NSO ke Jehovah oyom oto mbon oro ẹkpemade ndituak ibuot nnọ enye ke nnennen usụn̄? Edieke enye oyomde mmọ ẹfọn ẹma, ndi owo ndomokiet ke otu nnyịn ekeme ndinem enye esịt? Mîdịghe, ndi enye oyom inam se inyụn̄ ikemede? Ọfọn ifiọk ibọrọ mbụme emi edieke iyomde ndinam n̄kpọ Abasi ye idatesịt. Ẹyak ise se prọfet Micah eketịn̄de aban̄a se Abasi oyomde oto nnyịn.—Kot Micah 6:8.

“Enye amasian fi se ifọnde.” Ufọn idụhe ndikekere m̀mê nso ke Abasi oyom oto nnyịn. Enye etịn̄ se enye oyomde in̄wan̄-in̄wan̄ ke Bible. Abasi ọdọhọ inam “se ifọnde.” Enye ikpọdọhọke inam idiọk. “Abasi edi ima,” ntre se enye oyomde oto nnyịn edi ke ufọn nnyịn. (1 John 4:8; 5:3) Edieke inamde se enye oyomde, esịt ayadat enye, nnyịn n̄ko iyọbọ ufọn.—Deuteronomy 10:12, 13.

“Nso ke Jehovah oyom oto fi?” Ndi Abasi enyene unen ndiyom n̄kpọ nto nnyịn? Ke akpanikọ, enyene! Ana ikop uyo esie sia enye edi Andibot ye Andinịm nnyịn uwem. (Psalm 36:9) Ntre, nso ke enye oyom oto nnyịn? Micah etịn̄ n̄kpọ ita oro Abasi oyomde oto nnyịn. Akpa ye udiana n̄kpọ ẹban̄a nte isinamde n̄kpọ ye ekemmọ owo, ndien ọyọhọ ita aban̄a itie ebuana nnyịn ye Abasi.

‘Nam se inende.’ N̄wed kiet ọdọhọ ke ikọ Hebrew oro ẹkabarede “se inende” abuana ndinam n̄kpọ ke nnennen usụn̄ ye mme owo ke obio.” Abasi oyom nnyịn inam n̄kpọ ye mbon en̄wen ke nnennen usụn̄ nte enye etemede. Ndinam se inende ọwọrọ nditre ndinam asari, nnyụn̄ nnam akpanikọ nnọ mbon en̄wen. (Leviticus 19:15; Isaiah 1:17; Mme Hebrew 13:18) Edieke inamde n̄kpọ ke nnennen usụn̄ ye mbon en̄wen, mmọ n̄ko ẹkeme ndinam kpasụk ntre ye nnyịn.—Matthew 7:12.

‘Ma mfọnido.’ Abasi ọdọhọ ifọn ido ye mme owo, inyụn̄ ima edu emi. Ẹkeme ndikabade ikọ Hebrew oro che’sedh nte “mfọnido” m̀mê “ima mfọnido” m̀mê “ima-nsọn̄ọnda.” Eyen ukpepn̄kpọ Bible kiet ọdọhọ ete: “Inenke ofụri ofụri ndidọhọ ke che’sedh ọwọrọ ima, mbọm, m̀mê mfọnido sia enye iwọrọke ndomokiet ke otu edu mbita emi, edi edi kpukpru mmọ mbita.” Edieke imade mfọnido, iyesifọn ido ye mme owo; edinenem nnyịn ndin̄wam mbon en̄wen. Ndien iyenyene inemesịt emi otode ndinọ owo n̄kpọ.—Utom 20:35.

‘Sụk idem san̄a ye Abasi fo.’ Ke Bible, ikọ oro ẹkabarede nte ‘san̄a’ ọwọrọ “ndidu uwem ke akpan usụn̄.” Nnyịn isan̄a ye Abasi ke ndidu uwem nte enye etemede ke Bible. Oyom isụk idem inam emi. Didie? Edieke isụkde idem ke iso Abasi, iyọfiọk nte enye adade nnyịn, iyonyụn̄ ifiọk se nnyịn mîkemeke ndinam. Mmọdo, ‘ndisụk idem nsan̄a ye Abasi’ ọwọrọ ndifiọk ata nnennen n̄kpọ emi enye oyomde oto nnyịn nnyụn̄ mfiọk se ikemede ndinam.

Imọkọm Jehovah ke emi enye mîdọhọke nnyịn inam mme n̄kpọ emi ẹkponide ẹkan nnyịn. Esịt esinem enye ke ini isịnde ofụri ukeme inam n̄kpọ esie. (Colossae 3:23) Enye ọfiọk se nnyịn mîkemeke ndinam. (Psalm 103:14) Ke ini nsụkidem anamde nnyịn n̄ko ifiọk ukeme nnyịn, iyokop idatesịt ndisan̄a ye enye. Ntak mûkpepke nte ọkpọtọn̄ọde ndisan̄a ye Abasi? Abasi esinen̄ede ọdiọn̄ mbon oro ẹsan̄ade ye enye.—Mme N̄ke 10:22.