N̄kamana ndikụt ubon nnyịn ẹdụn̄de ẹkpere Leipzig ke East Germany. Leipzig iyomke usụn̄ ikpọn̄ adan̄a Czech Republic ye Poland. Ini n̄kedide isua itiokiet, utom ete mi ama anam iwọrọ ikodụn̄ ke Brazil, ndien nte ini akade, ima iwọrọ ikodụn̄ ke Ecuador.

Ke ini n̄kedide isua 14, ete ye eka mi ẹma ẹnọ mi nnyọn̄ Germany n̄kaka n̄wed ke ufọkn̄wed emi ẹdụn̄de-dụn̄. Sia mmọ ẹkedude ke South America, ami n̄kese mban̄a idemmi ikpọn̄. N̄kodu uwem nda-ke-idem, ndọn̄ke enyịn m̀mê nte ndude uwem afịna mbon en̄wen m̀mê ifịnake.

Ke ini n̄kedide isua 17, ete ye eka mi ẹma ẹnyọn̄ ẹdi Germany. Ke nsonso oro, n̄kodụn̄ ye mmọ. Edi uwem nda-ke-idem ikayakke nsụk ibuot ndụn̄ ye mmọ. Ntre, ke ini n̄kedide isua 18, mma n̄kpọn̄ ufọk.

N̄koyoyok nnyụn̄ ndiọn̄ọke se n̄kpadade uwem mi nnam. Ke mma n̄kese nte mme owo ẹdude uwem ye se nsio nsio n̄ka ẹnamde, mma mbiere ke mfọnn̄kan n̄kpọ oro n̄kemede ndida uwem mi nnam edi ndika nsio nsio itie ke ererimbot emi nnyụn̄ nsan̄a nse ediye ekondo nnyịn mbemiso mme owo ẹbiatde enye.

Mma n̄kpọn̄ Germany, ndep motorcycle n̄wat n̄ka Africa. Edi, ikebịghike mma mfiak nnyọn̄ Europe man n̄kọdiọn̄ motorcycle mi. Esisịt ini ke oro ebede, mma n̄ka esụk kiet ke Portugal. Do ke n̄kebiere ke ndisan̄ake aba ke motorcycle, ke ndisisan̄a ke ubom.

Mma n̄kụt n̄kparawa ye n̄kaiferi emi ẹkeyomde ndiwat mbe Inyan̄ibom Atlantic n̄ka mme isuo ke Caribbean. Mma ntiene mmọ n̄ka. Laurie emi n̄kọdọde nte ini akade ekesịne ke otu mmọ. Ke ima ikodu esisịt ini ke Puerto Rico, ima ifiak inyọn̄ Europe. Ama ọdọn̄ nnyịn ndikpenyene ubomufọk. Ntre, ima iyom ubom emi ikpedepde inam akabade ubomufọk. Ke ima ikoyom ubom emi ke ọfiọn̄ ita, n̄kpọ ama etịbe emi mîkayakke inam se ikaduakde. Mbonekọn̄ Germany ẹma ẹmụm mi ẹsịn ke ekọn̄.

Ẹkesịn mi ke otu mme an̄wanaekọn̄ mmọn̄. Ndien mma ndu do isua kiet ye ọfiọn̄ ita. Ini oro ke ami ye Laurie ikanam  ndọ inyụn̄ iben̄e idem ndika iso nsan̄a nse ekondo. Esisịt ini mbemiso ẹkesịnde mi ke ekọn̄, ima idep ubom emi ẹkesidade ẹnyan̄a mme owo ke inyan̄. Ke ini n̄kedide owoekọn̄ do, ima itọn̄ọ ndinam ubom emi akabade edi ubomufọk. Ikoyom ndidodụn̄ ke ubom oro nnyụn̄ nsan̄a nse ediye ekondo nnyịn emi. Ini oro ke Mme Ntiense Jehovah ẹkedikwọrọ ikọ ẹnọ nnyịn ẹnyụn̄ ẹtọn̄ọ ndikpep nnyịn Bible. N̄kodụhe aba ke ekọn̄, ima inyụn̄ ikpere ndikụre ubom oro.

Ke nsonso oro, n̄kekwe se anade nnen̄ede n̄kpụhọde ke uwem mi. Mma ndọdọ n̄wan oro n̄kodụn̄de kiet nnyụn̄ ntre ndin̄wọn̄ sika. (Ephesus 5:5) Ndien amaedi isan̄ oro ikaduakde ndisan̄a n̄kanade ediye ekondo nnyịn emi, n̄kekere ke emi idiọkke sia isan̄a ise ubọkutom Abasi.

Edi mma ndikụt ke enyene mme n̄kpọ emi anade n̄kpụhọde—akpan akpan edu uwem mi. Sia n̄kesitan̄de idem etieti nnyụn̄ ndude uwem nda-ke-idem, n̄kesikere mban̄a idemmi ikpọn̄. Mme n̄kpọ oro n̄kekemede ndinam ama esikpon mi ibuot.

Usen kiet, mma n̄kot ọwọrọetop ukwọrọikọ oro Jesus ọkọkwọrọde ke obot. (Matthew ibuot 5-7) Ke nsonso oro, se Jesus eketịn̄de aban̄a nte ẹkemede ndikop inemesịt ikan̄wan̄ake mi. Ke uwụtn̄kpọ, enye ọkọdọhọ ke mbon oro ẹkopde biọn̄ ye nsatitọn̄ ẹkop inemesịt. (Matthew 5:6) Mma n̄kere nte ndikop biọn̄ m̀mê ndinana n̄kpọ ekemede ndinam owo okop inemesịt. Nte n̄kosụk n̄kpepde Bible, mma ndikụt ke kpukpru nnyịn imanana n̄kpọ ke iso Abasi, ndien ke ana isụhọde idem inyịme emi mbemiso ikemede ndinyene se nnyịn inanade emi. Onyụn̄ edi nte Jesus ọkọdọhọde mi ete: “Mmọ oro ẹkerede ẹban̄a unana mmọ ke n̄kan̄ eke spirit ẹkop inemesịt.”—Matthew 5:3.

Ke ami ye Laurie ima ikọtọn̄ọ ndikpep Bible ke Germany, ima iwọrọ ikodụn̄ ke France, ekem iwọrọ ika Italy. Ebiet eke ikaka, ima ikụt Mme Ntiense Jehovah. Mma nnen̄ede mma nte mmọ ẹmade kiet eken ke ofụri esit ẹnyụn̄ ẹdianade kiet. Mma n̄kụt ke Mme Ntiense ẹdi kiet ke ofụri ererimbot. (John 13:34, 35) Nte ini akakade, ami ye Laurie ima ina baptism ikabade idi Mme Ntiense Jehovah.

Ke mma n̄kana baptism, mma n̄ka iso n̄kpụhọde nte ndude uwem. Ami ye Laurie an̄wan mi ima ibiere ndiwat nto n̄kan̄ esụk Africa mbe Inyan̄ibom Atlantic ndụk United States. Do ke inyan̄ibom emi ke ami ye n̄wan mi ikesịne ke ekpri ubom ise mmọn̄ inyan̄ibom oro akande nnyịn okụk. Do ke n̄kokụt ke Andibot okpon ke enyọn̄ edi ke ami ndịghe n̄kpọ ndomokiet. Sia mmen̄kenyeneke se nnamde, mma nda ini nnen̄ede n̄kot Bible. Mbụk uwem Jesus ke isọn̄ ama enen̄ede otụk mi. Jesus ama ọfọn ama onyụn̄ ekeme ndinam ediwak n̄kpọ, edi enye ikatan̄ke idem. Enye ikesikereke iban̄a idemesie edi ekesikere aban̄a Ete esie.

Nte n̄ketiede n̄kere uwụtn̄kpọ Jesus, mma ndikụt ke ọfọn mbem iso nyom Obio Ubọn̄ Abasi utu ke ndibem iso nnam mme n̄kpọ eken ndien ufan̄ okpodu ami nyom Obio Ubọn̄ Abasi. (Matthew 6:33) Ke ini ami ye n̄wan mi isịmde United States, ima ibiere ndisụhọde ntie ndien n̄kpono Abasi.

Ini n̄kesidude uwem nda-ke-idem, n̄ketie nte mmọn̄ ubom—n̄ka iso mfiak edem, ndiọn̄ọke se n̄kpanamde. Edi idahaemi, Bible ada mi usụn̄ ndien item esie isikpụho owo. (Isaiah 48:17, 18) N̄ko, mmọdiọn̄ọ se n̄kpadade uwem mi nnam—oro edi, ndikpono Abasi nnyụn̄ n̄n̄wam mbon en̄wen ẹkpep n̄kpọ ẹban̄a enye.

Ndinam item Bible anam ndọ nnyịn enen̄ede enem. Esịt enem nnyịn n̄ko ndinyene ediye eyen emi ọdiọn̄ọde Jehovah onyụn̄ amade enye.

Idịghe nte nnyịn inyeneke mfịna ke uwem. Edi imebiere ndika iso nnam n̄kpọ Jehovah nnyụn̄ mbuọt idem ye enye. Imenịm ke Jehovah ayan̄wam nnyịn inam emi.—Mme N̄ke 3:5, 6.