Ibuot 7

Ndi Mmeben̄e Idem Ndikpọn̄ Ufọk?

“Ndusụk ini nsikere ke ẹda mi nte eyenọwọn̄ sia nsụk ndụn̄de ye ete ye eka mi okposụkedi emi mma n̄kọyọhọ isua 19; esitie nte n̄kpọ eke ẹdọhọde ke ndidịghe akwa owo ibọhọke n̄kpọn̄ ufọk n̄kodụn̄ ikpọn̄.”—Katie.

“Mmekpere ndiyọhọ isua 20, edi n̄kemeke ndidu uwem mi nte mmade sia nsụk ndụn̄de ye ete ye eka mi. Mmebiere ndikpọn̄ ufọk ndien.”—Fiona.

ANYAN ini mbemiso eben̄ede idem ndikpọn̄ ufọk, ekeme nditọn̄ọ ndidọn̄ fi ndidu uwem nte amade. Oro idiọkke. Kamse, nte ikenemede ke Ibuọt 3, akpa uduak Abasi ekedi mme uyen ndikpon n̄kabade ikpọ owo nnyụn̄ n̄kpọn̄ ete ye eka mmọ n̄kọtọn̄ọ ubon idemmọ. (Genesis 2:23, 24; Mark 10:7, 8) Edi akpanam didie ọfiọk m̀mê emeben̄e idem ndikpọn̄ ufọk? Kere ban̄a akpan mbụme ita emi anade ọbọrọ kan̄a. Akpa edi . . .

 Nsinam Nyom Ndikpọn̄ Ufọk?

Se se ẹwetde ke idak emi. Wet 1 esịm 8 kpere ntak oro anamde oyom ndikpọn̄ ufọk. Tọn̄ọ ke enye oro adade nte ata akpan ntak.

․․․․․ Nyom ndibọhọ mfịna

․․․․․ Nyom ndinen̄ede nnyene ifụre

․․․․․ Nyom mme ufan mi ẹkpono mi

․․․․․ Nyom ndikodu ye ufan mi emi oyomde owo ndida ndụn̄ ufọk

․․․․․ Nyom ndikanam utom unyịmesịt ke ebiet en̄wen

․․․․․ Nyom ndikpep nte n̄kemede ndidụn̄ ikpọn̄

․․․․․ Nyomke ete ye eka mi ẹbiat okụk aba ke ibuot mi

․․․․․ N̄kpọ en̄wen ․․․․․

Ẹkeme ndidọhọ ke ntak oro ẹnọde mi idiọkke. Akpan n̄kpọ oro ekpekerede aban̄a edi, Nsinam oyom ndikpọn̄ ufọk? Ke uwụtn̄kpọ, edieke oyomde ndikpọn̄ ufọk man enen̄ede enyene ifụre, ekeme ndidi se edikade okokụt ididịghe se ekekerede.

Danielle emi ọkọkpọn̄de ufọk esisịt ke ini enye ekedide isua 20 ama ekpep ekese n̄kpọ oto oro. N̄kaiferi emi ọdọhọ ete: “Idụhe ini emi owo enyenede ifụre ofụri ofụri. Ke ini odude ke idemfo, utom m̀mê unana okụk ekeme ndikpan fi ndusụk n̄kpọ oro akpamade ndinam.” Carmen, kpa n̄kaiferi emi ọkọkpọn̄de ufọk okodu ke esenidụt ke ọfiọn̄ itiokiet ọdọhọ ete: “Ama enem mi ke idem, edi n̄kesinyeneke ini nduọk odudu! N̄kesinyene ndinam utom ke ufọk—nnam ufọk asana, ndiọn̄ mme n̄kpọ oro ẹbiarade, nsion̄o mbiet ke flawa, nyet ọfọn̄, nsọk isọn̄, nnyụn̄ nnam mme n̄kpọ eken.”

Kûyak mbon en̄wen ẹnam fi ọkpọn̄ ufọk. (Mme N̄ke 29:20) Idem edieke enyenede nti ntak oro ẹnamde oyom ndikpọn̄ ufọk, fiọk ke oyoyom anam mme n̄kpọ en̄wen. Oyoyom ọfiọk nte ekpesede aban̄a idemfo, ndien oro edemede ọyọhọ mbụme iba . . .

Ndi Mmeben̄e Idem?

Ndikpọn̄ ufọk n̄kodụn̄ ikpọn̄ etie nte ndinam anyan isan̄ ke  wilderness. Ndi akpama ndika isan̄ ke ebiet oro mme owo mîdụn̄ke ke adan̄aemi mûfiọkke nte ẹtuakde tent, ẹbarade ikan̄, ẹtemde udia, m̀mê nte ẹkotde n̄wed ndise obio? Etie nte ukpamaha! Edi ediwak uyen oro ẹsikpọn̄de ufọk ẹkedụn̄ ikpọn̄ isifiọkke nte ẹsede ẹban̄a ufọk.

Enyene-ọniọn̄ Edidem Solomon ọkọdọhọ ke “owo mbufiọk [esikekere] ikpatisan̄ esie.” (Mme N̄ke 14:15) Kere ban̄a mme n̄kpọ oro ẹnemede mi man ọfiọk m̀mê emeben̄e idem ndikpọn̄ ufọk n̄kodụn̄ ikpọn̄. Sịn idiọn̄ọ emi ✔ ke mme n̄kpọ oro ọdiọn̄ọde ndinam idahaemi, nyụn̄ sịn idiọn̄ọ emi X ke mme n̄kpọ oro akpanade ekpep.

□ Okụk oro edidade ese aban̄a idemfo: Serena ọdọhọ ete: “Akananam ndaha okụk idemmi ndep n̄kpọ. Ndịk esinam mi ndikpọn̄ ufọk n̄kọtọn̄ọ ndifam okụk nnịm.” Didie ke ekeme ndikpep ndida okụk fo nse mban̄a idemfo?

N̄ke kiet ke Bible ọdọhọ ete: “Owo ọniọn̄ ayakpan̄ utọn̄ onyụn̄ aka iso ọbọ item.” (Mme N̄ke 1:5) Bụp ete ye eka fo m̀mê okụk ifan̄ ke owo ekeme ndibiat kpukpru urua nda n̄kpe okụk ufọk, ndep udia, nnyụn̄ nse mban̄a ubomisọn̄ m̀mê ndida n̄kpe usụn̄. Ekem dọhọ mmọ ẹteme fi nte ekemede ndifam okụk fo nnịm man ada ekpe mme isọn oro akamade. a

 □ Mme utom ufọk: Brian emi edide isua 17 ọdọhọ ke se inamde imọ inen̄ede ifehe ndikpọn̄ ufọk edi ndisiyet ọfọn̄ imọ. Akpanam didie ọfiọk m̀mê emekeme ndise mban̄a idemfo? Aron emi edide isua 20 ọnọ ekikere emi ete: “Da urua kiet nam nte odụn̄ ikpọn̄. Dia n̄kukụre se etemde, emi akade urua ekedep, onyụn̄ adade okụk fo edep. Sịne ọfọn̄ emi eyetde ke idemfo onyụn̄ ọkwọhọrede ikpọn̄. Nam kpukpru n̄kpọ ẹsana ke ufọk ke idemfo. Da okụk idemfo kpe usụn̄ ka ebiet ekededi oro oyomde, kûyom un̄wam ete ye eka fo.” Edieke anamde se Aron etemede mi, ọyọbọ ufọn iba: (1) Eyekpep ekese n̄kpọ oro ẹdinyenede ufọn ọnọ fi, oyonyụn̄ (2) enen̄ede owụt esịtekọm ke se ete ye eka fo ẹnamde ẹnọ fi.

□ Nte okpodude uwem ye mbon en̄wen: Ndi omodu ke emem ye ete ye eka fo ọkọrọ ye kpukpru nditọuka? Edieke mûdụhe, emekeme ndikere ke uwem eyenem ima iwọrọ ikodụn̄ ye ufan imọ. Edi kop se Eve emi edide isua 18 etịn̄de mi: “Ufan mi iba ẹma ẹwọrọ ẹkedụn̄ kiet. Mbemiso ini emi, mmọ ẹkedi itai ye aban̄, edi mmọ ikekemeke ndidụn̄ kiet mbịghi. Kiet ama esisana idem etieti, edi enye eken ekedi ekpe mbat. Kiet ama enen̄ede ama n̄kpọ Abasi, edi enye eken ikenen̄ekede ima. Ikedịghe nte mmọ ẹkekerede!”

Nso ke akpanam? Erin, n̄kaiferi  emi edide isua 18 ọdọhọ ete: “Emekeme ndinen̄ede n̄kpep ndidu ke emem ye nsio nsio owo ke ini odụn̄de ye ete ye eka fo. Eyekpep ndibiere mfịna nnyụn̄ nnyịme ndusụk n̄kpọ ẹtak fi. N̄kpọ kiet emi n̄kụtde edi ke mbon emi ẹsikpọn̄de ufọk ke ntak oro mîyomke ndifan̄a n̄kpọ ye ete ye eka mmọ ẹkpep ndifefehe n̄kpọn̄ mfịna utu ke ndibebiere mmọ.”

□ Mme n̄kpọ eke spirit: Ndusụk owo ẹsikpọn̄ ufọk akpan akpan mbak ẹditiene ete ye eka mmọ ẹkpono Abasi. Mbon en̄wen ẹsinen̄ede ẹbiere ke iyaka iso ikpep Bible inyụn̄ ika iso ke utuakibuot mmimọ, edi ke mîbịghike mmọ ẹsiwaha ẹdụk idiọk usụn̄. Nso ke akpanam mbak ‘mbuọtidem fo ediwụre nte nsụn̄ikan̄’? b—1 Timothy 1:19.

Jehovah Abasi oyom kpukpru nnyịn idomo ifiọk m̀mê se inịmde edi akpanikọ. (Rome 12:1, 2) Nam eti ndutịm ban̄a edikpep Bible ye utuakibuot nyụn̄ tiene ndutịm emi ketket. Wewet mme n̄kpọ eke spirit oro odiomide ndinam ke n̄wed usenọfiọn̄ nyụn̄ domo nditiene n̄wed ndutịm emi ke ọfiọn̄ kiet, edi kûbet ete ye eka ẹnyenyịk fi anam mme n̄kpọ emi.

Akpatre ke otu mbụme ita oro anade ọbọrọ edi . . .

Nso ke Nyom Ndikpọn̄ Ufọk N̄kanam?

Ndi oyom ndikpọn̄ ufọk man ọbọhọ mfịna? Mîdịghe, ndi oyom ndikpọn̄ man ọwọrọ ke idak ete ye eka fo? Edieke  oyomde ndikpọn̄ ke ntak emi, ọwọrọ ekikere fo enen̄ede owụhọ ke se ọkpọn̄de, iwụhọke ke se edisobode. Oro ekpetie nte ndiwụk enyịn nse ukụtiso esịt ubomisọn̄—se ebede ọkpọn̄ ekeme ndida ntịn̄enyịn fo tutu usehe aba se idude ke iso. Nso ke ekeme ndikpep nto emi? Kûkere ndiwọrọ n̄kpọn̄ ufọk kpọt—kere n̄ko ban̄a se ọwọrọde aka ndinam.

Ndusụk n̄kparawa owo emi ẹdide Mme Ntiense Jehovah ẹsikpọn̄ ufọk ẹkekwọrọ ikọ ke ebiet en̄wen ke idụt mmọ m̀mê ke esenidụt. Mbon en̄wen ẹsikpọn̄ ufọk ẹken̄wam ẹbọp mme itie utuakibuot mîdịghe ẹkenam utom ke kiet ke otu n̄kọk itieutom Mme Ntiense Jehovah. Edi ndusụk ẹkere ke akpana idụn̄ kan̄a ke idem mmimọ mbemiso idọde ndọ. c

Nen̄ede tie kere se ededi oro aduakde ndinam. N̄ke kiet ke Bible ọdọhọ ete: “N̄kọkibuot owo nsịnifịk itreke ndinyene ufọn, edi kpukpru owo eke ẹnamde n̄kpọ ke ibụmede iditreke ndidu ke unana.” (Mme N̄ke 21:5) Kop se ete ye eka fo ẹtịn̄de. (Mme N̄ke 23:22) Bọn̄ akam ban̄a n̄kpọ emi. Ndien kere ban̄a mme edumbet Bible oro ẹnemede mi nte osụk anamde ubiere fo.

Akpan mbụme oro okpobụpde idemfo ikpedịghe, Ndi mmeben̄e idem ndikpọn̄ ufọk? akpakam edi, Ndi mmeben̄e idem ndise mban̄a ufọk mi? Edieke ibọrọ fo ke udiana mbụme emi edide ih, ọwọrọ emekeme ndikpọn̄ ufọk mbufo n̄kodụn̄ ikpọn̄.

[Mme Ikọ Idakisọn̄]

AKPAN ITIE N̄WED ABASI

“Erenowo ọyọkpọn̄ ete ye eka esie.” —Matthew 19:5.

ITEM

Ke ndusụk ini, nọ ete ye eka fo okụk oro akpadade edep udia, ekpe ufọk, onyụn̄ anam mme n̄kpọ eken ọnọ idemfo. Edieke mûkemeke mîdịghe edieke mûmaha ndibiat okụt nse mban̄a idemfo ke ini odụn̄de ye ete ye eka fo, ọwọrọ uben̄eke idem ndiwọrọ n̄kodụn̄ ikpọn̄.

NDI AMA ỌFIỌK  . . . ?

Se inamde oyom ndikpọn̄ ufọk ekeme ndibiere adan̄a nte edikopde inemesịt ke ama ọkọkpọn̄ ufọk.

SE NDINAMDE

Se n̄kpamade ndinam mma n̄kpọn̄ ufọk edi ․․․․․

Se ndibụpde ete ye eka mi mban̄a n̄kpọ emi edi ․․․․․

AFO EKERE DIDIE?

● Idem edieke n̄kpọ ọsọn̄de ye ubon mbufo, nso ufọn ke edibọ edieke akade iso odụn̄ ke ufọk?

● Nso ke ekeme ndinam ke adan̄aemi osụk odụn̄de ke ufọk mbufo, emi edinyenede ufọn ọnọ ubon mbufo onyụn̄ anam eben̄e idem ndise mban̄a ubon fo?

[Se ẹwetde ke ikpọ abisi ke page 52]

“Edi ndammana n̄kpọ ndiyom ndiwọrọ ke idak owo. Edi edieke oyomde ndikpọn̄ ufọk man owo edikpan fi ndusụk n̄kpọ oro akpamade ndinam, oro owụt ke uben̄eke idem ndikpọn̄ ufọk.”​—Aron

[Ndise ke page 50, 51]

Ndikpọn̄ ufọk n̄kodụn̄ ikpọn̄ etie nte ndinam anyan isan̄ ke wilderness—oyom ekpep se idin̄wamde fi ke ini anamde orụk isan̄ oro