KE SE ibede idụt 200 ke ofụri isọn̄, ediwak miliọn nditọ ufọkn̄wed ke ẹbọ ufọn kpukpru urua ẹto ukpepn̄kpọ Ufọkn̄wed Utom Ukara Abasi. Ndusụk ẹdi mbufa owo. Mbon eken ẹdodụk ufọkn̄wed emi ke ediwak isua. Ẹnịm ufọkn̄wed emi ke ediwak tọsịn itie. Afo emekeme ndinyene ukem ndutịm ubọ ukpep emi ke ebiet ekededi oro afo odude ke isọn̄. Mme owo ẹdude ke kpukpru isua emana, ekpụk, ye idaha ifiọkn̄wed ke ẹbọ ukpep ukara Abasi emi ke mfọn.

Ke ini ẹketọn̄ọde ufọkn̄wed emi ke mme esop Mme Ntiense Jehovah ke 1943, ẹkeda mme ikọ emi ẹtịn̄ uduak esie: ‘Man ẹtịm kpukpru “mme anam-akpanikọ” idem, kpa mbon oro ẹkekopde Ikọ Abasi ẹnyụn̄ ẹbuọtde idemmọ ke enye, “ndikeme ndinọ mmọ efen ukpep” . . . ye uduak ndinam owo kiet kiet . . . eben̄e idem mfọn mfọn nditịn̄ idotenyịn oro enye enyenede an̄wan̄wa.’ (Course in Theocratic Ministry, p. 4) Uduak ufọkn̄wed emi osụk edi ukem tutu esịm mfịn emi.

Ke akpanikọ, nso idi mfọnn̄kan n̄kpọ oro owo nnyịn ekededi ekemede ndida enọ utịn̄ikọ emi Abasi ọnọde nnyịn nnam? Bible ọbọrọ ete: “Yak kpukpru n̄kpọ eke ẹduọkde ibifịk ẹtoro Jehovah.” (Ps. 150:6) Ke ini inamde oro, nnyịn ida idatesịt isọk Ete nnyịn eke heaven. Nnyịn iwụt enye nte ke nnyịn imowụt esịtekọm iban̄a nti ido ye ima esie. Eyịghe idụhe ẹsịnde udọn̄ ẹnọ mme Christian ‘ndiwa uwa ekọm nnọ Abasi kpukpru ini ke enyịn̄ Jesus, kpa mfri n̄kpọk-inua eke ẹkponode enyịn̄ Esie’! (Heb. 13:15) Man in̄wam fi ofori ukeme fo ke ndida enọ emi Abasi ọnọde fi ntoro  Jehovah, nnyịn imadat esịt ndinyene fi nte eyen ufọkn̄wed ke Ufọkn̄wed Utom Ukara Abasi.

Ke adan̄aemi ẹnen̄erede ẹnọ ntịn̄enyịn ke edikot n̄wed nnọ owo ye usọ utịn̄ ikọ ye unọ ukpep ke ufọkn̄wed emi, mme ufọn ukpepn̄kpọ Ufọkn̄wed Utom Ukara Abasi ikụreke ke oro. Nte afo abuanade, ẹyen̄wam fi ndikọri utọ nti ukeme nte ọkpọkpọ edikot n̄wed, edikpan̄ utọn̄ nnyụn̄ nti n̄kpọ, edikpep n̄kpọ, edinam ndụn̄ọde, edikọk ibuot nnyụn̄ nnam ndutịm, edineme nneme, edibọrọ mme mbụme, ye ediwet mme ekikere nsịn ke n̄wed. Bible ke idemesie ye mme n̄wed ẹkọn̄ọde ke Bible ẹdidi isọn̄ kaban̄a ukpepn̄kpọ ye edibọrọ mme mbụme nnyụn̄ nnọ mme utịn̄ikọ ke ufọkn̄wed emi. Nte afo ekerede aban̄a mme ọsọn̄urua akpanikọ emi ẹdude ke Ikọ Abasi, afo eyekpep ndinyene mme ekikere Abasi. Oro ekeme ndinyene ufọn adan̄a didie ntem ke kpukpru ikpehe uwem! Kaban̄a ufọn oro Ikọ Abasi enyenede, William Lyon Phelps, andikpep ufọkn̄wed ntaifiọk eke ọyọhọ isua ikie 20, ekewet ete: “Kpukpru owo oro ẹnyenede ọyọhọ ifiọk Bible ke ẹkeme ndinen̄ede n̄kot mme ọdiọn̄ọ n̄wed . . . Ami nnịm nte ke ifiọk Bible ye unana ukpepn̄kpọ akamba ufọkn̄wed enyene ufọn akan ukpepn̄kpọ akamba ufọkn̄wed ye unana ifiọk Bible.”

Nte ededi, man ọbọ ufọn ọyọhọ ọyọhọ oto ukpep oro ẹnọde ke Ufọkn̄wed Utom Ukara Abasi, nte eyen ufọkn̄wed, ana afo esịn ọkpọkpọ ukeme. Apostle Paul ama esịn udọn̄ ọnọ nsan̄a Christian esie Timothy ete: “Tịn̄ enyịn nam mme n̄kpọ emi; sịn idem ke esịt ofụri-ofụri; man kpukpru owo ẹkụt n̄kọri fo ke eti ido.” (1 Tim. 4:15) Ke mme usụn̄ ewe ke afo ekeme ndisịn idem?

Edieke ekemede, dụk Ufọkn̄wed Utom Ukara Abasi ke kpukpru urua. Da n̄wed ukpepn̄kpọ emi, Bọ Ufọn to Ukpepn̄kpọ Ufọkn̄wed Utom Ukara Abasi, nam n̄kpọ ọniọn̄ ọniọn̄. Wet enyịn̄ fo ke ufan̄ oro ẹnịmde ẹnọ enyịn̄ ke page oro enyịn̄ n̄wed odude. San̄a ye n̄wed emi kpukpru ini oro afo akade ufọkn̄wed. N̄wed ukpepn̄kpọ emi enyene n̄ko ukpọk ufan̄ ndiwet n̄kpọ ndọn̄. Ke ini okotde mme akpan n̄kpọ oro afo ekerede ke ẹyen̄wam fi, dụri udịm ke idak mmọ. Da ikpọ ufan̄ emi ẹdude ke mben wet mme n̄kpọ oro ẹnyenede ufọn emi afo ekpepde ke mme ini oro ẹnemede n̄kpọ ke ufọkn̄wed.

 Ẹnọ isio isio ndutịm oro ẹmịn̄de-mịn̄ emi ẹditienede ke Ufọkn̄wed Utom Ukara Abasi. Ndutịm oro eyesịne n̄ko ọyọhọ ntọt aban̄ade nte ẹdinịmde ufọkn̄wed. Afo emekeme ndikụt ke ọfọn esịn ndutịm emi ke esịt n̄wed emi, ke ebiet oro edisọpde okụt.

Ke nditịm idem nnọ ikpehe ufọkn̄wed eke urua ke urua, ti ete ke Bible edi akpan n̄wed ukpepn̄kpọ. Nam edikot itie Bible ekededi oro ẹdiomide ẹnọ urua oro edi ebeiso n̄kpọ ọnọ fi. Edieke afo ekemede n̄ko ndibem iso n̄kot nsio nsio ikpehe ndutịm, emi n̄ko eyetịm enyene ufọn.

Ke ini ufọkn̄wed, mme ifet ẹkeme ndiberede nnọ otuowo nditiene mbuana. Bọ ọyọhọ ufọn to emi. Nditiene mbuana ke mme utọ nneme oro edi akpan n̄kpọ ke ndin̄wam fi eti se afo okopde onyụn̄ ekeme ndida enye nsịn ke edinam ke ọkpọkpọ uwem fo.

Edi akpanikọ, kpukpru nditọ ufọkn̄wed ẹnyene ifet ndinọ mme utịn̄ikọ m̀mê ndinam mme nnamn̄wụt ke esop. Da ifet emi kiet kiet nam n̄kpọ nte ọfọnde. Nen̄ede sịn idem nam n̄kọri ke ido utịn̄ikọ ekededi oro ẹnọde fi ndinam utom ke esịt. Ẹyenọ fi item ye ekikere ndinam fi aka iso anam n̄kọri. Dara ọkpọkpọ un̄wam oro. Wet mme akpan ekikere oro ẹnọde ẹban̄a se afo akpanamde ke idemfo man anam n̄kọri, sịn ke n̄wed fo. Sia mîdịghe mmemmem n̄kpọ owo ndikụt idemesie nte mbon en̄wen ẹkụtde enye, ima ima item Bible ye item oro ẹnọde ẹkeme nditịp n̄kpọ nsịn akamba akamba ke n̄kọri fo. Oro edi ntre idem ọkpọkọm afo omododu ke ufọkn̄wed emi ke ediwak isua.—N̄ke 1:5.

Nte afo akpama ndinam ata usọp usọp n̄kọri? Emekeme ndinam, edieke afo anamde ọkpọkpọ usio ukot. Bem iso kpep ikpehe oro ẹdinemede ke utịn̄ikọ eyen ufọkn̄wed kiet kiet. Edieke ẹyomde owo efen ada itie etịn̄ikọ, afo eyekeme ndinọ idem unyịme unyịme, ndien oro ọyọnọ fi mbufiọk efen efen. Ke ini mbon efen ẹnọde utịn̄ikọ, tịm kpan̄ utọn̄ ke nte mmọ ẹnọde utịn̄ikọ oro. Nnyịn ikpekpep n̄kpọ ito kiet eken.

Ke adianade do, edieke mme idaha fo ẹyakde, afo emekeme ndinam n̄kọri fo ọsọp ebe ke ndikpep n̄wed ukpepn̄kpọ emi n̄ka anyan ke idemfo. Ke ama eketịm ọfiọk se idude ke ukpepn̄kpọ 15 oro ẹtienede, ka iso ndinam n̄kpọ ke “Ndutịm Ndida Mfori Ukeme nte Etịn̄ikọ ye Andikpep,” emi ọtọn̄ọde ke page 78. Akpa kan̄a, kpep ukpepn̄kpọ kiet kiet, nyụn̄ nam  mme utom ẹnọde ẹnam oro ẹnyenede ebuana ye enye. Da se afo ekpepde sịn ke edinam ke utom ukwọrọikọ. Emi ekeme ndinen̄ede ntịp n̄kpọ nsịn ke n̄kọri fo nte etịn̄ikọ ye nte ọnọ ukpep ke Ikọ Abasi.

Ukpep emi afo ọbọde ke Ufọkn̄wed Utom Ukara Abasi ayan̄wam nditịm fi idem nnọ se idide akpan n̄kpọ ikan ke uwem. Sia nnyịn inyenede uwem ke ntak uduak Abasi, nditoro enye edi ndifiọk se inen̄ede idi uduak uwem nnyịn. Jehovah Abasi odot ndibọ mfọnn̄kan itoro. (Edi. 4:10b) Ukpep oro nnyịn ibọde ke ufọkn̄wed emi edi usụn̄ ndida nnam emi man otodo nnyịn ikeme ndikere n̄kpọ in̄wan̄-in̄wan̄, inam n̄kpọ ọniọn̄ ọniọn̄, inyụn̄ ineme mme utịbe utịbe akpanikọ eke Ikọ Abasi eke odudu spirit uforo uforo.