Abasi edi spirit. Enye okobot enyọn̄ ye isọn̄ ye kpukpru n̄kpọ emi ẹdude uwem. Idụhe eke okobotde Abasi, enye inyeneke ntọn̄ọ. (Psalm 90:2) Abasi oyom mme owo ẹkpono imọ ẹnyụn̄ ẹnen̄ede ẹfiọk orụk owo emi imọ idide.—Kot Utom 17:24-27.

Abasi edi owo onyụn̄ enyene enyịn̄. Edieke idụn̄ọrede mme n̄kpọ emi enye okobotde, iyọdiọn̄ọ ndusụk edu Abasi. (Rome 1:20) Edi edieke iyomde nditịm ndiọn̄ọ Abasi, ana nnyịn ikpep Bible.—Kot Psalm 103:7-10.

Jehovah Abasi emi okobotde nnyịn imaha utụk ye ufịk. Enye okobot nnyịn ke mbiet idemesie. (Deuteronomy 25:16) Ntak edi oro nnyịn mîsimaha ndikụt ẹtụkde m̀mê ẹfịkde owo. Idịghe Abasi edi ntak utụk ye ufịk emi ẹdude ke ererimbot mfịn. Abasi ọnọ owo ifụre ndimek se enye oyomde ndinam. Edi ediwak owo ẹda ifụre emi Abasi ọnọde mmọ ẹmia mbon en̄wen ufen. Utọ n̄kpọ emi esibiak Jehovah etieti.—Kot Genesis 6:5, 6; Deuteronomy 32:4, 5.

Jehovah imaha idiọkn̄kpọ, ntre enye idiyakke utụk ye ufịk aka iso ke nsinsi. (Psalm 37:28, 29) Bible ọdọhọ ke Abasi ọmọn̄ ososio kpukpru idiọkn̄kpọ efep ke isọn̄ emi.—Kot 2 Peter 3:7-9, 13.