LETA ofori uwem ye edu ediwak miliọn owo. Ata ediwak N̄wed Abasi Christian Usem Greek ẹkedi leta ke mbemiso. Mfịn nnyịn imekeme ndiwet leta ndida nsọn̄ọ mbufa mme andinịm ke akpanikọ idem, ndinyene nneme ye mme ufan, ndisịn udọn̄ nnọ nditọete iren ye iban oro ẹtọn̄ọde ndibiom san̄asan̄a mbiomo, ndisọn̄ọ mbon oro ẹsobode nsọn̄ọn̄kpọ idem, ndinyụn̄ nnọ ntọt oro ẹyomde man ẹse ẹban̄a mme utom esop.—1 Thess. 1:1-7; 5:27; 2 Pet. 3:1, 2.

Ediwet leta edi n̄ko usụn̄ unọ ikọ ntiense oro enyenede uforo. Ke ndusụk ebiet, ediwak owo ẹdụn̄ ke ikpọ ufọkidụn̄ oro ẹnyenede n̄kpọsọn̄ ukpeme m̀mê mme ufọkisen oro owo mîkemeke ndinam utom ifụre ifụre. Ndusụk owo isidụhe ke ufọk ediwak ini, ntre nnyịn isisoboke ye mmọ ke ini inọde ikọ ntiense ke ufọk ke ufọk. Mbon eken ẹdụn̄ ke mme nsannsan ebiet.

Udọn̄ọ, idiọk enyọn̄, m̀mê ukpan ekeme ke ndusụk idaha ndikụk fi nsịn ke ufọk fo. Nte afo emekeme ndiwet leta man ọnọ iman m̀mê owo oro afo eketịn̄de ikọ ọnọ ke ido nneme ikọ ntiense efen efen? Nte kiet ke otu nditọ ukpepn̄kpọ Bible fo ọwọrọ idụn̄? Leta emi afo ewetde ekeme ndidi sụk se enye oyomde man enye aka iso enyene udọn̄ ke n̄kpọ eke spirit. Mîdịghe eyedi afo emekeme ndibuana ntọt N̄wed Abasi oro odotde ye mbon oro ẹdọde ndọ obufa, ẹkabarede ẹdi ete ye eka, m̀mê oro ẹtabade mbonima mmọ ke n̄kpa.

Ke ini ewetde leta ndinọ owo oro akanam mûsoboke ikọ ntiense, bem iso tịn̄ owo emi afo edide. Afo emekeme ndinam an̄wan̄a nte ke afo abuana ke utom unyịmesịt emi ẹnamde ke ofụri ererimbot. Tịn̄ ete ke imọ idi kiet ke otu Mme Ntiense Jehovah, edieke ekerede ke odot imọ inam ntre. Nam owo oro ọdiọn̄ọ ntak emi afo ewetde-wet utu ke ndika ke idem. Wet nte n̄kpọ eke afo enemede nneme ye owo oro iso ye iso. Kpa ye oro, ke n̄kemuyo ye item oro “ẹnyene ibuot nte urụkikọt, ẹnyụn̄ ẹfụre nte ibiom,” tịm kere adan̄a ntọt oro afo ọkpọnọde aban̄a idemfo.—Matt. 10:16.

Sịn ke leta oro se afo ekpetịn̄de ye owo oro edieke afo ekpekemede ndiwaha n̄kese enye. Afo emekeme ndisio ntọn̄ọikọ ke ekpri n̄wed  Nte Ẹkpetọn̄ọde Ẹnyụn̄ Ẹkade Iso ke Nneme Bible nnam ekekem ye idaha m̀mê ndida nneme N̄wed Abasi nto nsiondi Utom Obio Ubọn̄ Nnyịn eke ndondo emi. Afo emekeme ndibụp mbụme onyụn̄ esịn udọn̄ ọnọ owo oro ndikere mban̄a enye. Ndusụk mme asuanetop ẹsikam ẹnam ẹdiọn̄ọ nte ke nnyịn imenyene ndutịm mfọn oro ẹnọde ibọrọ ke mme mbụme Bible ndien ekem ẹsiak ndusụk ibuotikọ ke kiet ke otu n̄wed un̄wam ukpepn̄kpọ nnyịn. Uwụtn̄kpọ leta oro ẹwetde ndida nnọ ikọ ntiense odu ke page 73. Enye ekeme ndinọ fi ndusụk ekikere, edi ọyọfọn ndinam se isịnede ke esịt enyene ukpụhọde. Mîdịghe ntre, nte ini akade, mme owo ẹkeme ndibọ ukem leta kiet emi ndien ndien.

Ndusụk owo ẹsimen̄e ndikot anyan leta otode esenowo. Ntre ekeme ndiwụt eti ibuot ndinam leta fo edi ibio ibio. Tre leta fo mbemiso andibọ ọtọn̄ọde ndikpa mba ndikot enye. Ọyọfọn ndisịn n̄wedikot ndidụk mbono esop ke Ufọkmbono Obio Ubọn̄. Afo emekeme ndisịn tract, ediye uduot ekpri n̄wed, m̀mê nsiondi Enyọn̄-Ukpeme m̀mê Awake! onyụn̄ anam an̄wan̄a nte ke ẹkeme ndinọ mmọ kpukpru ini edieke ẹyomde. Mîdịghe afo emekeme ndibụp m̀mê emekeme ndidi ndise enye ke ufọk esie man ẹka iso ye enye ke ibuot nneme emi.

Idahaemi, se leta uwụtn̄kpọ oro ẹsịnde mi. Tịm fiọk mme n̄kpọ ẹtienede mi: (1) Enye etie ediye ediye, idịghe nsuahade nsuahade. (2) Idem ọkpọkọm efọkn̄wed ososop, andibọ edisụk inyenyene enyịn̄ ye adres andinọ. (3) Ẹtịn̄ uduak leta emi ibio ibio ye nnennen nnennen ke akpa ikpehe ekikere. (4) Ẹneme akpan n̄kpọ kiet kiet ke isio isio ikpehe ekikere. (5) Ke ẹkerede ẹban̄a uduak esie, leta emi itiehe ufan ufan ikaha, inyụn̄ itiehe nte eke mbubehe.

Ke leta mbubehe, utọ nte enye oro ewetn̄wed esop ekemede ndinọ ẹsọk ọfis n̄kọk itieutom, ẹyesịn enyịn̄ esop, ọkọrọ ye enyịn̄ ewetn̄wed, adres esie, ye usenọfiọn̄. Ẹyewet n̄ko enyịn̄ ye adres owo m̀mê esop oro ẹnọde leta oro ẹsọk. Ekọm oro odotde eyetiene. Ke ndusụk usem ẹsiberi leta ye utọ ikọ nte “Ami okwo” m̀mê “Ami okwo ke mbuọtidem” mbemiso ẹsịnde ubọk. Ẹkpenyene ndida eton̄wed nsịn ubọk.

Ke leta ekededi, nọ akpan ntịn̄enyịn ke nte ọbọpde ikọ, nte obonde ikọ, idiọn̄ọ uduọk ibifịk, ye uyai. Ndinam ntre ayanam leta fo ye etop oro enye akamade ẹnyene uku.

Wet adres fo kpukpru ini ke edem efọkn̄wed—ekpetịm ọfọn edi adres fo. Edieke afo ekerede ke iwụtke ọniọn̄ ndinọ ọkpọkpọ adres fo ke ini  adade leta ọnọ isenowo ikọ ntiense, bụp mbiowo m̀mê mmọ ẹyenyịme afo ada adres Ufọkmbono Obio Ubọn̄ n̄kann̄kụk. Owo ikpenyeneke ndidede nda adres Watch Tower Society nnam emi, sia emi nte mîdotke ediwụt ke leta fo okoto ufọkutom N̄ka ndien ayada ndutịme edi. Edieke ẹsịnde n̄wed ke ini owo mîwetke adres andinọ leta, emi n̄ko ekeme ndinọ ukwan̄ ekikere nte ke N̄ka edi andinọ.

Kụt ete ke amadian n̄kemn̄kem ukpeusụn̄ post, akpan akpan edieke edide emesịn n̄wed. Edieke ukpeusụn̄ post mîkemke, ẹkeme ndiyom andibọ leta ekpe se isụhọde, ndien emi oyosụhọde uku etop fo. Ti ete ke ediwak idụt ke ini ẹsịnde ediye uduot ekpri n̄wed m̀mê magazine, ukpeusụn̄ usuan leta esikpon akan se ẹyomde ẹkpe ke leta kpọt.

Ke ndondo oro okụrede leta fo, kot enye man odụn̄ọde se isịnede. Enye etie didie? Nte enye etie ufan ufan onyụn̄ esịne usọ? Ima ye mfọnido ẹsịne ke otu mme edu oro nnyịn idomode ndiwụt ke ini nnyịn inamde n̄kpọ ye mbon en̄wen. (Gal. 5:22, 23) Edieke afo okụtde ekikere oro etiede etikwo etikwo m̀mê n̄kpọ oro ọnọde ekikere idotenyịn ndiọhọn̄kpọ, nen̄ede nte obonde ikọ.

Leta ekeme ndika mme ebiet oro afo mûkemeke ndika. Emi ke idemesie anam enye edi akpan n̄kpọutom ke utom ukwọrọikọ. Sia leta fo owụtde se afo ekerede ye mme n̄kpọ oro afo adade ke akpan n̄kpọ, nọ ntịn̄enyịn ke se isịnede, nte enye etiede, ye nte obonde ikọ. Enye ekeme ndinam owo ọtọn̄ọ isan̄, enyene nsọn̄ọ, m̀mê ọbọ nsịnudọn̄ ke usụn̄ uwem.