Abasi Enen̄ede Oyom Ifọn Ido

MFỌNIDO akanieren kiet ke Japan ama enen̄ede otụk akparawa kiet. Ete emi edi isụn̄utom, inyụn̄ itịmke ifiọk nditịn̄ ikọ Japan sia ibịghike enye ekedi obio emi. Edi enye esika ufọk akparawa emi kpukpru urua ekeneme Bible ye enye. Enye esifọn ido ye akparawa emi onyụn̄ ọbọrọ kpukpru mbụme esie.

Nte akanieren emi ọkọfọnde ido ama enen̄ede otụk akparawa emi. Akparawa emi ama ebiere ete: ‘Edieke Bible anamde owo ọfọn ido onyụn̄ ama ima ntem, ana n̄kpep Bible.’ Emi ama anam enye ọtọn̄ọ ndikpep Bible emi enye mîkọdiọn̄ọke n̄kpọ ndomokiet iban̄a. Ke akpanikọ, mfọnido esinen̄ede otụk owo akan ukwọrọikọ.

Mfọnido Edi Edu Abasi

Isisọn̄ke ndifọn ido ye mbon oro ẹbuanade n̄kpọ ye nnyịn. Mfọnido edi edu Abasi. Jesus ọkọdọhọ ke Ete imọ eke heaven ọfọn ido ye mbon emi ẹmade enye onyụn̄ ọfọn ye “mme anana-esịtekọm.” Ntre, Jesus ama ọdọhọ mme anditiene enye ete ẹkpebe Abasi. Enye ọkọdọhọ ete: “Mbufo ẹfọn ẹma, kpa nte Ete mbufo eke heaven ọfọnde ama.”—Luke 6:35; Matthew 5:48; Exodus 34:6.

Nnyịn mme owo imekeme ndifọn nte Abasi etemede sia Abasi okobot nnyịn ke mbiet esiemmọ. (Genesis 1:27) Nnyịn imekeme ndikpebe Abasi nnyụn̄ mfọn ido ye kpukpru owo, idịghe sụk ye mbon oro ẹbuanade n̄kpọ ye nnyịn. Bible ọdọhọ ke mfọnido esịne ke otu mbun̄wụm edisana spirit Abasi. (Galatia 5:22) Nte ikpepde iban̄a Abasi inyụn̄ inen̄erede isan̄a ikpere enye, ntre ke idikpep ndifọn ido ye kpukpru owo.

Ke adianade ye ndidada mfọnido mmana, Abasi enen̄ede oyom nnyịn ifọn ido. Ntak edi oro Enye ọdọhọde nnyịn ete “[ifọn] ido ye kiet eken.” (Ephesus 4:32) Enye ọdọhọ n̄ko ete: “Ẹkûfre ndikama isenowo,” m̀mê mbon oro nnyịn mîdiọn̄ọke; ndien owo emi mîsifọnke ido ikemeke ndinam emi.—Mme Hebrew 13:2.

Mme owo iwakke ndifọn ido ke ererimbot emi, owo okponyụn̄ ọfọfọn ido, owo ikọmke enye. Ntre, ndi imosụk ikeme ndifọn ido ye mme owo akpan akpan ye mbon oro nnyịn mîdiọn̄ọke? Nso ikeme ndin̄wam nnyịn inam emi? Ntak emi ikpanamde emi?

Abasi Enen̄ede Oyom Ifọn Ido

Ke apostle Paul ama ọkọdọhọ isifọn ido inyụn̄ ikama isenowo, enye ama ọdọhọ ke “ndusụk owo ẹma ẹkama mme angel esen idiọn̄ọke.” Ekpetie fi didie ke idem ndikama mme angel esen? Edi Paul ọkọdọhọ ke mbon oro ẹkekamade mme angel esen do ikọdiọn̄ọke ke angel ke ikama esen oro. Ikọ esie ọkọwọrọ ke edieke nnyịn isifọnde ido ye mbon oro nnyịn mîdiọn̄ọke, ke Abasi n̄ko ekeme ndidiọn̄ nnyịn ke usụn̄ emi nnyịn mîkodorike enyịn.

Mme itien̄wed oro ẹwetde ke ufọt page 1686 ke Edikabade Eke Obufa Ererimbot ẹwụt ke Paul eketịn̄ aban̄a se Abraham ye Lot ẹkenamde ke Genesis ibuot 18 ye 19. Mme angel oro Abraham ye Lot ẹkekamade  esen ẹma ẹtobo mmọ ata akpan etop. Eke Abraham ekedi ke Abasi ọyọnọ enye eyen erenowo nte enye ọkọn̄wọn̄ọde. Ndien eke Lot ekedi ndisian enye se enye akpanamde mbak ẹdisobo enye ye ubon esie sia Abasi okoyomde ndisobo Sodom ye Gomorrah.—Genesis 18:1-10; 19:1-3, 15-17.

Edieke okotde itie Bible emi ẹsiakde mi, oyokụt ke Abraham ye Lot ẹma ẹfọn ido ye isenowo emi mmọ mîkọdiọn̄ọke. Imọfiọk ke ekedi ido ke eyo Bible ndikama isenowo, edide owo oro edi ufan, iman, m̀mê owo oro owo mîkam idiọn̄ọke-diọn̄ọ. Ibet emi Abasi ọkọnọde nditọ Israel ọkọdọhọ ke mmọ “ẹnyene ndima esenowo” nnyụn̄ nse mban̄a mmọ. (Deuteronomy 10:17-19) Edi se Abraham ye Lot ẹkenamde mbemiso Abasi ọnọde Ibet emi ama akam akan se Ibet ọkọdọhọde ẹnam, ndien Abasi ama ọdiọn̄ mmọ.

Abasi ama ọnọ Abraham eyen, edi idịghe Abraham kpọt ke Abasi ọkọdiọn̄, nnyịn n̄ko imetiene ibọ edidiọn̄ ke ntak mfọnido Abraham. Didie? Abraham ye Isaac eyen esie ẹma ẹtiene ẹnam uduak Abasi osu. Jesus emi edide Messiah okoto ubon mmọ. Ima emi Abraham ye Isaac ẹkemade Abasi ẹkewụt nte Abasi edimade ubonowo inyụn̄ inọ Eyen esie edikpa ke ibuot nnyịn.—Genesis 22:1-18; Matthew 1:1, 2; John 3:16.

Mbụk emi ẹnen̄ede ẹwụt nte Abasi oyomde ikọt esie ẹdu uwem ye nte enye amade mfọnido. Edi mfọnido idịghe edu emi ẹdọhọde akpama afo enyene, mûmaha afo ọkpọn̄; Abasi enen̄ede oyom ifọn ido.

Ndifọn Ido Anam Itetịm Ifiọk Abasi

Bible ọdọhọ ke mme owo ke eyo nnyịn emi ‘ẹyenana esịtekọm, inyeneke nsọn̄ọnda ye ndammana ima.’ (2 Timothy 3:1-3) Ekeme ndidi emesisobo ye utọ mbon emi kpukpru usen. Edi utọ edu emi ikpanamke itre ndifọn ido ye mme owo. Bible ọdọhọ mme Christian ete: “Ẹkûda idiọk ẹsio owo usiene idiọk. Ẹnam se ifọnde ke enyịn kpukpru owo.”—Rome 12:17.

Abasi ọdọhọ isitat ubọk ifọn ido ye mme owo. Bible ọdọhọ ke ‘owo ekededi eke amade ima ọfiọk Abasi,’ ndien usụn̄ kiet emi iwụtde ke imama mme owo edi ndifọn ido ye mmọ. (1 John 4:7; 1 Corinth 13:4) Edieke ituade mme owo mbọm inyụn̄ ifọn ido ye mmọ, oro owụt ke imenen̄ede ifiọk Abasi, ndien emi ayanam itetịm ikop inemesịt. Jesus ọkọdọhọ ke Ukwọrọikọ esie oro ke Obot ete: “Mme atua owo mbọm ẹkop inemesịt, koro ẹyetua mmọ mbọm. Mmọ  oro esịt asanade ẹkop inemesịt, koro mmọ ẹyekụt Abasi.”—Matthew 5:7, 8.

Enyene mma kiet ke Japan emi ekerede Aki, onyụn̄ enyenede nditọ irenowo iba. Esịt ama enen̄ede ọduọ enye ke eka esie ama akakpa ke mbuari. N̄kpọ emi ama esinen̄ede afịna enye ndusụk ini tutu edi se enye akade ufọkibọk. Ekem mma kiet emi moto ọkọtọde ebe owot ọkpọn̄ nditọ ition ọnọ enye ama atan̄ nditọ emi edidụn̄ ke mbọhọ oro. Mbọm mmọ ama anam Aki tutu enye ọtọn̄ọ ndinam ufan ye mmọ nnyụn̄ nnọ mmọ n̄kpọ nte udia ye n̄kani ọfọn̄. Ndin̄wam ebeakpa emi ye nditọ esie ama ọdọn̄ Aki esịt n̄ko. Enye ama okụt ke ikọ Bible emi edi akpanikọ: “Inemesịt odu ke ndinọnọ akan ke ndibọbọ.” (Utom 20:35) Mfọnn̄kan n̄kpọ emi ekemede ndinam nnọ idemfo ke ini esịt ọduọde fi edi ndifọn ido ye owo.

‘Ndinọ Jehovah Ebuọt’

Ndusuk ini, mfọnido isikpaha n̄kpọ ndomokiet. Owo ekededi ekeme ndifọn ido—edide akwaowo m̀mê eyenọwọn̄, edide owo enyene n̄kpọ m̀mê inyeneke. Idem ndiyak mbon en̄wen ẹbem fi iso ke itie n̄kpọ owụt ke ọmọfọn ido. Ndidaha nda nnọ owo itie, ndinọ owo n̄kpọ, m̀mê ndika utom nnọ owo—kpukpru emi ẹwụt ke ọmọfọn ido. Edi edieke mûdiọn̄ọke se akpanamde, nam se ọdiọn̄ọde ke ekeme ndinem owo esịt. Mfọnido isụn̄utom emi ikadade itọn̄ọ nneme emi ama enen̄ede otụk akparawa oro iketịn̄de iban̄a ke ntọn̄ọ ibuotikọ emi akan se isụn̄utom oro ọkọkwọrọde. Ntak edi oro Abasi oyomde mme andituak ibuot nnọ enye ẹfọn ido.—Micah 6:8.

Ekpri n̄kpọ emi anamde ọnọ owo ekeme ndinen̄ede nnyene ufọn. Edieke akanamde n̄kpọ ọnọ owo ke ntak ima Abasi, n̄kpọ oro eyenem fi esịt, enem owo oro, onyụn̄ enem Abasi. Idem edieke owo emi anamde n̄kpọ ọnọ mîkọmke fi, oro iwọrọke ke mfọnido fo atatak. Abasi ama se anamde oro. Bible owụt ke owo eke ọfọnde mfọn ye owo “ọnọ Jehovah ebuọt.” (Mme N̄ke 19:17) Ntre, yom usụn̄ fọn ido ye mme owo.

[Se ẹwetde ke ikpọ abisi ke page 20]

Edieke mûdiọn̄ọke se akpanamde, nam se ọdiọn̄ọde ke ekeme ndinem owo esịt

[Ndise ke page 19]

Abasi ama ọdiọn̄ Abraham ke ntak mfọnido esie

[Ndise ke page 20]

Ndifọn ido ye mme owo etie nte ‘ndinọ Jehovah ebuọt’