk owo ẹtịn̄de ẹban̄a mbụk esie mi.

◼ “Se ikọwọrọde Victoria onyụn̄ ọwọrọ mi. Mmokụt ukụt ke uwem emi. Osụk etie mi nte n̄wọrọke n̄kpọ ndomokiet—okposụkedi emi edide ebịghi n̄kana baptism nte kiet ke otu Mme Ntiense Jehovah. Edi se Victoria okobụkde anam mbiere ndinen̄ede nse idem mi nte Jehovah esede.”—M. M.

◼ “Ke ini n̄kedide eyenọwọn̄, mma n̄n̄wana etieti nditre ndise ndise idan̄. Edi mma mfiak nse ke ndondo emi. Mmọdọhọ mbiowo ẹn̄wam mi, ndien ke n̄n̄wana nditre enye ofụri ofụri. Mbiowo ẹdọhọ mi ke Abasi ayatua mi mbọm sia enye ama mi. Edi ndusụk ini, esisụk etie nte n̄wọrọke n̄kpọ, ye nte ke Jehovah ikemeke ndima utọ owo nte ami. Ndikot mbụk Victoria enen̄ede an̄wam mi. Mmedi ndikụt idahaemi ke ini ekededi oro n̄kerede ke Jehovah ikemeke ndifen nnọ mi, ke etie nte n̄kpọ eke ndọhọde ke n̄kpa Eyen esie ikemeke ndifụk idiọkn̄kpọ mi. Mmafat ibuotikọ emi nnịm man nsikot nnyụn̄ ntie n̄kere se n̄kotde ini ekededi oro etiede nte n̄wọrọke n̄kpọ. Ẹsọsọn̄ọ ke ndisiwet utọ ibuotikọ emi!”—L. K.