Mme Andikot N̄wed Nnyịn Ẹbụp Ẹte . . .

Ntak emi ndusụk owo mîsidiaha Christmas?

▪ Ke ofụri ererimbot, se ikperede ndisịm biliọn owo iba ẹsidia Christmas ke December 25, ke adan̄aemi n̄kpọ nte miliọn owo 200 ẹsinịmde usọrọ emi ke January 7. Edi odu ediwak miliọn owo emi mîsidiaha Christmas. Ntak emi mmọ mîsidiaha?

Se idude edi ke ekeme ndidi mmọ idịghe mbon ido ukpono Christendom. Ẹkeme ndidi mmọ ẹsika ido ukpono mme Jew, Hindu, m̀mê Shinto, ke ndisiak ibat ibat. Mbon eken, utọ nte mbon oro mînịmke ke Abasi odu, mbon oro ẹnịmde ke enye ikereke iban̄a owo, ye mbon oro ẹnịmde se mmọ ẹmade, ẹkere ke Christmas edi n̄ke.

Edi n̄kpọ n̄kpaidem ndifiọk ke ediwak mbon oro ẹnịmde Jesus ke akpanikọ isimaha nditiene nnam se mbon eken ẹsinamde ke ini Christmas. Ntak-a? Kere ban̄a ntak inan̄ emi.

Akpa kan̄a, mmọ inịmke ke Jesus akamana ke December m̀mê ke January. Bible isiakke akpan usen emi Jesus akamanade. Enye ọdọhọ ete: “Mme ekpemerọn̄ ẹma ẹdu ke idụt oro emi ẹketiede ke an̄wa ẹkpeme otuerọn̄ mmọ ke okoneyo. Ndien angel Jehovah awara edida ekpere mmọ, . . . [onyụn̄] odọhọ mmọ ete: ‘. . . Andinyan̄a, emi edide Christ Ọbọn̄, amana ọnọ mbufo mfịn emi.’”—Luke 2:8-11.

Se idude edi ke etie nte Jesus akamana ke ntọn̄ọ ntọn̄ọ October, ini emi mme ekpemerọn̄ ẹsitiede ke an̄wa ẹkpeme erọn̄ mmọ. December ye January ẹsidi ata ini etuep ke Bethlehem. Mmọdo, eyo ama okụt, mme ekpemerọn̄ ẹsidọn̄ erọn̄ mmọ ke ufọk ke ntak ọkpọsọn̄ etuep.

Udiana ntak: N̄kukụre edinam emi Jesus ọkọdọhọde mme anditiene enye ẹsinịm edi editi n̄kpa esie, idịghe usọrọ usen emana esie, ndien enye ọkọdọhọ ẹnịm udia ọbọn̄ ẹda ẹti imọ. (Luke 22:19, 20) Fiọk n̄ko ete ke Gospel Mark ye John itịn̄ke-tịn̄ n̄kpọ ndomokiet iban̄a emana Jesus.

Ọyọhọ ntak ita: N̄kpọ ndomokiet idụhe ndiwụt ke mme Christian eyo mme apostle ẹma ẹsinịm usọrọ usen emana Christ. Edi mmọ ẹma ẹsiti n̄kpa esie. (1 Corinth 11:23-26) N̄kpọ nte isua 300 ẹma ẹbe tọn̄ọ Jesus akamana mbemiso Christendom ẹketọn̄ọde ndinịm usọrọ usen emana esie ke December 25. Fiọk ete ke akwa ufọkmbet England ama akpan usọrọ Christmas ke England ke n̄kpọ nte isua 360 emi ẹkebede. Ke United States, Akwa Esopikpe ke Massachusetts ama anam ukem oro. Ntak emi mmọ ẹkekpande Christmas? N̄wed oro The Battle for Christmas ọdọhọ ete: “N̄kpọ ndomokiet idụhe ke Bible, nnyịn inyụn̄ ikwe n̄kpọ ndomokiet ke mbụkeset oro owụtde ke Jesus akamana ke December 25.” N̄wed oro adian do ete ke mbon Puritan eset ẹkeda “Christmas nte usọrọ mme okpono ndem emi ẹnamde etie nte edi eke mme Christian.”

Ọyọhọ ntak inan̄ edi idiọk usụn̄ emi ẹketọn̄ọde usọrọ Christmas. Mme okpono ndem mbon Rome ẹma ẹsinịm nsio nsio usọrọ ndida n̄kpono Saturn, abasi utọin̄wan̄ ye Sol Invictus, m̀mê Mithra, abasi utịn mmọ. Mme usọrọ emi ke ẹkewọn̄ọde ẹkot Christmas. Christian Rätsch ye Claudia Müller-Ebeling, mme andiwet n̄wed emi ẹkotde Pagan Christmas, ẹdọhọ ẹte: “Ukem nte ediwak ido edinam ye mme ukpepn̄kpọ emi ẹkedude mbemiso eyo mme Christian, akani usọrọ emi ẹkesinịmde ndida nti ini emi ẹsikụtde utịn ke ntọn̄ọ ndaeyo isua kiet kiet ke ẹkewọn̄ọde ẹnịm nte usọrọ usen emana Christ.”

Ndi se inemede emi anam ọfiọk ntak emi ata mme Christian mîsidiaha Christmas?

[Se ẹwetde ke ikpọ abisi ke page 10]

N̄kukụre edinam emi Jesus ọkọdọhọde mme anditiene enye ẹsinịm edi editi n̄kpa esie, idịghe usọrọ usen emana esie