San̄a Kpere Abasi

Jehovah Asasua Ufịk

“OWO [akara] owo tutu ọnọ enye unan.” (Ecclesiastes 8:9) Ikọ emi ẹkewetde n̄kpọ nte isua 3,000 emi ẹkebede mi enen̄ede owụt nte ererimbot etiede idahaemi. Mme owo ẹsima ndida odudu mmọ mfiomo mbon en̄wen. Mmọ ẹsiwak ndifiomo mme ubuene ye mbon oro mînyeneke owo. Didie ke Jehovah ese utọ n̄kpọ oro? Ibọrọ odu ke n̄wed Ezekiel 22:6, 7, 31.—Kot.

Ke Ibet oro Jehovah ọkọnọde idụt Israel, enye ama ọdọhọ mbon oro ẹnyenede odudu ete ẹkûdedei ẹfiomo mme owo. Idụt oro edibọ edidiọn̄ Jehovah n̄kukụre edieke mme andikara ẹfọnde ido ẹnyụn̄ ẹtuade mbon n̄kpọnnam ye mme ubuene mbọm. (Deuteronomy 27:19; 28:15, 45) Edi ke eyo Ezekiel, mbọn̄ Jerusalem ye Judah ẹma ẹnen̄ede ẹfiomo mme owo ẹnyụn̄ ẹbak ibak. Didie?

Ezekiel 22:6 ọdọhọ ke mbọn̄ emi ẹma ẹda ‘ubọk mmọ ẹduọk iyịp.’ Ubọk mi ada aban̄a odudu m̀mê ukara. Ntak edi oro Bible en̄wen esịnde ufan̄ikọ emi ntem: “Mbọn̄ Israel . . . ẹda odudu mmọ ẹduọk iyịp.” Unenikpe akpasan̄a didie odu ke ini mbon emi ẹkpekụtde ẹte ke ẹnịm ibet ẹfiomode ẹnyụn̄ ẹkam ẹwotde-wot mbon oro mîduehe?

Ezekiel obiom mme andikara emi ikpe ye owo ekededi emi etienede mmọ abiat Ibet Jehovah. Ezekiel ọdọhọ ete: “Mmọ ẹmesịn ete ye eka ke ndek.” (Ufan̄ikọ 7) Mbon oro ẹkesịnde mme ete ye eka ke ndek ẹkebiat ndutịm emi Jehovah ọkọtọn̄ọde, kpa se isinamde obio adiana kiet, oro edi ubon.—Exodus 20:12.

Ndiọi owo emi ẹma ẹfịk mbon oro mîkenyeneke owo. Kpukpru emi ẹkewụt ke mmọ idaha Ibet oro Abasi ọkọnọde idụt Israel ke n̄kpọ. Ke uwụtn̄kpọ, Ibet Abasi ọkọdọhọ nditọ Israel ẹma isenowo nte idemmọ. (Exodus 22:21; 23:9; Leviticus 19:33, 34) Edi nditọ Israel ikanamke emi, utu ke oro, mmọ ẹkekam ẹtotụk isenowo emi.—Ufan̄ikọ 7.

Mmọ ẹma ẹnyụn̄ ẹfiomo mbon oro mînyeneke owo—oro edi, ‘nditọakpa ye mme ebeakpa.’ (Ufan̄ikọ 7) Esinen̄ede afịna Jehovah ndikụt nte ẹfiomode eyenakpa, ebeakpa, m̀mê owo emi n̄wan esie akpade. Abasi ọdọhọ ke imọ iditreke ndimia owo ekededi emi ofiomode mmọ ufen.—Exodus 22:22-24.

Nditọ Israel eyo Ezekiel ẹma ẹsọn̄ esịt ẹbiat ibet Abasi emi ye mmọ eken. Nso ke Jehovah akanam mmọ? Enye ọkọdọhọ ete: “Nyan̄wan̄a mmọ ifụtesịt mi ke idem.” (Ufan̄ikọ 31) Jehovah ama an̄wan̄a mmọ ifụtesịt ke idem kpa nte enye okonyụn̄ ọdọhọde ke ndikayak mbon Babylon ẹsobo Jerusalem ẹnyụn̄ ẹtan̄ mmọ ẹnyọn̄ọ Babylon ke isua 607 M.E.N.

Ikọ Ezekiel ekpep nnyịn n̄kpọ iba emi aban̄a Jehovah ye ufịk: Akpa, Jehovah asasua ufịk; ọyọhọ iba, mbọm mbon oro ẹfịkde esinam enye. Abasi ikpụhọkede. (Malachi 3:6) Enye ọn̄wọn̄ọ ke imọ imọn̄ itre kpukpru ufịk ke ererimbot emi inyụn̄ isobo mbon oro ẹfịkde ekemmọ owo. (Mme N̄ke 2:21, 22) Nnyịn imesịn udọn̄ inọ fi ite ekpep ekese aban̄a Abasi emi “amade unenikpe” mi, onyụn̄ ekpep nte ekpenen̄erede asan̄a ekpere enye.—Psalm 37:28.

Itie Bible emi okpokotde ke August:

◼ Ezekiel 21-38

[Se ẹwetde ke ikpọ abisi ke page 27]

Jehovah ama ọdọhọ mbon oro ẹnyenede odudu ete ẹkûdedei ẹfiomo mme owo