MME owo ke ofụri ofụri ẹsinyene ifụre ke ini mmọ ẹnemede nneme ye mme ufan. Mmọ ẹsitịn̄ ikọ ke ndammana usụn̄. Ndusụk owo ẹsitịn̄ ikọ ufiop ufiop; ke ini mbon eken mîsitịn̄ke ikọ awak. Kpa ye oro, nditịn̄ ikọ ke ndammana usụn̄ ntre anam enye enyene inem.

Nte ededi, ke ini osobode ye esenowo, idotke nditịn̄ ikọ ke usụn̄ oro etiede ufan ufan akaha m̀mê ndinen̄ede ntie mbubru mbubru. Ke akpanikọ, ke ndusụk obio ẹsitọn̄ọ kpukpru nneme ye esenowo ke ata nnennen usụn̄. Ke ẹma ẹkewụt ukpono oro odotde, do, ẹkeme ndiyom ẹda mbufiọk ẹtịn̄ ikọ ke mmemmem usụn̄ ye ke ata ido nneme.

Ke ini etịn̄de ikọ ke mbot utịn̄ikọ, ana afo n̄ko odu ke ukpeme. Ido oro etiede ata mbubru mbubru ekeme ndisụhọde uku mbono esop Christian ye akpan n̄kpọ oro ẹtịn̄de. Ke ndusụk usem, odu mme ikọ oro ẹsiyomde ẹtịn̄ ke ini ẹtịn̄de ikọ ye akwa owo, andikpep, akwa owo ukara, m̀mê ete ye eka. (Tịm fiọk mme ikọ oro ẹtịn̄de ke Utom 7:2 ye 13:16.) Ẹsida isio isio ikọ ke ini ẹtịn̄de ikọ ye nsan̄a ndọ m̀mê n̄kpet n̄kpet ufan. Ke adan̄aemi utịn̄ikọ nnyịn ke mbot utịn̄ikọ mîkpetiehe nnennen nnennen ikaha, enye ekpenyene ndiwụt ukpono.

Nte ededi, odu mme n̄kpọ oro ẹkemede ndinam utịn̄ikọ owo etie eto eto m̀mê nnennen nnennen akaha. Kiet ke otu emi edi nte ẹbonde mme ikọ. Mfịna esidemede ke ini etịn̄ikọ odomode nditịn̄ ikọ nnennen nte ẹwetde ke n̄wed. Ikọ oro ẹwetde-wet esinen̄ede ẹkpụhọde ye ikọ oro ẹtịn̄de-tịn̄. Edi akpanikọ, ẹsida n̄wed ẹnam ndụn̄ọde ke ini ẹtịmde utịn̄ikọ. Eyedi ẹda utịn̄ikọ oro ẹto n̄wed utịn̄ikọ oro ẹwetde-wet. Edi edieke afo etịn̄de ikọ ukem nte ẹwetde ke n̄wed m̀mê ndikot mmọ nnennen nnennen nto n̄wed utịn̄ikọ ke ini ọnọde utịn̄ikọ, utịn̄ikọ fo iditiehe nte nneme. Man etịn̄ ikọ ke ido nneme, tịn̄ mme akpan n̄kpọ ke mme ikọ idemfo nyụn̄ fep mme awak-n̄kukọhọ udịmikọ.

N̄kpọ efen edi ukpụhọde ke usọp. Utịn̄ikọ oro etiede eto eto  onyụn̄ edide ata nnennen nnennen esiwak ndinam ẹsịn usọp ukem ukem ke mme ikọ. Ke nneme ofụri usen, ẹsisịn ukpụhọde ke usọp nte ẹtịn̄de ikọ ẹnyụn̄ ẹtịn̄de ẹtuak ẹda ndien ndien ke nsio nsio udomo.

Nte ededi, ke ini etịn̄de ikọ ọnọ akamba otuowo, afo ekpenyene ndidian akamba uyo, odudu, ye ufiopesịt ke ido nneme oro man otodo omụm n̄kpan̄utọn̄ mmọ.

Man ekeme nditịn̄ ikọ ke ido nneme oro odotde ke utom ukwọrọikọ, oyom afo anam edi ido fo nditịn̄ ikọ ọfọn kpukpru usen. Emi iwọrọke ite ke ana afo enen̄ede aka n̄wed. Edi ọfọn ndikọri eti edu utịn̄ikọ oro edinamde mbon efen ẹkpan̄ utọn̄ ẹnọ fi ye ukpono. Ye oro ke ekikere, kere m̀mê oyom afo anam n̄kpọ aban̄a mme n̄kpọ ẹtienede mi ke nneme fo eke usen ke usen:

1. Fep mme ikọ oro mîdotke m̀mê oro ẹnamde fi ebiet mme owo oro usụn̄ uwem mmọ atuahade ye mme idaha Abasi. Ke n̄kemuyo ye item oro ẹnọde ke Colossae 3:8, fep ndek ndek ikọ m̀mê uyat uyat ikọ. Ke n̄kan̄ eken, idiọkke nditịn̄ mme ikọ oro mme owo ẹmehede. Mme ikọ oro ẹmehede, m̀mê mme ikọ oro ẹsitịn̄de kpukpru usen, ẹsidi ke ido nneme, edi mmọ ẹdu ke n̄kemuyo ye mme edumbet utịn̄ikọ oro ẹnyịmede.

2. Fep ndida ukem ikọ ye ukem ubak udịmikọ kpukpru ini ntịn̄ isio isio ekikere oro afo enyenede. Kpep ndida mme ikọ oro ẹwụtde se afo etịn̄de aban̄a in̄wan̄-in̄wan̄.

3. Fep ndifiak ntịn̄ se ama eketetịn̄; nyene se oyomde nditịn̄ in̄wan̄-in̄wan̄ ke ekikere, tọn̄ọ ndien nditịn̄ ikọ.

4. Fep ndiyak uwak ikọ ẹbọ fi nti ekikere ẹbiat. Nam edi ido fo nditịn̄ akpan n̄kpọ oro oyomde mme owo ẹti ke in̄wan̄-in̄wan̄ ikọ oro edide ibio ibio.

5. Tịn̄ ikọ ke usụn̄ oro owụtde ukpono ọnọ mbon efen.