N̄kokpon ke Santiago emi edide ibuot obio Chile. Mme ọn̄wọn̄ ikọn̄ekpo, sika, mme ada n̄kpọsọn̄ ibọk, ye ndiọi owo eken ẹkeyọyọhọ edem nnyịn. Ẹma ẹwot ete mi ke ini n̄kedide isua ition. Eka mi ama emen mi aka okodụn̄ ye ete kiet emi ekesidude uwem afai afai. Ete emi ama esitịm mi ye eka mi. Ke nteti nte enye ekesifiomode nnyịn.

Ke mma n̄kokpon, mma ntiene ndu uwem afai. Mma nsikop mme idiọk ikwọ, n̄n̄wọn̄ n̄kpọ etieti, nda n̄kpọsọn̄ ibọk, nnyụn̄ n̄n̄wọn̄ ikọn̄ekpo. N̄kesin̄wana ye mme anyam n̄kpọsọn̄ ibọk kpukpru ini, ndien mmọ ẹma ẹyom ndiwot mi ediwak ini. Isan̄ kiet, ẹma ẹdọn̄ mme owo ẹte ẹdiwot mi. Edi mma mbọhọ mfehe ke mmọ ẹma ẹkekịm mi ke ikwa. Isan̄ en̄wen, mme anyam n̄kpọsọn̄ ibọk ẹma ẹmụm mi, ẹwụk mi ikan̄ ke ibuot ẹnyụn̄ ẹyom ndiyịri mi n̄wot.

Mma mma n̄kaiferi kiet emi ekerede Carolina ke 1996, ndien ima inam ndọ ke 1998. N̄kekemeke nditre ikponesịt ye afai. Ntre ke akpan nnyịn ama akamana, mma n̄kere m̀mê ndinyụn̄ n̄kama enye nte ebeeka mi ekesikamade mi. Ntem mma n̄ka ufọkibọk n̄kese m̀mê ẹyekeme ndin̄wam mi. Edi ofụri usọbọ ye ibọk oro ẹkenọde mi ọkọwọrọ ikpîkpu. Ata ekpri n̄kpọ ekesiyat mi esịt. Ekesitie nte mmọn̄ n̄wot owo. Ntre mma mbiere ndiwot idem mbak ndikam n̄wot ikọtufọk mi usen kiet. Edi mmọkọm Abasi sia mmen̄kowotke idem.

Ke ata ediwak isua, n̄kenịmke ke Abasi do, edi ama ọdọn̄ mi ndiyom Abasi. Ntre, mma ntọn̄ọ ndika ufọkabasi. Mme Ntiense Jehovah ẹma ẹsidi ẹdikpep n̄wan mi Bible. Mma nsua mmọ tutu, ndusụk ini mma nsisụn̄i mmọ. N̄kekere ke mmọ ẹyesụn̄i mi usiene, edi mmọ ikesibọrọke mi ikọ.

Usen kiet, Carolina n̄wan mi ama ọdọhọ n̄kot Psalm 83:18 ke Bible mi. Itie Bible oro ọdọhọ ke Abasi ekere Jehovah. Idem ama akpa mi ndifiọk ke Abasi ekere Jehovah  ke ini ufọkabasi nnyịn mîkọdọhọke ke Abasi enyene enyịn̄. Mma ntọn̄ọ nditiene Mme Ntiense Jehovah n̄kpep Bible ke isua 2000.

Nte n̄kosụk n̄kpepde Bible, ama enem mi ndidiọn̄ọ ke Jehovah esinen̄ede atua owo mbọm onyụn̄ efen ọnọ owo. Ke uwụtn̄kpọ, Exodus 34:6, 7 ọdọhọ ke Jehovah edi “Abasi mbọm ye mfọn, isọpke iyatesịt edi awak ima-mfọnido ye akpanikọ, enịm ima-mfọnido ọnọ ediwak tọsịn, efen ndudue ye ubiatibet ye idiọkn̄kpọ.”

Kpa ye oro, ikememke inọ mi ndinam se n̄kekpepde. N̄kekere ke tutu amama ndikemeke nditre afai. Mma ndomo, edi ini ekededi oro mmen̄kemeke ndimụm idem n̄kama, n̄wan mi ama esidọn̄ mi esịt. Enye ama esidọhọ ke Jehovah ke okụt ukeme oro nsịnde. N̄wan mi ama aka iso an̄wam mi ndinam se Jehovah amade kpa ye oro eketiede nte ndikemeke tutu amama.

Usen kiet, Alejandro emi ekesikpepde mi Bible ama ọdọhọ n̄kot Galatia 5:22, 23. Itie Bible oro ọdọhọ ke mbun̄wụm spirit Abasi edi “ima, idatesịt, emem, anyanime, mfọnido, eti ido, mbuọtidem, ifụre ifụre ido, mfara ke idem.” Alejandro ọkọdọhọ mi ke idụhe owo ndomokiet emi ekemede nditie ke idemesie nnyene mme edu emi, edi ke edisana spirit Abasi kpọt ekeme ndinam owo enyene. Ndikop emi ama enen̄ede an̄wam mi.

Ekem mma ndụk akamba mbono Mme Ntiense Jehovah. Nte ẹkenamde n̄kpọ ke nde ke nde, ẹsanade idem, ẹnyụn̄ ẹtiede ntre ẹkpono Abasi ama anam mfiọk ke mmokụt ufọkabasi akpanikọ. (John 13:34, 35) Ntem mma nna baptism ke February 2001.

Jehovah anam ntre uwem afai nnyụn̄ ntọn̄ọ nditie emem emem. Etie nte n̄kpọ emi enye obụhọrede mi ke okpụk osio. Ediwak owo ẹkesasua mi, edi nduọhọke mmọ. Esịt enem mi idahaemi ndidiana ye n̄wan ye akpan ye udọ nnyịn nnam n̄kpọ Jehovah.

Mme iman mi ye n̄kani ufan mi ikpenịmke ke ami ndi emi. Ntre, ediwak mmọ ẹtọn̄ọ ndikpep Bible. Mmonyụn̄ n̄n̄wam mbon en̄wen ẹdidiọn̄ọ Jehovah. Esịt enen̄ede enem mi ndikụt nte Bible okpụhọrede mmọ n̄ko!