“Andisọn̄ọ Usen Osụhọde Etie”
San̄a Kpere Abasi
“Andisọn̄ọ Usen Osụhọde Etie”
BIBLE ọdọhọ ete: “Akananam baba owo kiet ikwe Abasi.” (John 1:18) Ubọn̄ Abasi enen̄ede ayama tutu owo ndomokiet ikemeke ndikụt Abasi ndu uwem. (Exodus 33:20) Edi ndusụk ini, Jehovah ama owụt owo ifan̄ se idude ke heaven. Prọfet Daniel ekedi kiet ke otu mmọ. Se enye okokụtde ama anam enye uten̄e, onyụn̄ anam nnyịn uten̄e n̄ko. Kop nte Daniel obụkde se Abasi akanamde enye okụt ke n̄kukụt. *—Kot Daniel 7:9, 10.
“Andisọn̄ọ Usen osụhọde etie.” Daniel kpọt okot Abasi “Andisọn̄ọ usen,” emi ọwọrọde ke enye ọsọn̄ọ kpukpru owo ye kpukpru n̄kpọ. (Daniel 7:9, 13, 22) Didie? Sia Jehovah edide “nsinsi Edidem,” enye ama ododu ke ofụri eyo emi ekebede, odu idahaemi, oyonyụn̄ odu ke nsinsi nsinsi. (1 Timothy 1:17; Jude 25) Jehovah enen̄ede enyene ọniọn̄ sia Bible ọdọhọ ke owo emi ebịghide uwem esinyene ọniọn̄. (Job 12:12) Imọfiọk ke idisọpke in̄wan̄a nnyịn ke ini Bible ọdọhọde ke Abasi inyeneke ntọn̄ọ. Edi ndi akpana ikere ke imekeme ndifiọk kpukpru n̄kpọ mban̄a Abasi emi ọniọn̄ esie mînyeneke mbiet?—Rome 11:33, 34.
Ti ete ke Daniel ọdọhọ ke Andisọn̄ọ Usen “osụhọde etie.” Etie anam nso? Mme ufan̄ikọ eken do ẹtịn̄ ẹban̄a “Esop” ye “ikpe.” (Daniel 7:10, 22, 26) Oro owụt ke Jehovah osụhọde etie man ebiere ikpe. Anie ke enye edibiere ikpe inọ? Mme idụt isọn̄ emi, kpa mmọ emi Daniel okokụtde ke n̄kukụt nte unam. * (Daniel 7:1-8) Nso utọ Ebiereikpe ke Jehovah edi?
“Edisịnen̄kpọ esie afia nte snow, idet ibuot esie onyụn̄ etie nte afia idet erọn̄.” Afia ada aban̄a edinen ye edisana ido. Idet ata ediwak erọn̄ ẹdi mfia. Ndi omokụt se Daniel okokụtde? Omokụt nte Akwa Ayaraiwat emi ọsọn̄ọde kpukpru owo ye kpukpru n̄kpọ esịnede ọfọn̄ emi afiade nte snow etie ke itie ikpe? Emi ẹwụt ke Jehovah ada ọniọn̄ ekpe edinen ikpe. Utọ Ebiereikpe emi ke ikpenen̄ede iberi edem inyụn̄ inen̄ede ikpono.
“Tọsịn ke itie tọsịn ẹnam n̄kpọ ẹnọ enye, tọsịn duop ke itie tọsịn duop ẹnyụn̄ ẹda enye ke iso.” Mmanie ẹdi mme asan̄autom Abasi emi? Bible ọdọhọ ke mme angel ẹdi “mme asan̄autom” Abasi. (Psalm 104:4) Abasi enyene angel esịm ediwak miliọn, ndien kpukpru mmọ ke ẹsịn idem ‘ẹnam uduak esie.’ (Psalm 103:20, 21) Ndi emi n̄ko iwụtke nte ọniọn̄ Abasi okponde? Jehovah Abasi kpọt ekeme ndikara utọ akpakịp udịm mme angel emi ẹsịnde idem ẹnam uduak esie mi ke anana-ibat isua.
Se Daniel okokụtde anam ibuọt idem ke Jehovah, kpa Andisọn̄ọ Usen. Ikpe esie enen, imonyụn̄ ikeme ndiberi edem ke ọniọn̄ esie. Domo ndikpep nte akpasan̄ade ekpere Abasi emi ọniọn̄ esie mînyeneke mbiet mi.
Itie Bible emi okpokotde ke October:
[Mme Ikọ Idakisọn̄]
^ ikp. 3 Idịghe nte Daniel ama okụt Abasi ata edikụt, edi Abasi okowụt enye n̄kukụt. Ndien enye ada se enye ọdiọn̄ọde etịn̄ se enye okụtde, oro edi, ndida nte owo etiede nnam nnyịn ifiọk Abasi, okposụkedi emi mîwọrọke ke Abasi etie nte owo.
^ ikp. 5 Edieke oyomde ndifiọk n̄kpọ mban̄a unam emi Daniel okokụtde mi ke n̄kukụt, mbọk kot ibuot 9 ke n̄wed Nọ Ntịn̄enyịn ke Prọfesi Daniel! emi Mme Ntiense Jehovah ẹsiode.
[Se ẹwetde ke ikpọ abisi ke page 18]
Utọ Ebiereikpe emi ke ikpenen̄ede iberi edem inyụn̄ inen̄ede ikpono
