IBUOTIKỌ IKPAEDEM | NSO ISỊNE KE BIBLE?
Abasi Ọn̄wọn̄ọ Ndinyan̄a Owo
Abasi ama ọdọhọ Abraham ete ke “mfri” oro imọ ikọn̄wọn̄ọde edito ubon esie. Abasi ọkọdọhọ ke mfri emi ayada edidiọn̄ ọsọk “kpukpru mme idụt isọn̄.” (Genesis 22:18) Ekem Jacob eyeyen Abraham ama ada ubon esie okodụn̄ ke Egypt. Ubon emi ama ọtọt akabade idụt Israel.
Nte ini akakade, Pharaoh idiọk edidem Egypt ama esịn nditọ Israel ke ufụn tutu Abasi ada Moses osio mmọ ke ufụn Egypt. Abasi ama abahade Ididuot Inyan̄ anam mmọ ẹsan̄a ẹbe. Ekem Abasi ama ọnọ mme ibet ye akpan Ibet Duop emi edikpemede mmọ. Ibet emi ama owụt se mmọ ẹkpewade man Abasi efen mme idiọkn̄kpọ mmọ. Abasi ama ọdọhọ Moses ọdọhọ nditọ Israel ke Imọ iyọnọ mmọ prọfet en̄wen. Prọfet oro edidi “mfri” oro Abasi ọkọn̄wọn̄ọde.
Ke n̄kpọ nte isua ikie inan̄ ama ekebe, Abasi ama afiak ọn̄wọn̄ọ ọnọ Edidem David ete ke “mfri” oro ikọn̄wọn̄ọde ke In̄wan̄ Eden edikara ke nsinsi. Enye edidi Messiah, Andinyan̄a emi Abasi emekde ete edinyan̄a mme owo onyụn̄ anam isọn̄ emi edi Paradise.
Abasi ama ada David ye mme prọfet eken anam mme owo ẹfiọk ediwak n̄kpọ ẹban̄a Messiah. Mmọ ẹma ẹdọhọ ke enye ọyọfọn ido onyụn̄ osụhọde idem; ye nte ke ini emi enye edikarade, ke biọn̄, ufịk, ye ekọn̄ ididụhe aba. Kpukpru owo ẹdidu ke emem, unam idinyụn̄ inamke owo n̄kpọ. Udọn̄ọ, ufen, ye n̄kpa ididụhe aba sia Abasi mîkoyomke mme owo ẹbọ ufen, ẹdọn̄ọ, ẹnyụn̄ ẹkpa. Ndien mme owo oro ẹkekpade ẹyeset ẹfiak ẹdidu ke isọn̄ emi.
Abasi ama ọdọhọ prọfet Micah etịn̄ ke Messiah edimana ke Bethlehem, onyụn̄ ọdọhọ prọfet Daniel ọdọhọ ke ẹyewot enye. Edi Abasi ama anam enye eset onyụn̄ anam enye edi Edidem ke heaven. Daniel ama ọdọhọ n̄ko ke Obio Ubọn̄ Messiah emi oyosobo kpukpru ukara ererimbot emi efep onyụn̄ akara isọn̄. Ndi Messiah ama edi nte Abasi ọkọn̄wọn̄ọde?
