Akpa Mbụme: Ntak Emi Abasi Okobotde Mi-e?

ROSALIND emi ẹkebọkde ke England ekesimama ndikpep nsio nsio n̄kpọ. Enye ama oyom n̄ko ndisin̄wam mme owo. Ke enye ama okokụre n̄wed, enye ama anam ata eti utom oro ekesịnede ndin̄wam mbon oro mînyeneke ufọkidụn̄, enye n̄ko ama esin̄wam mbon n̄kpọnnam ye mbon oro mîsikemeke ndikpep n̄kpọ. Kpa ye oro enye ekenyenede eti utom okonyụn̄ enyenede okụk etieti, enye ọdọhọ ete, “Mma nsikere ke ediwak isua nte, ‘Ntak emi nnyịn idude uwem? Ntak emi Abasi okobotde nnyịn-e?’”

Nso isinam ẹbụp mbụme emi? Mme owo itiehe nte mme unam emi mîsikereke n̄kpọ. Nnyịn imekeme ndikpep n̄kpọ nto se iketịbede ke ini edem, idiomi se idinamde ke ini iso, inyụn̄ ikere iban̄a ntak emi Abasi okobotde nnyịn.

Didie ke ndusụk owo ẹbọrọ mbụme emi? Ediwak owo ẹkere ke akpan ntak emi Abasi okobotde owo edi man edin̄wana okụk onyụn̄ ọwọrọ etop, ndien ke emi esinam owo okop inemesịt.

Nso ke ibọrọ mmọ ọwọrọ? Ọwọrọ ke nnyịn inyene ndibiere se idide ebeiso n̄kpọ ke uwem nnyịn. Ọwọrọ n̄ko ke ikpebem iso inam se idọn̄de nnyịn utu ke ndibem iso nnam uduak Abasi.

Nso ke Bible ekpep? Edidem Solomon ama enyene n̄kpọ barasuene onyụn̄ anam mme n̄kpọ oro ẹkemede ndinọ owo inemesịt, edi enye ama edikụt ke mme n̄kpọ oro inamke owo okop ata inemesịt. Enye ama etịn̄ se owo akpadade uwem esie anam ete: “Ke ẹma ẹkekop kpukpru n̄kpọ, utịt n̄kpọ emi edi: Bak ata Abasi nyụn̄ nịm mme ibet esie. Koro ofụri mbiomo  emi owo enyenede edi emi.” (Ecclesiastes 12:13) Nso ye nso isịne ke ndinịm ibet Abasi?

Abasi oyom nnyịn ikop inem uwem. Kiet ke otu n̄kpọ emi akanamde enye obot nnyịn edi oro. Solomon ekewet ete: “Idụhe se ifọnde ye owo ikan ndidia nnyụn̄ n̄n̄wọn̄ nnyụn̄ nnam ukpọn̄ esie okụt se ifọnde ke ọkpọsọn̄ utom esie. Ami mmokụt nte ke emi oto ubọk ata Abasi.”—Ecclesiastes 2:24.

Abasi oyom nnyịn ima mbonubon nnyịn inyụn̄ ise iban̄a mmọ. Kop nti item oro enye ọnọde owo kiet kiet mi ke ubon:

“Mme ebe ẹkpema iban mmọ nte idem mmọ.”​—Ephesus 5:28.

“Yak n̄wan enen̄ede okpono ebe esie.”—Ephesus 5:33.

“Nditọ, ẹkop uyo ẹnọ mme ete ye eka mbufo.”​—Ephesus 6:1.

Edieke inamde item Bible emi, iyokop inemesịt ye uyụhọ. Edi ata akpan n̄kpọ oro anade inam edi ndinen̄ede n̄kpep n̄kpọ mban̄a Andibot nnyịn nnyụn̄ nsan̄a n̄kpere enye nte Ufan nnyịn. Bible esịn udọn̄ ọnọ nnyịn ete ‘isan̄a ikpere Abasi,’ onyụn̄ ọdọhọ ke ‘enye ayasan̄a ekpere nnyịn.’ (James 4:8) Edieke asan̄ade ekpere enye, oyodu uwem nte akpanade odu.

Rosalind oro iketịn̄de iban̄a ama edifiọk ntak emi Abasi okobotde imọ. Enye akasan̄a didie ọfiọk? Mbọk kot se enye etịn̄de ke page 10 ke magazine emi.

Edieke oyomde ndifiọk n̄kpọ efen oro akpanamde man odu uwem ke usụn̄ oro enemde Abasi esịt, se ibuot 12 ke n̄wed Nso ke Bible Enen̄ede Ekpep? N̄wed emi odu n̄ko ke ikpehe Intanet www.pr418.com

[Ekebe ke page 5]

Jesus Ọkọdọhọ ke Nso Ikanam Abasi Obot Owo?

Jesus ama ọfiọk ntak emi Abasi okobotde imọ. Enye ọkọdọhọ ete: “N̄kamana kaban̄a emi, n̄konyụn̄ ndi ke ererimbot kaban̄a emi, man ntie ntiense nnọ akpanikọ.” (John 18:37) Jesus akada ofụri ini uwem esie ekpep mme owo n̄kpọ aban̄a Abasi ye se Abasi aduakde ndinam.

Edieke ikpebede Jesus, iyodu uwem nte akpanade idu. Enye akakam esesịn udọn̄ ọnọ nnyịn ete ikpebe imọ. (Matthew 11:29) Kere ban̄a usụn̄ iba oro ikemede ndikpebe Jesus:

Jesus ọkọdọhọ ke iyokop inemesịt edieke ‘ikerede iban̄a unana nnyịn ke n̄kan̄ eke spirit.’ (Matthew 5:3) Edieke imade ndikpep n̄kpọ ‘mban̄a ata Abasi kierakiet ye enye emi enye okosiode ọdọn̄, kpa Jesus Christ,’ iyesịk ikpere mmọ.​—John 17:3.

Jesus ama owụk mme anditiene enye ete ẹkpep mbon en̄wen se imọ ikekpepde mmọ. Enye ọkọdọhọ ete: “Ẹka ẹkenam mme owo ke kpukpru idụt ẹdi mbet mi, ẹnịm mmọ baptism ke enyịn̄ Ete ye Eyen ye edisana spirit, ẹkpep mmọ ẹnam kpukpru n̄kpọ eke n̄ketemede mbufo.”​—Matthew 28:19, 20.

Mbon oro ẹkpepde Bible ẹnyụn̄ ẹnamde se mmọ ẹkpepde man ẹnyene se mmọ ẹyomde ke n̄kan̄ eke spirit ẹkụt ke uwem mmọ ọfọn idahaemi akan nte ekedide. Ke ini mmọ ẹtọn̄ọde ndikpep mbon en̄wen mban̄a Abasi, mmọ ẹsitetịm ẹfiọk ntak emi Abasi okobotde mmimọ.