UKPEPN̄KPỌ 29
Nte Uyo Etiede
IDỊGHE se etịn̄de kpọt esinen̄ede otụk mme owo, edi n̄ko nte etịn̄de enye. Edieke owo oro etịn̄de ikọ ọnọ fi enyenede inem inem uyo oro etiede ufiop ufiop, ufan ufan, ye mfọnido mfọnido, nte idịghe akpanikọ nte ke afo eyetịm oyom ndikpan̄ utọn̄ nnọ enye n̄kan nte akpakpan̄de edieke uyo esie akpananade ufiop m̀mê etiede nsọn̄ido nsọn̄ido?
Ndinyene idaha uyo oro ẹmade inen̄ekede ikọn̄ọ ke nte uyo owo etiede. Enye n̄ko ekeme ndibuana edu owo. Nte owo ọkọride ke ifiọk akpanikọ Bible onyụn̄ adade enye esịn ke edinam, mme ukpụhọde ẹyedu ke nte enye etịn̄de ikọ. Uyo esie oyowụt mme utọ edu Abasi nte ima, idatesịt, ye mfọnido. (Gal. 5:22, 23) Ke ini enye enyenede ata udọn̄ ke idem mbon en̄wen, uyo esie oyowụt oro. Ke ini esịtekọm adade itie idiọk eseme, mme ikọ oro etịn̄de ye nte enịmde uyo ẹyewụt oro. (Eseme 3:39-42; 1 Tim. 1:12; Jude 16) Idem ke ini afo mûdiọn̄ọke usem oro ẹsemde, edieke owo kiet etịn̄de ikọ ntan̄idem ntan̄idem, ananade ime, okụtde ndudue, onyụn̄ etiede nsọn̄ido nsọn̄ido, ndien owo efen owụt nsụhọdeidem, ime, mfọnido, ye ima, ididịghe ọkpọsọn̄ n̄kpọ afo ndikụt ukpụhọde oro.
Ke ndusụk idaha, idiọk uyo ekeme ndito ndammana ndo m̀mê udọn̄ọ oro akabiatde owo eyenitọn̄. Mme utọ idaha oro ẹkeme ndisọn̄ tutu idịghe se ẹkemede ndinen̄ede ofụri ofụri ke editịm n̄kpọ emi. Nte ededi, ndikpep ndida mme ndido utịn̄ikọ nnam n̄kpọ nte odotde ekeme ndifori uyo.
Akpa kan̄a, edi akpan n̄kpọ ndidiọn̄ọ nte ke mme owo ẹnyene nsio nsio uyo. Uduak fo ikpedịghe ndinyene uyo oro ebietde eke owo en̄wen. Utu ke oro, fori ukeme oro uyo fo enyenede, ye mme san̄asan̄a uduot esie. Nso ikeme ndin̄wam fi anam emi? Akpan n̄kpọ iba ẹdu.
Kot Ibifịk Ọfọn. Man ekeme nditịm nda uyo fo nnam n̄kpọ, oyom afo enyene ofụm oro ekemde onyụn̄ okot ibifịk ọfọn. Ke ẹsiode emi
ẹfep, uyo fo ekeme ndimem, ndien utịn̄ikọ fo ekeme nditie n̄kpoho n̄kpoho.Akamba ikpehe obufre isịneke ke enyọn̄ enyọn̄ ikpanesịt; ọkpọ emi odude ke afara anam ikpehe emi etie nte enen̄ede okpon. Utu ke oro, obufre enen̄ede okpon ke n̄kan̄ enyọn̄ enyọn̄ esịp oro abaharede ikpanesịt ye akpa. Esịp oro abaharede ikpanesịt ye akpa eyịre ke usụhọde ikpehe ọkpọn̄kan̄ oro abaharede esịt ye idịbi.
Edieke afo ọdọn̄de ofụm ọyọhọ sụk enyọn̄ enyọn̄ obufre fo ke ini okotde ofụm, ibifịk ọyọsọp ababa fi. Uyo fo idinyeneke odudu, ndien afo ọyọsọp akpa mba. Man okot ibifịk ọfọn, oyom afo etetie mîdịghe adada nnennen nnennen onyụn̄ onụk afara aka edem. Nen̄ede sịn ukeme ndifep nditat sụk enyọn̄ enyọn̄ ikpanesịt fo ke ini okotde ibifịk oyom nditịn̄ ikọ. Bem iso dọn̄ ofụm yọhọ n̄kan̄ isọn̄ isọn̄ obufre fo. Ke ikpehe emi ọyọhọde, ọkpọn̄kan̄ edem mbiba ẹyetara. Ke ukem ini oro, esịp oro abaharede ikpanesịt ye akpa oyosụhọde aka isọn̄, okonụk akpa
ye nsia, anamde afo okop nte n̄kpahaisịn m̀mê ọfọn̄ efen oro esịnede otụkde fi ke idịbi. Edi obufre idụhe do; mmọ ẹdu ke esịt ọkpọn̄kan̄. Man odomo idemfo ese, dori ubọk kiet ke usụhọde ikpehe ọkpọn̄kan̄ fo kiet kiet. Ekem nen̄ede kot ibifịk. Edieke afo okotde ibifịk ọfọn, afo udumenekede idịbi fo udunyụn̄ umenekede afara fo. Utu ke oro, afo oyokop nte ọkpọn̄kan̄ oro ọdọkde sụn̄sụn̄ onyụn̄ atarade.Ekem, domo ndiduọk ibifịk. Kûbaha ofụm oro en̄wekde ke ndiduọk ibifịk usọp usọp. Duọk ibifịk sụn̄sụn̄. Kûdomo ndibọp usụn̄itọn̄ fo man omụm enye akama. Oro ọyọsọp anam uyo fo etie nte n̄kpọ eke
ẹbọpde-bọp m̀mê ọdọk akaha nte mîdotke. Odudu oro otode esịp idịbi ye esịp oro odude ke ufọt ọkpọn̄kan̄ osion̄o ofụm oro, ke adan̄aemi esịp oro abaharede ikpanesịt ye akpa ekpemede usọp oro enye adade ọwọrọ.Kpa nte efehe itọk oro ọbọde ukpep ke ufehe itọk, ntre ke etịn̄ikọ ekeme ndikpep ndikara ofụm oro enye en̄wekde. Da nnennen nyụn̄ bon afara nọ edem, kot ibifịk ọfọn man ọdọn̄ ofụm ọyọhọ usụhọde ikpehe obufre fo, nyụn̄ kot ibifịk sụn̄sụn̄ ke adan̄aemi abatde ibat sụn̄sụn̄ awak nte ekekeme ke ini kiet oro okotde ofụm. Ekem kpep ndikot n̄wed uyo ọwọrọ ke adan̄aemi okotde ibifịk ke ukem usụn̄ oro.
Nam Mme Esịp Oro Ẹsọn̄de Ẹmem. Akpan n̄kpọ efen oro ẹyomde man enyene eti uyo edi emi—du ke ifụre! Idem eyenen̄ede akpa fi ndikụt nte oforide uyo fo ke ndikpep ndidu ke ifụre ke ini etịn̄de ikọ. Ana ekikere ye esịt ẹdu ke ifụre, koro editịmede esịt esinam mme esịp ẹsọn̄.
Nam ekikere fo odu ke ifụre ebe ke ndinyene eti ekikere mban̄a otuowo fo. Edieke mmọ ẹdide mbon oro afo osobode ke an̄wautom, ti ete ke idem ọkpọkọm afo ekpep Bible ke ọfiọn̄ ifan̄ kpọt, afo ọmọfiọk nti n̄kpọ ẹban̄ade uduak Jehovah oro afo ekemede ndibuana ye mmọ. Ndien afo aka ebịne mmọ koro mmọ ẹyomde un̄wam, edide mmọ ẹfiọk m̀mê ifiọkke. Ke n̄kan̄ eken, edieke afo etịn̄de ikọ ke Ufọkmbono Obio Ubọn̄, ediwak mbon oro ẹdude ke otuowo ẹdi ikọt Jehovah. Mmọ ẹdi mme ufan fo, ndien mmọ ẹyom afo okụt unen. Idụhe mme owo efen ke ererimbot oro ẹnyenede utọ ufan ufan ye ima ima otuowo oro nnyịn isinyenede kpukpru ini.
Nam mme esịp itọn̄ ẹmem ebe ke ndinọ mmọ ntịn̄enyịn nnyụn̄ nsịn ukeme ndinam mmọ ẹdu ke ifụre. Ti ete ke mme esịp uyo fo esinyek ke ini ofụm asan̄ade ebe. Uyoikọ esikpụhọde nte mme esịp itọn̄ ẹsọn̄de m̀mê ẹmemde, ukem nte uyo urụk kita m̀mê ndido urụk esikpụhọrede ke ini ẹsọn̄ọde enye m̀mê ẹnamde enye emem. Ke ini anamde mme esịp uyo fo ẹmem, uyoikọ oyosụhọde. Ndinam mme esịp itọn̄ ẹmem an̄wam n̄ko ndinịm odudu ibuo in̄wan̄, ndien emi eyetịm otụk nte uyo fo etiede.
Yak ofụri idemfo odu ke ifụre—edọn̄, ubọk, afara, ye itọn̄. Emi eyetịp esịn ke ndinyene udobi oro edinamde uyo fo ekeme ndika anyan. Uyo esinyene udobi ke ini ofụri idem anamde n̄kpọ nte ebiet emi uyo otode, edi nnyekidem esibiọn̄ọ emi. Uyo, emi ọwọrọde oto eyenitọn̄, isinamke uyom n̄kukụre ke odudu ibuo edi esinam uyom n̄ko ke mme ọkpọ ikpanesịt, ke edet, enyọn̄-enyọn̄ n̄kpọkinua, ye ndudu eken. Kpukpru emi ẹkeme nditịp nsịn ke nte uyo odobide. Edieke afo odoride ndodobi n̄kpọ ke kita, uyo idiwọrọke; ana ẹdorode se ẹkedoride ẹfep edieke anade enye osioro uyo nte ọfọnde. Ntre ke edi ye mme ọkpọ oro ẹdude nnyịn ke idem, emi mme esịp ẹmụmde ẹkama. Edieke enyenede uyo oro odobide, afo eyekeme ndikpụhọde uyo fo nte odotde nnyụn̄ n̄wụt nsio nsio ntụk. Akamba otuowo eyekeme ndikop se afo etịn̄de ye unana afo ndifofiori.