Mercy: Stella, esịt ama enem mi ndikụt fi ke Editi n̄kpa Jesus Christ urua oko. * Okokụt didie ofụri se ẹkenamde do?

Stella: Ama enem etieti, edi ke nditịn̄ akpanikọ, idịghe kpukpru n̄kpọ akan̄wan̄a mi. Mmọdiọn̄ọ ke ediwak owo ẹsidia Christmas, edi owo isiwakke nditi n̄kpa Jesus.

Mercy: Ntre ke edi. Ata ediwak owo ke ofụri ererimbot ẹsidia Christmas. Edi Mme Ntiense Jehovah ẹkere ke ata akpan usen emi ẹkpetide edi usen emi Jesus akakpade, idịghe usen emana esie. Edieke enyenede ekpri ini, n̄kpama ndiwụt fi ntak emi nnyịn ikerede ke ọfọn ndisiti n̄kpa Jesus.

Stella: Mfịna idụhe.

Mercy: Akpan ntak emi Mme Ntiense Jehovah ẹsitide n̄kpa Jesus edi sia enye ọkọdọhọ mme mbet esie ẹsiti n̄kpa imọ. Kere ban̄a se Jesus akanamde okoneyo oro ekesierede usen emi ẹkewotde enye. Ndi emeti ata akpan udia emi enye akadiade ye mme mbet esie emi ẹkesọn̄ọde ẹda ye enye?

Stella: Etịn̄ aban̄a Udia Ọbọn̄?

Mercy: Nnennen. Kpa enye ke ẹkot Udia Mbubreyo Ọbọn̄. Nte mmọ ẹkesụk ẹdiade udia oro, Jesus ama etịn̄ se anade mmọ ẹsinam. Mbọk kot Luke 22:19 ise man ikop se enye eketịn̄de.

Stella: Ọfọn. Itie oro ọdọhọ ete: “N̄ko, enye emen uyo, ọnọ ekọm, obụn̄, onyụn̄ ayak ọnọ mmọ, ete: ‘Emi ada aban̄a idem mi eke ẹdinọde kaban̄a mbufo. Ẹka iso ẹnam emi nditi mi.’”

Mercy: Sọsọn̄ọ. N̄kọ omokụt se Jesus ọkọdọhọde mi ke akpatre udịmikọ ke ufan̄ikọ oro: “Ẹka iso ẹnam emi nditi mi.” Ndien mbemiso Jesus ọkọdọhọde mme mbet esie ẹsiti imọ, enye ama etịn̄ se ikpanamde mmọ ẹsinam emi. Enye ọkọdọhọ ke iyom ndikpa ke ibuot mme anditiene imọ. Ukem se enye eketịn̄de edi emi ke Matthew 20:28. Itie oro ọdọhọ ete: “Eyen owo [ikedịghe] man ẹnam n̄kpọ ẹnọ enye, edi man enye anam n̄kpọ ọnọ owo onyụn̄ ọnọ ukpọn̄ esie nte ufak ke ibuot ediwak owo.” Ke nditịn̄ ibio ibio, se isinamde Mme Ntiense Jehovah ẹsop idem kpukpru isua ke nnennen usenọfiọn̄ emi Jesus akakpade edi oro—man ẹti nte Jesus akakpade afak nnyịn. N̄kpa esie ayanam kpukpru mbon emi ẹkopde uyo Abasi ẹdu uwem ke nsinsi.

Stella: Mmesikop mme owo ẹdọhọde ke Jesus akakpa man nnyịn inyene uwem, edi isin̄wan̄ake mi.

Mercy: Inyụn̄ in̄wan̄ake ediwak owo n̄ko. Ukpepn̄kpọ emi aban̄ade nte Jesus akakpade afak nnyịn idịghe ekpri ukpepn̄kpọ. Edi enye edi  kiet ke otu ukpepn̄kpọ emi enemde akan ke Bible. Yak n̄kam mbụp fi ise, ndi ke osụk enyenyene ini?

Stella: Mmenyene.

Mercy: Ọfọn. Ibịghike n̄kokot n̄kpọ mban̄a ufak, yak nse ise m̀mê nyekeme ndinam an̄wan̄a fi ke ata mmemmem usụn̄.

Stella: Ọfọn.

Mercy: Man ufak emi itịn̄de iban̄a mi enen̄ede an̄wan̄a nnyịn, ọfọn ibem kan̄a iso idiọn̄ọ se idiọkn̄kpọ emi Adam ye Eve ẹkenamde ke In̄wan̄ Eden akadade edi. Yak ikot Rome 6:23 man emi an̄wan̄a nnyịn. Mbọk kot itie oro ise.

Stella: Ọfọn. Itie oro ọdọhọ: “N̄kpọ eyenutom idiọkn̄kpọ edi n̄kpa, edi enọ oro Abasi ọnọde edi nsinsi uwem ke Christ Jesus Ọbọn̄ nnyịn.”

Mercy: Sọsọn̄ọ. Yak ineme itien̄wed emi ise. Akpa, se nte ẹtọn̄ọde ufan̄ikọ emi: “N̄kpọ eyenutom idiọkn̄kpọ edi n̄kpa.” Se Abasi eketịn̄de edi oro toto ke editọn̄ọ—n̄kpọ eyenutom, m̀mê utịp, idiọkn̄kpọ edi n̄kpa. Imọdiọn̄ọ ke ini oro, idiọkowo ndomokiet ikodụhe. Adam ye Eve ẹma ẹfọn ẹma ke ini Abasi okobotde mmọ, ndien kpukpru nditọ mmọ ẹkpekemana nte mme mfọnmma owo n̄ko. Ntre, idụhe se ikpakanamde owo ndomokiet akpa. Abasi okoyom Adam ye Eve ye kpukpru nditọ esie ẹdu uwem ke nsinsi ẹnyụn̄ ẹkop inemesịt. Edi ndi se Abasi okoyomde emi ama etịbe?

Stella: Iketịbeke. Adam ye Eve ẹma ẹdia mfri eto oro Abasi ọkọdọhọde mmọ ẹkûdia.

Mercy: Nnennen. Ndien mmọ ndikadia mfri oro ekedi idiọkn̄kpọ. Ọwọrọ mmọ ẹkekokoi ẹsọn̄ ibuot ye Abasi. Ẹkeme ndidọhọ ke mmọ ẹkemek ndidi mbon oro mîfọnke ima, mme anamidiọk. Se Adam ye Eve ẹkenamde oro ama ada afanikọn̄ ọsọk mmọ ye kpukpru nditọ mmọ.

Stella: Se etịn̄de in̄wan̄ake mi-o!

Mercy: Yak nnọ fi uwụtn̄kpọ ise. Ndi akanam amada iko mmọn̄eba etem maimai?

Stella: Ih! Mmetem ediwak ini.

Mercy: Yak idọhọ ke emenyene obufa iko mmọn̄eba. Etise iko mmọn̄eba emi ọduọ en̄wịne idiọk idiọk. Edieke adade iko oro etem maimai, ekere ke maimai oro editie didie?

Stella: Edinyụn̄ etie nte iko oro; eyenyene ndo.

Mercy: Ukem ntre, ke ini Adam ye Eve ẹkemekde ndisọn̄ ibuot ye Abasi, mmọ ẹma ẹkabade ẹtie nte iko emi en̄wịnede; idiọkn̄kpọ ye unana mfọnmma ama obiom mmọ ndo. Ndien sia mmọ ẹkekabarede ẹdi mme anamidiọk mbemiso mmọ ẹnyenede nditọ, kpukpru nditọ mmọ ẹkenyụn̄ ẹmana ye ukem ndo oro. Kpukpru mmọ ẹkemana ye idiọkn̄kpọ. Ke Bible, ikọ oro “idiọkn̄kpọ” idịghe se owo anamde-nam kpọt, edi n̄ko se nnyịn ikadade-da imana. Okposụkedi ami ye afo mîkanamke idiọkn̄kpọ ndomokiet, mîkonyụn̄ imanake-mana ke ini Adam ye Eve ẹkenamde idiọkn̄kpọ, mmọ ẹma ẹbiat n̄kpọ ẹnọ nnyịn ye kpukpru nditọ mmọ ye nditọ nnyịn. Mmọ ẹma ẹyak kpukpru nnyịn ẹsịn ke uwem unana mfọnmma ye n̄kpa. Onyụn̄ edi nte Bible etịn̄de ke Rome 6:23, ke utịp idiọkn̄kpọ edi n̄kpa.

Stella: Ntak emi kpukpru owo ẹkpebọde ufen ke nsinsi ke ntak idiọkn̄kpọ Adam ye Eve? N̄kereke ke utọ n̄kpọ emi ọfọn.

Mercy: Afo emenen—itiehe nte ọfọn. Edi enyene se Abasi akanamde aban̄a oro. Sia Abasi esinamde se inende kpukpru ini, enye ama ebiere ke ana Adam ye Eve ẹkpa ke ntak idiọkn̄kpọ mmọ, edi nnyịn nditọ mmọ isụk inyenyene idotenyịn. Abasi ama anam n̄kpọ man nnyịn ibọhọ idiọkn̄kpọ ye n̄kpa. Enye ama ọdọn̄ Jesus edikpa afak nnyịn. Fiak se Rome 6:23. Ke ufan̄ikọ oro ama ọkọdọhọ ke “n̄kpọ eyenutom idiọkn̄kpọ edi n̄kpa,” enye aka iso ete: “Edi enọ oro Abasi ọnọde edi nsinsi uwem ke Christ Jesus Ọbọn̄ nnyịn.”  Ntem, n̄kpa Jesus anam nnyịn ikeme ndibọhọ idiọkn̄kpọ ye n̄kpa. *

Mercy: Enyene akpan n̄kpọ en̄wen emi n̄kpamade ndiwụt fi ke ufan̄ikọ oro.

Stella: Nso idi oro?

Mercy: N̄kọ emeti ke ufan̄ikọ emi ọdọhọ: “Enọ oro Abasi ọnọde edi nsinsi uwem ke Christ Jesus Ọbọn̄ nnyịn.” Kere ise, edieke edide Jesus ọkọbọ ufen onyụn̄ akpa ọnọ nnyịn, ntak emi Bible ọdọhọde ke ufak edi “enọ oro Abasi ọnọde”? Ntak owo mîdọhọke “enọ oro Jesus ọnọde”? *

Stella: Hmm. Ndiọn̄ọke.

Mercy: Ọfọn, Abasi okobot Adam ye Eve, ndien enye ke mmọ ẹkedue ke ini mmọ ẹkesọn̄de ibuot ke In̄wan̄ Eden. Anaedi ama enen̄ede abiak enye ke ini akpa owo iba emi enye okobotde mi ke isọn̄ ẹkesọn̄de ibuot ye enye. Edi Jehovah ama ọsọsọp etịn̄ nte mfịna emi edisan̄ade etre. * Enye ama ọdọhọ ke kiet otu nditọ esie ke heaven eyedi isọn̄ emi, edidu uwem nte mfọnmma owo, onyụn̄ akpa afak nnyịn. Omokụt do ke Jesus ndikedi ndikpa mfak nnyịn edi enọ Abasi. Enyene n̄kpọ en̄wen emi anamde idọhọ ke ufak edi enọ Abasi. Ndi akanam emekere nte eketiede Abasi ke idem ke ini ẹkewotde Jesus?

Stella: Akanam n̄kereke.

Mercy: Mmokụt n̄kpọmbre nditọwọn̄ ke iso ufọk fo emi. Ntre, anaedi emenyene nditọ.

Stella: Ih, mmenyene, nditọ iba—erenowo ye n̄wan.

Mercy: Ọfọn, kere ise nte eketiede Jehovah Abasi ke idem usen emi ẹkewotde Jesus Eyen esie. Kere nte enye eketiede ke heaven ese nte ẹmụmde edima Eyen esie, ẹsakde enye nsahi, ẹnyụn̄ ẹtọde enye ita. Ekere ke eketie enye didie ke idem ke ini ẹkekọn̄de Eyen esie ke eto ẹnyụn̄ ẹyak enye ọkọn̄ọ do amian̄a tutu akpa?

Stella: Anaedi ama abiak enye tutu. Akanam n̄kereke n̄kpọ emi ntem-o!

Mercy: Imọdiọn̄ọ ke nnyịn ikemeke ndifiọk nnennen nnennen nte eketiede Abasi ke idem usen oro. Edi imọfiọk ke n̄kpọ esibiak enye, imonyụn̄ ifiọk ntak emi enye akayakde oro etịbe. Bible etịn̄ ntak emi Abasi akanamde emi ke John 3:16. Itien̄wed emi enem tutu ndien ata ediwak owo ẹdiọn̄ọ se enye etịn̄de. Mbọk kot ise.

Stella: Itie oro okot ete: “Abasi ama enen̄ede ama ererimbot tutu enye ọnọ ikpọn̄-ikpọn̄ edibon Eyen esie, man owo ekededi eke ọbuọtde idem ye enye okûtak edi enyene nsinsi uwem.”

Mercy: Sọsọn̄ọ. Mbọk fiak se ntọn̄ọ ufan̄ikọ oro ise. Ọdọhọ ke “Abasi ama enen̄ede ama ererimbot.” Ima akanam Abasi ọnọ Eyen esie edi isọn̄ emi edikpa ọnọ nnyịn. Ufak edi n̄kponn̄kan usụn̄ emi Abasi ye Jesus ẹwụtde ke imama nnyịn. Ndien se Mme Ntiense Jehovah ẹsisopde idem ọtọkiet ẹti edi emi kpukpru isua ke nnennen usenọfiọn̄ emi Jesus akakpade. Okụt didie nneme emi?

Stella: Enem etieti. Sọsọn̄ọ nte adade ini eneme n̄kpọ emi ye ami.