INAMKE n̄kpọ m̀mê nso mfịna ke mmọ ẹsobo, akpana mme asan̄autom Abasi ẹkeme ndibọ ndọn̄esịt ke esop Christian. Ke ntak oro, ana mbiowo akpan akpan ẹkụt ẹte ke mme utịn̄ikọ ye item mmimọ ẹdi se inọde nsịnudọn̄. Mbiowo ẹkpenyene ndibiet “ọtọ udịbe ofụm, ye etehe ubọhọ edịm; ẹbiet akpa mmọn̄ ke edisat isọn̄, ẹbiet mfụt akwa itiat ke isọn̄ n̄kpa-mba.”—Isa. 32:2.

Edieke afo edide ebiowo, nte mme utịn̄ikọ fo ẹsinọ nduọkodudu ye ndọn̄esịt? Nte mmọ ẹsidemede udọn̄ mbon oro ẹdomode ndinam n̄kpọ Jehovah ke esịt akpanikọ? Nte mmọ ẹsinọ owo odudu ndisịn ifịk nnam uduak Abasi kpa ye unana udọn̄ ata ediwak owo m̀mê ubiọn̄ọ? Nso edieke ndusụk owo ke otuowo fo ẹdude ke mfụhọ, ẹbọde ufen ke ntak akwa nsọn̄ọn̄kpọ, m̀mê ẹn̄wanade ye idiọk udọn̄ọ oro mînyeneke usọbọ? Afo emekeme ndida mme ikọ ‘inua fo nsọn̄ọ nditọete fo esịt.’—Job 16:5.

Da ifet oro afo enyenede nte etịn̄ikọ n̄wam nditọete fo ndinyene idotenyịn nnyụn̄ mbọ odudu nto Jehovah ye mme ndutịm oro enye anamde.—Rome 15:13; Eph. 6:10.

Ti Mmọ Se Jehovah Anamde. Akpan usụn̄ kiet ndinam owo enyene uko edi ndiwụt nte Jehovah akan̄wamde ikọt esie ke mme ini afanikọn̄ ke eset.—Rome 15:4.

Jehovah ama ọdọhọ Moses ete ‘ọsọn̄ọ Joshua esịt’ onyụn̄ ‘ọsọn̄ọ enye idem’ mbemiso nditọ Israel ẹkedụkde Isọn̄ Un̄wọn̄ọ, emi mme asua ẹkedụn̄de adan̄aoro. Didie ke Moses akanam oro? Ke iso Joshua, Moses ama eti ofụri idụt oro mme n̄kpọ oro Jehovah akanamde ọnọ mmọ nte mmọ ẹkewọrọde ẹkpọn̄ Egypt. (Deut. 3:28; 7:18) Moses ama abat n̄ko mme edikan oro Jehovah akadade mmọ akan mme Amorite. Ekem Moses ama esịn udọn̄ ọnọ Joshua ete: “Sọn̄ọ idem, nyụn̄ nyene esịt.” (Deut. 31:1-8) Ke ini oyomde ndisịn udọn̄ nnọ nditọete fo, nte afo emesin̄wam mmọ ẹkop nsọn̄idem ebe ke nditi mmọ mme n̄kpọ oro Jehovah anamde ọnọ mmọ?

 Ndusụk ini mme mfịna ẹsikan mme owo ubọk tutu mmọ ẹkere m̀mê mmimọ iyọbọ mme edidiọn̄ Obio Ubọn̄ tutu amama. Ti mmọ nte mme un̄wọn̄ọ Jehovah ẹdide se ẹkemede ndiberi edem.—Josh. 23:14.

Ke ndusụk idụt ibet ukara akpan nditọete nnyịn ndikwọrọ eti mbụk. Ke mme utọ idaha oro, ima ima mbiowo ẹkeme ndin̄wam ekemmọ mme andinịm ke akpanikọ ndida mme ifiọkutom mme apostle Jesus Christ nsọn̄ọ idem. (Utom 4:1–5:42) Ndidụri ntịn̄enyịn n̄ko n̄wụt usụn̄ emi Abasi akanamde n̄kpọ aban̄a mme n̄kpọntịbe oro ẹwetde ke n̄wed Esther eyenen̄ede ọsọn̄ọ nditọete idem ndinyene uko.

Ke ndusụk idaha mme owo ẹsidụk mme mbono esop edi inamke n̄kọri ikan oro. Mmọ ẹkeme ndikere ke Abasi ikemeke ndifen nnọ mmọ koro akani usụn̄ uwem mmọ ekenen̄erede ọdiọk. Ndusụk afo emekeme ndibụk nte Jehovah akanamde n̄kpọ ye Edidem Manasseh. (2 Chron. 33:1-16) Mîdịghe afo emekeme nditịn̄ mban̄a mbon Corinth eset oro ẹkekpụhọrede usụn̄ uwem mmọ, ẹkabade ẹdi mme Christian, ndien Abasi etebe mmọ ikpe.—1 Cor. 6:9-11.

Nte odu ndusụk mbon oro ẹkerede ke mme mfịna oro mmimọ isobode ẹdi idiọn̄ọ unana edinyene unyịme Abasi? Afo emekeme nditi mmọ se Job okosobode ye nte enye ọkọbọde uwak edidiọn̄ sia enye ọkọsọn̄ọde ada ye Jehovah. (Job 1:1-22; 10:1; 42:12, 13; Ps. 34:19) Abian̄a abian̄a mbon ndọn̄esịt Job ẹkedọhọ ke ukwan̄ usụn̄ ẹte ke anaedi Job ama anam idiọkn̄kpọ. (Job 4:7, 8; 8:5, 6) Ke edide isio, ke ini ẹkesọn̄ọde mme mbet idem, ẹnyụn̄ “ẹkpe ye mmọ ẹte ẹsụk ẹyịre ke mbuọtidem,” Paul ye Barnabas ẹkedọhọ ẹte: “Nnyịn inyene ndibe ke ediwak ukụt ndụk Obio Ubọn̄ Abasi.” (Utom 14:21, 22) Kpasụk ntre mfịn, afo emekeme ndisọn̄ọ mbon oro ẹsobode mme idomo idem ke ndiwụt nte ke ẹyom edime ime ke idak ukụt ẹto kpukpru Christian ye nte ke enye edi ọsọn̄urua n̄kpọ ke enyịn Abasi.—N̄ke 27:11; Matt. 24:13; Rome 5:3, 4; 2 Tim. 3:12.

Sịn udọn̄ nọ mme andikpan̄ utọn̄ nnọ fi ndikere mme usụn̄ oro Jehovah osude mme un̄wọn̄ọ esie ke uwem mmọ. Ye esisịt nsịnudọn̄, mmọ ẹkeme ndikụt usụn̄ oro Jehovah anamde n̄kpọ ye mmọ ọkpọkpọ, kpa nte enye ọkọn̄wọn̄ọde. Ke Psalm 32:8, nnyịn ikot ite: “Nyeteme fi, nnyụn̄ n̄wụt fi usụn̄ eke afo edisan̄ade: nyeteme fi, nyetịn̄ fi enyịn mi ke idem.” Ke ndin̄wam mme andikpan̄ utọn̄ nnọ fi nditi nte Jehovah ekpemede m̀mê ọsọn̄ọde mmọ idem, afo ayanam mmọ ẹkụt  ke idemmọ nte ke Jehovah enen̄ede ekere aban̄a mmọ ndien nte ke enye ayan̄wam mmọ ke idomo ekededi oro mmọ ẹsobode idahaemi.—Isa. 41:10, 13; 1 Pet. 5:7.

Dara ke Se Abasi Anamde Idahaemi. Ke ini odomode ndisịn udọn̄ nnọ nditọete fo, dụri ntịn̄enyịn mmọ wụt se Jehovah anamde idahaemi. Nditịn̄ mban̄a mme n̄kpọ emi ke usụn̄ oro owụtde nte ke afo amadara mmọ eyedemede ukem ntụk oro ke esịt mme andikpan̄ utọn̄ nnọ fi.

Kere nte Jehovah an̄wamde nnyịn ndiyọ mme mfịghe uwem. Enye owụt nnyịn mfọnn̄kan usụn̄ ndidu uwem. (Isa. 30:21) Enye anam an̄wan̄a se idide ntak ubiatibet, ukwan̄ikpe, unana, udọn̄ọ, ye n̄kpa, onyụn̄ asian nnyịn nte enye edidade utịt ọsọk kpukpru emi. Enye ọnọ nnyịn ima ima itie nditọete. Enye ọnọ nnyịn ọsọn̄urua ifet edibọn̄ akam. Enye ọnọ nnyịn ifet edidi Mme Ntiense esie. Enye atat nnyịn enyịn ndidiọn̄ọ nte ke ẹma ẹdodori Christ ke ebekpo ke heaven ye nte ke mme akpatre usen akani editịm n̄kpọ emi ke ẹsan̄a usọp usọp ẹkpere utịt.—Edi. 12:1-12.

Dian mme mbono esop ye n̄kpri ye ikpọ mbono ke mme edidiọn̄ oro. Ke ini etịn̄de aban̄a mme ndutịm emi ke usụn̄ oro owụtde ke emenen̄ede okop inemesịt aban̄a mmọ, afo ọyọsọn̄ọ ubiere mbon efen ndika iso nsop idem ye nditọete mmọ.—Heb. 10:23-25.

Mme mbụk oro ẹwụtde nte Jehovah ọdiọn̄de mme ukeme nnyịn ke utom an̄wautom ẹdi n̄ko n̄kpọ nsịnudọn̄. Ke akpa isua ikie ke ini Paul ye Barnabas ẹkekade Jerusalem, mmọ ẹma ẹnam “kpukpru nditọ-ete ẹdara eti eti” ebe ke ndinọ ọyọhọ mbụk mban̄a nte mme Gentile ẹkekabarede esịt. (Utom 15:3) Afo n̄ko emekeme ndinọ nditọete idatesịt ebe ke ndibuana mme ifiọkutom oro ẹbọpde-bọp ye mmọ.

Edidi nsịnudọn̄ n̄ko ke ini ẹn̄wamde mme owo ndikụt ufọn n̄kpọ oro mmọ ẹnamde. Kọm mmọ ke ukeme oro mmọ ẹsịnde ke utom ukwọrọikọ Christian. Toro mbon oro mîkemeke ndinen̄ede mbuana ke utom ke ntak usọn̄ ye udọn̄ọ, edi oro ẹsọn̄ọde ẹda ẹyọ. Ti mmọ nte ke Jehovah ifreke ima oro mmọ ẹwụtde ẹnọ enyịn̄ esie. (Heb. 6:10) Mbuọtidem oro ẹdomode ẹse edi ọsọn̄urua inyene. (1 Pet. 1:6, 7) Oyom ẹti nditọete nnyịn n̄kpọ emi.

 Tịn̄ Ikọ ye Ntụk Ban̄a Idotenyịn Ini Iso. Mme un̄wọn̄ọ ini iso oro ẹtịn̄de ke odudu spirit ẹdi akpan n̄kpọ nsịnudọn̄ ẹnọ kpukpru mbon oro ẹmade Abasi. Ekeme ndidi ndusụk owo ke otuowo fo ẹsikop mme ikọ emi ediwak ini. Edi ebede ke esịtekọm oro afo owụtde ke ini etịn̄de aban̄a mme un̄wọn̄ọ emi, afo emekeme ndinam mmọ ẹdi ata idem n̄kpọ, ọnọde nsọn̄ọ nte ke mmọ ẹyesu, onyụn̄ anamde esịt mmọ ọyọhọ ye esịtekọm. Ndida se afo ekpepde ke Ufọkn̄wed Utom Ukara Abasi nsịn ke edinam ekeme ndin̄wam fi ndinam oro.

Jehovah ke idemesie edi Akwa Andinọ ikọt esie nsịnudọn̄ ye odudu. Edi, afo emekeme ndidiana kiet ye enye ke ndinam mbon efen ẹnyene mme utọ edidiọn̄ emi. Ke ini afo etịn̄de ikọ ọnọ esop, nen̄ede da ifet oro nam emi.