Anaedi ama okụt ke akpa ye udiana ibuotikọ ke Mme Ntiense Jehovah idaha Obio Ubọn̄ Abasi ibre mbre. Eyedi ama enem fi n̄ko ndikop ndusụk n̄kpọ oro Obio Ubọn̄ Abasi edinamde inọ mme owo. Edi emekeme ndikere m̀mê mme n̄kpọ emi ẹyesụk ẹtịbe.

Ọfọn etịm odụn̄ọde m̀mê se okopde edi akpanikọ utu ke ndinịm n̄kpọ ntre nnan nnan. (Mme N̄ke 14:15) Se mbon Beroea * ẹkenamde edi oro. Ke akpa ini oro mbon Beroea ẹkekopde eti mbụk Obio Ubọn̄ Abasi, mmọ ikenịmke se mmọ ẹkopde oro ntre ibe sia ekenemde-nem mmọ. Edi mmọ ẹma “ẹnen̄ede ẹdụn̄ọde N̄wed Abasi . . . ẹte ise m̀mê mme n̄kpọ emi ẹdi ntre.” (Utom 17:11) Ke nditịn̄ ke usụn̄ en̄wen, mbon Beroea emi ẹma ẹse m̀mê eti mbụk emi mmimọ ikopde esịne ke N̄wed Abasi. Nte ini akakade, mmọ ẹma ẹdikụt ke eti mbụk emi esịne ke N̄wed Abasi.

Mme Ntiense Jehovah ẹkpema afo etiene anam se mbon Beroea ẹkenamde emi. Nnyịn imesikpep mme owo Bible ke mfọn, ndien emi ọyọnọ fi ifet ndise m̀mê se Mme Ntiense Jehovah ẹkpepde ẹban̄a Obio Ubọn̄ Abasi esịne ke Bible.

Ndikpep Bible ayanam ọfiọk se Obio Ubọn̄ edide onyụn̄ anam ọfiọk ibọrọ mbụme oro isiwakde ndibụp mban̄a uwem emi idude mi.

•   Ndi Abasi okobot nnyịn mîdịghe ndi ikofoforo?

• Ntak emi idude uwem?

• Ntak emi Abasi ayakde mme owo ẹbọ ufen?

• Nso isitịbe ke ini owo akpade?

• Ndi ẹyesobo isọn̄ emi?

• Nso ke ẹkpenam man ẹkop inemesịt ke ubon?

Se ikam idide akpan n̄kpọ ikan edi ke ndikpep Bible ayanam fi ‘asan̄a ekpere Abasi.’ (James 4:8) Ndien nte asan̄ade ekpere Abasi, ntre n̄ko ke edikụt ediwak nti n̄kpọ emi Obio Ubọn̄ Abasi edinamde inọ fi idahaemi ye ke nsinsi. Jesus ọkọbọn̄ akam ọnọ Ete esie ete: “Nsinsi uwem ọwọrọ mmọ ndikọ ifiọk emi aban̄ade fi, ata Abasi kierakiet, ye enye emi afo okosiode ọdọn̄, kpa Jesus Christ.”—John 17:3.