Mbon emi mînịmke ke Abasi do ẹma ẹwet n̄kpọ ẹwụk ke usụn̄ ẹte: “Ndi ufọn odu ndiyom Abasi? Ufọn idụhe.” Emi owụt ke ndusụk owo ẹkere ke ufọn idụhe ndiyom Abasi.

Idem ndusụk mbon oro ẹdọhọde ke imenịm ke Abasi do ẹnyụn̄ ẹdu uwem nte mbon oro mînịmke. Salvatore Fisichella emi edide akwa bishop Ufọkabasi Catholic ọdọhọ ete: “Idụhe eke edinịmde ke nnyịn idi mme Christian sia nnyịn inyụn̄ idu uwem nte mbon emi mîdiọn̄ọke Abasi.”

Ndusụk owo inyeneke-nyene ini inọ Abasi. Mmọ ẹkere ke Abasi inyeneke ufọn ndomokiet ke uwem mmimọ. N̄kukụre ini emi utọ mbon oro ẹsiyomde Abasi edi ke ini n̄kpọ anamde mmọ m̀mê ke ini emi mmọ ẹyomde enye anam n̄kpọ ọnọ mmimọ. Mmọ ẹdinam etie nte Abasi edi eyenufọk mmọ.

Mbon eken inen̄ekede ikụt ufọn ufọkabasi emi mme owo ẹkade sia mmọ mînamke se ẹkpepde ke ufọkabasi. Ke uwụtn̄kpọ, n̄kpọ nte mbon Catholic itiaita ke otu owo duop ke Germany ẹdọhọ ke idiọkke owo ndidu ye n̄wan mbemiso ẹnamde ndọ. Edi Bible idọhọke ntre, owo inyụn̄ ikpepke ntre ke ufọkabasi mmọ. (1 Corinth 6:18; Mme Hebrew 13:4) Idịghe mbon Catholic ikpọn̄ ẹdu uwem ntem. Mme etubom ke ediwak ufọkabasi ẹsiseme idem nte ke mbon ufọkabasi mmimọ ẹdu uwem nte mbon oro mînịmke ke Abasi do.

Se isụk inemede emi anam ndusụk owo ẹbụp m̀mê ufọn odu ndiyom Abasi. Idịghe akpa ẹbụpde mbụme emi edi emi. N̄wed Genesis owụt ke ẹma ẹbebụp mbiet mbụme emi ke In̄wan̄ Eden. Ntre man idiọn̄ọ ibọrọ mbụme emi, ẹyak ise ndusụk n̄kpọ emi ẹnemede ke N̄wed Genesis.