KE AKPA ini oro afo ekekpepde ndida mme edumbet Bible nsịn ke edinam, mme ido ukere n̄kpọ, utịn̄ikọ, ye edu uwem oro afo ekenen̄erede emehe ẹma ẹtọn̄ọ ndikpụhọde sụn̄sụn̄. Ediwak ke otu emi ẹkeda itie idem mbemiso afo ekesịnde enyịn̄ ke Ufọkn̄wed Utom Ukara Abasi. Idahaemi eyedi afo ama anam n̄kọri ekesịm idaha oro afo ama akayak uwem fo ọnọ Jehovah. Nte oro ọwọrọ ete ke afo emekeme nditre ndinam n̄kọri? Baba-o. Baptism fo edi ntọn̄ọ kpọt.

Mbet oro Timothy akanam utom nte ebiowo Christian ke ini Paul ọkọdọhọde enye ‘etịn̄ enyịn’ ke item oro ẹkenọde enye ye mme ifetutom oro ẹkeyakde ẹsịn enye ke ubọk—‘ndisịn idem ke esịt ofụri ofụri’ ke mme n̄kpọ emi—man “kpukpru owo ẹkụt n̄kọri [esie] ke eti ido.” (1 Tim. 4:12-15) Edide afo ndisụk ntọn̄ọ nditiene usụn̄ akpanikọ edi emi m̀mê emenyenyene ekese ifiọk ke usụn̄ uwem Christian, afo ekpenyene ndinyene udọn̄ ndinam n̄kọri.

Ke Ephesus 3:14-19, nnyịn ikot ite ke apostle Paul ọkọbọn̄ akam ete ekemmọ mme andinịm ke akpanikọ ‘ẹtịm ẹfiọk se idide ubom ye uniọn̄ ye ukon̄ ye utụn̄ọ’ akpanikọ. Ke ntak oro, Jesus ama ọnọ mme enọ ke owo man ẹkpep, ẹnen̄ede, ẹnyụn̄ ẹsọn̄ọ esop idem. Nditie n̄kere Ikọ Abasi eke odudu spirit ofụri ini, adianade ye un̄wam otode mme andikpep oro ẹnyenede mbufiọk, ẹkeme ndin̄wam nnyịn “ikọri” ke n̄kan̄ eke spirit.—Eph. 4:11-15.

N̄kọri oro esịne ‘edikabade ndi obufa ke spirit eke odude ke esịt fo.’ Emi abuana ndinyene okopodudu idaha ekikere oro odude ke n̄kemuyo ye eke Abasi ye Christ. Enye oyom ẹnyene ekikere mmọ kpukpru ini, man otodo “emen obufa owo esịne.” (Eph. 4:23, 24) Ke ini ekpepde mme Gospel, nte afo emesida mme mbụk uwem Christ emi nte uwụtn̄kpọ oro afo enyenede nditiene? Nte afo emesidomo ndidiọn̄ọ mme akpan edu oro Jesus ekenyenede ndien ekem esịn ọkpọsọn̄ ukeme ndikpebe mmọ emi?—1 Pet. 2:21.

Mme ibuotikọ oro afo enemede aban̄a ẹkeme ndiwụt udomo oro afo anamde utọ n̄kọri oro. Mbon oro ẹmende obufa owo ẹsịne isitịn̄ke ikọ oro edide abian̄a, asan̄ade ye isụn̄i, edide ndek ndek, m̀mê etikwo etikwo. Utu ke oro, ikọ mmọ esidi “se in̄wamde owo ndikọri . . . man ẹda  ufọn ẹnọ mmọ eke ẹkopde.” (Eph. 4:25, 26, 29, 31; 5:3, 4; Jude 16) Mme ikọ ye edinam mmọ ke ndịbe ye ke mme mbono esop ẹwụt nte ke akpanikọ ke okpụhọde uwem mmọ.

Edieke afo mûdịghe aba owo “emi ukpepn̄kpọ ẹtode ke nsio-nsio edem ẹbara nte ofụm ẹmen ẹtop ẹduọk,” emi n̄ko edi uyarade n̄kọri. (Eph. 4:14) Ke uwụtn̄kpọ, afo esinam n̄kpọ didie ke ini ererimbot osion̄ode ediwak mbufa ekikere, usụn̄, m̀mê orụk unọ idem inemesịt edi? Nte afo emesisobo idomo ndiwọn̄ọde ini emi akpadade anam mme n̄kpọ eke spirit nnịm man ebịne mme utọ n̄kpọ oro? Ndinam ntre ekeme ndibiọn̄ọ n̄kọri eke spirit. Etịm owụt eti ibuot didie ntem ndidedep ifet nnọ mme n̄kpọ eke spirit!—Eph. 5:15, 16.

Nte afo anamde n̄kpọ ye mbon en̄wen ekeme n̄ko ndidi idiọn̄ọ n̄kọri eke spirit. Nte afo emekpep ‘ndinyene esịt mbọm, nnyụn̄ mfen’ nnọ nditọete fo iren ye iban?—Eph. 4:32.

N̄kọri fo ndinam n̄kpọ ke usụn̄ Jehovah ekpenyene ndiwụt idem ke esop ye ke ufọk fo n̄ko. Uyarade ekpenyene ndidu n̄ko ke ufọkn̄wed, ke an̄wa, ye ke itieutom fo. (Eph. 5:21–6:9) Edieke afo owụtde mme edu uten̄e Abasi ke kpukpru utọ idaha oro ke ọyọhọ ọyọhọ udomo, do n̄kọri fo ke ayararede.

Jehovah ọnọ nnyịn owo kiet kiet mme ukeme ye mme ndammana ifiọk. Enye odori enyịn nnyịn ndida mmọ nnam n̄kpọ ke ufọn mbon efen ke utọ usụn̄ oro editode nnyịn, enye owụt mfọnido esie oro owo mîdotke. Kaban̄a emi apostle Peter ekewet ete: “Adan̄a nte mbufo kiet kiet ẹma ẹkebọ enọ ke ubọk Abasi, ẹda ẹnam n̄kpọ ẹnọ kiet eken nte nti mme akama-ukpọhọde . . . ufọn Abasi.” (1 Pet. 4:10) Didie ke afo ada itie akama-ukpọhọde fo anam n̄kpọ?

Peter aka iso ete: “Edieke owo etịn̄de ikọ, yak enye etịn̄ nte etịn̄ ikọ Abasi.” (1 Pet. 4:11) Ufan̄ikọ emi odori nsọn̄uyo ke mbiomo odude ke nditịn̄ ikọ ke ọyọhọ n̄kemuyo ye Ikọ Abasi, man otodo ẹnọ Abasi ubọn̄. Edu oro ẹdade ẹtịn̄ utọ ikọ oro ekpenyene n̄ko ndinọ Jehovah ubọn̄. Ukpep oro ẹnọde ke Ufọkn̄wed Utom Ukara Abasi ekeme ndin̄wam fi ndida enọ fo nnam n̄kpọ ke utọ usụn̄ oro—ọnọde Abasi ubọn̄ ebe ke usụn̄ oro afo an̄wamde mbon efen. Ke oro edide uduak fo, didie ke afo ekeme ndidomo n̄kọri fo ke ufọkn̄wed emi nse?

Utu ke ndikere mban̄a ibat n̄kpọ oro afo okụrede ke babru item utịn̄ikọ fo m̀mê mme utọ utịn̄ikọ oro ẹnọde fi, tie kere adan̄a nte ukpep  oro oforide uduot uwa ekọm fo. Ufọkn̄wed emi etịm nnyịn idem nditịm nnyene uforo ke an̄wautom. Ntre bụp idemfo: ‘Nte ami mmenen̄ede ntịm se nditịn̄de ke an̄wautom? Nte mmekpep ndiwụt ọkpọkpọ udọn̄ ke idem mbon oro nnọde ikọ ntiense? Nte mmesịn itiat idakisọn̄ nnọ mfiakn̄ka ebe ke ndibụp mme owo mme mbụme oro idinemede isan̄ efen? Edieke ami n̄kpepde Bible ye owo, nte ami ke nnam n̄kpọ ndikọri nte andikpep oro esịmde esịt?’

Kûda sụk mme ifetutom oro ẹnọde fi ubiere n̄kọri fo. Owo ikwe n̄kọri fo ke utịn̄ikọ oro ẹnọde fi, edi ẹkụt ke nte afo anamde enye. Edieke ẹkenọde fi utịn̄ikọ oro abuanade unọ ukpep, bụp idemfo: ‘Nte ami mma nnen̄ede nda usọ unọ ukpep nnam n̄kpọ? Nte ami mma nnọ utịn̄ikọ oro ke utọ usụn̄ oro anamde ukpụhọde odu ke uwem mbon oro ẹkekopde enye?’

Item oro ẹnọde ẹte ada enọ fo anam n̄kpọ abuana edinam usio-ukot. Nte afo emesinam usio-ukot ndisan̄a ye mbon efen ke an̄wautom? Nte afo emesiyom mme ifet ndin̄wam mme andibuana ke esop mbufo oro ẹdide mbufa owo, n̄kpri owo, m̀mê mbon n̄kpọnnam? Nte afo emesinọ idem unyịme unyịme ndinam Ufọkmbono Obio Ubọn̄ asana m̀mê ndin̄wam ke nsio nsio usụn̄ ke ikpọ ye n̄kpri mbono? Nte afo emekeme ndisịn enyịn̄ ke ini ke ini nte asiakusụn̄ unọ un̄wam? Nte afo emekeme ndinam utom nte asiakusụn̄ ofụri ini m̀mê ndin̄wam ke esop oro udọn̄ okponde akan. Edieke afo edide eyenete eren, nte afo ke anyanade ebịne man esịm mme n̄kpọ N̄wed Abasi oro ẹnamde mme owo ẹdot nte mme asan̄autom unamutom ye mbiowo? Afo ndinyịme ndinọ un̄wam nnyụn̄ mbọ mbiomo mbiom edi idiọn̄ọ n̄kọri.—Ps. 110:3.

Edieke etiede nte ke se ekemede ndinam edi ekpri ke ntak enyenede esisịt ifiọk ke usụn̄ uwem Christian, sọn̄ esịt. Ikọ Abasi ekeme ‘ndinam mme ọkọi ẹdi ọniọn̄.’ (Ps. 19:7; 119:130; N̄ke 1:1-4) Ndida item Bible nsịn ke edinam anam nnyịn ibọ ufọn ito mfọnmma ọniọn̄ Jehovah, oro ọsọn̄de urua akan ukpep ekededi oro ẹbọde ẹto ifiọk eyouwem kpọt. Edi, nte nnyịn inamde n̄kọri ke utom oro nnyịn inamde inọ Jehovah, nnyịn ke ibọ ọsọn̄urua ifiọk. Didie ke nnyịn ikeme ndida enye nnam n̄kpọ ke eti usụn̄?

Ke ama okosobo nsio nsio idaha ke uwem, owo ekeme ndikere ete: ‘Mma mbemiso nsobo idaha emi. Mmọdiọn̄ọ se ndinamde.’ Nte emi owụt ọniọn̄? Mme N̄ke 3:7 odụri owo utọn̄ ete: “Kûse idem fo ke ọfiọkn̄kpọ.” Ifiọk eyouwem ẹkpenyene nditịm nnam nnyịn ikere n̄kpọ ntatara  ntatara iban̄a mme n̄kpọ oro ikpenyenede ke ekikere ke ini isede iban̄a mme idaha ke uwem. Edi edieke nnyịn inamde n̄kọri eke spirit, ifiọk eyouwem nnyịn ekpenyene n̄ko ndinam nnyịn idiọn̄ọ nte ke nnyịn imoyom edidiọn̄ Jehovah man ikụt unen. Ntem, ẹkụt n̄kọri nnyịn, idịghe ke edise oro nnyịn isede iban̄a mme idaha ye mbuọtidem ke idem nnyịn, edi ke nnyịn ndisọsọp n̄wọn̄ọde mbịne Jehovah kaban̄a ndausụn̄ ke uwem nnyịn. Ẹwụt enye ebe ke nnyịn ndinyene mbuọtidem nte ke n̄kpọ ndomokiet ikemeke nditịbe ye unana unyịme esie ye ke nnyịn ndisọn̄ọ mmụm ima ima itie ebuana oro ẹkemede ndiberi edem ye Ete nnyịn eke heaven n̄kama.

Apostle Paul, kpa ye oro ekedide Christian oro ẹyetde aran, oro ama ọkọkọri esịm ọyọhọ idaha ke n̄kan̄ eke spirit, ama ọfiọk ete ke oyom imọ ika iso ‘inyanade ibịne’ man isịm utịtmbuba uwem. (Phil. 3:13-16) Nte afo emenyene utọ ekikere emi?

Afo anam n̄kọri adan̄a didie? Domo n̄kọri fo ke nte afo emende obufa owo esịne ọyọhọ ọyọhọ, nte afo osụkde ibuot ọnọ itie edikara Jehovah ofụri ofụri, ye adan̄a nte afo adade mme enọ fo okpono Jehovah ifịk ifịk. Nte afo ọbọde ufọn oto ukpepn̄kpọ Ufọkn̄wed Utom Ukara Abasi, mme edu oro ẹsion̄ode ẹwụt ke Ikọ Abasi ẹkpenyene ndiwụt idem sụn̄sụn̄ ke usụn̄ oro afo etịn̄de ikọ onyụn̄ ọnọde ukpep. Wụk ntịn̄enyịn ke mme ikpehe n̄kọri fo emi. Ih, dat esịt ban̄a mmọ, ndien n̄kọri fo eyetịm owụt idem.