KE URUA kiet kiet, ata ediwak esop Mme Ntiense Jehovah ẹsidiomi utịn̄ikọ an̄wa ke ibuot nneme N̄wed Abasi. Edieke afo edide ebiowo m̀mê asan̄autom unamutom, nte afo ọmọnọ uyarade nte ke idi eti ọnọ utịn̄ikọ an̄wa ye eti ọnọ ukpep? Edieke edide ntre, ẹkeme ndidọhọ fi ọnọ utịn̄ikọ an̄wa. Ufọkn̄wed Utom Ukara Abasi aman̄wam ata ediwak tọsịn nditọete iren ẹdot ndinyene ifetutom emi. Ke ini ẹnọde fi utịn̄ikọ an̄wa, afo ọkpọtọn̄ọ ke m̀mọ̀n̄?

Mbemiso anamde ndụn̄ọde ekededi, kot n̄wed utịn̄ikọ oro nyụn̄ tie kere enye tutu enye an̄wan̄a fi. Nyene ibuotikọ utịn̄ikọ oro ke ekikere. Nso ke afo enyene ndikpep otuowo fo? Nso idi uduak fo?

Mehe ye mme akpan ibuotikọ. Dụn̄ọde mme akpan n̄kpọ oro. Didie ke kiet kiet enyene ebuana ye ibuotikọ? Ke idak akpan n̄kpọ kiet kiet, ẹwet mme udiana akpan n̄kpọ. Ẹwet mme n̄kpọ oro ẹsọn̄ọde mme udiana akpan n̄kpọ emi ke idak mmọ. Kere nte ikpehe kiet kiet ke n̄wed utịn̄ikọ emi atatde enye oro ebemde iso, adade ekeyịri ye efen, onyụn̄ an̄wamde ndiyọhọ uduak utịn̄ikọ oro. Ke ndondo oro afo ọfiọkde ibuotikọ oro, uduak utịn̄ikọ oro, ye nte mme akpan n̄kpọ ẹyọhọde uduak oro, do afo emeben̄e idem nditọn̄ọ nditat utịn̄ikọ oro.

Ke akpa ekeme ndidi n̄kpọ un̄wam afo ndikere mban̄a utịn̄ikọ fo nte mbio mbio utịn̄ikọ inan̄ m̀mê ition, emi kiet kiet enyenede akpan n̄kpọ. Tịm mmọ kiet ke ini kiet.

N̄wed utịn̄ikọ oro ẹnọde edi n̄kpọ ndida ntịm idem. Owo inamke enye ndidi se ẹkamade ẹnọ utịn̄ikọ ata nnennen nnennen nte ẹwetde. Enye etie nte ufọk oro ẹsụk ẹbọpde ke ubọk. Oyoyom ẹsịn ibibene, ọkọm, mme usụn̄, oyonyụn̄ oyom ẹdọn̄ mme n̄kpọ ke esịt mbemiso enye akabarede edi ufọk oro enemde ndidụn̄.

Jesus Christ ye mme mbet esie ẹkesida N̄wed Abasi ẹsọn̄ọ ukpepn̄kpọ mmọ. (Luke 4:16-21; 24:27; Utom 17:2, 3) Afo emekeme ndinam ukem oro. Utịn̄ikọ fo ekpenyene ndikọn̄ọ ke N̄wed Abasi. Utu ke sụk edinam an̄wan̄a ye ediwụt nte mme ikọ oro ẹtịn̄de ke n̄wed utịn̄ikọ ẹnyenede  ebuana, fiọk nte N̄wed Abasi ọsọn̄ọde mme ikọ oro, ndien ekem da N̄wed Abasi nọ ukpep.

Nte afo etịmde utịn̄ikọ fo, dụn̄ọde ufan̄ikọ kiet kiet oro ẹsiakde ẹsịn ke n̄wed utịn̄ikọ. Tịm fiọk udọn̄ikọ. Ndusụk itien̄wed ẹkeme ndin̄wam sụk ke ndinam idaha an̄wan̄a. Idịghe kpukpru mmọ ke oyom okot m̀mê etịn̄ n̄kpọ otụk ke ini ọnọde utịn̄ikọ fo. Mek mbon oro ẹdotde ye otuowo fo ẹkan. Edieke afo owụkde ntịn̄enyịn ke mme itie N̄wed Abasi oro ẹsiakde ẹsịn ke n̄wed utịn̄ikọ oro, eyedi afo uduyomke ndida mme itie N̄wed Abasi efen efen nnam n̄kpọ.

Ndikụt unen ke utịn̄ikọ fo ikọn̄ọke ke ibat itie N̄wed Abasi emi okotde, edi ke uduot ukpepn̄kpọ. Ke ini asiakde itie N̄wed Abasi, wụt ntak emi okotde mmọ. Da ini buan mmọ. Ke ama okokot itie N̄wed Abasi, nịm Bible fo in̄wan̄ nte enemede itien̄wed oro. Eyedi otuowo fo ẹyenam kpa ntre. Didie ke afo ekeme ndidemede udọn̄ otuowo fo nnyụn̄ n̄n̄wam mmọ ẹbọ ufọn ata ọyọhọ ọyọhọ ẹto Ikọ Abasi? (Neh. 8:8, 12) Afo emekeme ndinam ntre ebe ke edinam an̄wan̄a, edinọ uwụtn̄kpọ, ye ediwụt nte ẹdade ẹnam n̄kpọ.

Edinam An̄wan̄a. Ke ini etịmde idem ndinam akpan itien̄wed an̄wan̄a, bụp idemfo: ‘Nso ke enye ọwọrọ? Ntak emi n̄kotde enye ke utịn̄ikọ mi? Nso ke mbon oro ẹdude ke otuowo ẹkeme ndibụp idemmọ mban̄a ufan̄ikọ emi?’ Ekeme ndiyom afo odụn̄ọde udọn̄ikọ, idaha, n̄kann̄kụk, odudu emi mme ikọ ẹnyenede, ye uduak andiwet oro ẹkenọde odudu spirit. Emi oyom ndụn̄ọde. Afo oyokụt akpakịp ntọt oro enyenede ufọn ke mme n̄wed oro “asan̄autom emi anamde akpanikọ, onyụn̄ enyenede ọniọn̄” ọnọde. (Matt. 24:45-47) Kûdomo ndinam kpukpru n̄kpọ ẹban̄ade ufan̄ikọ oro ẹn̄wan̄a, edi nam ntak emi ọkọdọhọde otuowo fo okot enye an̄wan̄a ke ebuana ye n̄kpọ oro enemede.

Edinọ Uwụtn̄kpọ. Uduak edinọ mme uwụtn̄kpọ edi ndinam otuowo fo enyene ntotụn̄ọ ifiọk m̀mê ndin̄wam mmọ ẹti akpan n̄kpọ m̀mê edumbet oro afo enemede. Mme uwụtn̄kpọ ẹn̄wam mme owo ndida se afo etịn̄de ọnọ mmọ n̄kabuan ye n̄kpọ oro mmọ ẹma ẹkefọfiọk. Emi edi se Jesus akanamde ke ini enye ọkọnọde ọwọrọetop Ukwọrọikọ esie oro ke Obot. “Mme inuen enyọn̄,” “ekpon̄idịm ke ikọt,” “mfafaha inua-otop,” ‘ufọk eke ẹbọpde ke enyọn̄ akamba itiat,’ ye ediwak utọ ikọ oro ẹma ẹnam ukpepn̄kpọ esie enyene nsọn̄uyo, an̄wan̄a, onyụn̄ edi se owo mîkemeke ndifre.—Matt. ib. 5-7.

Ediwụt nte Ẹdade Ẹnam N̄kpọ. Ndinam itie N̄wed Abasi an̄wan̄a nnyụn̄ nnọ uwụtn̄kpọ ẹyenam ẹnyene ifiọk, edi ndida ifiọk oro nnam n̄kpọ  ọnọ utịp. Ke akpanikọ, edi mbiomo otuowo fo ndida etop Bible nnam n̄kpọ, edi afo emekeme ndin̄wam mmọ ẹfiọk se ẹyomde ẹnam. Ke ndondo oro afo enịmde ke akpanikọ nte ke ufan̄ikọ oro enemede an̄wan̄a otuowo fo ke mmọ ẹnyụn̄ ẹkụt ebuana oro enye enyenede ye akpan n̄kpọ oro etịn̄de, da ini wụt mmọ nte enye otụkde edinịm ke akpanikọ ye edu uwem. Wụt mme ufọn ndisana mme ukwan̄ ekikere m̀mê edu oro mîkemke ye akpanikọ oro ẹnemede mi, nyak.

Nte afo ekerede aban̄a nte edibuande mme itie N̄wed Abasi, ti ete ke mme andibuana ke otuowo fo ẹto nsio nsio idaha ke uwem ẹnyụn̄ ẹsobo nsio nsio idaha. Mbufa mbon oro ẹnyenede udọn̄, mme uyen, n̄kani owo, ye mbon oro ẹn̄wanade ye nsio nsio ọkpọkpọ mfịna ẹkeme ndidu. Nam utịn̄ikọ fo odot onyụn̄ edi ata idem n̄kpọ. Fep ndinọ item oro etiede nte ke afo enyene sụk ibat ibat owo ke ekikere.

Ẹnanam ndusụk ubiere kaban̄a utịn̄ikọ fo ẹnọ fi. Ẹwụt mme akpan n̄kpọ in̄wan̄-in̄wan̄, ẹnyụn̄ ẹwụt udomo ini emi afo enyenede ndida nneme akpan ibuotikọ kiet kiet in̄wan̄-in̄wan̄. Mme ubiere eken ẹnyene fi ndinam. Afo emekeme ndimek ndibiat ekese ini ke ndusụk akpan n̄kpọ ye esisịt ke mbon eken. Kûkere ke ana afo okụre kpukpru akpan n̄kpọ ke ukem udomo. Oro ekeme ndinam afo etịn̄ ikọ itọk itọk, onyụn̄ ọnọ otuowo fo n̄kpọ awak akaha. Didie ke afo ekeme ndibiere m̀mê ewe ke editat ọyọhọ ọyọhọ m̀mê ewe ke editịn̄ aban̄a ibio ibio kpọt? Bụp idemfo: ‘Ewe akpan n̄kpọ edin̄wam mi nditịn̄ akpan ekikere eke utịn̄ikọ emi? Ewe edinọ n̄kponn̄kan ifet ndinam otuowo mi ẹbọ ufọn? Nte ndisio akpan itie N̄wed Abasi kiet oro ẹsiakde ẹsịn ye ntọt oro asan̄ade ye enye mfep ayanam uyarade oro ẹnọde emem?’

Nen̄ede fep ndisịn n̄kpọ oro ẹkerede-kere m̀mê ọkpọkpọ ekikere. Idem Eyen Abasi, Jesus Christ, ama efep nditịn̄ ikọ ‘ke uyo Idem Esie.’ (John 14:10) Fiọk ete ke ntak oro mme owo ẹdide mbono esop Mme Ntiense Jehovah edi man ẹdikop nte ẹnemede Bible. Edieke ẹdade fi nte eti etịn̄ikọ, eyedi edi ke ntak oro afo anamde edi ido fo ndidụri ntịn̄enyịn nnọ Ikọ Abasi, idịghe idemfo. Ke ntak emi, ẹsima mme utịn̄ikọ fo.—Phil. 1:10, 11.

Ke ama akanam n̄wed utịn̄ikọ oro ọdọn̄ọde ibat ibat n̄kpọ akabade edi enye oro anamde N̄wed Abasi an̄wan̄a ke inem inem usụn̄, oyoyom afo anam ndomonse ke utịn̄ikọ fo. Ọfọn nditịn̄ uyo ọwọrọ. Akpan n̄kpọ edi ndikụt nte ke afo emenyene kpukpru akpan n̄kpọ in̄wan̄-in̄wan̄ ke  ekikere. Ana afo ekeme ndisịn esịt fo ke utịn̄ikọ fo, esịn uwem ke utịn̄ikọ oro, onyụn̄ etịn̄ ikọ akpanikọ ye ufiopesịt. Mbemiso ọnọde utịn̄ikọ fo, bụp idemfo: ‘Nso ke ami ndori enyịn ndiyọhọ?’ Bụp n̄ko ete: ‘Nte mme akpan n̄kpọ ẹwọrọ ẹda? Nte ami mmenen̄ede nnam utịn̄ikọ mi ọkọn̄ọ ke N̄wed Abasi? Nte akpan n̄kpọ kiet kiet eyịre nte ekpeyịrede ye akpan n̄kpọ efen? Nte utịn̄ikọ emi anam ẹkọri esịtekọm ẹnọ Jehovah ye mme enọ esie? Nte utịtikọ enyene ebuana nnennen nnennen ye ibuotikọ, owụt otuowo se ẹkpenamde, onyụn̄ onụk mmọ ndinam oro?’ Edieke afo ekemede ndibọrọ ih ke mme mbụme emi, do afo emeben̄e idem ‘ndinam ifiọk ọfọn,’ ke ufọn esop nnyụn̄ ntoro Jehovah!—N̄ke 15:2.