Ntak Emi Andikop Akam Ayakde Ibọ Ufen?

OKPOSỤKEDI emi ndusụk owo ẹsibọn̄de akam, mmọ ẹsiyịk m̀mê Abasi odu. Ntak emi mmọ ẹsiyịkde? Ekeme ndidi sia mmọ ẹkụtde nte mme owo ẹbọde ufen ke ererimbot emi. Ndi akanam afo emekere ntak emi Abasi ayakde mme owo ẹbọ ufen?

Okûkam udi Abasi okonyụn̄ obot nnyịn ntem—nte mme anana-mfọnmma man ibọ ufen? Nnyịn ikpokponoke abasi emi okpoyomde mme owo ẹbọ ufen. Edi kere ban̄a emi ise: Edieke afo okosụk esede obufa ubomisọn̄ ekem afo edikụt ke ẹma ẹtọ mben ubomisọn̄ oro ẹbiat, ndi ekpekere ke andinam ubomisọn̄ oro akanam enye ntre? Ukpukereke! Ekpekere ke andinam ama anam enye ọfọn ama, ke anaedi owo m̀mê n̄kpọ ọtọ enye abiat.

Ntre n̄ko ke edi ye nnyịn. Nso ke ikpetịn̄ ke ini ikụtde nte kpukpru n̄kpọ-obot ẹdude ke nde ke nde, edi ndutịme ye ndiọi n̄kpọ eken ẹkpon ke isọn̄ emi. Bible ọdọhọ ke Adam ye Eve ẹma ẹfọn ẹma ke ini Abasi okobotde mmọ, edi ke mmọ ẹketịmede usụn̄ mmọ nte ini akade. (Deuteronomy 32:4, 5) Edi Abasi ọn̄wọn̄ọ ndidiọn̄ se mmọ ẹkebiatde nnyụn̄ nnam mbon oro ẹkopde item esie ẹfiak ẹfọn ẹma. Edi ntak emi enye ebịghide ntem-e?

Ntak Ebịghide Ntem-e?

Man idiọn̄ọ ntak, ana idiọn̄ọ m̀mê anie akpakara ubonowo. Jehovah ikoyomke mme owo ẹkara idem. Enye okoyom ndikara mmọ. Bible ọdọhọ ke “isịneke ke ubọk owo eke asan̄ade ndinen̄ede ikpatisan̄ esiemmọ.” (Jeremiah 10:23) Ọdiọk etieti nte akpa ete ye eka nnyịn ẹkebierede ndisọn̄ ibuot ye Abasi. Bible okot se mmọ ẹkenamde emi idiọkn̄kpọ. (1 John 3:4) Ntre, mmọ ikedịghe aba mfọnmma, edi ẹma ẹda ufen ẹsọk idemmọ ye nditọ mmọ.

Ke ediwak tọsịn isua, Jehovah amayak mme owo ẹkara idem, ndien mbụk owụt ke mme owo ikemeke ndikara idemmọ. Imenen̄ede ikụt ke kpukpru ukara owo ẹdi ntak  ufen emi ibọde mi. Baba kiet ikemeke ndisio ekọn̄, ubiatibet, ufịk, utụk, m̀mê udọn̄ọ mfep.

Didie ke Abasi Editre Ufen Emi?

Bible ọdọhọ ke Abasi ọmọn̄ ada edinen obufa ererimbot edi. (2 Peter 3:13) Mbon oro ẹmekde ke idemmọ ndima kiet eken nnyụn̄ mma Abasi ke Abasi ediyak ẹdụn̄ ke obufa ererimbot esie emi.—Deuteronomy 30:15, 16, 19, 20.

Bible ọdọhọ n̄ko ke Abasi eyetre ufen onyụn̄ osobo kpukpru mbon oro ẹnamde mme owo ẹbọ ufen ke “usen ubiereikpe” emi enen̄erede ekpere mi. (2 Peter 3:7) Ke oro ebede, Jesus Christ emi Abasi emekde nte Andikara ayakara mbon oro ẹkopde item. (Daniel 7:13, 14) Nso ke ukara Jesus edinam? Bible ọdọhọ ete: “Mbon nsụkidem ẹyeda isọn̄ ẹnyene, ediwak emem oyonyụn̄ adat mmọ esịt.”—Psalm 37:11.

Sia Jesus edide Edidem Obio Ubọn̄ Abasi, enye oyokụt ete ke imetre udọn̄ọ, usọn̄, n̄kpa, ye kpukpru afanikọn̄ eken oro isobode ke ntak emi owo ọkọsọn̄de ibuot ye Jehovah Abasi emi edide “ntọn̄ọ uwem.” (Psalm 36:9) Jesus ayanam udọn̄ọ okụre kpukpru mbon emi ẹsụkde idem ẹnọ edinem ukara esie. Ke ini ukara esie, mme un̄wọn̄ọ Bible emi ẹyesu:

◼ “Baba andidụn̄ kiet ididọhọke ite: ‘Ndọdọn̄ọ.’ Ẹyedahado ẹnọ mme andidụn̄ isọn̄ ke ndudue mmọ.”—Isaiah 33:24.

◼ “[Abasi] ọyọkwọhọde kpukpru mmọn̄eyet ke enyịn mmọ efep, n̄kpa idinyụn̄ idụhe aba, mfụhọ m̀mê ntuan̄a m̀mê ubiak idinyụn̄ idụhe aba. N̄kani n̄kpọ ẹma ẹbe ẹfep.”—Ediyarade 21:4.

 Ndi inemke fi ndifiọk nte ke Abasi ọmọn̄ etre kpukpru ufen oro isụk ibọde mi kpa nte enye ọkọn̄wọn̄ọde? Kan̄a ke emi, inaha ikere ke enye isibọrọke akam nnyịn sia enye ayakde ibọ ufen.

Ke akpanikọ, Abasi mmọdo. Enye esikop akam fo, onyụn̄ okop kpukpru eseme fo. Ọdọn̄ enye ndikụt fi odude uwem ke ini emi mûdunyeneke mfịna ndomokiet, mûdunyụn̄ ukopke aba ubiak.