Ndi Ama Ọfiọk?

Ndi Jesus akanam ndudue ke ini ọkọdọhọde ke inụn̄ esidaba?

▪ Ke ini Jesus ọkọkwọrọde ikọ ke obot, enye ama ọdọhọ mme anditiene enye ete: “Mbufo ẹdi inụn̄ isọn̄; edi edieke inụn̄ adabade, didie ke ẹkeme ndinam enye afiak enyene inem? Ifọnke ke baba n̄kpọ kiet ibọhọke nditop enye nduọk ke an̄wa man mme owo ẹdịghi ke ikpat.” (Matthew 5:13) Inụn̄ isiyakke n̄kpọ ọsọp abiara. Ntem, etie nte uwụtn̄kpọ Jesus ọkọwọrọ ke mme mbet imọ ẹkeme ndin̄wam mbon en̄wen mbak mmọ ẹdibiara, ye nte ke mmọ ẹkpenyene ndinam emi.

N̄wed oro ẹkotde The International Standard Bible Encyclopedia etịn̄ ntem aban̄a ikọ Jesus oro aban̄ade inụn̄ ndidaba: “Mme n̄kpatan̄a n̄kpọ en̄wen ke isọn̄ ẹma ẹsibuaha ye inụn̄ emi odude ke ikpehe Inyan̄ Inụn̄ ẹnyụn̄ ẹsabade enye. Inụn̄ emi ama esiyet, ndien se ikọyọhọde isụhọ ikenyeneke inem aba.” Ntak edi oro Jesus ọkọdọhọde ke nyọhọ-nsụhọ oro “ifọnke ke baba n̄kpọ kiet ibọhọke nditop enye nduọk ke an̄wa man mme owo ẹdịghi ke ikpat.” N̄wed oro ikasiakde ọdọhọ ke “mbon Palestine ẹkesiwobi inụn̄ mmọ ke mben Inyan̄ Inụn̄ sia ama esimem mmọ utom, okposụkedi mme n̄kpọ oro ẹkebuahade ye inụn̄ oro mîkayakke enye enem nte inụn̄ mbon eken.”

Didie ke n̄ke Jesus oro aban̄ade owo oro ọkọduọkde okụk drachma akan̄wan̄a mme owo?

▪ Jesus ama otop n̄ke aban̄a n̄wan kiet emi okodomode utuenikan̄ ada ini ọkpọri ufọk oyom kiet ke otu okụk drachma duop oro ọkọbọhọde enye osop tutu okụt. (Luke 15:8-10) Ke eyo Jesus, okụk drachma kiet ama ekpere ndidi ukem ye okụk utom usen kiet, ntre okụk oro Jesus eketịn̄de aban̄a mi ikedịghe ekpri okụk. Mbon oro ẹkekpan̄de utọn̄ ẹnọ Jesus ẹma ẹfiọk ke se enye eketịn̄de esitịbe.

Ndusụk n̄wed ndụn̄ọde ẹdọhọ ke iban ẹma ẹsiwak ndida okụk drachma nte n̄kpọmbana. Ekeme ndidi ikọ Jesus ọkọwọrọ ke okụk drachma ekedi kiet ke otu n̄kpọmbana emi iban ẹkemade ẹkan m̀mê kiet ke otu n̄kpọ ndọ mmọ. M̀mê ekedi ntre m̀mê ikedịghe, ndiduọk kiet ke otu okudọk duop oro ama anam esịt enen̄ede etịmede n̄wan oro onyụn̄ anam enye oyom okụk oro.

Akan oro, nte mme usụhọde owo ke eyo Jesus ẹkebọpde ufọk ikesiyakke un̄wana ye ufiop ẹnen̄ede ẹdụk ufọk mmọ. Mmọ ikọdọn̄ke window awak ke ufọk, edieke edide ẹma ẹkam ẹsesịn. Mmọ ẹkesiwak ndida mme utọ n̄kpọ nte nnyanyan̄a mbri ke isọn̄ufọk. Edieke okụk ọbọhọde owo ọduọ, ikesimemke utom ndikụt. Ntem, ete kiet ọdọhọ ete: “Ke ini ekpri n̄kpọ, utọ nte okụk, ọbọhọde owo osop ke utọ ufọk oro, se ẹkesinamde ekedi ndidomo utuenikan̄, n̄kpọri isọn̄ nyom.”

[Ndise ke page 21]

Inụn̄ ke inyan̄ inụn̄

[Mme ndise ke page 21]

Okụk drachma