San̄a Kpere Abasi

Ndi Enyịn̄ Fo Odu ke “N̄wed Editi” Abasi?

NDI Jehovah ọfiọk ukeme oro mme andituak ibuot nnọ enye ẹsịnde man ẹnem enye esịt? Ke akpanikọ, ọfiọk! Edi enye ọfiọk se ikande oro. Enye ọfiọk n̄ko nti utom mmọ ye itoro oro mmọ ẹtorode enye, ọkọrọ ye ini oro mmọ ẹkerede nti n̄kpọ ẹban̄a enye. Akan oro, tutu amama Jehovah idifreke ikọt esie ye se mmọ ẹnamde ẹnọ enye. Ntak emi idọhọde ntre? Ikọ oro prọfet Malachi ekewetde ọbọrọ mbụme emi.—Kot Malachi 3:16.

Ke ini Malachi eketịn̄de ntịn̄nnịm ikọ ke n̄kpọ nte isua 2,500 emi ẹkebede, mme owo ke Israel ikodụhe eti uwem ikonyụn̄ imaha ndinam n̄kpọ Abasi. Mme oku ikanamke utom mmọ nte akpanade ẹnam, ndien ata ediwak owo ẹma ẹsuene enyịn̄ Abasi ke ndibre idiọn̄, nsịn efịbe, nnyụn̄ ntụk owo. (Malachi 2:8; 3:5) Okposụkedi emi ediwak owo ẹkenamde mme utọ mbubiam n̄kpọ oro, ama enyene ndusụk nditọ Israel emi ẹkesọn̄ọde ẹda ẹnam n̄kpọ Abasi. Nso ke mmọ ẹkenam?

Malachi ọbọrọ ete: “Mbon oro ẹbakde Jehovah ẹneme nneme ye kiet eken.” Mbak Abasi edi eti edu. Mi, Malachi eketịn̄ aban̄a nditọ Israel oro ẹkenen̄erede ẹten̄e Abasi ẹkenyụn̄ ẹfehede ndinam n̄kpọ oro ediyatde enye esịt. Fiọk ete ke mbon oro ẹkebakde Abasi do ẹma “[ẹsineme] nneme ye kiet eken.” Emi ọwọrọ ke mmọ ẹma ẹsitie kiet ẹtịn̄ nti n̄kpọ ẹban̄a Jehovah ẹnyụn̄ ẹsịn udọn̄ ẹnọ kiet eken, mbak idiọkido mbon en̄wen edinam idem emem mmọ.

Nditọ Israel oro ẹkesọn̄ọde ẹda ẹma ẹkpono Jehovah ke usụn̄ en̄wen: Mmọ ẹma ‘ẹkere ẹban̄a enyịn̄ esie.’ Edikabade Bible en̄wen ọdọhọ ke mmọ ‘ẹkeda enyịn̄ Esie ke akpan n̄kpọ.’ Mbon oro ẹbakde Abasi ẹsikere n̄kpọ oro ẹwụtde ke mmọ ẹkpono Jehovah. Mmọ ẹma ẹsikere nti n̄kpọ ke esịt mmọ ẹban̄a se Jehovah anamde ẹnyụn̄ ẹkere ẹban̄a akwa enyịn̄ esie. Ndi Jehovah ama ọfiọk oro?

Malachi ọbọrọ ete: “Jehovah akpan̄ utọn̄ okop.” Jehovah ama esitie ke n̄kokon̄ ebietidụn̄ esie ke heaven akpan̄ utọn̄ okop kpukpru ikọ itoro oro mme andituak ibuot nnọ enye ẹkesitịn̄de ye kiet eken. Enye n̄ko ama ọfiọk se owo mmọ kiet kiet ekerede ke esịt. (Psalm 94:11) Edi enye ama anam se ikande oro.

Malachi asian nnyịn ete: “Ẹwet n̄wed editi ke iso esie.” N̄wed oro ada aban̄a enyịn̄ kpukpru mbon oro ẹsọn̄ọde ẹda ẹnam n̄kpọ Jehovah. Ti ke ẹkot enye “n̄wed editi.” * Emi ọwọrọ ke tutu amama Jehovah idifreke mme anam-akpanikọ ikọt esie oro ẹtuakde ibuot ẹnọ enye ye kpukpru se mmọ ẹdade ẹtoro enye—nti edinam, ikọ, ye ekikere. Edi Abasi eti mmọ man anam nso ọnọ mmọ? Enye ọn̄wọn̄ọ ndinọ mbon oro enyịn̄ mmọ akade iso odu ke n̄wed editi esie nsinsi uwem. *—Psalm 37:29.

Enem nnyịn ndifiọk ke Jehovah ama ofụri ukeme oro nnyịn isịnde ndituak ibuot nnọ enye ke nnennen usụn̄! Se ẹtịn̄de ke Malachi 3:16 anam inen̄ede ikere iban̄a itie ebuana nnyịn ye Jehovah. Ọfọn ibụp idem nnyịn ite: ‘Ndi enyịn̄ mi odu ke “n̄wed editi” Abasi?’ Enyịn̄ nnyịn oyodu edieke isịnde ofụri ukeme inam n̄kpọ, itịn̄ ikọ, inyụn̄ ikere n̄kpọ ke usụn̄ oro Jehovah editide nnyịn.

Itie Bible emi okpokotde ke December:

◼ Nahum 1–Malachi 4

[Mme Ikọ Idakisọn̄]