NTAK emi Christian ekpetịn̄de ikọ emi mîdịghe akpanikọ? Ekeme ndidi enye afiak etịn̄ sụk se enye okokopde owo efen etịn̄de, ye unana edida ini ndụn̄ọde m̀mê edi akpanikọ. Mîdịghe enye ke ndudue ekeme nditịn̄ ikọ ke n̄kponinua sia ntọt oro mîn̄wan̄ake enye. Ke ini nnyịn itịmde inọ ntịn̄enyịn ke ndinọ nnennen ntọt idem ke n̄kpri n̄kpọ, mme andikpan̄ utọn̄ nnọ nnyịn ẹyekụt ẹte ke mmimọ imekeme ndinyene mbuọtidem nte ke mme ata akpan etop oro itịn̄de ẹdi akpanikọ.

Ke An̄wautom. Ke ẹfiọkde ẹte ke ediwak n̄kpọ ẹdu oro mmimọ mîdiọn̄ọke kan̄a, ediwak owo ẹsikop ndịk nditọn̄ọ utom ukwọrọikọ. Edi, mmọ ẹsisọp ẹkụt ke mmimọ imekeme ndinọ ikọ ntiense uforo uforo, idem ye sụk ekpri ifiọk akpanikọ oro inyenede. Didie? Akpan n̄kpọ edi ntịmidem.

Mbemiso ọwọrọde an̄wautom, mehe ye ibuot nneme oro afo oyomde ndineme. Domo ndikere mme mbụme oro mme andikpan̄ utọn̄ nnọ fi ẹkemede ndibụp. Dụn̄ọde yom mme ibọrọ Bible oro ẹnọde uyụhọ. Emi eyetịm fi idem ndinọ mme ibọrọ oro ẹnende ifụre ifụre. Nte afo oyom ndikenịm ukpepn̄kpọ Bible? Dụn̄ọde n̄wed ukpepn̄kpọ oro ye ntịn̄enyịn. Kụt ete ke nsọn̄ọ N̄wed Abasi oro ẹnọde ke mme ibọrọ mbụme oro ẹmịn̄de an̄wan̄a fi.

Nso edieke enyeneufọk m̀mê nsan̄autom obụpde mbụme oro afo mûkeben̄eke idem ndibọrọ? Edieke afo mûtịmke udiọn̄ọ se idide akpanikọ, kûtịn̄ ke ibuot. “Esịt eti owo etịm ekere ndibọrọ.” (N̄ke 15:28) Afo emekeme ndinyene un̄wam oro afo oyomde ke n̄wed Reasoning From the Scriptures m̀mê Mme Ibuotikọ Bible Ndida Nnyene Nneme edieke ẹdude ke usem mbufo. Edieke mûkamake ndomokiet ke otu emi, dọhọ ke imọn̄ ikanam ndụn̄ọde ifiak idi. Edieke owo oro okobụpde mbụme oro enyenede esịt akpanikọ, enye eyenyene ime ebet nnennen ibọrọ. Ke akpanikọ, nsụhọdeidem fo ekeme nditịm ntụk enye.

Ndinam utom ye mme asuanetop oro ẹnyenede mbufiọk ke an̄wautom ekeme ndin̄wam fi ndinyene usọ ke nditịm nsiak Ikọ Abasi. Se mme itie N̄wed Abasi oro mmọ ẹkotde ye nte mmọ ẹdade ẹkọk ibuot. Sụhọde idem  bọ mme ekikere m̀mê edinen̄ede ekededi oro mmọ ẹnọde. Ifịk ifịk mbet oro Apollos ama ọbọ ufọn oto un̄wam oro mbon efen ẹkenọde. Luke eketịn̄ aban̄a Apollos nte “owo udọnikọ,” ‘owo oro ọsọn̄ọde ọfiọk n̄wed Abasi eti-eti,’ “owo ifiop-esịt,” owo emi ‘etịn̄de onyụn̄ etịmde ekpep mme owo n̄kpọ aban̄a Jesus.’ Kpa ye oro, ama odu se mîkan̄wan̄ake enye. Ke ini Priscilla ye Aquila ẹkefiọkde emi, mmọ ẹma “ẹda enye ẹnyọn̄ ufọk, ẹtịm ẹyarade usụn̄ Abasi ẹnọ enye.”—Utom 18:24-28.

“Ndisọn̄ọ Mmụm Ikọ Akpanikọ.” Mme utịn̄ikọ nnyịn ke mme mbono esop ẹkpenyene ndiwụt ukpono oro inyenede inọ n̄kokon̄ idaha oro esop enyenede nte “adaha ye isọn̄ eke akpanikọ Abasi odorode ke esịt.” (1 Tim. 3:15) Man isọn̄ọ imụm akpanikọ, edi akpan n̄kpọ nnyịn ndidiọn̄ọ se mme itie N̄wed Abasi oro nnyịn idiomide ndikot ke utịn̄ikọ ẹwọrọde. Diọn̄ọ se isịnede ke udọn̄ikọ ye uduak esie.

Mme owo ẹkeme ndifiak ntịn̄ se afo etịn̄de ke mbono esop. Edi akpanikọ, “kpukpru nnyịn idedue ke ediwak n̄kpọ.” (Jas. 3:2) Edi afo ọyọbọ ufọn ke ndikọri edu oro anamde ekeme nditịn̄ ikọ oro enende. Nte ini akade, ediwak nditọete iren oro ẹsịnde enyịn̄ ke Ufọkn̄wed Utom Ukara Abasi ẹyekabade ẹdi mbiowo. Ẹyom “se iwakde ikan” ẹto mbon oro ẹnọde utọ ifetutom emi. (Luke 12:48) Edieke ebiowo ke unana ntịn̄enyịn ọnọde ukwan̄ item oro adade akamba mfịna ọsọk mme andibuana ke esop, ebiowo oro ekeme ndinam Abasi ayat esịt ye enye. (Matt. 12:36, 37) Ntem, ana ẹfiọk eyenete oro odotde ndidi ebiowo nte owo oro ‘ọsọn̄ọde omụm ikọ akpanikọ eke ẹkekpepde enye.’—Titus 1:9.

Tịn̄ enyịn man n̄kọkibuot fo ẹdu ke n̄kemuyo ye “nti ikọ” eke ofụri akpanikọ N̄wed Abasi. (2 Tim. 1:13) Emi ikpenyeneke ndisịn fi ndịk ke idem. Ekeme ndidi afo ukotke kan̄a ofụri Bible uma. Ka iso ndikot enye. Edi kan̄a ke emi, tịm fiọk nte mme ekikere ẹtienede mi ẹkemede ndin̄wam fi ndidụn̄ọde ntọt oro afo ekerede ndida nnọ ukpep.

Akpa, bụp idemfo: ‘Nte ntọt emi odu ke n̄kemuyo ye se mma n̄kekpekpep ke Bible? Nte enye oyodụri mme andikpan̄ utọn̄ nnọ mi ekpere Jehovah, mîdịghe nte enye emenede ifiọk ererimbot ke enyọn̄, esịnde udọn̄ ọnọ mme owo nditiene ndausụn̄ esie?’ Jesus ọkọdọhọ ete: “Ikọ Fo edi akpanikọ.” (John 17:17; Deut. 13:1-5; 1 Cor. 1:19-21) Udiana, da mme n̄kpọ oro otu asan̄autom emi anamde akpanikọ, onyụn̄ enyenede ọniọn̄ ọnọde nam n̄kpọ nte ọfọnde. Emi idin̄wamke fi ndifiọk se mme itie N̄wed  Abasi ẹwọrọde kpọt, edi ayan̄wam fi n̄ko ndibuan mmọ ke usụn̄ oro adade ukem ukem onyụn̄ owụtde eti ibuot. Edieke ọkọn̄de utịn̄ikọ fo ke “nti ikọ” onyụn̄ eberide edem ke usụn̄ oro Jehovah adade enyene nneme ke ini atatde onyụn̄ abuande mme itie N̄wed Abasi, mme ikọ fo ẹyenen.

Ndidụn̄ọde Nte Ntọt Edide Nnennen. Mme n̄kpọntịbe ndondo emi, mme n̄kpọ oro ẹkotde ẹto ebiet efen, ye mme ifiọkutom ẹkeme ndin̄wam ke ini abuande onyụn̄ anamde mme akpan n̄kpọ ẹn̄wan̄a. Didie ke afo ekeme nditịm ndiọn̄ọ m̀mê mmọ ẹnen? Usụn̄ kiet edi ndida mme utọ ntọt oro nto ebiet emi ẹkemede ndiberi edem. Ti ndidụn̄ọde nse m̀mê ntọt oro edi eke idahaemi. Mme ibat ẹsikabade n̄kani; ifiọk ntaifiọk ẹsisọp ẹkpụhọde; ndien nte owo ọkọride ke ifiọk ukpepn̄kpọ mbụkeset ye mme usem eset, esiyom ẹnam ukpụhọde ke mme ubiere oro ẹkesịmde ẹkọn̄ọde ke ifiọk oro ẹkenyenede ke akpa. Nen̄ede du ke ukpeme edieke ekerede ndida ntọt nto n̄wedmbụk n̄kpọntịbe, ekebe ndise, ekebe ukopikọ, etop ilektrọnik, m̀mê Intanet. Mme N̄ke 14:15 ọnọ item ete: “Ọkọi ese kpukpru ikọ ke akpanikọ: edi ọniọn̄ etịm ese ikpat isan̄ esiemmọ.” Bụp idemfo: ‘Nte ẹdiọn̄ọ ebiet emi ntọt emi otode nte itie oro esinọde nnennen ntọt? Nte mme usụn̄ efen ẹdu oro ẹkemede ndida nsọn̄ọ ntọt emi?’ Edieke enyenede eyịghe aban̄a akpan ntọt, kûnọ enye.

Ke adianade ye edidụn̄ọde mfiọk m̀mê mme ebiet oro ẹdade ntọt ẹto ẹdi se ẹkemede ndiberi edem, tịn̄ enyịn kere nte afo odiomide ndida ntọt oro nnam n̄kpọ. Kụt ete ke nte adade n̄kpọ oro ẹkotde ẹto itie en̄wen ye ibat anam n̄kpọ odu ke n̄kemuyo ye udọn̄ikọ oro ẹdade mmọ ẹto. Ke ndidomo ndidori nsọn̄uyo ke mme akpan n̄kpọ, kpeme mbak “ndusụk owo” edikabade edi “ediwak owo,” “ediwak owo” edikabade edi “kpukpru owo,” “ke ndusụk idaha” edinyụn̄ akabade edi “kpukpru ini.” Nditịn̄ n̄kpọ mbe adan̄a m̀mê nditọt ibat, udomo, m̀mê nte n̄kpọ edide akpan n̄kpọ ke n̄kponinua ekeme ndidemede eyịghe ke se etịn̄de.

Ke ini afo etịn̄de se inende kpukpru ini, ẹyediọn̄ọ fi nte owo emi enyenede ukpono ọnọ akpanikọ. Emi etịn̄ eti ikọ adian Mme Ntiense Jehovah nte otu. Ke edide akpan n̄kpọ akan, enye ọnọ “Jehovah Abasi akpanikọ” ukpono.—Ps. 31:5.