Nte iketịn̄de ke akpa ibuotikọ, akpan utom Jesus ekedi ‘ndikwọrọ nnyụn̄ ntan̄a eti mbụk obio ubọn̄ Abasi.’ (Luke 8:1) Enye ikadaha ifu isịn, edi ama esisan̄a ke ofụri Israel ekpep mme owo aban̄a Obio Ubọn̄ Abasi. Ẹwet nte enye ọkọkwọrọde ikọ ke mme Gospel, ndien ẹsiak Obio Ubọn̄ Abasi ẹbe itie 100. Jesus ke idemesie eketịn̄ ikọ ke ata ediwak itie oro ẹsiakde Obio Ubọn̄ do. Ndien sia mîdịghe kpukpru se Jesus eketịn̄de ke ẹkewet ẹsịn ke Bible, anaedi enye ama etịn̄ aban̄a Obio Ubọn̄ Abasi akan oro.—John 21:25.

Ntak emi Jesus akadade Obio Ubọn̄ Abasi nte ata akpan n̄kpọ ke ini enye okodude ke isọn̄? Enye ama ọdiọn̄ọ ke Abasi emek imọ Edidem Obio Ubọn̄ oro. (Isaiah 9:6; Luke 22:28-30) Edi idịghe ndibọ ubọn̄ akanam enye ada Obio Ubọn̄ Abasi nte ata akpan n̄kpọ. (Matthew 11:29; Mark 10:17, 18) Enye akama Obio ubọn̄ Abasi sia enye ama ọdiọn̄ọ se Obio Ubọn̄ emi edinamde inọ mbon emi enye amade, oro edi, Ete esie ye mbet esie emi ẹnamde n̄kpọ Abasi. Ndien enye osụk amama Obio Ubọn̄ Abasi! *

Jesus enen̄ede ama Ete esie. (Mme N̄ke 8:30; John 14:31) Enye ama mme edu Ete esie, utọ nte ima, mbọm, ye nte enye mîsikpehe ukwan̄ikpe. (Deuteronomy 32:4; Isaiah 49:15; 1 John 4:8) Ntre, esibiak Jesus ndikop ẹsude nsu ẹdian Ete esie, utọ nte owo ndidọhọ ke Abasi idọn̄ke enyịn ke ufen emi mme owo ẹbọde ye nte ke enye oyom nnyịn ibọ ufen. Emi edi kiet ke otu ntak emi akanamde Jesus esisịn idem ọkwọrọ “eti mbụk obio ubọn̄.” Enye ama ọdiọn̄ọ ke Obio Ubọn̄ Abasi ayanam enyịn̄ Abasi asana. (Matthew 4:23; 6:9, 10) Didie ke enye edinam emi?

Jehovah ayada Obio Ubọn̄ esie anam mme ukpụhọde emi ẹdifọnde ye kpukpru owo. “Enye ọyọkwọhọde kpukpru mmọn̄eyet ke enyịn” nti owo efep. Jehovah oyosio kpukpru se isinamde ẹtua eyet efep. Enye oyokụt ete ke ‘n̄kpa idụhe aba, mfụhọ m̀mê ntuan̄a m̀mê ubiak inyụn̄ idụhe aba.’ (Ediyarade 21:3, 4) Abasi eyetre ufen ofụri ofụri ke Obio Ubọn̄ esie. *

 Imosụk ise Jesus ekenen̄erede esịn idem ọkwọrọ Obio Ubọn̄ Abasi ọnọ mme owo. Enye ama ọdiọn̄ọ ke Obio Ubọn̄ emi oyowụt nte Ete esie enen̄erede enyene odudu esinyụn̄ atuade owo mbọm. (James 5:11) Jesus ama ọfiọk n̄ko ke Obio Ubọn̄ Abasi ọyọfọn etieti ye mbon en̄wen emi imọ imade—oro edi, nti owo.

Jesus ama ododu ye Ete esie ke heaven anyan ini mbemiso enye edide isọn̄. Ete esie akada enye obot kpukpru se idude mfịn—ekondo nnyịn emi enyenede uten̄e ye mme anana-ibat ntantaọfiọn̄, ye ediye isọn̄ nnyịn emi ye mme unam ye eto ke esịt. (Colossae 1:15, 16) Edi, ke otu kpukpru emi, “se ikọnọde [Jesus] idatesịt ekedi” mme owo.—Mme N̄ke 8:31.

Ima akanam Jesus esikwọrọ ikọ ọnọ mme owo. Enye ama anam mme owo ẹfiọk ke imọ ikedi isọn̄ man ‘iditan̄a eti mbụk inọ mme ubuene.’ (Luke 4:18) Jesus ama esinanam owụt nte imọ imade mme owo, idịghe nditetịn̄ kpọt. Ke uwụtn̄kpọ, ke ini akwa otuowo ẹkesopde idem ndikop ukwọrọikọ Jesus, “mbọm mmọ [ama] anam enye, enye onyụn̄ ọkọk mbon udọn̄ọ mmọ.” (Matthew 14:14) Ke ini ete kiet emi ọkọdọn̄ọde ata idiọk udọn̄ọ ọkọdọhọde ke Jesus ekeme ndinam udọn̄ọ okụre imọ edieke enye amade, mbọm esie ama anam enye. Jesus ama ọdọhọ enye ete: “Mmama. Sana.” Nte udọn̄ọ akasan̄ade okụre enye edi oro. (Luke 5:12, 13) Ke ini Jesus okokụtde Mary ufan esie atuade n̄kpa Lazarus eyeneka esie, Jesus ama “omụm mmụm ke spirit, esịt onyụn̄ etịmede enye.” Enye ama “atua eyet.” (John 11:32-36) Ekem, enye ama anam se mmọ mîkodorike enyịn—anam Lazarus emi akakpade usen inan̄ eset!—John 11:38-44.

Jesus ama ọfiọk ke se imọ ikanamde inọ mme owo ini oro ididịghe ke nsinsi. Enye ama ọfiọk ke ebebịghi awawara kpukpru mbon oro imọ ikọkde udọn̄ọ ẹyefiak ẹdọn̄ọ, kpukpru mbon oro imọ inyụn̄ inamde ẹset ẹyefiak ẹkpan̄a. Edi Jesus ama ọfiọk n̄ko ke Obio Ubọn̄ Abasi oyosio mme mfịna emi efep ke nsinsi. Oro edi ntak emi enye mîkanamke utịben̄kpọ kpọt, edi esịn idem n̄ko ọkwọrọ “eti mbụk obio ubọn̄.” (Matthew 9:35) Mme utịben̄kp̣ọ emi ẹkewụt se Obio Ubọn̄ Abasi edinamde ke ofụri ererimbot ke mîbịghike. Kop se Bible etịn̄de mi aban̄a se Abasi ọn̄wọn̄ọde ndinam ini oro.

[Mme Ikọ Idakisọn̄]

•  Udọn̄ọ ididụhe aba.

  “Ke ini oro enyịn ẹyen̄wan̄a mme nnan, utọn̄ ẹyenyụn̄ ẹsịrede mme inan. Ke ini oro mbụn̄ọ ọyọfrọ nte ayara edop, edeme imụm oyonyụn̄ ọkwọ ke idatesịt.” N̄ko, “baba andidụn̄ kiet ididọhọke ite: ‘Ndọdọn̄ọ.’”—Isaiah 33:24; 35:5, 6.

• N̄kpa ididụhe aba.

  “Ndinen owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.”—Psalm 37:29.

  “Enye eyemen n̄kpa emen ke nsinsi, Jehovah Akakan Ọbọn̄ Andikara oyonyụn̄ ọkwọhọde mmọn̄eyet efep ke iso kpukpru owo.”—Isaiah 25:8.

• Mbon emi ẹkekpade ẹyeset.

  “Ini ke edi eke kpukpru mme andidu ke udi editi ẹdikopde enye uyo ẹwọn̄ọ ẹdi.”—John 5:28, 29.

  Mme owo “ẹyeset ke n̄kpa.”—Utom 24:15.

• Kpukpru owo ẹyenyene ufọk ye utom.

  “Mmọ ẹyebọp ufọk ẹnyụn̄ ẹdụn̄ ke esịt; mmọ ẹyenyụn̄ ẹtọ in̄wan̄ vine ẹnyụn̄ ẹdia mbun̄wụm mmọ. Mmọ idibọpke ndien owo en̄wen odụn̄; mmọ iditọhọ ndien owo en̄wen adia. . . . Ndimek ikọt mi ẹyedia ufọn utom ubọk mmọ ọyọhọ ọyọhọ.”—Isaiah 65:21, 22.

•  Ekọn̄ ididụhe aba.

  “Enye amanam ekọn̄ etre tutu esịm utịt isọn̄.”—Psalm 46:9.

  “Idụt idimenke akan̄kan̄ itiene idụt, mmọ idinyụn̄ ikpepke aba ekọn̄.”—Isaiah 2:4.

• Kpukpru owo ẹyenyene udia.

  “Isọn̄ oyon̄wụm mbun̄wụm esie; Abasi, kpa Abasi nnyịn, ọyọdiọn̄ nnyịn.”—Psalm 67:6.

  “Uwak n̄kpasịp ẹyedu ke isọn̄; ọyọyọhọ ọduọhọ ke mme enyọn̄ obot.”—Psalm 72:16.

• Owo ndomokiet idibueneke.

  ‘Owo idifreke mme ubuene.’—Psalm 9:18.

  “Enye ayanyan̄a ubuene emi esemede oyom un̄wam, ye owo ukụt ye owo ekededi emi mînyeneke andin̄wam. Enye ayatua usụhọde owo ye ubuene mbọm, oyonyụn̄ anyan̄a ukpọn̄ mme ubuene.”—Psalm 72:12, 13.

Ke ini afo ekerede aban̄a mme n̄kpọ emi Abasi ọn̄wọn̄ọde ndinam mi ke Obio Ubọn̄ esie, oyokụt ntak emi Jesus adade Obio Ubọn̄ emi ke ata akpan n̄kpọ. Ke ini Jesus okodude ke isọn̄, ekesinenem enye ndikwọrọ Obio Ubọn̄ Abasi nnọ owo ekededi emi enyịmede ndikpan̄ utọn̄ sia enye ama ọfiọk ke Obio Ubọn̄ emi editre kpukpru mfịna oro inyenede mfịn.

Ndi akpama nditiene n̄kụt mme n̄kpọ emi Abasi ọn̄wọn̄ọde ndinam mi ke Obio Ubọn̄ esie? Edieke edide ntre, didie ke afo ekpekpep mme n̄kpọ en̄wen aban̄a Obio Ubọn̄ emi? Ndien nso ke akpanam man etiene adia ufọn Obio Ubọn̄ emi? Iyọbọrọ mme mbụme emi ke ibuotikọ oro etienede.