Mme Andikot N̄wed Nnyịn Ẹbụp Ẹte . . .

Ndi Abasi Ọdọhọ N̄kûn̄wọn̄ Sika?

▪ Owo oro enyenede esịt akpanikọ ekeme ndibụp mbụme emi sia mîdụhe ibet ndomokiet ke Bible emi etịn̄de n̄kpọ aban̄a sika m̀mê un̄wọn̄. Ndi emi ọwọrọ ke owo ikemeke ndidiọn̄ọ se Abasi ekerede aban̄a n̄kpọ emi? Iwọrọke ntre.

Bible ọdọhọ ete ke “Abasi ọkọnọ odudu spirit ẹda ẹwet ofụri N̄wed Abasi.” (2 Timothy 3:16) N̄wed Abasi esịne mme in̄wan̄-in̄wan̄ edumbet ye ikọ oro ẹwụtde nte Abasi oyomde nnyịn ise iban̄a idem nnyịn. Akpa kan̄a, yak ise se ndụn̄ọde emi mbiausọbọ ẹkenamde owụtde aban̄a se sika esinamde owo. Ekem iyeneme nte mme ndụn̄ọde oro ẹkemde ye mme edumbet Bible.

Sika esibiat owo n̄kpọ ke idem onyụn̄ owot ata ediwak owo. Ke United States, sika esiwot owo kiet ke otu kpukpru owo ition oro ẹkpan̄ade do. Itieutom United States Oro Esede Aban̄a Uda N̄kpọsọn̄ Ibọk ke Idiọk Usụn̄ ọdọhọ ke ibat owo emi sika owotde kpukpru isua ke United States awak akan ibat owo emi ẹkpan̄ade ke “mmịn, AIDS, n̄kpọsọn̄ ibọk, mbabuat n̄kpọntịbe ubomisọn̄, uwotidem, ye ke ubọk owo en̄wen.”

Mbon oro ẹn̄wọn̄de sika ẹsinọ mbon en̄wen udọn̄ọ. Nsụn̄ikan̄ sika ọnọnọ owo udọn̄ọ ọkpọkọm ata esisịt odụk owo ibio. Mbon oro mîsin̄wọn̄ke sika edi oro ẹn̄wekde nsụn̄ikan̄ sika ẹkeme ndisọp ndọn̄ọ kansa obufre ye udọn̄ọ esịt. Mbiausọbọ ẹkụt ke ndondo emi nte ke mbon oro ẹdude ke ufọk oro ẹken̄wọn̄de sika ẹkeme ndimen udọn̄ọ. Mmọ ẹdọhọ ke utebe ye ntọn̄ sika isisọpke iwọrọ ke ọfọn̄, abran̄kịn isọn̄, ye mme n̄kpọ ntre idem ke andin̄wọn̄ sika ama ọkọwọrọ ke anyan ini. N̄kpọ emi esinen̄ede afịna nditọwọn̄ inyụn̄ iyakke mmọ ẹdiọn̄ọ n̄kpọ ke ufọkn̄wed.

Owo isisọpke itre sika. Mbon oro ẹsin̄wọn̄de sika ẹsidi ifịn sika. Ke nditịm ntịn̄, mme anam ndụn̄ọde ẹdọhọ ke idiọk ibọk emi odude ke sika emi ẹnyụn̄ ẹkotde nicotine esinam sika emehe owo inyụn̄ iyakke owo ọsọp etre un̄wọn̄ sika.

Didie ke mme ndụn̄ọde emi ẹkem ye mme edumbet Bible? Kere ban̄a se itienede emi ise:

Abasi oyom nnyịn ida uwem ke akpan n̄kpọ. Abasi ama etịn̄ ke Ibet oro enye ọkọnọde idụt Israel nte ke ana mbon oro ẹnamde n̄kpọ imọ ẹda uwem ke akpan n̄kpọ. (Deuteronomy 5:17) Akana nditọ Israel ẹbọp ibio ibibene ẹkanade mben enyọn̄ ọkọm ufọk mmọ. Ntak-a? Sia mme enyọn̄ ọkọm mmọ ẹketie mbatmbat mbatmbat, ẹma ẹsinyụn̄ ẹdoro do ẹnam n̄kpọ. Ibio ibibene oro ikayakke mme owo ẹto ọkọm oro ẹdiduọ ẹda unan mîdịghe ẹkpakpa. (Deuteronomy 22:8) Efen n̄ko, nditọ Israel ẹkenyene ndikụt nte ke mme ufene mmimọ inamke mbon en̄wen n̄kpọ. (Exodus 21:28, 29) Owo emi ọn̄wọn̄de sika abiat edumbet Abasi emi. Enye ada ubọk esie anam idem esie. Ke adianade do, enye ọnọ mbon en̄wen udọn̄ọ.

Abasi oyom nnyịn ima imọ inyụn̄ ima mbọhọidụn̄ nnyịn. Jesus Christ ọkọdọhọ ete ke ana mme anditiene imọ ẹnịm n̄kponn̄kan ibet iba. Ana mmọ ẹma Abasi ke ofụri esịt, ukpọn̄, ekikere, ye ukeme mmọ, ẹnyụn̄ ẹma mbọhọidụn̄ mmọ nte idemmọ. (Mark 12:28-31) Sia uwem edide enọ Abasi, owo emi ọn̄wọn̄de sika owụt ke imọ idaha uwem emi Abasi ọnọde mi ke akpan n̄kpọ onyụn̄ owụt ke imọ imaha Abasi. (Utom 17:26-28) Utọ owo emi ekeme ndinọ mbọhọidụn̄ esie ata idiọk udọn̄ọ, ndien emi owụt ke enye imaha mbọhidụn̄ esie.

Abasi oyom nnyịn ifep ndek ndek ido. Bible eteme mme Christian ete ẹyet “kpukpru se isabarede obụkidem ye spirit” ẹfep ke idem mmọ. (2 Corinth 7:1) Edin̄wọn̄ sika esisabade owo. Isimemke inọ mbon oro ẹyomde nditre un̄wọn̄ sika ndinam emi man ẹnem Abasi esịt. Edi Abasi ekeme ndin̄wam mmọ ẹtre ndek ndek edu emi.