Bible Okpụhọde Mme Owo

NSO inam ete kiet emi owo mîketịmke ikama okop inemesịt idahaemi onyụn̄ edi eti ebe ye eti ete? Nso ikanam mma kiet emi okodude idiọk uwem akabade owo Abasi? Kot se mmọ ẹtịn̄de mi.

‘N̄kọwọrọke n̄kpọ.’​—VÍCTOR HUGO HERRERA

N̄KAMANA KE 1974

NTO CHILE

N̄KEKEMEKE NDIME MMỊN

NTE UWEM MI EKETIEDE: N̄kamana ke Angol, ediye obio kiet ke edem usụk Chile. Ndiọn̄ọke ete mi. Ke ini n̄kedide isua ita kpọt, eka mi ama emen mi ye udọeka mi aka Santiago, ibuot obio Chile. Nnyịn ikodụn̄ ke ekpri ubet kiet ke ebiet emi mbon emi mînyeneke ufọk ẹsidụn̄de. Ikesinam ndek ke ekwe uwak owo inyụn̄ ibọ mmọn̄ ke mmọn̄ esan̄ukwak mme enịme-ikan̄.

Ke n̄kpọ nte isua iba ẹma ẹkebe, ukara ama ọnọ nnyịn ekpri ufọk. Ke ndiọkiso, mme akpara, mme abiatibet, mme akpammịn, ye mme ada n̄kpọsọn̄ ibọk ẹkedụn̄ do.

Usen kiet, eka mi ama okụt ete kiet, ekem mmọ ẹma ẹdọ ndọ. Ebeeka mi ekedi akpammịn. Enye ama esitịm mi ye eka mi. Mma nsikedịbe ntua, nnyụn̄ n̄kere nte n̄kpenyenede ete emi ekpekpemede mi.

Nnyịn ikedi ọkpọkpọi ubuene okposụkedi emi eka mi ekesịnde idem anam utom man inyene se idiade. Ke ini biọn̄ ọkọdọn̄de nnyịn, nnyịn ikesidia nsat mmọn̄eba ye suka. Nnyịn ikenyeneke TV, ntre ima isiwọrọ ikedịbe ke window mma kiet ke mbọhọ nnyịn ise TV esie. Usen kiet, enye ama omụm nnyịn, ntre nnyịn ikekemeke aba ndika n̄kese.

Usen emi ebeeka mi mîn̄wọn̄ke mmịn, enye ama esidep udia ọnọ mi ye udọeka mi. Edi emi ikesiwakke nditịbe. Ini kiet, enye ama akam edep ekpri TV ọnọ nnyịn. Kiet ke otu ini emi esịt ekenemde mi edi oro.

Mma ndiọn̄ọ ndikot n̄wed ke ini n̄kedide isua 12. Mma ntre n̄wed ke ini n̄kedide isua 13 nnyụn̄ ntọn̄ọ utom. Ke utom ama akasuana, mma nsisan̄a ye mbonutom nnyịn emi ẹkesọn̄ọde mi n̄kadia uwem, ntiene nda n̄kpọsọn̄ ibọk nnyụn̄ n̄n̄wọn̄ ọkpọsọn̄ mmịn. Ikebịghike, n̄kekemeke ndime mmịn ye n̄kpọsọn̄ ibọk.

Mma nsobo Cati ke ini n̄kedide isua 20 inyụn̄ ndọ ndọ nte ini akade. N̄kpọ ama ọfọn ke nsonso oro, ekem, mma mfiak ntọn̄ọ idiọk uwem. Mma ndọdiọn̄ ndiọk. Edi mma ndifiọk ke edieke mmen̄kpụhọkede, ke nyaka n̄kpọkọbi mîdịghe n̄kpakpa. Se ikọdiọkke mi esịt ikan edi ke mma nnam Víctor akpan mi ọbọ ukem  ufen oro n̄kọbọde ke ini n̄kedide eyenọwọn̄. N̄kpọ emi ama enen̄ede ọdiọk mi esịt. Ekenen̄ede etie nte n̄wọrọke n̄kpọ.

Ke n̄kpọ nte isua 2001, Mme Ntiense Jehovah iba ẹma ẹdi ufọk nnyịn, n̄wan mi onyụn̄ enyịme mmọ ẹkpep imọ Bible. Enye ama esitịn̄ se enye ekpepde ọnọ mi. Mma ntọn̄ọ ndikpep Bible n̄ko man mfiọk mme n̄kpọ emi ke idemmi. N̄wan mi ama ana baptism nte Ntiense Jehovah ke 2003.

NTE BIBLE OKOKPỤHỌREDE UWEM MI: Usen kiet, mma n̄kot Ruth 2:12, emi ọdọhọde ke Jehovah esidiọn̄ mbon oro ẹnamde n̄kpọ ke mbuọtidem, ẹnyụn̄ ẹfehede ẹkedụk idak mba esie ẹyom ubọhọ. Mma mfiọk ke edieke n̄kpụhọrede, ke esịt eyenem Abasi, ke enye oyonyụn̄ ọdiọn̄ mi. Mma nnyụn̄ n̄kụt ke Bible etịn̄ ke ediwak itie ete ke ukpammịn ifọnke. Se idude ke 2 Corinth 7:1 ama enen̄ede otụk mi. Itien̄wed oro ọdọhọ “nnyịn iyet kpukpru se isabarede obụkidem” ifep. Ntre, mma ntọn̄ọ nditre ndiọi uwem. Ikememke ke nsonso oro sia mma nsisọp iyatesịt etieti, edi n̄wan mi ama aka iso ọyọ onyụn̄ ebere ye ami.

Ekem, mma ntre utom oro n̄kesinamde sia mme ada n̄kpọsọn̄ ibọk ye mme akpammịn ẹma ẹwak do etieti. Okposụkedi emi nditre utom emi akanamde n̄kûnen̄ede nnyene okụk aba, emi ama ọnọ mi ini ndinen̄ede nsịn idem n̄kpep Bible. Ini oro ndien ke n̄kọtọn̄ọ ndidu uwem nte ata Christian. Akananam n̄wan mi iyomke n̄kpọ emi ubọk mi mîsịmeke, inyụn̄ isueneke mi sia ndide ubuene. Esịt enen̄ede enem mi ke ofụri ibetedem oro enye ọnọde mi.

Mma ntọn̄ọ ndinen̄ede ndian idem ye Mme Ntiense sụn̄sụn̄. Mmọ ẹma ẹnam mi n̄kụt ke kpa ye oro mmen̄kakaha n̄wed, ke Jehovah ama nte nsịnde idem nnam n̄kpọ esie. Ima ye edidianakiet oro odude ke esop Abasi ama enen̄ede otụk ubon nnyịn. Akananam nnyịn ikwe utọ n̄kpọ oro ke ebiet en̄wen. Ntre, ke December 2004, mma ntiene nna baptism.

UFỌN ORO MBỌDE: Mmokụt ke se Jehovah etịn̄de ke Isaiah 48:17 edi ata akpanikọ. Itie oro ọdọhọ ete: “Ami Jehovah, ndi Abasi fo, Enye emi ekpepde fi man afo ọbọ ufọn.” Ukpụhọde oro n̄kanamde ama enen̄ede otụk eka mi ye udọeka mi tutu mmọ n̄ko ẹtọn̄ọ ndikpep Bible. Esịt enem idem mme mbọhọidụn̄ nnyịn ndikụt ukpụhọde oro nnamde, ye nte nnyịn ikopde inem uwem.

N̄wan mi enen̄ede ama Abasi onyụn̄ ada mi nte eti ebe ye ufan emi enye ekemede ndiberi edem. Okposụkedi emi mmen̄kọfiọkke ete mi, Bible ekpep mi nditịm n̄kama nditọ irenowo ita emi Abasi ọnọde mi. Mmọ ẹkpono mi. Se ikam inemde mi esịt ikan edi nte ke mmọ ẹnen̄ede ẹfiọk Jehovah ẹnyụn̄ ẹma enye.

Okposụkedi emi owo mîketịmke mi ikama, mmọkọm Jehovah Abasi ke ndinam mi n̄kop inemesịt idahaemi.

 “Mma nsisọp iyatesịt nnyụn̄ nyom ikọ.”​—NABIHA LAZAROVA

N̄KAMANA KE 1974

NTO BULGARIA

N̄KESINYAM N̄KPỌSỌN̄ IBỌK

NTE UWEM MI EKETIEDE: N̄kamana ke Sofia ke Bulgaria. Nnyịn ikenyeneke n̄kpọ ikaha, ikonyụn̄ idịghe ubuene. Ete mi ọkọwọrọ ọkpọn̄ nnyịn ke ini n̄kedide isua 6. N̄kpọ emi ama enen̄ede abiak mi sia nnyịn ikekereke-kere ke ete mi ọkpọsọn̄ esịt anam nnyịn utọ n̄kpọ oro. Eketie nte n̄wọrọke n̄kpọ ye nte ke inyeneke eke akpamade mi. Emi ama anam nsọn̄ ibuot ke mma n̄kokpon. Mma nsisọp iyatesịt nnyụn̄ nyom ikọ.

N̄kefehe n̄kpọn̄ ufọk ke ini n̄kedide isua 14. Mma nsiyịp okụk eka ye ekaeka mi. Ọkpọsọn̄ iyatesịt mi ama esisịn mi ke ediwak mfịna ke ufọkn̄wed, ndien emi ama anam ẹnọ mi n̄ka ufọkn̄wed ition ke ufan̄ isua ifan̄. Mma mfehe n̄wọrọ ke ufọkn̄wed isua ita mbemiso ekem ini emi ẹkpenọde mi n̄weditoro. Ekem, mma n̄kọtọn̄ọ oburobụt uwem, nsinyụn̄ n̄n̄wọn̄ sika ye ikọn̄ekpo. Mma nsinyụn̄ n̄n̄wọn̄ mmịn etieti nnyụn̄ n̄ka udia uwem kpukpru ini. N̄kpọ en̄wen emi n̄kanamde ekedi ndinyam n̄kpọsọn̄ ibọk. Nte mme owo ẹbọde ufen ẹnyụn̄ ẹkpan̄ade ama anam n̄kere ke ufọn idụhe ndidu uwem ke ererimbot atahade emi. Ntre, mma ndọhọ nnọ uwem se uwem oyomde sia mmemfiọkke n̄kpọn̄.

Ke 1998 ke ini n̄kedide isua 24, ẹma ẹmụm mi ye n̄kpọsọn̄ ibọk ke ini n̄kebehede ke itiembehe ubomofụm São Paulo ke Brazil. Ẹma ẹnọ mi n̄ka n̄kpọkọbi isua inan̄.

NTE BIBLE OKOKPỤHỌREDE UWEM MI: Ke 2000, Mme Ntiense Jehovah ẹma ẹtọn̄ọ ndidi ndise nnyịn ke ufọk-n̄kpọkọbi kpukpru urua. Ntiense kiet emi ekerede Marines ama enen̄ede ọfọn ido ye ami. Enye ama anam ọdọn̄ mi ndikpep Bible. Sia akanam mmen̄kopke n̄kpọ ndomokiet mban̄a Mme Ntiense Jehovah, mma mbụp mbon n̄kpọkọbi eken mban̄a mmọ. Idem ama akpa mi ndikop ediwak mmọ ẹdọhọde ke Mme Ntiense idịghe nti owo. Kiet ke otu mmọ ọkọdọhọ mi ke mmekeme ndika ufọkabasi ekededi, edi n̄kûsan̄a n̄kpere Mme Ntiense Jehovah. Se enye eketịn̄de ama anam nnen̄ede nyom ndifiọk ntak emi ẹsuade mmọ ntre. Mma ndikụt ke ẹsua mmọ sia mmọ ẹkponode ata Abasi. N̄kọ Bible ọdọhọ ke ẹyekọbọ owo ekededi emi enen̄erede oyom nditiene Jesus.—2 Timothy 3:12.

Ẹkedọhọ nsinam utom ke ọfis ufọk-n̄kpọkọbi oro. Usen kiet, mma n̄kụt ekebe ifan̄ emi ẹdọn̄de n̄kani Enyọn̄-Ukpeme ye Awake! * ke ubet ubonn̄kpọ. Mma ntan̄ magazine emi n̄ka ubet n̄kpọkọbi mi n̄kokot. Nte n̄kokotde, n̄ketie nte owo emi okụtde mbịtmbịt mmọn̄ ke ama akakpa nsatisọn̄ ke desat. Mma nsibiat ediwak hour n̄kpep Bible kpukpru usen sia mmen̄kenyeneke se nnamde.

Ẹma ẹkot mi usen kiet ẹka ọfis ufọk-n̄kpọkọbi oro. N̄kekere ke ẹmọn̄ ẹsio mi unyọn̄, ntre mma  nsọsọp ntọn̄ọ nditan̄ n̄kpọ mi, n̄kọm mbon n̄kpọkọbi eken unyọn̄, nnyụn̄ mfehe n̄ka ọfis oro. Edi ke mma n̄kesịm do, ẹkedọhọ mi ke ẹkụt ibet en̄wen emi n̄kabiatde, ntre ke nnyene ndifiak ndu isua iba ke ufọk-n̄kpọkọbi.

Eketie nte ibuot oyom ndibebe mi akpa ini oro n̄kopde emi. Edi ke usen ifan̄ ẹma ẹkebe, mma ndikụt ke emi akakam edi edidiọn̄ Abasi. Okposụkedi emi mma n̄kekpep ediwak n̄kpọ ke Bible, n̄kosụk nyoyom ndifiak n̄kodu uwem nte n̄kodude mbemiso ndide ufọk-n̄kpọkọbi. Ntre, ndifiak ndu mi isua iba oro ama an̄wam mi n̄kpụhọde.

Mmesikere ndusụk ini ke Abasi ikemeke-keme ndida mi nte asan̄autom esie. Edi ke mma n̄ketie n̄kere se idude ke 1 Corinth 6:9-11, mma ndikụt ke akpa mme Christian ẹkenyụn̄ ẹtie nte ami mbemiso ẹkabarede ẹdi mme Christian. Edi Jehovah ama an̄wam mmọ ẹkpụhọde. Uwụtn̄kpọ mmọ ama enen̄ede esịn udọn̄ ọnọ mi.

Ikọsọn̄ke nditre ndusụk idiọk uwem oro n̄kesidude. Ke uwụtn̄kpọ, mma nsọsọp ntre uda n̄kpọsọn̄ ibọk. Edi ikememke utom nditre sika. Mma nsịn ikpafak mbe isua kiet mbemiso n̄kemede nditre enye ndien. N̄kpọ kiet emi akan̄wamde mi ekedi ndifiọk kpukpru ndiọi n̄kpọ emi sika esinamde owo. Edi akakan n̄kpọ emi akan̄wamde mi edi akam oro n̄kesibọn̄de kpukpru ini n̄kpe Jehovah ubọk nte an̄wam mi.

Nte n̄kasan̄ade n̄kpere Jehovah, mma ntọn̄ọ ndifiọk ke odu owo emi amade mi okposụkedi emi ete mi ọkọkpọn̄de nnyịn. Ikọ Psalm 27:10 ama enen̄ede otụk mi. Itien̄wed oro ọdọhọ ete: “Edieke ete mi ye eka mi ẹkpekpọn̄de mi, Jehovah ekpemen mi akama.” Mmenyene ndien ata eti Ete emi mîdikpọn̄ke mi tutu amama! Uwem mi ọwọrọ n̄kpọ idahaemi. Ke April 2004, ọfiọn̄ itiokiet ke ẹma ẹkesio mi ke ufọk-n̄kpọkọbi, mma nna baptism nte Ntiense Jehovah.

UFỌN ORO MBỌDE: Esịt esinem mi idahaemi. Idem akam ọsọn̄ mi idahaemi akan akpa sia mma n̄ketre kpukpru uwem atahade oro n̄kesidude. Ndọ nnyịn enem etieti, ndien ami ye Ete mi eke heaven ididi ata ufan. Mmonyụn̄ nnyene ediwak ete, eka, ye nditọeka ke esop Abasi. (Mark 10:29, 30) Esịt enem mi nte ke mmọ ẹma ẹdiọn̄ọ ke mmekeme ndikpụhọde idem mbemiso ami ke idemmi ndiọn̄ọde.

Ndusụk ini, esịt esibiom mi mma nti nte n̄kesidude uwem. Edi esịt esisọn̄ mi ndifiọk ke owo “iditịghi aba” kpukpru ndiọi n̄kpọ emi ẹtịbede idahaemi ke obufa ererimbot emi Abasi ọn̄wọn̄ọde. (Isaiah 65:17) Ke emi, se itịbede inọ mi anam nnen̄ede n̄kere mban̄a mbon oro ẹdude uwem nte n̄kesidude. Ntre mmada se ikọwọrọde mi n̄n̄wam mme owo. Ke uwụtn̄kpọ, ke ini n̄kwọrọde ikọ, isisọn̄ke mi ndikwọrọ ikọ nnọ mme akpammịn, mme ada n̄kpọsọn̄ ibọk m̀mê mme abiatibet. Mmenen̄ede nnịm ke edieke owo nte ami okokpụhọrede, ke owo ekededi ekeme ndikpụhọde n̄ko.

[Ikọ Idakisọn̄]

[Se ẹwetde ke ikpọ abisi ke page 27]

“Okposụkedi emi mmen̄kọfiọkke ete mi, Bible ekpep mi nditịm n̄kama nditọ irenowo ita emi Abasi ọnọde mi”

[Se ẹwetde ke ikpọ abisi ke page 29]

“Mmenyene ndien ata eti Ete emi mîdikpọn̄ke mi tutu amama!”