AKPA USỌBỌ Mbọk ti ete ke ẹnam itie emi ẹnọ mbabuat n̄kpọntịbe kpọt.

BAPTISM Ẹyenịm n̄kpọitie ẹnọ mbon baptism ke iso itie edinam. Edieke ẹnamde ukpụhọde ekededi, ẹyenam mbufo ẹfiọk. Mbon oro ẹyomde ndina baptism ẹkpenyene nditie ke ebiet oro ẹnịmde ẹnọ mmọ mbemiso utịn̄ikọ baptism ọtọn̄ọde ke usenubọk Saturday. Owo kiet kiet ekpenyene ndida ọfọn̄ ukwọhọde idem ye ọfọn̄ uyere mmọn̄ esie oro owụtde iso o-bụt ndi.

ENỌ IMAESỊT Ẹbiat ediwak okụk ẹnam ndutịm man ẹnyene n̄kpọitie oro ekemde, ẹnyene mme n̄kpọ utịn̄ikọ, kamara, TV, n̄kpọ usio vidio, ye ediwak n̄kpọ eken oro anamde mbono emi enem, man an̄wam nnyịn inen̄ede ikpere Jehovah. Enọ imaesịt fo ayan̄wam ẹkeme ndinyene okụk nda nnịm mbono emi mma, oyonyụn̄ an̄wam ke utom Abasi ke ofụri ererimbot. Oyokụt mme ekebe emi afo ekemede ndisịn enọ imaesịt fo ke ofụri an̄wa mbono emi. Emekeme n̄ko ndida Intanet nnọ edieke akade donate.pr418.com/efi. Imenen̄ede ima se ededi emi afo ọnọde. Otu Emi Ẹsede Ẹban̄a Utom Mme Ntiense Jehovah ẹkọm fi ke nte atatde ubọk an̄wam man ẹnam utom Abasi.

MME ADAIDAHA Utom mme adaidaha edi ndin̄wam fi. Mbọk kop se mmọ ẹtịn̄de. Nịm n̄kpọisan̄ ke itie emi mmọ ẹdọhọde, san̄a ke ebiet emi mmọ ẹwụtde fi, tie ke ebiet emi mmọ ẹnọde fi, dorode n̄kpọ fo fep ke n̄kpọitie mmọ ẹkpedọhọ anam ntre, nyụn̄ kop uyo mmọ ke mme n̄kpọ ntre.

N̄KPỌITIE Mbọk kere ban̄a mbon en̄wen. Ti ete ke n̄kukụre mbon oro ekemede ndimum itie nnịm nnọ ẹdi mbonubon mbufo, mbon oro ẹkesan̄ade ntre ke ukem moto, mbon oro ẹdụn̄de kiet, m̀mê mbon oro afo esikpepde Bible. Mbọk kûdori n̄kpọ ke n̄kpọitie emi mûnịmke unọ owo ndomokiet.

N̄KPỌ ORO ẸFIỌHỌDE Ẹkpenyene ndida kpukpru n̄kpọ oro ẹfiọhọde n̄ka Lost and Found. Edieke n̄kpọ ekededi ọbọhọde fi osop, ka itieutom emi koyom. Ẹkpenyene ndida nditọwọn̄ oro ẹbọhọde mme ete ye eka ẹsop n̄ka itieutom emi. Mbọk ẹtịm ẹse nditọ mbufo enyịn man mmọ idinam esịt ọduọ mbufo m̀mê ndisịn owo en̄wen ke utom.

UTOM IMAESỊT Edieke oyomde ndin̄wam ke utom ke mbono emi, mbọk ka Information and Volunteer Service Department.

UFỌKN̄WED MME ỌKWỌRỌ OBIO UBỌN̄ Mme asiakusụn̄ emi ẹdide isua 23 esịm 65, emi ẹkpemade ndinen̄ede nnam utom Jehovah n̄kan nte ẹnamde idahaemi, ẹkpenyene ndidụk mbono mbon oro ẹyomde ndika Ufọkn̄wed Mme Ọkwọrọ Obio Ubọn̄ emi ẹdinịmde uwemeyo Sunday. Ẹyetọt ini ye ebiet oro ẹdinịmde mbono emi.