MME etịn̄ikọ oro ẹnyenede mbufiọk ẹdiọn̄ọ ufọn edinyene ibuotikọ. Ke ini mmọ ẹtịmde utịn̄ikọ, ibuotikọ an̄wam mmọ ndiwụk ntịn̄enyịn ke akpan ntọt nnyụn̄ n̄kere ntotụn̄ọ ntotụn̄ọ mban̄a enye. Utịp edi nte ke utu ke mmọ nditịn̄ ediwak n̄kpọ enyọn̄ enyọn̄, mmọ ẹsitat utịn̄ikọ mmọ ke usụn̄ oro etịmde enyene ufọn ọnọ otuowo mmọ. Ke ini akpan n̄kpọ kiet kiet eyịrede nnennen nnennen ye ibuotikọ onyụn̄ an̄wamde nditat enye, oro an̄wam otuowo n̄ko nditi mme akpan n̄kpọ emi nnyụn̄ mfiọk ufọn mmọ.

Okposụkedi ẹkemede ndidọhọ ke ibuotikọ fo edi ibuot nneme oro afo adade etịn̄ ikọ, afo oyokụt nte ke uduot utịn̄ikọ fo eyetịm ọfọn edieke afo etide nte ke ibuotikọ fo edi akpan ekikere oro afo adade atat ibuot nneme fo. Obio Ubọn̄, Bible, ye ediset ke n̄kpa ẹdi ntatara ibuot nneme. Ẹkeme ndida nsio nsio ibuotikọ ntat mme ibuot nneme emi. Mmọ emi ẹdi ndusụk uwụtn̄kpọ: “Obio Ubọn̄, Ata Ata Ukara,” “Obio Ubọn̄ Abasi Ayanam Isọn̄ Edi Paradise,” “Ẹkeda Odudu Spirit Abasi Ẹwet Bible,” “Bible Edi Eti Ndausụn̄ ọnọ Eyo Nnyịn,” “Ediset ke N̄kpa ọnọ Mbon Mfụhọ Idotenyịn,” ye “Idotenyịn Ediset ke N̄kpa An̄wam Nnyịn Ndisọn̄ọ Nda ke Ukọbọ.” Oyom ẹda ata nsio nsio usụn̄ ẹtat kpukpru ibuotikọ emi.

Ke n̄kemuyo ye akpan ibuotikọ Bible, se Jesus Christ ọkọkwọrọde ke ini utom ukwọrọikọ esie ke isọn̄ ama ọsọn̄ọ owụt ibuotikọ oro: “Ubọn̄ Heaven ke ekpere.” (Matt. 4:17) Didie ke ẹketat ibuotikọ oro? Ẹtịn̄ n̄kpọ ẹtụk Obio Ubọn̄ oro awak ebe utịm ike-110 ke Gospel mbinan̄ oro. Edi Jesus ama anam se ikande edida ikọ oro ‘Obio Ubọn̄’ ntịn̄ ikọ ndien ndien. Ebede ke se enye ekekpepde ye mme utịben̄kpọ oro enye akanamde, Jesus ama anam an̄wan̄a nte ke imọ, oro ikodude do, idi Eyen Abasi, kpa Messiah, enye oro Jehovah edinọde Obio Ubọn̄ oro. Jesus ama owụt n̄ko ete ke ebede ke imọ, ẹma ẹberede usụn̄ ẹnọ mbon en̄wen ndibuana ke Obio Ubọn̄ oro. Enye ama etịn̄ mme edu oro anade mbon oro ẹdinọde ifet oro ẹwụt. Ebede ke mme ukpepn̄kpọ esie ye  mme utịbe utom oro enye akanamde, enye ama owụt in̄wan̄-in̄wan̄ se Obio Ubọn̄ Abasi edinamde ke uwem mme owo onyụn̄ owụt ke imọ ndida spirit Abasi mbịn mme demon nduọn̄ọ ekedi uyarade nte ke ‘Obio Ubọn̄ Abasi ama esịm’ mme andikop ikọ esie. (Luke 11:20) Obio Ubọn̄ oro ke Jesus ọkọdọhọ mme anditiene enye ẹtie ntiense ẹban̄a.—Matt. 10:7; 24:14.

Ndida Ibuotikọ Oro Odotde. Owo iyomke afo atat ibuotikọ ke ukem udomo oro Bible atatde, kpa ye oro ndinyene ibuotikọ oro odotde edi akpan n̄kpọ.

Edieke ẹdọhọde fi emek ibuotikọ, bem iso kere se idide uduak utịn̄ikọ fo. Ndien nte afo emekde mme akpan n̄kpọ oro edidade etịm utịn̄ikọ fo, kụt ete ke mmọ ẹnen̄ede ẹsọn̄ọ ibuotikọ oro afo emekde.

Edieke ẹnọde ibuotikọ, tịn̄ enyịn dụn̄ọde usụn̄ oro enye owụtde nte ẹkpedade ẹtat utịn̄ikọ fo. Ekeme ndiyom esịn ndusụk ukeme man ọfiọk ufọn ye se ẹkemede ndinyene nto utọ ibuotikọ oro. Edieke anade afo emek mme n̄kpọ ndida ntat ibuotikọ oro ẹnọde fi, tịn̄ enyịn mek man owụk ekikere ke ibuotikọ oro. Ke n̄kan̄ eken, edieke ẹnọde se ẹditịn̄de, osụk oyoyom afo odụn̄ọde nte ekemede ndida enye nnam n̄kpọ ke n̄kemuyo ye ibuotikọ oro. Oyom afo n̄ko ekere nte utịn̄ikọ oro edide akpan n̄kpọ ọnọ otuowo fo ye se ikpedide uduak fo ke ndinọ enye. Emi ayan̄wam fi ndibiere se okpodoride nsọn̄uyo ke utịn̄ikọ fo.

Nte Okpodoride Nsọn̄uyo ke Ibuotikọ. Man odori nsọn̄uyo nte odotde ke ibuotikọ, ana afo esịn itiat idakisọn̄ ke ini emekde onyụn̄ etịmde utịn̄ikọ fo. Edieke afo adade sụk mme n̄kpọ oro ẹsọn̄ọde ibuotikọ fo, edieke afo onyụn̄ etienede mme edumbet oro ẹbuanade ke nditịm eti utịn̄ikọ, eyedi afo oyodori nsọn̄uyo ke ibuotikọ ke ndammana usụn̄.

Edifiak ntịn̄ ikọ ekeme ndin̄wam ndisịn odudu ke ibuotikọ. Ke ndinem ikwọ, ibuotikọ edi inem inem ikpehe ikwọ oro ẹfiakde ẹkwọ ndien ndien tutu enye akabade edi n̄wọrọnda ke ofụri ikwọ oro ẹtịmde. Owo isifiakke ikwọ inem inem ikpehe ikwọ oro ke ukem usụn̄ kpukpru ini. Ndusụk ini udịm ikwọ kiet m̀mê iba kpọt ke ẹsifiak ẹkwọ, ke ini ke ini ẹsifiak ẹkwọ akpan udịm ikwọ ke isio isio usụn̄, edi ke usụn̄ kiet m̀mê eken, anditịm ikwọ esida mbufiọk etịm ikwọ esie tutu inem inem ikpehe esie akara ofụri ikwọ oro. Ukem oro ke ekpenyene ndidi  ye ibuotikọ utịn̄ikọ. Edifiak ntịn̄ mme ọkpọikọ ke ibuotikọ etie nte edifiak n̄kwọ inem inem ikpehe ke ikwọ. Edida mme mbiet ikọ emi ntịn̄ ikọ m̀mê edifiak ntịn̄ ibuotikọ ke usụn̄ efen owụt ibuotikọ oro ke nsio nsio usụn̄. Ndida mme utọ usụn̄ oro nnam n̄kpọ ayanam ibuotikọ edi akpan ekikere oro otuowo fo ẹdade ẹnyọn̄ọ.

Idịghe mme utịn̄ikọ ẹnọde ke mbot utịn̄ikọ kpọt ke mme edumbet emi ẹbuana, edi ẹbuana n̄ko nneme ke an̄wautom. Ẹkeme nditi ibio ibio nneme ke ata anyan ini edieke ibuotikọ ọwọrọde ada. Ẹyesọsọp ẹti item oro ẹnọde ke ukpepn̄kpọ Bible edieke ẹkedoride nsọn̄uyo ke ibuotikọ. Ukeme oro afo esịnde ke ndimek nnyụn̄ ntat mme ibuotikọ oro ẹdotde ayanam ekese ke ndifori ukeme fo nte etịn̄ikọ ye ọnọ ukpep ke Ikọ Abasi.