N̄kokpon ke Puerto Limón, emi edide esụk kiet ke Costa Rica. Ete ye eka mi ẹkenyene nditọ itiaita, ndien ami n̄kedi ọyọhọ itiaba. Ete mi akakpa ke ini n̄kedide isua itiaita. Ntre, eka mi ọkọbọk nnyịn ikpọn̄.

Mma mma baseball etieti toto ke ini emi n̄kedide eyenọwọn̄. Ke ini n̄kedide n̄kpọ nte isua 18, mma nsitiene ekpri n̄ka kiet mbre baseball. Nte ikosụk ibrede baseball usen kiet, owo kiet emi esisan̄ade oyom mbon emi ẹdiọn̄ọde mbre mbuba ama obụp mi m̀mê n̄kpama ndibre baseball nnọ Nicaragua. N̄kedi n̄kpọ nte isua 20 ini oro. Edi sia idem mîkọsọn̄ke eka mi, n̄kekemeke ndidaha n̄kpọn̄ enye n̄kodụn̄ ke Nicaragua. Ntre mma ndọhọ owo oro ke ndidịghe. Nte ini akakade, owo en̄wen emi esisan̄ade oyom mbon emi ẹdiọn̄ọde mbre mbuba ama osion̄o nsio nsio owo ke utọ n̄ka emi n̄kesibrede baseball ọdọhọ ikebre baseball inọ Costa Rica. Mma nnyịme. Ntre, mma mbre baseball nnọ idụt nnyịn ọtọn̄ọde ke 1949 esịm 1952, ndien mma mbre baseball ke Cuba, Mexico, ye Nicaragua. Mma nnen̄ede ndiọn̄ọ ndibre baseball. Mma nsibre ubọk 17 nduehe ndomokiet. Ama esinem mi etieti ndikop mme owo ẹfioride enyịn̄ mi ke ini mbrede baseball.

Edi mma nsidu oburobụt uwem. Mma nnyene ufan an̄wan kiet, nnyụn̄ mma ediwak iban en̄wen. Mma nsinyụn̄ n̄n̄wọn̄ mmịn mbe ubọk. Usen kiet, mmịn ama anam mi tutu ke ini eyo esierede, ntịghi nte n̄kasan̄ade n̄kesịm ufọk. Mma nsinyụn̄ mbre nsio nsio mbre mfọniso.

Ini oro n̄kosụk ndude etịme etịme uwem mi ke eka mi akakabade edi Ntiense Jehovah. Enye ama odomo ndinam mi ntiene n̄kpep Bible, edi n̄kọnọhọ enye iso ini oro sia n̄kọdọduọ nnyịne ke mbre mbuba. Biọn̄ ikesidọn̄ke mi ke ini mbrede baseball sia ofụri ekikere mi ekesisịne ke mbre oro. Idụhe se n̄kamade nte baseball!

Edi ke ini n̄kedide isua 29, mma nda ata akamba unan ke ini n̄kọfrọde n̄ka ndimụm bọl. Ke idem ama ọkọsọn̄ mi,  mma ntre ndibre baseball. Edi n̄kosion̄oke idem ofụri ofụri n̄kpọn̄ mbre emi. Mma nsikpep mme owo baseball. Mmọ ẹkedu ke n̄ka ubre baseball emi okodude ekpere ufọk mi.

Ke 1957, Mme Ntiense Jehovah ẹma ẹkot mi ndidụk akamba mbono mmọ emi ẹkenịmde ke an̄wambre emi n̄kesibrede baseball, ndien mma n̄ka. Nte n̄kosụk ntiede do, mma n̄kụt ke Mme Ntiense Jehovah ẹnam n̄kpọ ukpono ukpono ye kiet eken, edi mbon oro ẹkesidide ẹdise baseball ẹkesitie uyom uyom. Se n̄kokụtde ke itie mbono oro ama anam ntọn̄ọ ndikpep Bible ye Mme Ntiense Jehovah, nnyụn̄ ntọn̄ọ ndidụk mbono esop mmọ.

Mma mma se n̄kekpepde ke Bible. Ke uwụtn̄kpọ, Jesus ọkọdọhọ ke mme mbet esie ẹyekwọrọ eti mbụk Obio Ubọn̄ Abasi ke ofụri ererimbot ke mme akpatre usen. (Matthew 24:14) Mma n̄kpep n̄ko ke ata mme Christian idaha ukwọrọikọ mmọ in̄wana okụk. Jesus ọkọdọhọ ete: “Mbufo ẹkebọ ke mfọn, ẹnọ ke mfọn.”​—⁠Matthew 10:⁠8.

Nte n̄kosụk n̄kpepde Bible, mma mmen se Bible etịn̄de ndomo ye nte Mme Ntiense Jehovah ẹnamde n̄kpọ. Mma nnen̄ede mma ukeme oro mmọ ẹsịnde ndikwọrọ eti mbụk Obio Ubọn̄ Abasi ke ofụri ererimbot. Mma n̄kụt ke mmọ ẹnen̄ede ẹyom ndin̄wam mme owo nte Jesus ọkọdọhọde ata mme Christian ẹnam. Ntre ke ini n̄kokotde se Jesus eketịn̄de ke Mark 10:21 ete, “Ditiene mi,” mma mbiere ndikabade ndi Ntiense Jehovah.

Edi ama ada mi ini mbemiso n̄keme nditre ndusụk n̄kpọ oro n̄kesinamde. Ke uwụtn̄kpọ, mma nsibre mbre mfọniso kpukpru urua ke ediwak isua. Edi mma ndikpep ke Abasi imaha mbre mfọniso ye idiọkitọn̄. (Isaiah 65:11; Colossae 3:⁠5) Ntem mma ntre ndibre mbre mfọniso. Akpa Sunday oro n̄ketrede ndibre, owo emi ekebrede nọmba oro n̄kesibrede ama adia. Mme owo ẹma ẹdọhọ ke ami n̄kpadia oro ẹnyụn̄ ẹdọhọ mfiak ntọn̄ọ ndibre, edi n̄kenyịmeke. N̄kafiakke mbre mbre mfọniso aba tọn̄ọ usen oro n̄ketrede.

Bible ọdọhọ ‘imen obufa owo isịne.’ (Ephesus 4:24) Edi usen oro n̄kanade baptism ke akamba mbono Mme Ntiense Jehovah, mma nsobo idomo emi akpakanamde ọsọn̄ mi ndika iso nnam emi. Ke ini n̄kakade ufọkisen oro n̄kodude, mma n̄kụt akani ufan mi an̄wan adade ke enyịnusụn̄ ebet mi. Enye ama ọdọhọ mi ete, “Sammy, berede usụn̄ idụk ufọk ikanam se isinamde.” Mma nsọsọp ndọhọ enye ke nnamke utọ n̄kpọ oro aba nnyụn̄ ndọhọ enye ke ndu uwem idahaemi nte Abasi oyomde. (1 Corinth 6:18) Idem ama akpa enye. Ekem enye ama ọtọn̄ọ ndida se Bible etịn̄de aban̄a use nnam mbubru onyụn̄ ọdọhọ ifiak ikodu nte ikesidude. Edi mma ndaha n̄kpọn̄ enye, mbe ndụk ufọk mberi usụn̄. Enen̄ede enem mi ndidọhọ ke toto ke 1958 emi n̄kakabarede ndi Ntiense Jehovah, ke mfiakke n̄kanam mme n̄kpọ oro mma n̄ketre.

Ufọn oro ndiade ke ntak emi nnamde se Bible ọdọhọde awak etieti. Ndusụk ufọn oro edi ke mmenyene ediwak nti ufan idahaemi, ndu eti uwem, nnyụn̄ nnen̄ede n̄kop inemesịt.

Nsụk mmama baseball, edi ndaha enye aba nte ebeiso n̄kpọ. Mma nnyene okụk nnyụn̄ n̄wọrọ etop ke ini n̄kesibrede baseball, edi mme n̄kpọ oro ikebịghike. Idahaemi, enem mi ndinam ufan ye Jehovah ye nditọete mi, ndien iyaka iso idi ufan ke nsinsi. Bible ọdọhọ ete: “Ererimbot ke ebebe efep ye mme udọn̄ esie, edi owo eke anamde uduak Abasi ododu ke nsinsi.” (1 John 2:17) Idụhe se mmade idahaemi nte Jehovah Abasi ye ikọt esie!