Ama enen̄ede enem Don ye Margaret * ke ini eyen mmọ ye ubon esie ẹkedide ẹdise mmọ. Mmọ ẹma ẹsịn ekpri usọrọ ke usen oro nditọ mmọ ẹkeyomde ndinyọn̄. Margaret, emi enen̄erede ọdiọn̄ọ nditem udia, ama anam udia emi ẹsibuakde macaroni ye cheese ẹtem sia nditọ nditọ esie ẹsima udia emi etieti.

Ke kpukpru owo ẹma ẹkesụhọde ẹtetie, Margaret ama emen udia edidori ke okpokoro. Ke ini enye okokụbọrede udia oro, idem ama akpa enye ndikụt ke cheese kpọt ke edi, macaroni isịneke. Enye ama efre ndisịn macaroni emi akam edide ata udia!

Kpukpru nnyịn imesinam ndudue, inamke n̄kpọ m̀mê ikpon didie m̀mê inyụn̄ idiọn̄ọ n̄kpọ nte nso. Imekeme ndidue ntịn̄ se nnyịn mîkpetịn̄ke, ifre ndinam se akpanade inam, mîdịghe inam n̄kpọ ke idiọk ini. Ntak emi isinamde ndudue? Nso ke ikpanam iban̄a ndudue emi inamde? Ndi enyene se ikpanamde man nnyịn idinam ndudue? Ndise ndudue nte Abasi esede ayan̄wam nnyịn ibọrọ mme mbụme emi.

Ke ini inamde n̄kpọ ọfọn, imesinyịme ẹtoro nnyịn. Kpasụk ntre, ke ini inamde ndudue, ndi ikpọfọnke inyịme n̄ko ke imanam ndudue, idem ọkpọkọm mbon en̄wen ikwe? Edieke isụhọrede idem, idisọn̄ke nnyịn ndinam oro.

Edieke owo emi adade idem ke n̄kpọ akaha anamde ndudue, enye ekeme ndinam nte ke inyeneke se idiọkde do, ọduọhọ owo en̄wen, mîdịghe inyịmeke ke imanam ndudue. Utọ edu oro esiwak ndida mfịna ndi. Edu emi isiyakke ẹkeme ndikọk mfịna oro odude, onyụn̄ ekeme ndinam ẹduọhọ mbon oro mînyeneke ubọk ke ndudue oro. Ọkpọkọm ikekeme ndidịp ndudue nnyịn, ana iti ke “owo nnyịn kiet kiet ayanam ibat aban̄a idemesie ọnọ Abasi.”—Rome 14:12.

Abasi ọdiọn̄ọ ke imekeme ndinam ndudue. N̄wed Psalm ọdọhọ ke Abasi “enyene esịtmbọm onyụn̄ ọfọn ido,” ke “enye idikwe ndudue inọ owo kpukpru ini, idinyụn̄ iyatke esịt ke nsinsi.” Enye ọdiọn̄ọ ke nnyịn ifọnke ima, isinyụn̄ ifreke ke “nnyịn idi ntan.”—Psalm 103:8, 9, 14.

Jehovah oyom nnyịn ise ndudue nte imọ isede. (Psalm 130:3) Ediwak item odu ke Bible emi ẹkemede ndin̄wam nnyịn ifiọk se ikpanamde ke ini inamde ndudue m̀mê ke ini mbon en̄wen ẹnamde ndudue.

Mme owo ẹsima ndidi ẹma ẹnam ndudue ẹma, mmọ ẹduọhọ mbon en̄wen, mîdịghe ẹdomo ndinam nte ke se mmimọ iketịn̄de m̀mê inamde inen̄ekede idiọk. Akpakam ọfọn ekpe ubọk edieke eduede etịn̄ ikọ emi ayatde owo man ẹka iso ẹdi ufan. Ndi enyene se ekeduede anam emi mînemke fi esịt mîdịghe emi ayatde owo en̄wen? Utu ke nditie nyat idemfo esịt m̀mê ndiduọhọ owo en̄wen,  ndi ikpakam ifọnke ndinam ofụri se ekemede man enen̄ede ndudue oro? Ndiduọhọ owo en̄wen edikam inanam mfịna oro okpon. Ntre, kpep n̄kpọ to ndudue fo, kpe mbon oro ekeduede ubọk, nyụn̄ fre ban̄a se iketịbede.

Ke ini owo en̄wen anamde ndudue, imesisọp ndinam enye ọfiọk ke nnyịn imaha se enye anamde oro. Edi ọfọn inam item Jesus Christ emi: “Kpukpru n̄kpọ eke mbufo ẹyomde mme owo ẹnam ye mbufo, ana mbufo n̄ko ẹnam kpasụk ntre ye mmọ.” (Matthew 7:12) Ke ini inamde ndudue, imesiyom mbon en̄wen ẹtua nnyịn mbọm mîdịghe ẹfre ẹban̄a se ikanamde oro. Ndi ikpọfọnke inam kpa ntre ke ini mbon en̄wen ẹnamde ndudue?—Ephesus 4:32.

Iyanam ndudue edieke nnyịn mîtịmke ikere n̄kpọ, mîtịn̄ke enyịn inam n̄kpọ, m̀mê ke ini nnyịn mîtịmke ifiọk n̄kpọ oro inamde. Idụhe owo nnyịn ndomokiet emi mîsinamke ndudue. Edi nnyịn idinamke ediwak ndudue edieke inamde item Bible.

Akpa item oro iyomde ndineme odu ke Mme N̄ke 18:13 emi ọdọhọde ete: “Owo ekededi eke ọbọrọde ikọ ke ini enye mîkopke kan̄a, oro edi ndisịme ye esuene ọnọ enye.” Edieke inyenede ime ibet owo etịn̄ ikọ esie ama, inyụn̄ itịmde ikere mbemiso ibọrọde, nnyịn iditịn̄ke ikọ ke iyatesịt, nnyịn idinyụn̄ inamke n̄kpọ ke ibụmede. Ndinyene ime n̄kpan̄ utọn̄ ayanam ifiọk se nnyịn mîkọfiọkke onyụn̄ anam nnyịn ikûnam ndudue.

Item Bible en̄wen edi: “Edieke usụn̄ odude, adan̄a nte mbufo ẹkekeme, ẹtie ke emem ye kpukpru owo.” (Rome 12:18) Nam se ekekeme man odu ke emem ye mme owo. Ke ini anamde utom ye mbon en̄wen, kere ban̄a mmọ nyụn̄ kpono mmọ. Toro mmọ ke se mmọ ẹnamde ọfọn nyụn̄ tịn̄ n̄kpọ emi edinamde mmọ ẹka iso ẹsịn idem ẹnam utom. Edieke mbufo ẹtiede ufan ufan, idisọn̄ke mbufo ndifen nnọ kiet eken edieke owo eduede etịn̄ ikọ m̀mê anam n̄kpọ emi ayatde owo, ẹyenyụn̄ ẹkeme ndikọk ikpọ mfịna emi odude.

Ke ini anamde ndudue, utu ke ndiyom n̄kpọ ntịn̄ nnyan̄a idem, domo ndikpep n̄kpọ nto ndudue fo. Yak ndudue oro anam enyene nti edu. Ndudue ekeme ndinam owo ekpep ndinen̄ede nnyene ime, mfọn ido, mfara ke idem, nnyene ifụre ifụre ido, ntie emem emem, nnyụn̄ mma mme owo. (Galatia 5:22, 23) Se edikpepde ayanam okûnam ukem ndudue oro ini en̄wen. Kûnen̄ede utie ukere nte ndudue oro afịnade fi, kûnyụn̄ unam nte ibeheke fi. Ndisida n̄kpọ emi akpayatde fi nnam mbubru ekeme n̄ko ndin̄wam fi.

Edieke isede ndudue nte Abasi esede, emi ayan̄wam nnyịn ifiọk se ikpanamde ke ini inamde ndudue m̀mê ke ini mbon en̄wen ẹnamde ndudue. Nnyịn ididuọhọke idem nnyịn ikaha, idinyụn̄ iyatke esịt ye mbon en̄wen. Edieke ikpepde n̄kpọ ito ndudue nnyịn, iyenyene ọniọn̄, mme owo ẹyenyụn̄ ẹma nnyịn. Nnyịn idikereke ke nnyịn iwọrọke n̄kpọ. Ke ini idiọn̄ọde ke mbon en̄wen ke ẹnyụn̄ ẹdomo ndikpep n̄kpọ nto ndudue mmọ, oro ayanam nnyịn ikûsua mmọ. Akakan ufọn oro ididiade edi ke emi ayanam ifen mme owo nte Abasi esifende nnyịn, onyụn̄ anam ima mmọ nte Jehovah amade nnyịn.—Colossae 3:13.

Ndi ndudue Margaret oro iketịn̄de iban̄a ke ntọn̄ọ ama abiat ekpri usọrọ oro mmọ ẹkenamde usen oro? Ikabiatke, sia kpukpru mmọ ẹma ẹfiọk ke enye ikokoho-koi inam. Ntre mmọ ẹma ẹda se iketịbede oro ẹsịn ke mbubru, Margaret ama onyụn̄ etiene asak. Mmọ ẹma ẹdia udia oro kpa ye oro owo mîkesịnke macaroni. Ke ediwak isua ama ekebe, nditọ nditọ esie iba oro ẹma ẹtịn̄ se iketịbede usen oro ẹnọ nditọ mmọ, ẹnyụn̄ ẹtịn̄ nte ekesinemde mmọ ndidu ye ete-ete ye eka-eka mmọ.