Ndi Jehovah enen̄ede ekere aban̄a nnyịn, mîdịghe, ndi enye idọn̄ke enyịn ke se iwọrọde nnyịn? Nte Bible ọbọrọde mbụme emi enen̄ede ọdọn̄ nnyịn esịt. Abasi enen̄ede ekere aban̄a nnyịn, ndien enye oyom nnyịn ikop inemesịt. Kpukpru usen, enye esifọn mfọn ye kpukpru nnyịn, ọkọrọ ye idem mbon oro mîsikọmke enye. Kot se apostle Paul eketịn̄de ke Utom 14:16, 17.

Paul ọkọdọhọ mbon Lystra emi mîkọfiọkke Abasi ete: “Ke mme emana emi ẹkebede [Abasi] ama ayak kpukpru mme idụt ẹsan̄a ke mme usụn̄ idemmọ, okposụkedi emi enye mîkayakke n̄kpọ ntiense anana aban̄a idemesie ke emi enye ọfọnde ido, ọnọde mbufo edịm emi otode enyọn̄ ye ini eduek, ọnọde mbufo udia barasuene onyụn̄ anamde esịt mbufo ọyọhọ ye idatesịt.” Nso ke ikọ Paul ọkọwọrọ?

Se Paul eketịn̄de emi ama enen̄ede an̄wan̄a mbon Lystra sia ata ediwak mmọ ẹkedi mme ọtọ-in̄wan̄. Isọn̄ obio mmọ ama esifọn n̄kpọ etieti, mmọn̄ onyụn̄ odu. Edi Paul ama anam mmọ ẹfiọk ke Abasi ọnọ mmọ edịm, enye onyụn̄ anam se mmọ ẹtọde ọfọn. Emi ọwọrọ ke ini ekededi oro mmọ ẹdọkde ekese n̄kpọ ke in̄wan̄ mmọ ẹnyụn̄ ẹdiade nti n̄kpọ ẹkop inemesịt, ke mfọn Abasi ke mmọ ẹkedia oro.

Se Paul eketịn̄de emi ọnọ mbon Lystra ekpep nnyịn ediwak n̄kpọ aban̄a Jehovah Abasi.

Akpa n̄kpọ emi ikpepde edi nte ke Jehovah ọnọ nnyịn ifụre ndimek se iyomde. Emeti ke Paul ọkọdọhọ ke Jehovah ama ayak mme idụt ‘ẹsan̄a ke usụn̄ idemmọ.’ N̄wed kiet emi mme akabade Bible ẹsidade ẹnam ndụn̄ọde ọdọhọ ke Abasi akayak mmọ “ẹnam se mmọ ẹmama.” Jehovah isikpakke-kpak owo ite okpono imọ. Enye ayak kpukpru nnyịn ibiere se iyomde ndinam.—Deuteronomy 30:19.

Ọyọhọ n̄kpọ iba emi ikpepde edi ke Jehovah oyom nnyịn ifiọk imọ. Se Paul eketịn̄de anam ifiọk emi. Enye ọkọdọhọ ke Jehovah iyakke n̄kpọ ntiense anana aban̄a idemesie. N̄wed oro iketịn̄de iban̄a ọdọhọ ke emi ọwọrọ ke Jehovah “anam mme owo ẹnen̄ede ẹfiọk utọ Abasi emi imọ idide.” Se Abasi okobotde anam ikụt “mme edu” esie, emi esịnede mfọnido, ọniọn̄, odudu, ye ima. (Rome 1:20) Jehovah etịn̄ ediwak n̄kpọ aban̄a idemesie ke Bible. (2 Timothy 3:16, 17) Ndi emi iwụtke ke enye oyom nnyịn ifiọk imọ?

Ọyọhọ n̄kpọ ita emi ikpepde edi ke Jehovah oyom nnyịn ikop inemesịt. Paul ọkọdọhọ ke Jehovah ‘anam esịt nnyịn ọyọhọ ye idatesịt.’ Idem mme idiọkowo oro mîfiọkke Jehovah ẹkeme ndidia se mmọ ẹmade ẹnyụn̄ ẹkop inemesịt. Edi Abasi oyom nnyịn inen̄ede ikop inemesịt ke nsinsi. N̄kukụre se idinọde owo utọ inemesịt emi edi ndikpep Bible mfiọk utọ owo emi Abasi edide nnyụn̄ nda se ikpepde ndu uwem.—Psalm 144:15; Matthew 5:3.

Idụhe owo emi mîdiaha mfọn Abasi kpukpru usen. Mmọdo, kpep nte ekemede ndikọm Abasi emi anamde esịt fo “ọyọhọ ye idatesịt.”