ỌFỌFỌN ọnọ owo eke “mbet Jehovah [adatde] enye esịt.” Utọ owo oro okot Ikọ Abasi “ke uwemeyo ye ke okoneyo.” (Ps. 1:1, 2) Nte afo emenyene utọ idatesịt oro? Didie ke afo ekeme ndinam idatesịt oro enyenede oto n̄wed Abasi ọkọri?

Kûkot mme ikọ kpọt. Kụt mme idaha oro afo okotde aban̄a ke enyịn ikike. Kere ban̄a mme uyoikọ mbon oro ẹtịn̄de ẹban̄a. Nte afo okotde mme ntọn̄ọ ibuot Bible, kop nte Jehovah ke idemesie ayararede ke nde ke nde, se ẹnamde man isọn̄ odot se owo odụn̄de. Kop nte enye ọdọhọde Eyen esie, kpa Etubom Anamutom, nte ke ini ekem ndibot mme akpa owo oro. Kụt idaha oro ke enyịn ikike: Adam ye Eve ẹsọn̄ ibuot, Abasi ebiere ikpe ọnọ mmọ ndien, ke oro ebede, enye ebịn mmọ osion̄o ke Paradise. (Genesis, ibuot 1-3) Kop nte uten̄e ofụkde fi ke ini okotde nte uyo oro otode heaven anamde ẹdiọn̄ọ Jesus Christ nte edima Eyen Abasi, kpa enye emi Abasi okosiode ọdọn̄ man ediyak uwem esie ọnọ kaban̄a ubonowo. (Matt. 3:16, 17) N̄wana ndikere nte apostle John akanamde n̄kpọ ke ini enye okopde nte Jehovah ọdọhọde: “Sese, mmanam kpukpru n̄kpọ ẹdi mbufa.” (Edi. 21:5) Ke akpanikọ, ndikot Ikọ Abasi ke usụn̄ emi edi se inọde idatesịt!

Ka iso ndikot n̄wetnnịm n̄kpọ eke odudu spirit, ndien afo ọyọfiọk Jehovah nte owo emi enyenede uku ye uten̄e. Afo eyenen̄ede asan̄a ekpere Enye emi amade nnyịn mi, anamde n̄kpọ ye nnyịn ke mbọm, an̄wamde nnyịn edieke nnyịn ke nsụhọdeidem ikade iso idomo ndinam uduak esie, onyụn̄ owụtde nnyịn nte ikpokụtde unen ke kpukpru se inamde.—Josh. 1:8; Ps. 8:1; Isa. 41:10.

Adan̄a nte ini oro afo adade okot Bible ọniọn̄de, ntre ke afo edikop uyụhọ nte afo ọkọride ke ifiọk oro afo enyenede aban̄a se Abasi aduakde ndinam nnọ fi. Edi idatesịt oro ayaka anyan akan oro. Ke ini se afo okotde ọnọde fi un̄wam oro afo oyomde ndida nse mban̄a mme mfịna ọniọn̄ ọniọn̄, eyetie fi ke idem nte eketiede andiwet psalm emi ọkọdọhọde ete: “Ikọ ntiense fo edi utịbe: oro esịn ukpọn̄ mi ekpeme mmọ.” (Ps. 119:129) Afo n̄ko oyokop idatesịt nte afo okụtde mme edumbet ke N̄wed Abasi oro ẹn̄wamde ndikara ekikere ye mme udọn̄ fo ke usụn̄ uten̄e Abasi.—Isa. 55:8, 9.

Bible ọnọ ndausụn̄ ke ido uwem oro ekpemede nnyịn osio ke afanikọn̄  onyụn̄ owụtde nnyịn nnennen usụn̄. Nte nnyịn ikotde enye, nnyịn imọfiọk ite ke Jehovah edi Ete oro ọfiọkde mme mfịna oro ẹkemede ndidu ke ini nnyịn iyakde idem inọ mme udọn̄ anana-mfọnmma obụkidem. Enye iyomke nnyịn ibọ mme enyene-ndịk utịp oro owo mîkemeke ndifep ke ntak edifụmi mme n̄kokon̄ idaha ido uwem esie. Enye ekere aban̄a nnyịn onyụn̄ oyom nnyịn inyene mfọnn̄kan usụn̄ uwem. Nnyịn ndikot Ikọ esie an̄wam nnyịn nditịm mfiọk nte ọfọnde ndinyene enye nte Abasi ye Ete nnyịn eke heaven.

Andiwet psalm eketịn̄ aban̄a owo oro okotde Ikọ Abasi ke usen ke usen ete: “Kpukpru se enye anamde ọwọrọ usụn̄.” (Ps. 1:3) Ih, kpa ye unana mfọnmma nnyịn, kpa ye oro idude ke idiọk editịm n̄kpọ Satan, ndien kpa ye mme ukeme oro Devil esịnde ndisobo nnyịn mfep, edikot Ikọ Abasi ofụri ini ye edida se ikotde nsịn ke edinam ẹyen̄wam nnyịn ndikụt unen ke kpukpru n̄kpọ oro ẹban̄ade itie ebuana nnyịn ye Jehovah.

Sia nnyịn idude ke idak mfịghe otode akani editịm n̄kpọ emi, ndikot mme ekikere Andibot idem ke ekpri ibio ini ke usen ke usen ekeme ndinọ nnyịn odudu. Ndusụk mbon oro ẹkekọbide ke ntak mbuọtidem mmọ ẹkenyene sụk ibat ibat ufan̄ikọ oro mmọ ẹkekụtde ke mme n̄wedmbụk n̄kpọntịbe. Mmọ ẹma ẹsịbe mme itie emi, ẹmụm ẹsịn ke ibuot, ẹnyụn̄ ẹtie ẹkere mmọ. Jehovah ama ọdiọn̄ mme ukeme mmọ sia mmọ ẹkenamde se idaha mmọ akayakde ke ndibọ ifiọk otode Ikọ Abasi. (Matt. 5:3) Edi, ata ediwak nnyịn imenen̄ede inyene ifụre emi akande oro. Nnyịn ikpenyeneke ndibiere nte ke ndikot ufan̄ikọ Bible usọp usọp ini kiet ke usen, ke idemesie, ayada utịbe utịbe utịp edi. Nte ededi, nnyịn iyọbọ mme edidiọn̄ edieke inamde ukpụhọde ke se nnyịn inịmde ke mme ebeiso n̄kpọ man otodo ikot ikpehe Bible kiet usen kiet kiet, ikere iban̄a enye, inyụn̄ ida enye isịn ke edinam ke uwem nnyịn.

Ke nditịm ntịn̄, n̄kpọ ekeme nditịmede mme mfọnn̄kan ndutịm nnyịn. Ke oro etịbede, nnyịn idinịm mme n̄kpọ oro ẹnen̄erede ẹdi akpan n̄kpọ ke ebeiso. Ke uwụtn̄kpọ, nnyịn idikoho-koi itre ndin̄wọn̄ mmọn̄ ke usen kiet m̀mê iba. Inamke n̄kpọ m̀mê nso itịbe ke uwem nnyịn eke usen ke usen, do, nnyịn ikpenyene ndida ndusụk ini nda mmọn̄ akpanikọ mbịt itọn̄.—Utom 17:11.

Nte afo omokot ofụri Bible ke idemfo? Ekikere edikot ọtọn̄ọde ke Genesis nsịm Ediyarade etie nte n̄kpọ eke okponde akaha ọnọ ndusụk owo.  Ntem, ediwak mbon oro ẹkeyomde ndikot ofụri Bible ẹkebem iso ẹtọn̄ọ ye edikot N̄wed Abasi Christian Usem Greek. Ntak-a? Eyedi koro mmọ ẹma ẹkeme ndisọsọp n̄kụt nte mme n̄wed Bible oro ẹtụkde mmọ nte mme owo oro ẹyomde ndisan̄a ke nde ikpat Christ. Mîdịghe eyedi sia N̄wed Abasi Christian Usem Greek mînen̄ekede iwak—awakde esisịt kpọt akan mbahade kiet ke itie inan̄ ke ofụri Bible. Edi ke mmọ ẹma ẹkekụre ndikot n̄wed 27 oro, mmọ ẹma ẹwọn̄ọde ntịn̄enyịn mmọ ẹnọ n̄wed 39 eke N̄wed Abasi Usem Hebrew ẹnyụn̄ ẹtọn̄ọ ndikot nnyụn̄ n̄kop inem mmọ. Etisịm ini oro mmọ ẹkụrede N̄wed Abasi Usem Hebrew, mmọ ẹnyenyene edu edikot Bible ofụri ini, ntre mmọ ẹma ẹka iso, ẹkot N̄wed Abasi Christian Usem Greek ọyọhọ ikaba, inyụn̄ itreke. Afo akpakam anam edikot Ikọ Abasi ke usen ke usen edi edu ofụri eyouwem fo kpasụk ntre.

Nte odu owo ke ubon m̀mê esop mbufo oro mîkemeke ndikot n̄wed? Ntak mûnyịmeke ndikot Bible kpukpru ini nnọ owo oro? Afo ọyọbọ ufọn, enye n̄ko ọyọbọ ufọn nte enye etiede ekere se enye okopde onyụn̄ adade enye esịn ke edinam ke uwem esie.—Edi. 1:3.

 Nte ini akade, afo emekeme nditọn̄ọ akpan utom ke ebuana ye edikot Bible fo. Ndusụk ke otu emi ẹkeme ndifori ifiọk fo kaban̄a ebuana oro nsio nsio ikpehe Bible ẹnyenede. Edieke Bible fo enyenede mme ikọ mben n̄wed, emi ekeme ndida fi n̄ka ọyọhọ mbụkeset ye mme mbiet mbụk oro. Mmọ ẹkeme ndin̄wam fi ọfiọk mme idaha oro ẹkedade ẹkesịm ediwet nsio nsio psalm ọkọrọ ye mme leta oro mme apostle Jesus Christ ẹkewetde. Insight on the Scriptures ọnọ ekese ntọt aban̄a idaha mme owo, mme itie, ye mme edu oro ẹsiakde ke Bible. Mme chart ẹdụri ntịn̄enyịn ẹbịne edisu mme ntịn̄nnịm ikọ Bible, ẹwụt m̀mê ewe ndidem ye prọfet ẹkedu ke ukem iduọk ini, ẹnyụn̄ ẹnọ mme usenọfiọn̄ oro ẹkperede ndidi nnennen kaban̄a ediwak n̄kpọntịbe Bible.

Nte afo etiede ekere se afo ekpepde, afo ọyọfiọk ntak emi ndusụk idaha ẹkedemerede ke otu ikọt Abasi. Afo ọyọfiọk n̄ko ntak emi Jehovah akanamde n̄kpọ ye ikọt esie nte enye akanamde. Afo oyokụt nte Jehovah esede mme edinam ukara, mme idụt, ye mme owo. Emi ayanam fi enen̄ede enyene ifiọk aban̄a ekikere esie.

Mbụk Bible eyenen̄ede enem fi ke ini afo okụtde idaha oro mme n̄kpọntịbe ẹkedade itie ke enyịn ikike. Mme n̄wed ndise obio Bible ẹwụt mme ikpehe obio ọkọrọ ye nte mme itie ẹyomde usụn̄ ẹkpọn̄ kiet eken. Ke uwụtn̄kpọ, ke ekperede ebiet ewe ke nditọ Israel ẹkebe Ididuot Inyan̄? Isọn̄ Un̄wọn̄ọ okokpon adan̄a didie? Jesus akasan̄a oyom usụn̄ adan̄a didie ke ini utom ukwọrọikọ esie ke isọn̄? Nso mme n̄kpọ ke Paul okokụt ke mme isan̄ isụn̄utom esie? Mme n̄wed ndise obio ye se ẹtịn̄de ẹban̄a mme ikpehe isọn̄ ẹnọ ọyọhọ ntọt oro ẹnamde edikot Bible fo enyene uwem. M̀mọ̀n̄ ke afo ekeme ndikụt mme n̄wed ndise obio Bible? Ndusụk ẹdu ke New World Translation of the Holy Scriptures. Mme eboho Insight ẹsịne n̄kpọ nte mme n̄wed ndise obio 70, ẹnyụn̄ ẹnyene index n̄wed ndise obio ke utịt utịt akpa eboho. Da Watch Tower Publications Index yom mme n̄wed ndise obio eken. Edieke mme n̄wed emi mîdụhe, da mme n̄wed ndise obio oro ẹmịn̄de ke Enyọn̄-Ukpeme man ẹkpen̄wam fi ke edikot Bible fo.

Ke N̄wed Abasi Usem Hebrew, Edidem David ama otoro Jehovah, ete: “O Abasi, mme ekikere fo ẹsọn̄ mi urua didie! Ibat mmọ okpon didie!” (Ps. 139:17, 18) Ke N̄wed Abasi Christian Usem Greek, apostle Paul ama otoro Jehovah koro Enye “[akayamade] nnyịn ke esịt, man Enye an̄wan̄ade owo enyịn ndifiọk ubọn̄ Abasi ke iso Jesus Christ.” (2 Cor. 4:6) Paul okodu uwem ediwak isua ikie ke David ama akakpa; kpa ye oro, mmọ mbiba ẹma ẹdat esịt ẹban̄a Ikọ Abasi. Afo n̄ko emekeme ndidat esịt, edieke afo adade ini okot kpukpru se Jehovah ọnọde fi ke Ikọ esie eke odudu spirit.