Mme Utịben̄kpọ Oro Ẹyomde Nditịbe

EDIEKE ọkpọdọn̄ọde ata idiọk udọn̄ọ emi oyomde ẹsasiak fi idem, ndi ekpenyịme abiausọbọ emi akanam mîsiakke owo idem asiak fi? Imọdiọn̄ọ ke ukpenyịmeke. Edi nso ke akpanam edieke ọdiọn̄ọde ke abiausọbọ emi enen̄ede ọdiọn̄ọ n̄kpọ aban̄a udọn̄ọ emi ye nte ke enye asasiak ata ediwak owo udọn̄ọ emi anade ẹsiak fi mi? Ndi emi ikpanamke enyịme enye asiak fi idem?

Ererimbot emi idude mi onyụn̄ etie nte owo emi ọdọn̄ọde ata idiọk udọn̄ọ emi oyomde usiakidem. Jehovah ọn̄wọn̄ọ ke Bible ete ke imọn̄ inam enye akabade Paradise. (2 Peter 3:13) Edi mbemiso oro etịbede, ana ẹsio idiọkn̄kpọ ẹfep ke isọn̄ emi ofụri ofụri. (Psalm 37:9-11; Mme N̄ke 2:21, 22) Ana ẹnyụn̄ ẹsion̄o kpukpru ndiọi n̄kpọ emi nnyịn ikụtde mi ke isọn̄ ẹfep mbemiso ẹnamde isọn̄ afiak edi Paradise. Emi edidi ata utịben̄kpọ!—Ediyarade 21:4, 5.

Mme Ntiense Jehovah ẹnịm ke emi ẹyetịbe. Ntak-a? Koro mme utịben̄kpọ oro Jehovah Abasi ama akananam ẹwụt ke enye enyene odudu ndisu mme un̄wọn̄ọ esie. Yak imen utịben̄kpọ itiokiet kpọt ke Bible idomo ye se Bible ọn̄wọn̄ọde aban̄a ini iso.

 Afo akpakam aka iso ekpep aban̄a se Abasi ọn̄wọn̄ọde ndinam nnọ nnyịn ke ini iso. Nte akade iso enyene mbuọtidem, ntre ke edinen̄ede enyene idotenyịn—oro edi, idotenyịn ndidu uwem ke ini emi editienede idia ufọn mme utịben̄kpọ emi Jehovah anamde.

 [Ekebe/​Mme ndise ke page 9, 10]

UTỊBEN̄KPỌ:

JESUS AMA ADA UYO YE IYAK IFAN̄ ỌBỌK EDIWAK TỌSỊN OWO.​—MATTHEW 14:13-21; MARK 8:1-9; JOHN 6:1-14.

UN̄WỌN̄Ọ BIBLE:

“Isọn̄ oyon̄wụm mbun̄wụm esie; Abasi, kpa Abasi nnyịn, ọyọdiọn̄ nnyịn.”​—PSALM 67:6.

SE EMI ỌWỌRỌDE:

BIỌN̄ IDIDỌN̄KE OWO NDOMOKIET ABA.

UTỊBEN̄KPỌ:

JESUS AMA ANAM MME NNAN ẸKỤT USỤN̄.​—MATTHEW 9:27-31; MARK 8:22-26.

UN̄WỌN̄Ọ BIBLE:

“Enyịn ẹyen̄wan̄a mme nnan.”​—ISAIAH 35:5.

SE EMI ỌWỌRỌDE:

ẸYENAM KPUKPRU MME NNAN ẸKỤT USỤN̄.

UTỊBEN̄KPỌ:

JESUS AMA ỌKỌK MBON EMI ẸBIOMODE NDO.​—MATTHEW 11:5, 6; JOHN 5:3-9.

UN̄WỌN̄Ọ BIBLE:

“Mbụn̄ọ ọyọfrọ nte ayara edop.”​—ISAIAH 35:6.

SE EMI ỌWỌRỌDE:

OWO NDOMOKIET IDIBIOMOKE NDO.

UTỊBEN̄KPỌ:

JESUS AMA ỌKỌK KPUKPRU UDỌN̄Ọ.​—MARK 1:32-34; LUKE 4:40.

UN̄WỌN̄Ọ BIBLE:

“Baba andidụn̄ kiet ididọhọke ite: ‘Ndọdọn̄ọ.’”—ISAIAH 33:24.

SE EMI ỌWỌRỌDE:

OWO NDOMOKIET IDIDỌN̄ỌKE ABA. NNYỊN IYENEN̄EDE IKOP NSỌN̄ỌIDEM.

UTỊBEN̄KPỌ:

JESUS AMA ANAM OFỤM ODOBO INYAN̄ ONYỤN̄ ANA SỤN̄.​—MATTHEW 8:23-27; LUKE 8:22-25.

UN̄WỌN̄Ọ BIBLE:

“Mmọ ẹyebọp ufọk ẹnyụn̄ ẹdụn̄ ke esịt; mmọ ẹyenyụn̄ ẹtọ in̄wan̄ vine ẹnyụn̄ ẹdia mbun̄wụm mmọ. Mmọ idikpaha utom ke ikpîkpu.”​—ISAIAH 65:21, 23.

“Afo oyodu oyom usụn̄ ọkpọn̄ ufịk—koro afo udufeheke baba n̄kpọ kiet—ye n̄kpọndịk ekededi, koro enye idisan̄ake ikpere fi.”​—ISAIAH 54:14.

SE EMI ỌWỌRỌDE:

MME OTO-OBOT AFANIKỌN̄ IDITỊBEKE ABA.

UTỊBEN̄KPỌ:

JESUS AMA ANAM MME AKPAN̄KPA ẸSET.​—MATTHEW 9:18-26; LUKE 7:11-17.

UN̄WỌN̄Ọ BIBLE:

“Kpukpru mme andidu ke udi editi [ẹyewọn̄ọ] ẹdi.”—JOHN 5:28, 29.

“Inyan̄ asana mme akpan̄kpa oro ẹdude ke esịt esie ayak, n̄kpa ye Udi ẹnyụn̄ ẹsana mme akpan̄kpa emi ẹdude mmọ ke esịt ẹyak.”​—EDIYARADE 20:13.

SE EMI ỌWỌRỌDE:

ẸYENAM MBON NNYỊN ORO ẸKPAN̄ADE ẸSET.