KE ADAN̄AEMI ekpenyenede ndinọ akpan ntịn̄enyịn ke uduot ukpepn̄kpọ fo, odot n̄ko ọnọ ntịn̄enyịn ke edikpeme ini ke utịn̄ikọ fo. Ẹtịm mme mbono esop nnyịn nditọn̄ọ nnyụn̄ ntre ke akpan ini. Oyom kpukpru owo oro ẹnyenede n̄kpọ ndinam ẹdiana kiet man ẹnam emi.

Ke mme ini Bible, nte mme owo ẹkesede uwem okpụhọde ye nte ẹsede mfịn ke ediwak ebiet. Ẹkesisiak ini ebe ke ndida mme ikọ oro mîwụtke ata nnennen ini, utọ nte “ke ini ekperede ọyọhọ hour usụkkiet usenubọk” m̀mê “[ekperede] hour inan̄ uwemeyo.” (Matt. 20:3-6; John 1:39) Akpan ntak ikodụhe ndifịna mban̄a editịm n̄kpeme ini ke mme edinam eke usen ke usen. Ke ndusụk ikpehe ererimbot mfịn, ẹnyene ukem ekikere oro ẹban̄a ini.

Nte ededi, idem okposụkedi mme ido n̄kann̄kụk m̀mê se owo amade ẹkemede ndinam etie nte ke mme owo idaha ini ke akpan n̄kpọ, nnyịn imekeme ndibọ ufọn ke ndinọ enye ntịn̄enyịn oro odotde. Ke ini ẹnọde ediwak owo n̄kpọ ndinam ke ndutịm, oyom ẹkere ẹban̄a ini oro ẹnọde ikpehe kiet kiet. Ẹkeme nditịm mbuan edumbet emi, “ẹnam kpukpru n̄kpọ ke nde ye ke ido nte eyede” ke edikpeme ini ke mme n̄kpọ oro ẹnọde nnyịn inam ke mbono esop.—1 Cor. 14:40.

Nditịm N̄kpeme Ini. Akpan n̄kpọ edi ntịmidem. Nte ido edide, mme etịn̄ikọ oro ẹsidiade ini ẹdi mbon oro mîsitịmke idem ọfọn. Mmọ ẹkeme ndinyene mbuọtidem ke idemmọ n̄kaha. Mîdịghe mmọ ẹkeme nditọn̄ọ nditịm idem ke usen ama okokụre. Editịm n̄kpeme ini ọtọn̄ọ ke ndiwụt esịtekọm nnọ se ẹnọde fi anam ye ke ndinyịme nditịm idem ọfọn.

Nte se ẹnọde fi anam edi ukotn̄wed? Akpa kan̄a, dụn̄ọde Ukpepn̄kpọ 4 esịm 7, emi esịnede editịn̄ ikọ ọdọnọ, editịn̄ ikọ ntuak nda, edisọn̄ọ ntịn̄ ikike ikọ, ye edidori nsọn̄uyo ke mme akpan ekikere. Ekem, da item oro sịn ke edinam nte afo okotde itie oro ẹnọde fi ndikot uyo ọwọrọ. Se ini oro afo adade. Nte oyom afo okot ọsọp inua man okụre ke ini oro ẹnọde? Sọp inua ke mme itie oro mînen̄ekede isịne akpan n̄kpọ,  edi ka iso kot tuak da nyụn̄ kot sụn̄sụn̄ man odori nsọn̄uyo ke mme akpan n̄kpọ. Kot fiak kot. Nte afo anamde n̄kọri ke ndikot n̄wed ọdọnọ, eyedi mmemmem n̄kpọ ndikpeme ini fo.

Nte afo editịn̄ ikọ oto n̄wed utịn̄ikọ? Iyomke ewet n̄kpọ awak akaha—anamde enye ekpere nditie nte n̄wed utịn̄ikọ oro ẹkotde-kot—man okụt ke omokụre ke nnennen ini. Ke ini akanamde n̄kpọ ke Ukpepn̄kpọ 25, afo ama ekpep eti usụn̄ ndinam emi. Nyene akpan n̄kpọ ition emi ke ekikere: (1) Tịm eti utịn̄ikọ, edi kûyak n̄kpọ awak akaha. (2) Nyene mme akpan n̄kpọ in̄wan̄-in̄wan̄ ke ekikere, edi kûmomụm kpukpru ikọ udọn̄ ke ibuot. (3) Wet ini oro odiomide ndida ke ikpehe kiet kiet ke n̄wed utịn̄ikọ fo m̀mê ini oro ekpesịmde akpan ebiet ke utịn̄ikọ fo. (4) Ke ini anamde ntịmidem, kere ntọt oro okposiode efep edieke adiade ini. (5) Kpep nte edinọde utịn̄ikọ fo.

Edinam ndomonse edi akpan n̄kpọ. Nte afo anamde ndomonse, se ini oro afo adade ke ikpehe kiet kiet ke utịn̄ikọ fo. Nam ndomonse ediwak ini tutu ofụri utịn̄ikọ fo ekeme ndikụre ke nnennen ini oro ẹnọde. Kûdomo ndidọn̄ n̄kpọ awak akaha. Nịm ekpri nyọhọ-nsụhọ ini nọ idemfo koro utịn̄ikọ oro afo ọnọde ke iso otuowo ekeme ndida ini oro ọniọn̄de esisịt akan ini akadade ekpep ke idemfo.

Ndibahade Mme Ikpehe. Editịm n̄kpeme ini asan̄a ikpat kiet ye edibahade utịn̄ikọ fo ndọn̄ ke ikpehe ke ikpehe nte odotde. Ekpenyene ndibiat n̄kponn̄kan ini ke edinọ idem utịn̄ikọ. Do ke mme ata akpan item ẹsịne. Ntọn̄ọikọ ekpenyene ndiniọn̄ n̄kem ndiyụhọ uduak ita oro ẹkenemede ke Ukpepn̄kpọ 38. Idem utịn̄ikọ ikpenyeneke ndiniọn̄ n̄kaha tutu ini idụhe aba ndida nnam utịtikọ odot, nte ekemde ye Ukpepn̄kpọ 39.

Ukeme oro afo esịnde nditịm n̄kpeme ini oyosụn̄ọ ke ndinọ eti utịn̄ikọ oyonyụn̄ owụt ukpono oro afo enyenede ọnọ mbon efen oro ẹnyenede n̄kpọ ndinam ke ndutịm ọkọrọ ye ofụri esop.