Ndi Jehovah ama kpukpru se ikọt esie ẹnamde man ẹnem enye esịt? Ndusụk owo ẹkere ke enye idọn̄ke enyịn ke se nnyịn inamde. Edi owo emi ekerede n̄kpọ ntem idiọn̄ọke Abasi. Bible ọdọhọ ke Jehovah adara ofụri ukeme emi ikọt esie ẹsịnde ndinam n̄kpọ esie. Se apostle Paul eketịn̄de ke Mme Hebrew 11:6 anam idọhọ ntre.

Nso ke ikpanam man inem Abasi esịt? Paul ọdọhọ ke ‘owo emi mînyeneke mbuọtidem ikemeke nditịm nnem Abasi esịt.’ N̄kọ omokụt ke Paul idọhọke ke ọsọsọn̄ owo emi mînyeneke mbuọtidem ndinem Abasi esịt, edi ọdọhọ ke utọ owo emi ikemeke ndinem Abasi esịt. Oro ọwọrọ ke edieke iyomde ndinem Abasi esịt, ke ana inyene mbuọtidem.

Nso utọ mbuọtidem isinem Jehovah esịt? Owo emi ọdọhọde ke imenyene mbuọtidem enyene ndinam n̄kpọ iba. Akpa, ana enye ‘enịm ke Abasi odu.’ Owo akpasan̄a didie enem Abasi esịt edieke enye mînịmke ke enye do! Owo emi enyenede ata mbuọtidem enyene ndinam se ikande oro sia idem mme demon n̄ko ẹnịm ke Jehovah do. (James 2:19) Nte idude uwem ediwụt ke imenyene mbuọtidem ke Abasi. Edieke idude uwem emi enemde Abasi esịt, oro owụt ke imenen̄ede inyene mbuọtidem.—James 2:20, 26.

Owo emi ọdọhọde ke imenyene mbuọtidem enyene n̄ko ndinịm nte ke Abasi “edi andinọ mbon oro ẹnen̄erede ẹyom enye utịp.” Utọ owo emi enen̄ede enịm ke Abasi ikemeke ndifre kpukpru se inamde man inem enye esịt. (1 Corinth 15:58) Owo akpasan̄a didie enem Jehovah esịt edieke enye mînịmke ke enye ekeme ndinọ ikọt esie utịp, ke onyụn̄ enen̄ede ọdọn̄ enye ndinam emi! (James 1:17; 1 Peter 5:7) Owo emi ekerede ke Abasi idọn̄ke enyịn ke se nnyịn inamde, ye nte ke enye idinọhọ nnyịn utịp idiọn̄ọke Abasi.

Mmanie ke Jehovah esinọ utịp? Paul ọdọhọ ke esinọ “mbon oro ẹnen̄erede ẹyom enye.” N̄wed emi mme akabade n̄wed ẹsidade ẹnam utom ọdọhọ ke Ikọ Greek emi ẹkabarede “ẹnen̄erede ẹyom enye” iwọrọke ndiyom Abasi nte owo oyom n̄kpọ emi okosopde, edi ọwọrọ ndisịn idem n̄kpono Abasi. N̄wed en̄wen ọdọhọ ke Ikọ Greek oro ọwọrọ ndisịn ofụri ukeme nnam n̄kpọ Abasi. Emi anam nnyịn ifiọk utọ mbon oro Jehovah esinọde utịp—oro edi, mbon oro ẹbuọtde idem ke enye, ẹmade enye ke ofụri esịt, ẹnyụn̄ ẹsịnde ifịk ẹnam n̄kpọ esie.—Matthew 22:37.

Nso utịp ke Jehovah edinọ ikọt esie? Enye ọn̄wọn̄ọ ndinọ mmọ nsinsi uwem ke Paradise ke isọn̄ ndiwụt ke imama mmọ inyụn̄ idara se mmọ ẹnamde. (Ediyarade 21:3, 4) Ndi ikọ ọwọrọ ke Jehovah inọhọ ikọt esie utịp ndomokiet idahaemi? Iwọrọke! Enye ọnọ mbon oro ẹsịnde idem ẹyom enye uwak edidiọn̄ mfịn. Edisana spirit ye Ikọ Abasi anam mmọ ẹdu ata eti uwem emi ọnọde mmọ inemesịt.—Psalm 144:15; Matthew 5:3.

Omokụt do ke Jehovah edi Abasi emi amade se ikọt esie ẹnamde ẹnọ enye. Ke ama ọkọdiọn̄ọ emi, ndi idọn̄ke fi ndinen̄ede nsan̄a n̄kpere Abasi? Edieke ọdọn̄de, tọn̄ọ idahaemi kpep nte ekemede ndinyene mbuọtidem emi edinamde Jehovah ọnọ fi utịp, nyụn̄ du uwem emi owụtde ke emenyene utọ mbuọtidem emi.