Emekeme ndibụp ete, ‘Edieke edide Abasi ọdiọn̄ọ kpukpru n̄kpọ, ọdiọn̄ọ se n̄kerede ye se nyomde, ufọn ndibọn̄ akam ndien-e?’ Mbụme oro idiọkke. N̄kọ Jesus ọkọdọhọ ke Abasi ‘ọfiọk mme n̄kpọ emi oyomde idem mbemiso eben̄ede enye.’ (Matthew 6:8) Edidem David okonyụn̄ ekere n̄kpọ ntem, ntak edi oro enye ọkọdọhọde ke Psalm 139:4 ete: “Idụhe ikọ emi odude mi ke edeme, O Jehovah, sese! afo ọmọfiọk mmọ kpukpru.” Ntak ndien isibọn̄de akam inọ Abasi? Man ibọrọ mbụme emi,  yak ise se Bible etịn̄de aban̄a akam emi ikọt Abasi ẹkesibọn̄de. *

Bible ọdọhọ ke Jehovah * ọdiọn̄ọ kpukpru n̄kpọ. Enye ọdiọn̄ọ kpukpru n̄kpọ aban̄a mme asan̄autom esie kiet kiet onyụn̄ ama mmọ. (Psalm 139:6; Rome 11:33) Enye itiehe nte kọmputa emi esitide se ẹkedọn̄de ẹban̄a owo, edi se owo oro anamde m̀mê ekerede ibeheke enye. Edi Abasi enen̄ede ama ndifiọk se nnyịn ikerede sia enye oyom isan̄a ikpere imọ. (Psalm 139:23, 24; James 4:8) Ntak edi oro Jesus ọkọdọhọde mbet esie ẹsibọn̄ akam kpa ye oro edide Ete esie ọfọfiọk se nnyịn iyomde. (Matthew 6:6-8) Adan̄a nte itịn̄de nte etiede nnyịn ke idem inọ Abasi, ntre ke iditịm isan̄a ikpere enye.

Ndusụk ini, nnyịn isidiọn̄ọke se ikpeben̄ede Abasi ke akam. Ama etịbe ntre, Abasi esinam se nnyịn iyomde ọnọ nnyịn sia enye ọdiọn̄ọ se ifịnade nnyịn okposụkedi emi nnyịn mîdiọn̄ọke. (Rome 8:26, 27; Ephesus 3:20) Ima ikụt nte Abasi an̄wamde nnyịn ntre, idem ke n̄kpọ oro nnyịn mîkọfiọkke nte enye edinamde, emi esinam inen̄ede isan̄a ikpere enye.

Bible etịn̄ ke Ata ọkpọsọn̄ Abasi esibọrọ akam mbon emi ẹsọn̄ọde ẹda ye enye. Bible etịn̄ n̄ko ntak emi Abasi mîsibọrọke akam ndusụk owo. Ke uwụtn̄kpọ, ke ini afai okokponde ke Israel ke eset, Abasi ama ọdọn̄ prọfet Isaiah ọkọdọhọ ikọt esie ete: “Okposụkedi mbufo ẹbọn̄de ediwak akam, ami n̄kopke; iyịp ọmọyọhọ mbufo ke ubọk.” (Isaiah 1:15) Emi owụt ke Abasi isikopke akam mbon emi mînịmke ibet esie m̀mê mbon emi ẹben̄ede se mmọ mîkpeben̄eke.—Mme N̄ke 28:9; James 4:3.

Edi Bible ọdọhọ ke 1 John 5:14 ete: “Se ededi oro nnyịn iben̄ede nte ekemde ye uduak esie, enye ọbiọn̄ utọn̄ ke eben̄e nnyịn.” Ndi emi ọwọrọ ke Abasi ọyọnọ ikọt esie se ededi oro mmọ ẹben̄ede? Iwọrọke. Apostle Paul ama ekpe Abasi ubọk ikata ete osio imọ “n̄kukịm ke obụkidem.” (2 Corinth 12:7, 8) Etie nte enyịn ekesibiak Paul. Abasi ama ọnọ Paul odudu ndikọk mme owo udọn̄ọ nnyụn̄ nnam owo eset, edi enye ekenyene ndiyọ esie. Anaedi emi ama afịna enye etieti. (Utom 19:11, 12; 20:9, 10) Okposụkedi emi Abasi mîkọbọrọke akam Paul nte enye okoyomde, Paul ama enem esịt nte Abasi ọkọnọde imọ odudu ndiyọ mfịna oro.—2 Corinth 12:9, 10.

Ndusụk owo ke Bible ẹma ẹsibọn̄ akam, Abasi onyụn̄ eyere mmọ ke ebe oro. (2 Ndidem 20:1-7) Edi ikesidịghe ntem kpukpru ini. Ama esifịna ndusụk ikọt esie ke ini eketiede nte Abasi ibọrọke akam mmọ. Ke uwụtn̄kpọ, Edidem David ama obụp Abasi ete: “O Jehovah, adan̄a didie ke afo edifre mi? Ke nsinsi? (Psalm 13:1) Edi ke ini enye etide ediwak ini emi Jehovah akanyan̄ade enye, enye ama aka iso ọbuọt idem ke enye. Kpa ke akam emi ke David ọkọdọhọ Abasi ete: “Amaedi ami, mmọbuọt idem ke ima-mfọnido  fo.” (Psalm 13:5) Kpa nte ekedide ye David, ikọt Abasi mfịn ẹkeme ndikọbọ ke akam tutu Abasi ọbọrọ mmọ.—Rome 12:12.

Abasi esinam se enye okụtde ke ọyọfọn ye nnyịn.

Idịghe kpukpru ini ke esidi nditọ ẹma ẹbeben̄e mme ete ye eka n̄kpọ, mmọ ẹnọ. Ntem ke Abasi esinyụn̄ anam ye nnyịn. Enye isibọrọke akam nnyịn ndusụk ini nte nnyịn ikerede ye ke ini iyomde. Edi nnyịn imọfiọk ke sia Abasi edide edima Ete, ke enye ọyọnọ nnyịn se enye okụtde ke ọfọn ye nnyịn ye ke ini enye okụtde ke ọfọn.—Luke 11:11-13.

Abasi ekeme ndibọrọ nnyịn edi nnyịn ifiọkke.

Edieke ibọn̄de akam idọhọ Jehovah emen mfịna nnyịn efep edi mfịna oro osụk ododu, ndi oro akpanam idọhọ ke Jehovah ibọrọke akam nnyịn? Ihih. Ikpakam ise m̀mê enyene nte Abasi ọbọrọde akam nnyịn edi nnyịn ifiọkke. Ke uwụtn̄kpọ, imekeme ndinyene mfịna ndien ufan nnyịn edi edin̄wam nnyịn. (Mme N̄ke 17:17) Ndi ukereke ke anaedi Jehovah ada ufan oro ọbọrọ akam nnyịn? Abasi ekeme ndida Bible mbọrọ akam nnyịn. Bible ekeme nditeme nnyịn se ikpanamde ke ini inyenede mfịna.—2 Timothy 3:16, 17.

Ediwak ini, Abasi isimenke-men mfịna ifep, edi esisọn̄ọ nnyịn idem man ikeme ndiyọ. (2 Corinth 4:7) Ke uwụtn̄kpọ, ini kiet Jesus ama ekpe Ete esie ubọk ete emen se ikoyomde ndiwọrọ imọ efep sia enye ama ọdiọn̄ọ ke n̄kpọ oro ayanam ẹsuene enyịn̄ Abasi. Utu ke ndimen mfep, Abasi akakam ọdọn̄ angel kiet ete ọkọsọn̄ọ enye idem. (Luke 22:42, 43) Abasi ekeme n̄ko ndinam ufan nnyịn etịn̄ ikọ ọdọn̄ nnyịn esịt ke ini inyenede mfịna. (Mme N̄ke 12:25) Edieke nnyịn mîkpemeke, imekeme ndifre ke Abasi ada owo emi ọbọrọ akam nnyịn sia emi mîdịghe se ikekerede.

Abasi esibọrọ ndusụk akam ke edikem ini esie.

Bible ọdọhọ ke Ata Ọkpọsọn̄ Abasi esibọrọ akam mbon emi ẹsụhọrede idem “ke edikem ini.” (1 Peter 5:6) Ntre edieke Jehovah mîsọpke ibọrọ akam nnyịn, inaha ikere ke enye idọn̄ke enyịn ke se ifịnade nnyịn. Abasi emi okobotde nnyịn ọdiọn̄ọ mfịna nnyịn akan nte nnyịn idiọn̄ọde, ntre enye edibọrọ akam nnyịn ke ini enye okụtde ke ọyọfọn ye nnyịn.

Yak inọ uwụtn̄kpọ ise. Da nte ke ekpri eyen fo ọdọhọ fi edep enan̄ukwak ọnọ imọ. Ndi eyedep ọnọ enye kpa idahaoro? Edieke okụtde ke enye ekpri akaha ndiwat enan̄ukwak, ndi oyosụk edep ọnọ enye? Ududepke. Edidep ke enye ama okokpon ekem ndiwat. Ntre ke Abasi esinyụn̄ anam ye nnyịn. Enye esinọ nnyịn ‘se iyomde’ ke edikem ini esie.—Psalm 37:4.

Bible ọdọhọ mme Christian ẹnịm ke akam enyene ufọn. Ndusụk owo ẹkeme ndidọhọ ke emem nditịn̄ edi ke imemke ndinam. Imọfiọk ke isimemke edieke inyenede akamba mfịna mîdịghe edieke ẹfịkde nnyịn. Ekeme ndisọn̄ nnyịn ndinyene ime mbet Abasi ọbọrọ akam nnyịn ke utọ ini ntem. Edi ọfọn iti se Jesus ekekpepde nnyịn aban̄a edibọn̄ akam kpukpru ini.

Jesus ama ọnọ uwụtn̄kpọ ubuene ebeakpa emi ekesikade ebịne idiọk ebiereikpe kiet ọkọdọhọ  ebiere ikpe imọ ndien. (Luke 18:1-3) Okposụkedi emi ọbọn̄ emi mîkamaha ndin̄wam ebeakpa oro ke nsonso oro, ke akpatre enye ama ọdọhọ ete: “Nyebiere edinen ikpe nnọ enye, man enye okûdi mi aba edifịna mi tutu n̄kpa mba.” (Luke 18:4, 5) Ke usem emi ẹkedade ẹwet itie emi, ọbọn̄ oro ọkọdọhọ ke iyanam se ebeakpa oro oyomde mbak enye “editọ imọ enyịn” emi ọwọrọde mbak mma oro “edibiat imọ enyịn̄.” * Edieke utọ owo emi ekenyịmede ndibiere ikpe mma oro mbak ẹdibiat enye enyịn̄, ndi ukereke ke Abasi emi akam edide ata eti Ete nnyịn ayanyan̄a mbon emi “ẹsemede ẹnọ enye uwemeyo ye okoneyo”? Abasi “ayawara anam ẹbiere edinen ikpe ẹnọ mmọ” kpa nte Jesus ọkọdọhọde.—Luke 18:6-8.

Kpa ye edide ekeme ndikak nnyịn ndusụk ini ndiyịre n̄kpe Abasi ubọk nte anyan̄a nnyịn, inaha ikpa mba. Edieke ikade iso ibọn̄ akam, oro owụt ke imenen̄ede inịm ke Abasi ayanam se iben̄ede enye. Ke ini ikụtde nsio nsio usụn̄ emi Abasi ọbọrọde akam nnyịn, emi ayanam inen̄ede ikpere enye. Mmọdo, edieke ikade iso ibọn̄ akam inyụn̄ inyene mbuọtidem, Jehovah iditreke ndibọrọ akam nnyịn.—Luke 11:9.