N̄wed Abasi Usem Greek etịn̄ n̄kpọ aban̄a akwa owoekọn̄ Rome ke ediwak itie. Owoekọn̄ emi akadade mbon emi ẹkewotde Jesus usụn̄ ekedi akwa owoekọn̄. Cornelius emi ekedide akpa owo Gentile oro akakabarede edi Christian ekedi akwa owoekọn̄ n̄ko. Owo emi okokụtde ete ke ẹmia apostle Paul ekedi akwa owoekọn̄, ukem oro n̄ko ye Julius emi akadade Paul aka Rome.—Mark 15:39; Utom 10:1; 22:25; 27:1.

Mbonekọn̄ 50 esịm 100 ẹkesidu ke idak akwa owoekọn̄. Utom esie ama esịne nditụnọ nnyụn̄ nnọ mbon emi ẹdude ke idak esie ukpep, ndise m̀mê ọfọn̄ ye n̄kpọekọn̄ mmọ ọfọn, ndinyụn̄ ntịm mmọ idem mben̄e ekọn̄.

Akwa owoekọn̄ ekedi owo emi ẹkponode etieti ke ekọn̄. Enye ekedi owo emi ekemede nditịm nda mbonekọn̄ usụn̄. Enye ekesinam mbonekọn̄ Rome ẹtiene ibet ekọn̄ ẹnyụn̄ ẹkeme ndin̄wana ekọn̄ ọfọn. N̄wed kiet ọdọhọ ke akwa owoekọn̄ ama esibịghi etieti ke ekọn̄, ke enye ekesinyụn̄ ọdiọn̄ọ utom ekọn̄ akan mbon emi ẹdude ke idak esie.

Ukụtiso eset ikesidịghe akrasi nte edide idahaemi. Ẹkesiwak ndidi okpoho, silver, gold, m̀mê mbuaha silver ye gold. Akpa itie emi ẹtịn̄de ẹban̄a ukụtiso ke Bible edi ke ini ẹkebọpde tent utuakibuot, kpa akpa itie emi nditọ Israel ẹkesituakde ibuot ẹnọ Jehovah. Iban ẹma ẹnọ ukụtiso man ẹda ẹnam besịn okpoho ye n̄kpọ udori besịn. (Exodus 38:8) Etie nte ẹkefọfọp ukụtiso oro atara mbemiso ẹdade ẹnam n̄kpọ emi.

Ẹma ẹkụt mme n̄kpọmbana idem iban ke mme itie emi ẹkedọkde isọn̄ ẹsion̄o ukụtiso ke Israel ye ke mbọhọ esie. Mme ukụtiso emi ẹkesiwak ndidi ekara ekara, ẹnyene ubọk emi ẹdade eto, ukwak, m̀mê nnụkenen ẹnam ke mbiet an̄wan. Owo ikesitụkke inyụn̄ ibanake edem ukụtiso emi.

Ukụtiso eset ikesiyamake nte ukụtiso idahaemi. Etie nte utọ ukụtiso emi ke apostle Paul eketịn̄ aban̄a ke ini enye ọkọdọhọde ete: “Idahaemi nnyịn ikụt n̄kpọ mbukpọn̄ mbukpọn̄ ke ukụtiso ukwak.”—1 Corinth 13:12.