1, 2. Ntak emi esịt enemde edima ete ndikụt nte eyen esie okopde item esie, ndien nso isinam Jehovah adat esịt nte ete emi?

 ETE ada ke window ese nte ekpri eyeneren esie ebrede bọl ye mme ufan esie. Bọl mmọ odụk usụn̄ mbakara. Ọdọn̄ eyen emi ndika n̄kemen. Kiet ke otu mme ufan esie akpak enye ete efehe ekemen bọl oro edi, edi eyen oro ofụn̄ ibuot onyụn̄ ọdọhọ ete: “Ete mi ọkọdọhọ n̄kûsuwọrọ usụn̄ mbakara.” Ete esie atuak inua imam.

² Ntak emi esịt enemde ete esie? Edi koro enye ama ọdọhọ eyen esie ete okûsan̄a ikpọn̄ ọwọrọ usụn̄ mbakara. Ke ini eyen emi anamde item oro—okposụkedi emi enye mîfiọkke ke ete imọ ke ese—ete esie ọfiọk ke eyen imọ ke ekpep ndikop item, ndien ke n̄kpọ idinamke enye. Esịt adat ete oro ukem nte esidatde Ete nnyịn eke heaven, kpa Jehovah. Abasi ọfiọk ke edieke anade nnyịn ika iso inam akpanikọ inyụn̄ idu uwem ikụt utịbe utịbe ini iso oro imọ iben̄ede inịm inọ nnyịn, ke ana nnyịn ikpep ndibuọt idem ye imọ inyụn̄ ikop item imọ. (Mme N̄ke 3:5, 6) Ntak edi oro enye ọkọnọde nnyịn mfọnn̄kan andikpep.

3, 4. Didie ke Jesus ‘ekekpep n̄kopitem,’ didie ke ẹkenyụn̄ ‘ẹnam enye ọfọn ama’? Nam an̄wan̄a.

³ Bible etịn̄ n̄kpọ oro akpade owo idem aban̄a Jesus, ete: “Okposụkedi enye ekedide Eyen, enye ama ekpep n̄kopitem oto ndutụhọ oro enye okokụtde; ndien ke ẹma ẹkenam enye ọfọn ama, enye akabade edi ntak nsinsi edinyan̄a ọnọ kpukpru owo eke ẹkopde uyo esie.” (Mme Hebrew 5:8, 9) Eyen emi ama ododu ke heaven ke anana-ibat isua. Enye ama okụt ini emi Satan ye mme angel eken ẹkesọn̄de ibuot, edi akpan Abasi ikedehedei itiene mmọ isọn̄ ibuot. Ẹketịn̄ ntịn̄nnịm ikọ eke odudu spirit emi ẹban̄a enye, ẹte: “Ami n̄kọsọn̄ke ibuot.”  (Isaiah 50:5) Ndien ntak emi ẹkemede ndidọhọ ke Eyen oro okokopde item mi ke mfọnmma usụn̄ “ama ekpep n̄kopitem”? Didie ke ẹkpekeme ndinam utọ mfọnmma owo emi afiak “ọfọn ama”?

⁴ Kere ban̄a uwụtn̄kpọ emi. Owoekọn̄ enyene akan̄kan̄ emi ẹtịmde ẹdom okposụkedi emi akanam owo mîdaha enye in̄wana ekọn̄. Edi enye okpụhọ akan̄kan̄ emi ọbọ enye oro ẹma ẹkedada ẹn̄wana ekọn̄ uforo uforo, emi ẹnyụn̄ ẹdade ukwak emi etịmde ọsọn̄ idem ẹnam. Ndi se enye anamde oro iwụtke eti ibuot? Kpasụk ntre, Jesus ama okokokop item ke mfọnmma usụn̄ mbemiso enye ekedide isọn̄. Edi ke enye ama ekedi isọn̄, enye ama enen̄ede owụt ke imọ imokop item. Enye ama edisobo mme idomo oro enye mîkpokosoboke ke heaven, ndien oro ama enen̄ede odomo n̄kopitem esie, anamde etie nte ukwak oro etịmde ọsọn̄ idem.

5. Nso ikanam n̄kopitem Jesus enen̄ede edi akpan n̄kpọ, ndien nso ke idineme ke ibuot emi?

⁵ N̄kopitem ekedi akpan n̄kpọ ke utom oro Jesus ekedide ndinam ke isọn̄. Nte “akpatre Adam,” Jesus ekedi isọn̄ man edinam se akpa ete ye eka nnyịn mîkanamke—ndika iso n̄kop item Jehovah Abasi, idem ke ini idomo. (1 Corinth 15:45) Edi n̄kopitem Jesus iketiehe eto eto. Jesus ama ada ofụri esịt, ofụri ekikere, ye ofụri ukpọn̄ esie okop item. Ndien enye akanam emi ye idatesịt. Ndinam uduak Ete esie ekedi akpan n̄kpọ ọnọ enye akan udia! (John 4:34) Nso idin̄wam nnyịn ikop item nte Jesus? Ẹyak ibem iso ikere iban̄a se ikanamde Jesus okop item. Nditi emi ayanam ibiọn̄ọ idomo inyụn̄ inam uduak Abasi. Ekem iyodụn̄ọde ndusụk utịp oro ẹtode edikop item nte Christ.

6, 7. Siak ndusụk n̄kpọ oro ẹkenamde Jesus okop item.

⁶ Nti edu oro Jesus ekenyenede ke esịt esie ẹkenam enye okop item. Nte ikokụtde ke Ibuot 3, nsụhọdeidem Christ okoto esịt. Ntan̄idem isiyakke mme owo ẹkop item, edi  nsụhọdeidem esin̄wam nnyịn inyịme ndikop item Jehovah. (Exodus 5:1, 2; 1 Peter 5:5, 6) Ke adianade do, se Jesus akamade ye se enye akasuade ẹkenam enye okop item.

⁷ Ke akande kpukpru, Jesus ama ama Jehovah, Ete esie eke heaven. Iyenen̄ede ineme iban̄a ima oro ke Ibuot 13. Utọ ima oro akanam Jesus enyene mbak Abasi. Enye ama enen̄ede ama Jehovah, onyụn̄ enen̄ede eten̄e enye tutu okop ndịk ndiyat Ete esie esịt. Mbak Abasi ekedi ntak kiet oro ẹkeyerede akam Jesus. (Mme Hebrew 5:7) Mbak Jehovah edi n̄ko n̄wọrọnda n̄kpọ kiet emi idikụtde ke ukara Jesus, kpa Edidem emi edide Messiah.—Isaiah 11:3.

8, 9. Nte ẹkebemde iso ẹtịn̄, Jesus ekese didie edinen ido ye idiọkido, ndien didie ke enye okowụt emi?

⁸ Ndima Jehovah esịne ndisua se Jehovah asuade. Ke uwụtn̄kpọ, kere se ẹkebemde iso ẹtịn̄ ẹban̄a Edidem emi edide Messiah: “Afo amama edinen ido onyụn̄ asua idiọkido. Ntak  edi oro Abasi, kpa Abasi fo, adade aran idatesịt eyet fi akan mme nsan̄a fo.” (Psalm 45:7) “Mme nsan̄a” Jesus ẹkedi ndidem eken emi ẹketode ubon Edidem David. Jesus enyene ntak ndinen̄ede ndat esịt n̄kan mme nsan̄a esie ke ini ẹyetde enye aran. Ntak-a? Utịp esie enen̄ede okpon akan eke mmọ, ukara esie onyụn̄ enen̄ede enyene ufọn. Ẹnọ enye utịp emi koro ima oro enye akamade edinen ido ye usua oro enye akasuade idiọkido ẹma ẹnam enye okop item Abasi ke kpukpru n̄kpọ.

⁹ Didie ke Jesus okowụt ke imọ imama edinen ido inyụn̄ isua idiọkido? Ke uwụtn̄kpọ, Jesus akanam n̄kpọ didie ke ini mme anditiene enye ẹkenamde utom ukwọrọikọ nte enye eketemede mmọ ẹnyụn̄ ẹnyenede nti utịp? Enye ama adat esịt etieti. (Luke 10:1, 17, 21) Eketie Jesus didie ke idem ke ini mbon Jerusalem ẹkekade iso ndisọn̄ ibuot ẹnyụn̄ ẹsịnde ima ima un̄wam oro enye ọkọnọde mmọ? Enye ama atua aban̄a nsọn̄ibuot obio oro. (Luke 19:41, 42) Nti ye ndiọi n̄kpọ oro mme owo ẹkesinamde ẹma ẹsinen̄ede ẹtụk Jesus.

10. Nnyịn ikpese nti ye ndiọi edinam didie, ndien nso idin̄wam nnyịn inam oro?

¹⁰ Nditie n̄kere mban̄a nte Jesus ekesede eti ye idiọk an̄wam nnyịn idụn̄ọde se inamde ikop item Jehovah. Kpa ye oro idide mme anana-mfọnmma owo, imekeme ndinen̄ede mma nti edinam inyụn̄ inen̄ede isua ndiọi edinam. Oyom ibọn̄ akam inọ Jehovah, iben̄e enye an̄wam nnyịn ise n̄kpọ nte enye ye Eyen esie ẹsede. (Psalm 51:10) N̄ko, oyom ifep mme n̄kpọ oro ẹdinamde nnyịn ikûse n̄kpọ nte mmọ ẹsede. Nditịn̄ enyịn mmek unọ idem inemesịt ye mme nsan̄a nnyịn ẹdi akpan n̄kpọ. (Mme N̄ke 13:20; Philippi 4:8) Edieke se ikanamde Christ okop item edide se inamde nnyịn ikop item, do nnyịn idikopke item enyọn̄ enyọn̄. Nnyịn idinam se inende ke ntak oro imade ndinam ntre. Iyefep ndiọi edinam, idịghe koro ikopde ndịk ke ẹkeme ndiyarade nnyịn, edi koro isuade utọ edinam oro.

11, 12. (a) Nso iketịbe inọ Jesus ke ntọn̄ọ ntọn̄ọ utom ukwọrọikọ esie? (b) Ewe n̄kari ke Satan ekebem iso ada odomo Jesus?

¹¹ Ke ntọn̄ọ ntọn̄ọ utom ukwọrọikọ Jesus, ẹma ẹdomo enye man ẹse adan̄a nte enye asuade idiọkn̄kpọ. Ke enye ama akana baptism, enye ama odu okoneyo 40 ye uwemeyo 40 ke wilderness idiaha n̄kpọ. Ekem, Satan ama edi edidomo enye. Se nte Devil akakaride n̄kari.—Matthew 4:1-11.

¹² Satan ekebem iso ọdọhọ enye ete: “Edieke afo edide eyen Abasi, dọhọ mme itiat emi ẹkabade mme ebok uyo.” (Matthew 4:3) Eketie Jesus didie ke idem ke enye ama eketre udia ebịghi ntre? Bible etịn̄ in̄wan̄-in̄wan̄ ete ke ‘biọn̄ ama ọdọn̄ enye.’ (Matthew 4:2) Satan ama ada ndammana udọn̄ ndidia udia odomo enye, okokoi etie ebet ini oro idem edimemde Jesus. Se n̄ko nte Satan akamiade ata ye Jesus ke ndidọhọ: “Edieke afo edide eyen Abasi.” Satan ama ọfiọk ke Jesus edi “akpan ke otu kpukpru edibotn̄kpọ.” (Colossae 1:15) Kpa ye oro, Jesus ikayakke Satan anam enye ayat esịt ọsọn̄ ibuot ye Abasi. Jesus ama ọfiọk ke Abasi ikoyomke imọ ida odudu imọ inam n̄kpọ inọ idem imọ. Enye ikanamke se Satan okoyomde, ke ntem owụtde ke imọ imosụhọde idem inyụn̄ inịm ke Jehovah ọyọnọ imọ udia ye ndausụn̄.—Matthew 4:4.

13-15. (a) Siak ọyọhọ idomo iba ye ita oro Satan okodomode Jesus, ndien nso ke Jesus akanam? (b) Nnyịn isan̄a didie ifiọk ke Jesus ama enen̄ede ekpeme idem ye Satan?

¹³ Ke ọyọhọ idomo iba, Satan ama ada Jesus aka n̄kokon̄ ebiet ke enyọn̄ ibibene temple. Satan ama ada n̄kari oyụrọde Ikọ Abasi odomo ndinam Jesus anam ndyọ ndyọ n̄kpọ osio idemesie ọduọk ke isọn̄, ọdọhọde ke mme angel idiyakke n̄kpọ anam enye. Edieke otuowo ke temple ẹkpekụtde utọ utịben̄kpọ oro, ndi owo ndomokiet ekpededei afan̄a ke Jesus idịghe Messiah oro ẹken̄wọn̄ọde? Ndien edieke otuowo ẹkpenyịmede Jesus nte Messiah ke ntak utọ ndyọ ndyọ n̄kpọ oro, ndi emi ikpanamke Jesus ọbọhọ ekese afanikọn̄? Ekeme ndidi akpanam. Edi Jesus ama ọfiọk ke Jehovah okoyom Messiah osụhọde idem anam utom esie, idịghe ndinam ndyọ ndyọ  n̄kpọ man mme owo ẹnịm enye ke akpanikọ. (Isaiah 42:1, 2) Isan̄ emi n̄ko, Jesus ama esịn ndisọn̄ ibuot ye Jehovah. Uwọrọetop ikọdọn̄ke enye.

¹⁴ Edi nso kaban̄a etabi edinyene odudu ukara? Ke ọyọhọ idomo ita, Satan ama enyịme ndinọ Jesus kpukpru mme obio ubọn̄ ererimbot emi edieke Jesus atuakde ibuot ọnọ Satan ini kiet kpọt. Ndi enye ama enen̄ede ekere aban̄a enọ Satan? Enye ọkọdọhọ ete: “Daha mi, Satan!” onyụn̄ adian do ete: “Koro ẹwet ẹte, ‘Edi Jehovah Abasi fo ke ana afo atuak ibuot ọnọ, onyụn̄ edi enye ikpọn̄ ke ana afo anam edisana utom ọnọ.’ ” (Matthew 4:10) Idụhe se ikpanamde Jesus atuak ibuot ọnọ abasi en̄wen. Idụhe odudu ukara m̀mê uwọrọetop ererimbot emi, oro ẹkemede ndida ntap enye nnam ọsọn̄ ibuot ye Jehovah.

¹⁵ Ndi Satan ama akpa mba? Enye ama adaha nte Jesus okowụkde enye. Nte ededi, Gospel Luke ọdọhọ ke Devil ama “adaha ọkpọn̄ enye tutu ifet afiak eberede.” (Luke 4:13) Ke akpanikọ, Satan okosụk oyoyom mme ifet en̄wen ndidomo Jesus nsịm utịt. Bible asian nnyịn ke ‘ẹma ẹdomo Jesus ẹse ke kpukpru usụn̄.’ (Mme Hebrew 4:15) Ntre Jesus ama enen̄ede ekpeme idem ye Satan; nnyịn ikponyụn̄ ikpeme ntre.

16. Didie ke Satan odomo mme asan̄autom Abasi mfịn, ndien didie ke nnyịn ikeme ndibiọn̄ọ mme ukeme esie?

¹⁶ Satan aka iso ndidomo mme asan̄autom Abasi mfịn. Ke mfụhọ, unana mfọnmma nnyịn esiwak ndinam iduọ idụk idomo esie. Satan esida n̄kari odomo ndinam nnyịn idu uwem ibụk, itan̄ idem, inyụn̄ idiọk itọn̄ iyom odudu. Satan akam ekeme ndida uma-inyene nnam owo enyene ndiọi edu mbita emi! Oyom isisụhọde itie ndusụk ini idụn̄ọde idem nnyịn. Ọyọfọn itie ikere se idude ke 1 John 2:15-17. Nte inamde emi, imekeme ndibụp idem nnyịn m̀mê mme udọn̄ obụkidem eke editịm n̄kpọ emi, udọn̄ edinyene inyene, ye udọn̄ edinem mbon en̄wen esịt ẹnam nnyịn ikûma Ete nnyịn eke heaven nte ikesimade. Oyom iti ke ererimbot emi ye andikara esie, Satan, ẹmọn̄ ẹbebe ẹfep. Ẹyak ibiọn̄ọ n̄kari n̄kari  ukeme oro enye esịnde nditap nnyịn inam idiọkn̄kpọ! Uwụtn̄kpọ Eteufọk nnyịn akpakam ọsọn̄ọ nnyịn idem, koro “enye ikanamke idiọkn̄kpọ.”—1 Peter 2:22.

17. Didie ke Jesus akada edikop item nnọ Ete esie, edi nso ke ndusụk owo ẹkeme ndidọhọ?

¹⁷ N̄kopitem abuana se ikande editre ndinam idiọkn̄kpọ; Christ ama esịn idem anam kpukpru ewụhọ Ete esie. Enye ọkọdọhọ ete: “[Nnam] n̄kpọ eke enemde enye esịt kpukpru ini.” (John 8:29) Jesus ndikokop item ntem ama anam enye enen̄ede okop idatesịt. Edi, ndusụk owo ẹkeme ndidọhọ ke ikọsọn̄ke Jesus ndikop item. Mmọ ẹkeme ndikere ke enye ekenyene ndikop item nnọ Jehovah kpọt, kpa mfọnmma owo, ke adan̄aemi nnyịn inyenede ndikop item nnọ mme anana-mfọnmma owo emi ẹkamade ukara. Edi, se idude edi ke Jesus ama esikop item ọnọ mme anana-mfọnmma owo emi ẹkekamade ukara.

18. Nso uwụtn̄kpọ n̄kopitem ke Jesus ekenịm nte enye okosụk ọkọride?

¹⁸ Nte Jesus okosụk ọkọride, enye okodu ke idak Joseph ye Mary, kpa mme anana-mfọnmma ete ye eka esie. Anaedi enye ama esikụt mme ndudue ete ye eka esie akan nte ata ediwak nditọ ẹkpekụtde. Ndi enye ama ọsọn̄ ibuot, etre ndisụk ibuot nnọ mmọ nte Abasi etemede, onyụn̄ asian mmọ nte ẹkpesede ẹban̄a ubon? Kop se Luke 2:51 etịn̄de mi aban̄a Jesus, ke ini enye ekedide isua 12: “Enye . . . aka iso osụk ibuot ọnọ mmọ.” Ke ndikosụk ibuot ntem, enye ama enịm ata eti uwụtn̄kpọ ọnọ mme uyen Christian, emi ẹdomode ndikop uyo mme ete ye eka mmọ nnyụn̄ nnen̄ede n̄kpono mmọ.—Ephesus 6:1, 2.

19, 20. (a) Mme n̄kpọ-ata ewe oro ẹban̄ade edikop item nnọ mme anana-mfọnmma owo ke Jesus okosobo? (b) Ntak emi ata mme Christian mfịn ẹkpekopde item mbon oro ẹdade usụn̄ ke otu mmọ?

¹⁹ Ke se iban̄ade edikop item mme anana-mfọnmma owo, Jesus ama osobo mme n̄kpọ-ata oro ata mme Christian mfịn  mîdisoboke. Kere ban̄a nte n̄kpọ eketiede ke ini oro enye okodude uwem. Jehovah ama enyịme Ido Ukpono Mme Jew, esịnede temple esie ke Jerusalem ye itie oku, ke anyan ini. Edi nte ini akakade, enye ama esịn ido ukpono oro onyụn̄ akabade emek esop Christian. (Matthew 23:33-38) Kan̄a ke emi, ediwak mme adaiso ido ukpono ke ẹkekpep mme owo nsunsu ukpepn̄kpọ akwaifiọk Greece. Udia n̄wo ekedi ọsọ n̄kpọ ke temple tutu Jesus okot enye “itie udịbe mbon n̄wo.” (Mark 11:17) Ndi Jesus ama etre ndisika temple ye mme synagogue? Baba! Jehovah ke okosụk adada mme ebiet emi anam n̄kpọ. N̄kopitem ama anam Jesus esika mme usọrọ ke temple onyụn̄ esika synagogue tutu Abasi okpụhọde mme n̄kpọ.—Luke 4:16; John 5:1.

²⁰ Edieke Jesus okokopde item ke mme utọ idaha oro, akpana ata mme Christian ẹka iso ẹkop item mfịn. Kamse, nnyịn idu uwem ke ini oro enen̄erede okpụhọde, ini emi ẹma ẹkefiak ẹtọn̄ọ edisana utuakibuot nte ẹma ẹketetịn̄ anyan ini ko. Abasi ọn̄wọn̄ọ ọnọ nnyịn ke imọ idiyakke Satan abiat ikọt imọ oro ifiakde itan̄ ibok. (Isaiah 2:1, 2; 54:17) Edi akpanikọ ke imesikụt idiọkn̄kpọ ye unana mfọnmma ke esop Christian. Edi ndi akpana iyak unana mfọnmma mbon en̄wen  anam nnyịn isọn̄ ibuot ye Jehovah, inyụn̄ itre mbono esop Christian m̀mê ikụt ndudue inọ mbiowo? N̄wan̄ansa-o! Utu ke oro, nnyịn imadat esịt ndinọ mbon oro ẹdade usụn̄ ke esop ibetedem. N̄kopitem esinam nnyịn idụk mme mbono esop Christian ye mme mbono, inyụn̄ ida item N̄wed Abasi oro ibọde do isịn ke edinam.—Mme Hebrew 10:24, 25; 13:17.

21. Jesus akanam n̄kpọ didie ke ini ẹkedomode ndinam enye ọsọn̄ ibuot ye Abasi, ndien nso ke emi ekpep nnyịn?

²¹ Jesus ikedehedei iyak mme owo, idem mme ufan oro ẹkeyomde ufọn esie, ẹkpan enye ndikop uyo Jehovah. Ke uwụtn̄kpọ, apostle Peter ama odomo ndinam Jesus Eteufọk esie enịm ke ikoyomke enye okụt ndutụhọ onyụn̄ akpa. Jesus ama enen̄ede esịn item oro Peter ọkọnọde enye ete atua idemesie mbọm, koro ekedi idiọk item. (Matthew 16:21-23) Mfịn, mme anditiene Jesus ẹsifiọk nte ẹnamde n̄kpọ ye mme iman oro ẹyomde ufọn mmọ, edi emi ẹkemede ndidomo ndinam mmọ ẹkûnịm ibet ye mme edumbet Abasi. Ukem nte mme anditiene Jesus ke eyo mme apostle, nnyịn ibiere “ndikop uyo Abasi nte andikara utu ke uyo owo.”—Utom 5:29.

22. Ewe mbụme ke Jesus ọkọbọrọ, ndien didie?

²² Ẹma ẹnen̄ede ẹdomo n̄kopitem Jesus ke ini ẹkeyomde ndiwot enye. Ke usen mfụhọ oro, “enye ama ekpep n̄kopitem” ke akakan usụn̄. Enye akanam uduak Ete esie, idịghe eke idemesie. (Luke 22:42) Ke ndikanam emi, enye ama enịm mfọnmma uwụtn̄kpọ nsọn̄ọnda. (1 Timothy 3:16) Enye ama ọbọrọ mbụme oro ẹkebụpde ata anyan ini ko: Ndi mfọnmma owo ekeme ndisọn̄ọ nda n̄kop item Jehovah idem ke ini idomo? Adam ye Eve ẹma ẹkpu ndinam emi. Edi Jesus ama edidu uwem ke isọn̄, akpa, onyụn̄ owụt ke mfọnmma owo ekeme. Akakan ke otu kpukpru se Jehovah okobotde ama owụt ke mfọnmma owo ekeme ndikop item Jehovah ke ini idomo. Enye ama okop item idem ke ini n̄kopitem ekenen̄erede akpa enye n̄kpọ.

23-25. (a) Nso ebuana ke n̄kopitem enyene ye nsọn̄ọnda? Nam an̄wan̄a. (b) Nso ke idineme ke ibuot en̄wen?

 ²³ Ndikop item owụt ke imọsọn̄ọ ida ye Jehovah m̀mê ke ituak ibuot inọ enye ke ofụri ukpọn̄. Ke ntak emi Jesus okokopde item, enye ama ọsọn̄ọ ada onyụn̄ anam ofụri ubonowo ẹbọ ufọn. (Rome 5:19) Jehovah ama enen̄ede ọdiọn̄ Jesus. Edieke ikopde uyo Christ, kpa Eteufọk nnyịn, Jehovah ọyọdiọn̄ nnyịn n̄ko. Ndikop uyo Christ ada esịm “nsinsi edinyan̄a”!—Mme Hebrew 5:9.

²⁴ Ke adianade do, nsọn̄ọnda ke idem esiemmọ edi edidiọn̄. Mme N̄ke 10:9 ọdọhọ ete: “Owo eke asan̄ade ke nsọn̄ọnda ayasan̄a ke ifụre.” Edieke ẹmende nsọn̄ọnda ẹdomo ye akwa ufọk oro ẹdade eti kọrikọri ẹbọp, do ẹkeme ndimen ini kiet kiet oro owo okopde item ndomo ye kọrikọri kiet kiet. Ekeme nditie nte ke kọrikọri kiet kpọt idịghe akpan n̄kpọ, edi mmọ kiet kiet ẹnyene ufọn. Ndien ke ini ẹtan̄de ediwak mmọ ẹkọk, ediye ufọk esiwọrọ ada. Ke ini ẹtan̄de kpukpru item oro isikopde ẹdian ọtọkiet, ẹda kiet ẹdian ye eken, ke usen ke usen, ke isua ke isua, nsọn̄ọnda nnyịn editie nte ediye ufọk emi ẹdade kọrikọri kiet kiet ẹbọp.

²⁵ Ndika iso n̄kop item ke anyan ini anam nnyịn iti edu en̄wen, oro edi, ukeme ediyọ. Iyeneme uwụtn̄kpọ oro Jesus ekenịmde ke afan̄ emi ke ibuot en̄wen.