Kpep N̄kpọ To Ikọ Abasi

Nso ke Mme Angel ye Mme Demon Ẹkeme Ndinam Nnyịn?

Ibuotikọ emi ọbọrọ mme mbụme emi ẹkemede ndidi emesibụp onyụn̄ owụt n̄ko ebiet emi okpokụtde ibọrọ ke Bible fo. Mme Ntiense Jehovah ẹyema ndinam ibọrọ mbụme emi enen̄ede an̄wan̄a fi.

1. Mmanie ẹdi mme angel?

Mme angel ẹdi mme owo eke spirit emi ẹdụn̄de ke heaven. Mmọ ẹkpon ẹkan nnyịn. Ata Abasi ke idemesie emi edide spirit, ekebem iso obot mme angel emi ndien edibot isọn̄. (Job 38:4, 7; Matthew 18:10) Jehovah enyene ediwak miliọn angel oro ẹnamde akpanikọ ẹnọ enye.—Kot Psalm 103:20, 21; Daniel 7:9, 10.

2. Ndi mme angel ẹsin̄wam mme owo?

Mme angel ẹma ẹn̄wam Lot emi ekedide edinen owo. Enye okodu ke obio emi Abasi ama ekebiere ndisobo sia mbon obio oro ẹkediọkde etieti. Angel iba ẹma ẹka ẹkedọhọ Lot emen ubon esie efehe ọwọrọ ke obio oro. Ndusụk owo ẹkekere ke mmọ ẹkenam mbubru, inyụn̄ ifeheke iwọrọ ke obio oro. Edi Lot ye nditọ esie iban iba ẹma ẹbọhọ nsobo oro sia mmọ ẹkenamde se Abasi ọkọdọn̄de mme angel oro ẹkedọhọ mmọ.—Kot Genesis 19:1, 13-17, 26.

Bible ọdọhọ ke mme angel ke ẹn̄wam mme owo mfịn ke ndinọ mbon oro ẹsịnde idem ẹkwọrọ eti mbụk Obio Ubọn̄ Abasi ndausụn̄. (Matthew 24:14) Eti mbụk emi esịne ntọt n̄ko. Ntọt emi idịghe n̄kpọ mbubru kpa nte ntọt oro mme angel ẹkenọde Lot mîkedịghe n̄kpọ mbubru. Abasi ọdọn̄ mme angel ẹte ẹdinọ ntọt emi.—Kot Ediyarade 1:1; 14:6, 7.

Abasi ekeme ndida mme angel nsọn̄ọ nnyịn idem ke ini isobode idomo. Enye ama ada angel ọsọn̄ọ Jesus idem.—Kot Luke 22:41-43.

Abasi ọmọn̄ ada mme angel anam n̄kpọ en̄wen ke mîbịghike, oro edi, ndisobo mme idiọkowo emi ẹdide ntak ufen emi ibọde. Emi ayanam ubonowo ẹbọ emem.—Kot 2 Thessalonica 1:6-8.

  3. Nso ke mme demon ẹkeme ndinam nnyịn?

Ukem nte ediwak owo ke isọn̄ ẹnamde idiọkn̄kpọ ẹnyụn̄ ẹsọn̄de ibuot ye Abasi, ntre n̄ko ke ekedi ke heaven. Ediwak angel ẹma ẹsọn̄ ibuot ye Abasi. (2 Peter 2:4) Ẹkot mme angel oro ẹkesọn̄de ibuot do mme demon. Etubom mmọ edi Satan kpa Devil. Satan ye mme demon esie ke ẹda ubonowo ẹtụn usụn̄.—Kot Ediyarade 12:9.

Satan ada ndiọi mbubehe, ukara owo, ye nsunsu ido ukpono abian̄a mme owo man adian̄ade mmọ ọkpọn̄ Abasi. Ntem Satan edi ntak ukwan̄ikpe, afai, ye ufen oro ubonowo ẹbọde mi.—Kot 1 John 5:19.

4. Didie ke mme demon ẹsibian̄a mme owo?

Satan amabian̄a ediwak owo ke ndikpep mmọ nte ke owo ama akpa ke enye esikabade edi spirit emi ekemede ndinyene nneme ye mmọ. Edi Bible ọdọhọ ete ke mme akpan̄kpa ikemeke ndinam baba n̄kpọ kiet. (Ecclesiastes 9:5) Mme demon ẹsibian̄a mme owo ke nditịn̄ ikọ nte owo nnyịn oro akakpade. (Isaiah 8:19) Mme demon ẹsida mme obụp ekpo, mme etịn̄ ini iso, mbiaidiọn̄, ye mme asiak-ntantaọfiọn̄ ẹbian̄a mme owo n̄ko. Ikọ Abasi odụri nnyịn utọn̄ ete ifep kpukpru edinam emi. Ntre, akpana ifọp n̄kpọ ekededi emi inyenede, emi enyenede ebuana ye mme demon m̀mê ndedịbe odudu.—Kot Deuteronomy 18:10, 11; Utom 19:19.

Edieke imade Jehovah, nnyịn idifeheke mme demon. Edieke ikpepde Ikọ Abasi inyụn̄ inamde se enye etịn̄de, emi ayan̄wam nnyịn ibiọn̄ọ Devil inyụn̄ isan̄a ikpere Abasi. Jehovah enen̄ede okop odudu akan mme demon. Mme anam-akpanikọ angel esie ẹkeme ndisọn̄ọ nnyịn idem ke ini iyomde un̄wam.—Kot Psalm 34:7; James 4:7, 8.

Edieke oyomde ndifiọk n̄kpọ en̄wen, mbọk kot ibuot 10 ke n̄wed Nso ke Bible Enen̄ede Ekpep?, emi Mme Ntiense Jehovah emi ẹsiode.