N̄kọtọn̄ọ ke ekpri mma mme eto ye unam. Ete mi ama esimen nnyịn aka ndiye ebiet ke obio nnyịn ke Central Finland. Mmama unam etieti. Ke ini n̄kedide eyenọwọn̄, ekesitie nte n̄kpememen kpukpru an̄wa ye ebua oro n̄kụtde n̄kama. Ke mma n̄kokpon owo, esịt ikenemke mi ndikụt nte mme owo ẹsinamde n̄kpọ ye unam. Ntre, mma ndụk n̄ka emi mîyakke owo ofiomo unam. Mma n̄kokụt mbon oro ẹkenyụn̄ ẹtiede nte ami.

Nnyịn ima isịn ibuot isịn itọn̄ inam mme owo ẹdiọn̄ọ ke unam enyene unen n̄ko. Ima isisan̄a ke udịm ika mme ufọkurua emi ẹnyamde ikpa ye idet unam ye mme itieutom emi ẹsiwotde unam ẹda ẹkpep nte ẹkpesọbọde owo idem. Ima inyụn̄ isiak obufa n̄ka emi edisikpemede mme unam. Sia ikesinamde n̄kpọ idat idat man inyene se iyomde, ima isinyene mfịna ye ukara. Ẹma ẹmụm mi ẹka esop ediwak ini.

Ke adianade ye nte mme owo ẹnamde n̄kpọ ye unam, esịt ikenemke mi n̄ko iban̄a mfịna ererimbot emi. Mma ndụk nsio nsio n̄ka, utọ nte N̄ka Emi Esede Aban̄a Unen Owo ke Ofụri Ererimbot ye N̄ka Emi Esede Aban̄a N̄kann̄kụk. Mma nnen̄ede nsịn idem ke mme n̄ka emi. Mma nsinam n̄kpọ man n̄n̄wam mme ubuene, mbon oro mînyeneke udia idia, ye mmọ eken emi mînyeneke owo.

Mma ndikụt ke n̄kemeke ndikpụhọde ererimbot emi. Okposụkedi emi mme n̄ka nnyịn ẹkekọkde n̄kpri mfịna, nnyịn ikekemeke ndikọk ikpọ mfịna ererimbot emi. Ererimbot ọkọdọdiọn̄ ọdiọk. Eketie nte idiọkn̄kpọ akan ererimbot ubọk, ndien idụhe eke ọdọn̄de enyịn. Ofụri ukeme emi n̄kesịnde ọkọwọrọ ikpîkpu.

Sia esịt mîkenemke mi ke ntak emi mmen̄kemeke ndikpụhọde ererimbot, mma ntọn̄ọ ndikere mban̄a Abasi ye Bible. Mma n̄kpekpep Bible ye Mme Ntiense Jehovah. Kpa ye oro n̄kokụtde ke mmọ ẹfọn ido ẹnyụn̄ ẹnen̄ede ẹma mi, n̄keben̄eke idem ndikpụhọde uwem mi ini oro. Edi idahaemi mma mbiere ndikpụhọde.

Mma n̄kụbọde Bible mi ntọn̄ọ ndikot. Bible ama enen̄ede ọdọn̄ mi esịt. Mma ndikụt ediwak itie ke Bible emi ọdọhọde itịm ise iban̄a unam. Ke uwụtn̄kpọ, Mme N̄ke 12:10 ọdọhọ ete ke “eti owo ekere uwem unam esie.” (Edisana Ŋwed Abasi Ibom) Mma ndikụt n̄ko nte ke idịghe Abasi edi mfịna ererimbot emi. Utu ke oro, ke se inamde ererimbot emi ọdiọk ntem edi emi ediwak owo mîmaha ndikop uyo Abasi. Ama enen̄ede enem mi ndifiọk nte Jehovah amade nnyịn onyụn̄ emede ime ye nnyịn.—Psalm 103:8-14.

Ini ntem ke n̄kokụt babru oro ẹkedọhọde ẹda ẹtobo n̄wed Nso ke Bible Enen̄ede Ekpep? Mma nda babru oro ndọhọ Mme Ntiense Jehovah ẹnọ mi n̄wed oro kiet. Ikebịghike Ntiense kiet ama asan̄a ye n̄wan esie edi ndikpep mi Bible, ndien mma nnyịme. Mma nnyụn̄ ntọn̄ọ ndidụk mbono esop mmọ ke Ufọkmbono Obio Ubọn̄. Emi ama anam ntọn̄ọ ndima se n̄kekpepde ke Bible.

Bible ama an̄wam mi nnam ediwak ukpụhọde. Mma ntre ndin̄wọn̄ sika ye ndin̄wọn̄ mmịn mbe ubọk. Mma ntọn̄ọ ndisịne ọfọn̄ nnyụn̄ n̄kama idem nte eyen owo, n̄kesinyụn̄ ntịn̄ke ikọ ntịme ntịme aba. Mma nnyụn̄ ntọn̄ọ ndikpono ukara. (Rome 13:1) N̄konyụn̄ ndụhe aba obụrobụt uwem.

Se ikọsọn̄de mi ikan ndinam ekedi ndiwọrọ ke nsio nsio n̄ka oro n̄kodụkde. Akpa kan̄a, eketie mi nte ke edieke n̄wọrọde n̄kpọn̄ n̄ka emi, n̄kpọ emi ayabiak ediwak owo ebịghi. Edi mma ndifiọk ke Obio Ubọn̄ Abasi edikọk mfịna ererimbot. Mma mbiere ndisịn ofụri ukeme mi nnam n̄kpọ Abasi nnyụn̄ n̄n̄wam mbon en̄wen ẹkpep ẹban̄a Obio Ubọn̄ esie.—Matthew 6:33.

Ke ini n̄kodude ke mme n̄ka oro, n̄kada ndusụk owo nte nti owo, nda mbon eken nte ndiọi owo, ndien mma nsisua mbon oro n̄kadade nte ndiọi owo. Edi Bible anam ntre ndisua mme owo. Mmama kpukpru owo idahaemi. (Matthew 5:44) Usụn̄ kiet emi n̄wụtde ke mmama kpukpru owo edi ndikwọrọ eti mbụk Obio Ubọn̄ Abasi nnọ mmọ. Esịt enem mi ndikụt nte utom emi ọnọde mme owo emem, idatesịt, ye ata idotenyịn.

Ndiyak n̄kpọ nsịn Jehovah ke ubọk anam mi nnyene emem. Mmetịm nnịm ke enye nte Andibot idiyakke ẹfiomo owo ye unam ke nsinsi m̀mê ndiyak ẹsobo isọn̄ emi. Obio Ubọn̄ esie ọyọdiọn̄ kpukpru se mme owo ẹbiatde ke ererimbot emi. (Isaiah 11:1-9) Esịt enem mi ndifiọk mme n̄kpọ emi, onyụn̄ enem mi ndin̄wam mme owo ẹtiene ẹnịm emi ke akpanikọ. N̄kereke aba ndikpụhọde ererimbot.