EYEDI afo emenen̄ede anam ndụn̄ọde onyụn̄ etịm se idisịnede ke utịn̄ikọ fo. Eyedi afo n̄ko emetịm ntọn̄ọikọ oro edemerede udọn̄. Edi, n̄kpọ kiet ke ososụhọ—utịtikọ oro odotde. Kûda enye ke ekpri n̄kpọ. Se afo etịn̄de akpatre ke ẹsiwak nditi ebịghi akan. Edieke utịtikọ mînyeneke odudu, idem se ẹketịn̄de ke mbemiso ekeme ndikabade nnana uwem.

Kere ban̄a se itienede emi: Ke ekperede utịt uwem esie, Joshua ama ọnọ mbiowo ke idụt Israel n̄wọrọnda utịn̄ikọ. Ke ama okobụk usụn̄ oro Jehovah akanamde n̄kpọ ye Israel tọn̄ọ ke eyo Abraham, ndi Joshua n̄kukụre akafiak etịn̄ se idide mme akpan n̄kpọ ibio ibio? Baba. Utu ke oro, enye akada ọkpọsọn̄ ntụk ọnọ mme owo oro item, ete: “Ẹbak Jehovah, ndien, ẹnyụn̄ ẹnam n̄kpọ esie ke esịt kiet, ye ke akpanikọ.” Kot utịtikọ Joshua oro ẹwetde ke Joshua 24:14, 15 ke idemfo.

Apostle Peter ama ọnọ n̄wọrọnda utịn̄ikọ efen oro ẹkụtde ke Utom 2:14-36, ke iso akwa otu ke Jerusalem ke Usọrọ Pentecost eke 33 E.N. Akpa, enye ama anam an̄wan̄a nte ke se mmọ ẹkekụtde ekedi edisu ntịn̄nnịm ikọ Joel aban̄ade edin̄wan̄a spirit Abasi nduọk. Ekem, enye ama owụt nte emi ekenyenede ebuana ye mme ntịn̄nnịm ikọ ẹban̄ade Messiah ke Psalm, emi ẹkebemde iso ẹtịn̄ ẹban̄a ediset ke n̄kpa Jesus Christ ye edimenede enye ke enyọn̄ nnịm ke ubọk nnasia Abasi. Ekem, ke utịtikọ esie, Peter ama etịn̄ in̄wan̄-in̄wan̄ se kpukpru owo oro ẹkedude ke otuowo esie ẹnyenede ndinam. Enye ọkọdọhọ ete: “Mmọdo yak ufọk Israel ẹtịm ẹfiọk ẹte, Abasi ama anam Enye edi Ọbọn̄ ye Christ, kpa Jesus emi mbufo ẹkewotde ke [eto ndutụhọ, NW].” Mbon oro ẹkedude do ẹma ẹbụp ẹte: “Nditọ-ete, inam didie?” Ekem Peter ọbọrọ mmọ ete: “Mbufo ẹkabade esịt, ẹnyụn̄ ẹna baptism, kpukpru mbufo, ke enyịn̄ Jesus Christ.” (Utom 2:37, 38) Usen oro, n̄kpọ nte owo 3,000 ke otuowo esie, oro se ẹkekopde ekenen̄erede otụk mmọ ẹma ẹnyịme akpanikọ aban̄ade Jesus Christ.

Mme Akpan N̄kpọ Ndikere Mban̄a. Se afo etịn̄de ke utịtikọ fo ekpenyene ndinyene ebuana nnennen nnennen ye ibuotikọ utịn̄ikọ fo. Enye  ekpenyene ndidi utịtikọ oro odotde ye mme akpan n̄kpọ oro afo atatde. Okposụkedi ekemede ndida ndusụk ọkpọikọ nto ibuotikọ fo, edifiak nsiak enye nnennen edi mbubehe idemowo.

Nte ido edide, uduak utịn̄ikọ fo edi ndisịn udọn̄ nnọ mbon efen ndinam n̄kpọ mban̄a ntọt oro ọnọde. Kiet ke otu akpan uduak utịtikọ edi ndiwụt mmọ se ẹkpenamde. Ke ini afo ekemekde ibuotikọ ye mme akpan n̄kpọ fo, nte afo ama etịm ekere ntak oro ibuotikọ oro edidide akpan n̄kpọ ọnọ otuowo fo ye se ididide uduak fo ke ndinọ enye? Ke edide ntre, afo ọmọdiọn̄ọ se afo ediyomde mmọ ẹnam. Idahaemi afo enyene ndinam mmọ ẹfiọk se ẹkpenamde ye nte ẹkpenamde enye.

Ke adianade ye ediwụt otuowo fo se ẹkpenamde, utịtikọ fo ekpenyene ndinụk owo ndinam n̄kpọ. Enye ekpenyene ndisịne nti ntak oro anade owo anam n̄kpọ onyụn̄ ekeme ndisịne mme ufọn oro ẹkemede ndinyene nto edinam oro. Edieke etịmde akpatre udịmikọ ye ntịn̄enyịn onyụn̄ obonde enye nte ọfọnde, enye ayafiak esịn odudu ke ofụri utịn̄ikọ fo.

Ti ete ke utịn̄ikọ oro ke asasan̄a ebịne utịt. Se afo etịn̄de ekpenyene ndiwụt oro. Usọp fo ekpenyene n̄ko ndida n̄kekem. Kûtịn̄ ikọ usọp inua tutu esịm utịt, ndien ekem etre inikiet inikiet. Ke n̄kan̄ eken, kûyak uyo fo osụhọde ofụri ofụri. Uyo fo ekpenyene ndikpon n̄kem edi ikponke ikaha. Mme akpatre udịmikọ fo ẹkpenyene ndiwụt ke emesịm utịt. Afo ekpenyene nditịn̄ mmọ ke ofụri esịt ye nsọn̄uyo. Ke ini etịmde utịn̄ikọ fo, kûtre ndinam ndomonse ke utịtikọ fo.

Utịtikọ fo ọkpọniọn̄ adan̄a didie? Emi idịghe n̄kpọ oro ẹdade ini kpọt ẹbiere. Owo ikpenyeneke ndidodụri utịtikọ. Ẹkeme ndibiere uniọn̄ oro odotde ẹtiene nte enye otụkde otuowo. Utịtikọ oro odotde awak ndidi enye oro edide mmemmem, nnennen, ye in̄wan̄-in̄wan̄. Enye oro ọniọn̄de ke ndusụk udomo oro esịnede ibio ibio uwụtn̄kpọ ekeme n̄ko ndinyene uforo edieke ẹtịmde enye ye ntịn̄enyịn. Men ibio ibio utịtikọ ofụri n̄wed Ecclesiastes, oro ẹkụtde ke Ecclesiastes 12:13, 14, domo ye utịtikọ Ukwọrọikọ oro ke Obot, emi omụhọde akan, oro ẹwetde ke Matthew 7:24-27.

Ke An̄wautom. Ebiet emi ediyomde afo etịm ekere aban̄a utịtikọ edi ke an̄wautom. Afo emekeme ndinam ẹnyene ekese ufọn edieke etịmde idem onyụn̄ enyenede ima ima udọn̄ ke idem mme owo. Emekeme ndida item oro ẹnọde ke enyọn̄ emi nnam n̄kpọ ke usụn̄ oro enyenede ufọn idem ke ini enemede nneme ye owo kiet.

 Nneme oro ekeme ndidi ata ibio ibio. Ekeme ndidi owo oro anam n̄kpọ. Ediwaha fo ekeme ndibịghi ke minit kiet kpọt. Edieke odotde, afo emekeme nditịn̄ se ikade ntem: “Mmokụt ke anam n̄kpọ. Edi yak ntịn̄ ikọ kiet nnọ fi. Bible owụt ete ke Andibot nnyịn enyene utịbe utịbe uduak—ndinam isọn̄ emi edi ebiet emi mme owo ẹkemede ndidara uwem ke nsinsi. Nnyịn imekeme ndidu ke Paradise oro, edi nnyịn inyene ndikpep se Abasi oyomde.” Mîdịghe afo emekeme ndikam ndọhọ ke iyafiak idi ke ini oro ọfọnde akan.

Ẹkeme ndisụk nnam akamba ufọn edieke enyeneufọk esịbede nneme inikiet inikiet—idem etiede nsọn̄ido nsọn̄ido. Kere ban̄a item odude ke Matthew 10:12, 13 ye Rome 12:17, 18. Eyedi sụn̄sụn̄ ibọrọ fo ekeme ndikpụhọde ekikere esie kaban̄a Mme Ntiense Jehovah. Oro edidi eti utịp.

Ke n̄kan̄ eken, ekeme ndidi afo ama enyene nneme oro ọnọde uyụhọ ye enyeneufọk. Ntak mûfiakke utịn̄ mme akpan n̄kpọ oro afo oyomde enye eti? Sịn se ikemede ndinụk enye ndinam n̄kpọ mban̄a se etịn̄de.

Edieke afo okụtde ke usụn̄ eberede ọnọ n̄kaiso nneme ini efen, nam owo oro enyene idotenyịn aban̄a oro. Bụp mbụme—edide enye oro ẹnemede ke Reasoning From the Scriptures m̀mê ke n̄wed oro ẹtịmde ẹnọ ukpepn̄kpọ Bible. Nyene utịtmbuba fo ke ekikere, nte Jesus okowụtde ke Matthew 28:19, 20.

Nte afo oyom ndiberi ukpepn̄kpọ Bible? Ndifiak nsiak ibuotikọ ayan̄wam eyen ukpepn̄kpọ oro eti se ẹkenemede. Mme mbụme ndụn̄ọde ẹyen̄wam ndisọn̄ọ nsịn mme akpan n̄kpọ ke ekikere eyen ukpepn̄kpọ, akpan akpan edieke ndụn̄ọde oro mîdịghe itọk itọk. Mbụme aban̄ade nte n̄kpọ oro ẹkpepde ekemede ndinyene ufọn nnọ eyen ukpepn̄kpọ m̀mê nte enye ekemede ndibuana se enye ekpepde ye mbon efen ekeme ndin̄wam enye ndikere nte enye ekemede ndida se enye ekpepde nnam n̄kpọ.—N̄ke 4:7.

Ti nte ke uforo oro ofụri nneme fo enyenede ọkọn̄ọ ke utịtikọ fo.