Mmọdiọn̄ọ Ndien Abasi Emi N̄kponode

NTE MARIETA MANUEL BACUDIO OBỤKDE

Akwa pastọ Pentecostal emi ọdọhọde ke imekeme ndikọk udọn̄ọ ama edi edise nnyịn. Ke ini enye okotụkde mi, “spirit ama osio mi ọduọk,” ndien mma nsụhọ. Ke ini nsetde ndi, eketie mi ke idem nte ke mmenyene odudu ndida n̄kọk udọn̄ọ, ndien se n̄koyomde edi oro. N̄kasan̄a didie ndidu ke utọ itie emi, ndien uwem mi eketie didie ke oro ebede? Mbemiso mbọrọ mbụme emi, yak ntịn̄ kan̄a mban̄a idem ye ubon mi.

N̄KAMANA ke Ilocos Norte ke Philippines, ke December 10, 1968. N̄kedi ọyọhọ eyen itiaba ke otu nditọ duop. Ukem nte ediwak nditọ obio nnyịn, nnyịn ikedi mbon Catholic. N̄kokụre akwa ufọkn̄wed ke 1986, ndien n̄kaduak ndidi nurse. Edi n̄kekemeke ndinam oro sia mma ndidọn̄ọ ata idiọk udọn̄ọ. Ama odu ini emi n̄kekerede ke mmọn̄ n̄kpa. Emi ama anam n̄kpe Abasi ubọk nte anam idem ọsọn̄ mi, nnyụn̄ n̄n̄wọn̄ọ ke nyanam n̄kpọ esie ke ofụri eyouwem mi edieke enye anamde idem ọsọn̄ mi.

Ama ada ini mbemiso idem ọsọn̄de mi. Edi ke idem ama ọkọsọn̄ mi, mma nti se n̄kọn̄wọn̄ọde nnọ Abasi. Ntre ke June 1991, mma n̄kọtọn̄ọ ufọkn̄wed ukpep Bible Pentecostal. Ẹkedọhọ ke kiet ke otu n̄kpọ emi owo ekemede ndinyene ke ufọkn̄wed emi edi “edisana spirit emi edide enọ mfọn.” N̄koyom ndinyene odudu ukọk udọn̄ọ. Ẹkekpep nnyịn ke ufọkn̄wed oro ẹte ke ndibọn̄ akam nnyụn̄ ntie utre udia ekeme ndinam owo enyene odudu ukọk udọn̄ọ. Ini kiet, man nnam mme owo ẹkere ke mmenyene “enọ” oro, mma ndịbe n̄kop nte eyen ufọkn̄wed nnyịn kiet ọbọn̄de akam ke nditụn̄ọ ke ini ubọn̄ akam. Mbemiso enye okụrede akam oro, mma mfiak mfehe n̄kọtọn̄ọ edọn̄ ke itie emi n̄kọtọn̄ọde. Ekem mma nsian enye nnennen se enye ọkọbọn̄de ke akam, ndien enye ama enịm ke mmenyene “enọ mfọn” oro!

Mma nnyene ediwak mbụme ke ufọkn̄wed oro. Ke uwụtn̄kpọ, Matthew 6:9 asiak “Ete” onyụn̄ etịn̄ aban̄a “enyịn̄” esie. Mma mbụp nte, “Anie edi Ete emi Jesus eketịn̄de aban̄a mi?” ndien “Enyịn̄ anie ke ikpanam asana?” Ibọrọ emi mme andikpep ẹkesinọde ikesin̄wan̄ake. Mmọ ẹma ẹtịn̄ ẹban̄a Abasi-Ita-ke-Kiet ẹnyụn̄ ẹdọhọ ke edi ndịben̄kpọ. N̄kpọ emi ama esitịmede mi. Kpa ye oro, mma n̄ka iso ndibọ ukpep man n̄kpedi pastọ.

Ẹnam Ndiọn̄ọ Mme Ntiense Jehovah

Ke ufọkn̄wed oro, ẹma ẹkpep nnyịn nte ke Mme Ntiense Jehovah ẹdiọk ẹkan ke otu kpukpru nsunsu ufọkabasi. Ẹkedọhọ ke mmọ ẹnyụn̄ ẹdi mme andibiọn̄ọ Christ. Ntre, mma nnen̄ede nsua mmọ.

Ke ọyọhọ isua mi iba ke ufọkn̄wed, mma ndika ufọk ndise ete ye eka mi ke ini nduọkodudu. Ke ini Carmen akamba eyeneka mi okopde ke mmedi ufọk, enye ama ọwọn̄ọde edi n̄ko. Eyeneka mi emi ama anana baptism nte Ntiense Jehovah, esinyụn̄ ọkwọrọ ikọ  ofụri ini. Ke ini enye akan̄wanade ndikpep mi n̄kpọ mban̄a Abasi, mma nyat esịt mbọrọ nte: “Mmọdọdiọn̄ọ Abasi emi n̄kponode!” Ke mma n̄kosụn̄i enye, mma mberi enye nsio ke usụn̄ nnyụn̄ nnọhọ enye ifet ndineme nneme aba ye ami.

Ke mma n̄kafiak nnyọn̄ ufọkn̄wed, Carmen ama ọnọ ekpri n̄wed emi ẹkotde Nte Afo Ekpenyene Ndinịm Abasi-Ita-ke-Kiet ke Akpanikọ? * ẹsọk mi. Mma n̄n̄wịn enye inikiet inikiet ntop nsịn ke ikan̄. Ke n̄kosụk nyayat esịt ye enye.

Mma Ndi Pastọ

Nte n̄kosụk ndude ke ufọkn̄wed oro, mma n̄kwọrọ ikọ n̄kabade mme owo esịt. Esịt ama enen̄ede enem mi ke ini eka mi ye eyeneka mi ẹketienede mi ẹdụk ufọkabasi Pentecostal.

Ke March 1994, mma n̄kụre ufọkn̄wed ukpep Bible Pentecostal. Ini oro ke akwa pastọ oro n̄ketịn̄de ke ntọn̄ọ ekedi ufọkn̄wed emi. Kpukpru nnyịn emi ikoyomde ndikụre n̄wed ima iyom ndidu do sia ima inịm ke enye enyene odudu ukọkudọn̄ọ. Ima idọk ibịne enye ke n̄kpoto ukwọrọikọ, ifrọ inyụn̄ itiene enye ikwak ubọk ke ini ẹkesụk ẹmiade ban. Ekem owo ekededi emi enye otụkde ọduọ, “spirit osio owo oro ọduọk.” * Ke ini enye okotụkde mi, mma nduọ ke isọn̄ nsụhọ. Ke ini nsetde ndi, ndịk ama anam mi, edi mma n̄kop ke idem mi nte ke mmenyene odudu ndikọk udọn̄ọ, ndien esịt ama enem mi tutu.

Ikebịghike mma nda odudu emi nnam idem ọsọn̄ ekpri eyenọwọn̄ kiet emi ọkọdọn̄ọde utoenyịn. Ke ini n̄kọbọn̄de akam, ibibiak ama asiaha enye, idem onyụn̄ ọsọn̄ enye. Ke akpatre, mma n̄kere ke mmanam se n̄kọn̄wọn̄ọde nnọ Abasi. Edi okosụk etie mi nte ke ndiọn̄ọke Abasi. Mma nnịm ke ata isọn̄ esịt mi nte ke Abasi kiet kpọt odu, edi n̄kenen̄ekede ndiọn̄ọ enye. Ndien mma nyịk ediwak n̄kpọ emi ẹkekpepde ke ufọkabasi nnyịn.

Se Ikanamde N̄kpụhọde Ekikere

Ke n̄kpọ emi ẹma ẹkebe, mma ntetịm nsua Mme Ntiense Jehovah. Mma nsifọp kpukpru n̄wed mmọ emi n̄kụtde. Edi usen kiet n̄kpọ ama etịbe. Idem ama akpa mi ndifiọk ke eka mi ikamaha aba ufọkabasi nnyịn. Carmen ke ekekpep Bible ye enye! Esịt ama etetịm ayat mi ye Carmen.

Ekem mma n̄kụt Awake! kiet ke ubet eka mi. Mma nyom ndifọp Awake! oro, edi n̄kọdọhọ nse se eka mi esikotde. Mma ndikụt ibuotikọ kiet emi aban̄ade owo emi okonyụn̄ enen̄erede enịm se ẹkekpepde ke ufọkabasi mmọ. Edi ke ini enye ọtọn̄ọde ndikot n̄wed Mme Ntiense Jehovah onyụn̄ okot Bible, enye ama edikụt ke Abasi-Ita-ke-Kiet, ikan̄ nsobo, ye ukpọn̄ ikpaha ke nsinsi emi ẹkpepde ke ufọkabasi isịneke ke Bible. N̄kpọ emi ama otụk mi etieti. Mma nyom nditịm ndiọn̄ọ mme n̄kpọ emi. Ọtọn̄ọde ke ini oro,  ama enen̄ede ọdọn̄ mi ndifiọk akpanikọ oro odude ke Bible.

Ke mma n̄kokot ke Awake! nte akpammịn emi ekesidade n̄kpọsọn̄ ibọk eketrede kpukpru emi ke ama ekekpep Bible, mma n̄kot ediwak n̄wed en̄wen emi Mme Ntiense Jehovah ẹsiode. Mma ndikụt ekpri n̄wed emi, Enyịn̄ Abasi Oro Edibịghide ke Nsinsi. * Ke mma n̄kokot n̄wed emi, mma ndifiọk ke enyịn̄ Abasi edi Jehovah. Ama enen̄ede enem mi ndifiọk ata Abasi!—Deuteronomy 4:39; Jeremiah 10:10.

Mma nsidịbe n̄kot n̄wed Mme Ntiense Jehovah nnyụn̄ n̄kpep ediwak n̄kpọ efen efen ke Bible. Ke uwụtn̄kpọ, ẹkekpep mi ke ufọkn̄wed ukpep Bible Pentecostal oro nte ke Jesus edi Abasi, edi idahaemi mma ndikụt ke Bible nte ke enye edi “Eyen odu-uwem Abasi.”—Matthew 16:15, 16.

Mma N̄kpụhọde Ekikere

Ke ini n̄kafiakde n̄kụt Carmen, idem ama akpa enye ndikop mi ndọhọde enye ọnọ mi ekpri n̄wed oro Enyịn̄ Abasi Oro Edibịghide ke Nsinsi ye mme n̄wed efen. Mma mbiat ediwak isua ke ufọkn̄wed Pentecostal oro, edi owo ikekpepke mi akpanikọ do. Eketie nte ẹfụk mi n̄kpọ ke enyịn. Edi akpanikọ oro n̄kokụtde ke n̄wed Mme Ntiense Jehovah ama enen̄ede adat mi esịt. Mma ndikụt ikọ Jesus emi: “Mbufo ẹyefiọk akpanikọ, akpanikọ oyonyụn̄ anam mbufo ẹwọrọ ufụn.” (John 8:32) Akpanikọ emi ama ọtọn̄ọ ndikpụhọde uwem mi.

N̄kekere ke mmekeme ndikpono Jehovah Abasi ke ndịbe nnyụn̄ n̄ka iso ndi pastọ. N̄kekemeke aba ndikpep mme owo ediwak n̄kpọ oro n̄kekpepde mmọ ke ufọkabasi. Edi mma n̄kere m̀mê ndida m̀mọ̀n̄ okụk nse mban̄a idem mi edieke ntrede utom pastọ. Nso utọ bụt ke ufọkabasi nnyịn ẹdidia ntem edieke pastọ mmọ akabarede edi Ntiense Jehovah! Ntem mma n̄ka iso ndi pastọ, edi n̄kpepke aba mme nsunsu ukpepn̄kpọ ufọkabasi.

Ke ini n̄kafiakde n̄kụt Carmen eyeneka mi, enye ama ọdọhọ ndụk mbono esop Mme Ntiense Jehovah. Sia n̄kesikade akamba ufọkabasi nnyịn ke Laoag, mma n̄kama enyịn nyom itie mboho Mme Ntiense Jehovah. Ẹma ẹmen mi ẹwụt Alma Preciosa Villarin, emi ẹkesikotde “Precious.” Enye ekedi ọkwọrọikọ ofụri ini. Okposụkedi emi n̄kosụk ndade Mme Ntiense didie didie, mma nyak mma emi ekpep mi Bible.

Eyeneka mi ama enen̄ede enyene ime nte enye ekesikwọrọde ikọ ọnọ mi. Mma ndikụt ke Precious onyụn̄ eme ime ntre. Enye ama enen̄ede an̄wam mi ndiọn̄ọ Bible, kpa ye oro  n̄kesiyatde esịt ndomo ndifan̄a n̄kpọ enye, idem ndusụk ini mmenerede uyo ke enyọn̄ ntịn̄ se ẹkekpepde mi ke ufọkabasi nnyịn. Nte Precious ye Mme Ntiense eken ẹkemade mi, ẹsụhọrede idem, ẹnyụn̄ ẹtiede emem emem ama enen̄ede otụk mi. Se ikanamde ọdọn̄ mi ndikpono Jehovah edi emi.

Mma ndikụt ke July 1995 ke edieke nyomde ndinem Jehovah esịt, ke nnyene ndikpọn̄ utom pastọ. Ntak-a? Ke Ediyarade 18:4, Abasi ọdọhọ mbon oro ẹdude ke nsunsu ido ukpono ete: “Mbufo ikọt mi ẹwọn̄ọ ke esịt esie, edieke mbufo mîyomke nditiene mbuana ke mme idiọkn̄kpọ esie, edieke mbufo mînyụn̄ iyomke nditiene mbọ mme ufen esie.” Edi ndidia nso ndien? Mme Hebrew 13:5 ama ekpep mi nte ke edieke nnamde uduak Abasi, ke enye ọn̄wọn̄ọ ete: “Ndidehedei n̄kpọn̄ fi, ndinyụn̄ nsịnke fi.”

Kpa ye oro ete mi ye akpaneka mi ẹkenen̄erede ẹbiọn̄ọ mi, mma n̄ka ufọk nnyịn n̄kọfọp kpukpru n̄kpọ oro n̄kesidade nnam utom pastọ mi. N̄kanam emi urua iba mbemiso nna baptism nte Ntiense Jehovah. Ke mma n̄kọfọp kpukpru n̄kpọ oro, mma ndikụt ke kpukpru odudu oro n̄kenyenede ndida n̄kọk udọn̄ọ ikodụhe aba. Ini akpa ekesidi mma nnana, etie nte enyene n̄kpọ emi esisan̄ade efịk mi. N̄kokopke n̄kpọ emi aba n̄ko. Mbukpọn̄ oro n̄kesikụtde ke mben window mi ikodụhe aba. Mma ndikụt ke Bible nte ke idịghe Abasi esinọ mme owo odudu ndida n̄kọk udọn̄ọ mfịn, ke ndiọi spirit ẹsinọ. Esịt enem mi ndibọhọ utọ ufụn emi, kpa nte eyenan̄wan oro Paul akanamde “demon idiọn̄” ọwọrọ enye ke idem.—Utom 16:16-18.

Esịt ama enem mi tutu ndina baptism usen kiet ye eka mi ke September 1996. Ke mma n̄kana baptism, mma n̄kabade ndi ọkwọrọikọ ofụri ini Mme Ntiense Jehovah. Ndien mmanam emi ke ediwak isua idahaemi.

Mma ndidọ ebe; ebe mi ekere Silver. Ami ye enye ke isịn ofụri ukeme nnyịn ikpep adiaha nnyịn Bible. Ndusụk nditọeka mi ẹtiene nnyịn ẹkpono Jehovah. Kpa ye oro abiakde mi nte mmen̄kabakke ndiọn̄ọ Abasi, esịt enem mi idahaemi sia mmọdiọn̄ọ ndien Abasi emi n̄kponode.

[Mme Ikọ Idakisọn̄]

[Se ẹwetde ke ikpọ abisi ke page 13]

Mma nda odudu emi nnam idem ọsọn̄ ekpri eyenọwọn̄ kiet emi ọkọdọn̄ọde utoenyịn

[Se ẹwetde ke ikpọ abisi ke page 14]

Akpanikọ emi ama ọtọn̄ọ ndikpụhọde uwem mi

[Se ẹwetde ke ikpọ abisi ke page 15]

Ama enen̄ede enem mi ndifiọk ata Abasi!

[Ndise ke page 13]

Ini n̄kụrede ufọkn̄wed Pentecostal

[Ndise ke page 14, 15]

Precious ke ekpep mi Bible

[Ndise ke page 15]

Ke ini ami ye eka mi ikanade baptism

[Ndise ke page 15]

Ndi ọkwọrọikọ ofụri ini

[Ndise ke page 15]

Ami ye ebe mi ye adiaha nnyịn ye ediwak iman nnyịn emi ẹtienede ẹkpono Jehovah