Udiana Mbụme: Nso Iditịbe Mma N̄kpa?

ROMAN ekedi eyenọwọn̄ ke ini moto ọkọtọde ata ufan esie owot. Enye ọdọhọ ete: “N̄kpa ufan mi ama anam nnen̄ede n̄kere n̄kpọ. Ke ediwak isua ẹma ẹkebe tọn̄ọ nte moto ọkọtọ enye, mma nsikere m̀mê nso isitịbe inọ nnyịn ima ikpa.”

Nso isinam ẹbụp mbụme emi? N̄kpa imeheke owo. Inyeneke owo emi esiyomde ndikpa inamke n̄kpọ m̀mê enye edi isua ifan̄. Ediwak owo ẹsikere m̀mê nso isitịbe ke owo ama akpa.

Didie ke ndusụk owo ẹbọrọ mbụme emi? Ediwak owo ẹnịm ke enyene n̄kpọ ke idem owo emi esikade iso odu uwem ke owo ama akakpa. Mmọ ẹnịm ke nti owo ẹdika heaven, ndien ke mme anam idiọkn̄kpọ ẹyebọ ufen nsinsi nsobo. Mbon en̄wen ẹkere ke owo ama akpa, ke enye ebe efep ke nsinsi, owo idinyụn̄ itịghi enye aba.

Nso ke ibọrọ mmọ ọwọrọ? Akpa ibọrọ ọwọrọ ke owo isikpaha-kpa. Ọyọhọ ibọrọ iba ọwọrọ ke uwem inyeneke ufọn. Mbon oro ẹnịmde ke uwem inyeneke ufọn ẹsima ndidọhọ: “Ẹyak nnyịn idia inyụn̄ in̄wọn̄, koro nnyịn iyakpa n̄kpọn̄.”—1 Corinth 15:32.

Nso ke Bible ekpep? Bible ikpepke ke enyene n̄kpọ ke idem owo oro esikade iso odu uwem ke owo ama akakpa. Abasi ama ọnọ Edidem Solomon spirit ewet ete: “Mme odu-uwem [ẹfiọk] ẹte ke mmimọ iyakpa; edi amaedi mme akpan̄kpa, mmọ ifiọkke baba n̄kpọ kiet.” (Ecclesiastes 9:5) Mbon emi ‘mîfiọkke baba n̄kpọ kiet’ ifiọkke se ikade iso aba. Mmọ idikemeke ndikop ubiak m̀mê inemesịt m̀mê ndinam n̄kpọ ndomokiet. Ntre mme akpan̄kpa ikemeke ndin̄wam mme odu-uwem m̀mê ndinam mmọ ibak.

Ediwak owo ẹkere ke edi uduak Abasi mme owo ndikpa, edi idịghe ntre. Enye okobot Adam man odu uwem ke isọn̄ ke nsinsi. N̄kukụre ini oro Abasi eketịn̄de aban̄a n̄kpa ekedi ini oro enye akasiande Adam ufen oro ẹdinọde enye edieke enye ọsọn̄de ibuot. Enye ama akpan Adam ete okûdia mfri eto kiet onyụn̄  odụri enye utọn̄ ete ke edieke enye adiade mfri oro ke enye “ayakpa n̄kpa.” (Genesis 2:17) Edieke Adam ye Eve ẹkpekekopde uyo Abasi, mmọ ye kpukpru nditọ mmọ oro ẹsọn̄ọde ẹda ẹnam n̄kpọ Abasi ẹkpekedu uwem ke nsinsi.

Adam okokokoi otụt utọn̄ ye Abasi. Enye ndiketre ndikop uyo Abasi ekedi idiọkn̄kpọ, ntak edi oro enye akakpade. (Rome 6:23) Ke Adam ama akakpa, inyeneke n̄kpọ oro ọkọwọrọde enye ke idem aka iso odu uwem. Utu ke oro, Adam ama akpa ofụri ofụri. Abasi ọkọdọhọ Adam ete: “Ke ibibiak iso fo ke afo edidia udia tutu afo afiak ke ntan, sia ẹkesiode fi do. Koro afo edide ntan, oyonyụn̄ afiak ke ntan.” (Genesis 3:19) Sia kpukpru nnyịn idide nditọ Adam, nnyịn ikadada idiọkn̄kpọ ye n̄kpa imana.—Rome 5:12.

Kpa ye oro Adam ekemekde ndisọn̄ ibuot ye Abasi, Abasi oyosu se enye ọkọn̄wọn̄ọde, oro edi, ndinam nditọ Adam ẹdụn̄ ẹyọhọ ofụri isọn̄. (Genesis 1:28; Isaiah 55:11) Jehovah ayanam ata ediwak owo oro ẹkekpan̄ade ẹset ke mîbịghike. Apostle Paul ọkọdọhọ ke “ndinen owo ye mme anam ukwan̄n̄kpọ ẹyeset ke n̄kpa” ini oro.—Utom 24:15.

Roman, oro iketịn̄de iban̄a ke ntọn̄ọ ama edikpep Bible onyụn̄ ọfiọk se Bible etịn̄de aban̄a mme akpan̄kpa ye se enye etịn̄de aban̄a Jehovah Abasi. Se enye ekedide edifiọk ama anam enye okpụhọde ekikere. Kot mbụk esie ke page 11 ke magazine emi.

Edieke oyomde ndifiọk se isitịbede ke ini owo akpade, se ibuot 12 ke n̄wed Nso ke Bible Enen̄ede Ekpep? N̄wed emi odu n̄ko ke ikpehe Intanet www.pr418.com

[Ekebe ke page 7]

Nso ke Jesus Eketịn̄ Aban̄a N̄kpa?

Jesus ikenyịmeke ye mme adaiso ido ukpono eyo esie oro ẹkedọhọde ke owo idinamke mme akpan̄kpa ẹset. (Luke 20:27) Enye ikonyụn̄ ikpepke ke enyene n̄kpọ oro esiwọrọde owo ke idem aka iso odu uwem ke owo ama akakpa. Kop se Jesus ekekpepde mi.

N̄kpa etie nte idap. Ke ini Lazarus ufan Jesus akakpade, enye ọkọdọhọ ete: “Lazarus ufan nnyịn aka ndiduọk odudu, edi ami mmọn̄ n̄ka do man n̄kedemede enye ke idap.” Se Jesus eketịn̄de ikan̄wan̄ake mme mbet esie. Mmọ ẹkedọhọ enye ẹte: “Ọbọn̄, edieke edide enye aka ndiduọk odudu, enye oyokop nsọn̄idem.” Mbụk Bible oro ọdọhọ ete: “Jesus eketịn̄ aban̄a n̄kpa esie. Edi mmọ ẹkere ke enye eketịn̄ aban̄a ndide idap nduọk odudu. Adan̄aoro, Jesus ọdọhọ mmọ in̄wan̄-in̄wan̄ ete: ‘Lazarus akpa.’”—John 11:11-14.

Mme akpan̄kpa ẹyeset. Ke ini Jesus ekesịmde obio mme Lazarus, enye ama ọdọn̄ Martha eyeneka Lazarus esịt, ete: “Eyeneka fo eyeset.” Ekem Jesus ọn̄wọn̄ọ ete: “Ami ndi ediset ye uwem. Owo eke ọbuọtde idem ye ami, idem ọkpọkọm enye akpakpa, oyodu uwem.” Se Jesus ọkọn̄wọn̄ọde ikedịghe n̄wọkinua. Okposụkedi emi ama ọkọyọhọ usen inan̄ tọn̄ọ nte Lazarus akakpa, Jesus ama anam enye eset ke iso ediwak owo oro ẹkedude do.—John 11:23, 25, 38-45.

Ke ini Jesus akayararede se iditịbede ke ini iso ọnọ John, enye ama afiak etịn̄ ke ẹyenam mme akpan̄kpa ẹset. Enye ọkọdọhọ ke ini ke edi oro n̄kpa edisanade mbon oro ẹkpan̄ade ayak.—Ediyarade 20:13.