Jairo akamana ye udọn̄ọ mfre emi ẹkotde spastic quadriplegia. Udọn̄ọ emi esinam ọkpọ ememem owo. Ntre, owo emi ọdọn̄ọde udọn̄ọ emi isikemeke ndimenede ubọk ye ukot, isinyụn̄ ikemeke ndiwọn̄ọde itọn̄. Udọn̄ọ emi abiat ediwak esịp ke idem Jairo, esinyụn̄ anam ubọk ye ukot esie afian̄ade. Ndusụk ini, Jairo esida unan ke ini emi etịbede. Mbon oro ẹdude ẹkpere ẹkeme nditiene nda unan edieke mmọ mîkpemeke sia ubọk m̀mê ukot Jairo ẹsituak onyụn̄ afian̄ade ke ini owo mîdorike enyịn. Oro anam ẹsibọbọp enye ubọk ye ukot ẹdian ke n̄kpọitie mbon n̄kpọnnam mbak enye edida unan, edinyụn̄ ọnọ mbon en̄wen unan.

Jairo ọkọtọn̄ọ ke nsek ọbọ ufen. Ke ini enye ekedide ọfiọn̄ ita, enye ama ọtọn̄ọ ndisiduọ unam nnyụn̄ nsụhọ. Ediwak ini, Mama esikere ke enye akpakpa ama, ntre esimen enye efehe aka ufọkibọk.

Kpukpru emi ama anam ọkpọ Jairo emem ofụri ofụri. Ini enye edide isua 16, enye ama odorode ekikoi. Ama ọdiọk tutu edi se ẹkesiakde enye idem. Ke nteti nte Jairo ekesituade eyet ofụri okoneyo ke ini enye ọnyọn̄de usiakidem edi.

Udọn̄ọ Jairo ikayakke enye ekeme ndinam n̄kpọ ndomokiet nnọ idemesie. Ẹkesinanam kpukpru n̄kpọ ẹnọ enye. Ẹkesinọnọ enye udia, ẹsịne enye ọfọn̄, ẹmen enye ẹdori ke bed. Mama ye Papa ẹkesinam mme n̄kpọ emi ẹnọ enye. Okposụkedi emi ẹsinamde-nam kpukpru n̄kpọ ẹnọ enye, Mama ye Papa ẹsiti enye kpukpru ini ke uwem esie esịne Abasi ke ubọk.

Nnyịn idi Mme Ntiense Jehovah, ndien Papa ye Mama ẹketọn̄ọ ndisikot mme mbụk Bible nnọ Jairo toto ke nsek. Mmọ ẹdiọn̄ọ ke uwem owo iwọrọke n̄kpọ ndomokiet edieke enye mîkpereke Abasi. Okposụkedi emi udọn̄ọ emi ọdiọkde Jairo idem, esinyụn̄ anamde enye enyenyek kpukpru ini, enye enyene idotenyịn ke n̄kpọ ọyọfọn ke ini iso. Edi Mama ye Papa ẹma ẹsikere m̀mê Bible ayan̄wan̄a Jairo.

Usen kiet, ke ini Jairo ekedide eyenọwọn̄, Papa ama ọdọhọ enye ete: “Jairo, mbọk n̄wana tịn̄ ikọ ise ye ami.” Ekem enye adian do ete: “Edieke amade mi, oyodomo ukeme.” Nte Papa okosụk ọdọhọde enye etịn̄ ekpededi ikọ kiet, mmọn̄eyet ama asiaha Jairo ke enyịn. Enye ama an̄wana nditịn̄ ikọ, edi ikemeke. N̄kukụre se enye ekekemede  ndinam ekedi uyom emi etiede nte owo ede idap osio n̄kụni. Ama abiak Papa nte enye akanamde Jairo atua. Edi eyet esie ama owụt ke se Papa eketịn̄de ama an̄wan̄a enye. Onyụn̄ edi ke enye ikekemeke nditịn̄ ikọ.

Ikebịghike, ete ye eka mi ẹma ẹkụt ke enyene nte Jairo esinamde enyịn ke ini etiede nte enye ekpetịn̄ ikọ. Ama esibiak Jairo nte enye mîkemeke nditịn̄ se enye oyomde. Edi ke ini Mama ye Papa ẹdade nte enye anamde enyịn ẹdiọn̄ọ se enye oyomde, Jairo ama esituak inua imam. Nte enye ekesidọhọde sọsọn̄ọ edi oro.

Abiausọbọ emi esin̄wamde mbon emi mîkemeke nditịn̄ ikọ ama ọdọhọ isimenede ubọk mbiba ke enyọn̄ ke ini ibụpde enye mbụme emi oyomde enye ọbọrọ ih m̀mê ihih. Edieke enye esede ubọk nnasia, ọwọrọ enye ọdọhọ ih. Edi edieke enye esede ubọk ufien, ọwọrọ ihih.

Ikata ke isua, Mme Ntiense Jehovah ẹsinịm n̄kpri ye ikpọ mbono. Ata ediwak owo ẹsitie ẹkop utịn̄ikọ Bible emi ẹsinọde mi. Utịn̄ikọ baptism esinen̄ede enem Jairo. Usen kiet, ke ini Jairo ekedide isua 16, Papa ama obụp enye m̀mê enye akpama ndina baptism. Inikiet inikiet, enye ama ese ubọk nnasia Papa ndiwụt ke ikpama ndina. Do ke Papa okobụp enye m̀mê enye ama ọbọn̄ akam ọnọ Abasi ọdọhọ enye ke iyom ndinam n̄kpọ esie ke nsinsi. Jairo ama afiak owụk enyịn ese ubọk nnasia Papa. Ọwọrọ Jairo ama ayayak idem ọnọ Jehovah.

Ke ẹma ẹkeneme Bible ye enye ediwak ini, ẹma ẹkụt ke Jairo ọdiọn̄ọ se mme Christian ndina baptism ọwọrọde. Ntre, ke 2004, enye ama ọbọrọ akakan mbụme emi akanam ẹbụpde enye. Mbụme oro ekedi: “Ndi amayak idem ọnọ Abasi ndinam uduak esie?” Jairo ama emenede enyịn ke enyọn̄. Se ẹkedọhọde enye anam edi emi edieke ibọrọ esie edide ih. Ntre, ke ini Jairo edide isua 17, enye ama ana baptism onyụn̄ akabade edi Ntiense Jehovah.

Ke 2011, Jairo ama ọtọn̄ọ ndisida kọmputa ntịn̄ ikọ. Kọmputa enye emi edi kọmputa emi ẹsede-se ke enyịn ndien enye anam se owo oyomde. Ke uwụtn̄kpọ, edieke owo owụkde enyịn ese n̄kpọ ke kọmputa oro mîdịghe ekepde n̄kpọ oro enye esede, n̄kpọ oro oyokụbọde ọnọ enye nte emi enye okponyụn̄ adade ubọk esie efịk okụbọde. Ẹma ẹdọn̄ ndise ke kọmputa emi ẹnọ Jairo ye mme ikọ emi ẹwụtde se ndise emi adade aban̄a. Ntre, ke ini enye esede ekededi ke otu ndise emi, kọmputa emi esikot se ndise emi adade aban̄a.

 Nte Bible akan̄wan̄ade Jairo, ntre n̄ko ke ọkọdọn̄ enye ndin̄wam mbon en̄wen ẹtiene ẹdiọn̄ọ Abasi. Ke ini kpukpru nnyịn ke ufọk itiede ntre ikpep Bible kpukpru urua, enye esiwak ndidi ese kọmputa edise mi. Enye esinam emi ndidọhọ n̄kûfre ndiwet ibọrọ emi imọ idinọde ke mbono esop.

Ke mbono esop, enye esikama enyịn oyom ibọrọ emi ke kọmputa esie. Ke ini enye okụtde, enye esiwụk enyịn ese itie oro mîdịghe ekep enyịn ndien kọmputa okot ibọrọ esie man kpukpru owo ẹkop. Enye esituak inua imam ini ekededi emi enye ọbọrọde mbụme ntem sia ibọrọ esie esisọn̄ọ mme owo idem. Alex emi edide ekpri ufan Jairo ọdọhọ ete: “Esinen̄ede enem mi ndikop Jairo ọbọrọde mbụme ke mbono esop.”

Jairo esida enyịn esie ọkwọrọ ikọ ọnọ mme owo. Usụn̄ kiet emi enye esinamde emi edi ndiwụk enyịn ke kọmputa esie nse ndise Paradise emi mme unam ye mme owo emi ẹtode nsio nsio ebiet ẹdụn̄de ke emem. Ke ini enye owụkde enyịn ẹse ndise emi, kọmputa esie esidọhọ ete: “Bible ọdọhọ ke isọn̄ emi ayakabade edi Paradise. Emem oyodu, ndien udọn̄ọ ye n̄kpa ididụhe aba, Ediyarade 21:4.” Edieke owo emi enye ọkwọrọde ikọ ọnọ amade se enye okopde oro, Jairo esinam kọmputa esie ọdọhọ ete, “Ndi akpama ndikpep Bible ye ami?” Idem ama akpa nnyịn ke ini ete eka nnyịn ekenyịmede Jairo ekpep enye Bible. Ama enem nnyịn etieti ndikụt nte Jairo esidade Ntiense en̄wen adian idem ekekpep ete eka nnyịn n̄kpọ. Ete eka nnyịn ama ana baptism ke akamba mbono emi ẹkenịmde ke August 2014.

Mme andikpep ke ufọkn̄wed mme Jairo ẹkụt nte Jairo esịnde idem anam n̄kpọ Abasi. Rosario, kiet ke otu mbiausọbọ emi esin̄wamde Jairo ye mbon en̄wen oro mîkemeke nditịn̄ ikọ, ama etịn̄ ini kiet ete: “N̄kpadaduak ndika ufọkabasi, ndika eke Mme Ntiense Jehovah. Mmokụt nte mbuọtidem Jairo anamde uwem esie ọwọrọ n̄kpọ, kpa ye udọn̄ọ esie.”

Esịt esinem Jairo etieti ke ini n̄kotde se Bible ọdọhọde ke Isaiah 35:6 nnọ enye. Itie oro ọdọhọ ke “mbụn̄ọ ọyọfrọ nte ayara edop, edeme imụm oyonyụn̄ ọkwọ ke idatesịt.” Okposụkedi emi enye esifụhọde ndusụk ini, enye isiyakke mfụhọ emen enye emen, edi osụk okokop inemesịt. Se inamde etie ntem edi ke Abasi edi akpa ke uwem esie, ndien nditọete ke esop ẹsinyụn̄ ẹtiene ẹn̄wam enye. Enye ndikop inemesịt nnyụn̄ nnen̄ede mbuọt idem ke Abasi owụt ke ndinam n̄kpọ Jehovah kpa ye se iwọrọde owo isiyakke uwem odorode owo.