San̄a Kpere Andikop Akam

EDIWAK mbon emi ẹnịmde ke Abasi odu ikemeke nditịn̄ akpan ntak emi anamde mmọ ẹnịm ke enye odu. Mmọ inyụn̄ ikemeke nditịn̄ se inamde ido ukpono ẹdiọk ntem m̀mê nditịn̄ ntak emi Abasi ayakde mme owo ẹbọ ufen. N̄kukụre se mmọ ẹkemede ndinam edi ndinyụn̄ mbọn̄ akam nnọ Abasi emi mmọ mîtịmke ifiọk.

Edi afo emekeme nditịm nsan̄a n̄kpere Abasi. Edieke ọdiọn̄ọde Abasi onyụn̄ amade enye, emi ayanam ọbuọt idem ke enye. Ana owo enyene uyarade ke se enye ọbuọtde idem. (Mme Hebrew 11:1) Edieke enen̄erede ọdiọn̄ọ Abasi, afo emekeme ndisineme nneme ye enye nte eneme ye ufan. Kere ban̄a se ndusụk mbon emi ẹkesibọn̄de akam kpa ye oro mmọ ẹkeyịkde m̀mê Abasi odu ẹtịn̄de.

◼ Patricia emi iketịn̄de iban̄a ke akpa ibuotikọ ọdọhọ ete: “Usen kiet, n̄kodu ye mme ufan mi n̄kpọ nte owo duop. Ekem mmọ ẹma ẹtọn̄ọ ndineme mban̄a ufọkabasi. Mma ndọhọ mmọ ke utọ nneme emi anam n̄wọrọ ke ufọk. Ete mi emi mînịmke ke Abasi odu ke eneme nneme emi ye kiet ke otu Mme Ntiense Jehovah ke ufọk nnyịn. Ufan mi kiet ama ọdọhọ mi ete, ‘Etie nte Mme Ntiense Jehovah ẹnen̄ede ẹdiọn̄ọ se mmọ ẹkpepde.’

“Ufan mi en̄wen ama ọdọhọ ete, ‘Yak iyom usen kiet ikese se mmọ ẹsinamde ke mbono esop mmọ.’ Se ikonyụn̄ inamde edi oro. Okposụkedi emi nnyịn mîkenịmke kpukpru se Mme Ntiense ẹtịn̄de, ndusụk nnyịn ima ika iso idụk mme mbono esop mmọ sia mmọ ẹketiede ufan ufan.

“Edi Sunday kiet, mma n̄kop n̄kpọ oro akanamde n̄kpụhọde ekikere. Etịn̄ikọ ama etịn̄ ntak emi mme owo ẹbọde ufen. Akananam ndiọn̄ọke ke ẹkebot owo nte mfọnmma ye nte ke idiọkn̄kpọ ye n̄kpa ẹketo owo kiet ẹbe ẹsịm kpukpru owo. Etịn̄ikọ ama etịn̄ n̄ko ntak emi akanade Jesus akpa man anam ubonowo ẹfiak ẹkedi mfọnmma kpa nte Adam ekedide. * (Rome 5:12, 18, 19) N̄kpọ emi ama an̄wan̄a mi inikiet inikiet. Mma ndifiọk ke Abasi odu emi ekerede aban̄a nnyịn. Ntre, mma n̄ka iso ndikpep Bible, ndien ikebịghike, mma ndibọn̄ akam ndien nnọ ata Abasi emi.”

◼ Allan oro ikonyụn̄ itịn̄de iban̄a ke akpa ibuotikọ ọdọhọ ete: “Usen kiet, Mme Ntiense Jehovah ẹma ẹdi ufọk nnyịn, ndien n̄wan mi  ada mmọ odụk ufọk sia ama enem enye ndikop ke mme owo ẹyedu uwem ke isọn̄ emi ke nsinsi. Esịt ama ayat mi. Ntre, mma nda enye ndụk itie utemudia n̄kọdọhọ enye nte, ‘Akpasasan̄a didie enịm utọ n̄kpọ oro? Udiọn̄ọke ke idụt oro ẹbabian̄a fi!’

“Enye ama ọbọrọ mi ete: ‘Ọfọn, wọrọ diwụt ise ke mmọ ẹbabian̄a.’

“N̄kekemeke ndiwụt ke mmọ ẹbabian̄a. Edi mmọ ẹma ẹnen̄ede ẹfọn ido ye ami ẹnyụn̄ ẹnọ mi n̄wed emi etịn̄de m̀mê ẹkebobot owo m̀mê owo okoto ke unam ediforo. N̄wed emi ama an̄wan̄a onyụn̄ esịne ifiọk tutu nyom ndifiọk ekese mban̄a Abasi. Ntre, mma ntọn̄ọ ndikpep Bible ye Mme Ntiense, ndien ikebịghike, mma ndifiọk ke se Bible ekpepde enen̄ede okpụhọde ye kpukpru se n̄kekerede mban̄a ufọkabasi. Nte n̄kosụk n̄kpepde n̄kpọ mban̄a Jehovah, mma ntọn̄ọ ndibọn̄ akam nnọ enye. Mma mben̄e enye nte an̄wam mi n̄kpụhọde ndiọi ido oro n̄kenyenede. Mmenen̄ede nnịm ke Jehovah ama eyere akam oro.”

◼ Andrew emi odụn̄de ke England ọdọhọ ete: “Okposụkedi emi n̄kenen̄erede mma ifiọk ntaifiọk, mmen̄kesinyụn̄ nnịmke n̄kpọ ntre ntre,  se ikanamde nnịm ke owo okoto ke unam ediforo ekedi sia mbon en̄wen ẹkedọhọde ke emi edi akpanikọ. N̄kenịmke ke Abasi odu ke ntak ediwak ndiọi n̄kpọ oro ẹtịbede ke ererimbot.

“Edi ndusụk ini mma nsikere nte: ‘Edieke edide Abasi odu, ntak ndien emi mme owo ẹbọde ufen ntem? Ntak emi ubiatibet ye ekọn̄ ẹdude ntem?’ Edi ke ini n̄kodụkde mfịna, mma nsibọn̄ akam nyom un̄wam, edi n̄kọfiọkke m̀mê mbọn̄ nnọ anie.

“Ekem owo ama ọnọ n̄wan mi tract Mme Ntiense Jehovah emi, Nte Ererimbot Emi Eyebọhọ? Se nsisụk mbụpde edi oro. Tract emi ama anam n̄kere ke ọkpọfọn nse se Bible etịn̄de aban̄a emi. Ekem, ke ini n̄kakade nduọkodudu, owo ama ọnọ mi n̄wed emi, The Bible—God’s Word or Man’s? * Ke ini n̄kọdiọn̄ọde ke ata ifiọk ntaifiọk ekem ye se Bible etịn̄de, ama ọdọn̄ mi ndikpep ekese mban̄a Bible. Ntem ke ini owo kiet ke otu Mme Ntiense Jehovah okoyomde ndikpep mi Bible, mma nnyịme. Ke mma n̄kedi ndifiọk uduak Jehovah, mma ndikụt ke Jehovah edi ata owo emi n̄kemede ndibọn̄ akam nnọ mban̄a n̄kpọ ekededi.”

◼ Jan emi ekedide owo Protestant ke London toto ke ekpri ọdọhọ ete: “Mbubịk emi ẹkesibịkde ke mme ufọkabasi ye nte ufen okponde ke ererimbot akanam mi ntre ndika ufọkabasi. Mma ntre ufọkn̄wed nnyụn̄ ntọn̄ọ ndibre kita man nnyene okụk. Adan̄aoro ke n̄kokụt Pat. Enye ekedi owo Catholic toto ke ekpri, edi ekem etre uka ufọkabasi kpa nte ami n̄ketrede.

“Ami ye Pat ye ediwak mbon eken oro mîkokụreke ufọkn̄wed, emi ẹkenyenede udọn̄ ke ufọkabasi mbon Asia, ikodụn̄ ke ufọk emi ẹma ẹkewọrọ ẹkpọn̄. Nnyịn ima isitie ineme iban̄a se idide uduak uwem tutu eyo ọsọn̄. Okposụkedi emi ami ye Pat mîkenịmke ke Abasi odu, ima ikere ke enyene ‘odudu emi ọnọde onyụn̄ enịmde nnyịn uwem.’

“Mma mman akpan nnyịn ke ini ikakade edem edere England ndiyom utom nte mme ebre ikwọ. Mma mbọn̄ akam nnọ Abasi emi mmen̄kenịmke ke enye odu okoneyo oro akpan nnyịn ọkọdọn̄ọde. Ke oro ebede, ami ye Pat ikesidụn̄ nte an̄wa ye eku, ntre mma mmen akpan nnyịn n̄wọrọ n̄kpọn̄ enye. Mma mfiak mbọn̄ akam nyom un̄wam, ndusụk edi odu owo emi esikopde akam. N̄kọfiọkke ke Pat ama etiene ọbọn̄ akam.

“Nte ini akakade, Mme Ntiense iba ẹma ẹdikọn̄ usụn̄ ufọk Pat ẹnyụn̄ ẹkot Bible ẹnọ enye. Pat ama okot mi onyụn̄ obụp m̀mê n̄kpama ndikpep Bible ye Mme Ntiense. Nnyịn ima idikụt ke ana isịn ndọ nnyịn ke n̄wed edieke iyomde ndinem Abasi esịt. Ama enen̄ede ọsọn̄ mi ndinyịme sia nnyịn mîkodụn̄ke nte ebe ye n̄wan.

“Nnyịn ikoyom ndifiọk ekese mban̄a nte mme ntịn̄nnịm ikọ Bible ẹsude, ntak emi nnyịn ibọde ufen, ye se Obio Ubọn̄ Abasi edide. Ekem ima idifiọk ke Abasi ama nnyịn, ndien nnyịn ikoyom ndinam se enye ọdọhọde. Ntre, ima isịn ndọ nnyịn ke n̄wed. Ọniọn̄ emi ẹdude ke Ikọ Abasi an̄wam nnyịn ibọk nditọ nnyịn mbita. Nnyịn imenịm ke Jehovah ama okop akam nnyịn.”

Dụn̄ọde Uyarade Emi ke Idemfo

Mbon oro isiakde ke ibuotikọ emi ye ediwak miliọn owo eken ikayakke nsunsu ido ukpono ẹbian̄a mmọ, edi ẹma ẹdi ẹdidiọn̄ọ ntak emi Abasi ayakde mme owo ẹbọ ufen. Ndi ama okụt ke nnennen ifiọk Bible akanam mmọ kiet kiet ẹkụt ke Jehovah esikop akam?

Ndi akpama ndidụn̄ọde uyarade oro ẹwụtde ke Abasi odu? Mme Ntiense Jehovah ẹyekop inemesịt ndin̄wam fi ọfiọk akpanikọ aban̄a Jehovah ye nte afo ekemede ndisan̄a n̄kpere enye, kpa “Andikop akam.”—Psalm 65:2.

[Mme Ikọ Idakisọn̄]

[Se ẹwetde ke ikpọ abisi ke page 10]

“Ke mma n̄kedi ndifiọk uduak Jehovah, mma ndikụt ke Jehovah edi ata owo emi n̄kemede ndibọn̄ akam nnọ mban̄a n̄kpọ ekededi”

[Ndise ke page 9]

Ata mbuọtidem asan̄a ye uyarade ye udọn̄ edidiọn̄ọ akpanikọ mban̄a Abasi